بۆ خوجهبوونا وان ل كوردستانێ عه‌ره‌ب ناسنامه‌یێن خوه دگوهۆرن
ئه‌ڤرۆ نیوز،زنار تۆڤى:
بۆ وێ چه‌ندێ كو عه‌ره‌ب ل كوردستانێ خۆجهـ ببن ناسنامه‌یێن خوه دكه‌نه كوردى و په‌رله‌مانتاره‌كێ كوردستانێ ژى مه‌ترسیا بریاره‌كا وه‌زاره‌تا نافخۆیا عێراقێ ئاشكه‌رادكه‌ت. بێستوون فایه‌ق په‌رله‌مانتاره‌كێ كوردستانێ یه ژ بزاڤا گۆران دبێژیت:وه‌زاره‌تا نافخۆیا عێراقێ ل بارێ ڤه‌گۆهاستنا ناسنامه‌یا وه‌لاتیان بریاردایه و ل دووڤ وێ بریارێ،هه‌مى وه‌لاتیێن عێراقێ د ئازادن ناسنامه‌یێن خوه ژ پارێزگه‌هه‌كێ بۆ ئێكا دى كو هه‌رێما كوردستانێ ژى ڤه‌دگریت ڤه‌گۆهێزیت، ئه‌ڤه‌ژى مه‌ترسیێ ل سه‌ر ئاسایش و دیمۆگرافیا هه‌رێما كوردستانێ دروستدكه‌ت، ب ڤێ چه‌ندێ گه‌له‌ك عه‌ره‌ب دشێن ناسنامه‌یێن خوه بۆ سه‌ر هه‌رێما كوردستانێ و كه‌ركووك و ده‌ڤه‌رێن كوردستانێ یێن ده‌رڤه‌ى ئیدارا هه‌رێمێ ڤه‌گۆهێزن.
هه‌روه‌سا دبێژیت:من دگه‌ل وه‌زیرێ نافخۆیێ هه‌رێمێ ئاخفتیه و من گۆتیێ كو ڤێ بریارا وه‌زاره‌تا نافخۆیا عێراقێ ده‌رباره‌ى پارێزگه‌هێن هه‌رێمێ (هه‌ولێر،دهۆك،سلێمانى،هه‌له‌بچه) بهێته راگرتن و كار پێنه‌هێته‌كرن، چونكى ئه‌ڤه دێ مه‌ترسیێ ل سه‌ر داهاتى و دیمۆگرافیا هه‌رێما كوردستانێ دروستكه‌ت.
وى په‌رله‌مانتارى گوتیه ژى:به‌رى چه‌ند هه‌یڤان من سه‌ره‌دانا قه‌زا خانه‌قینێ كریه و ژ نێزیك من دیتیه،كو چاوا هۆزێن ناسیار یێن عه‌ره‌ب ل پارێزگه‌ها دیالا ناسنامه‌یێن خوه دكه‌نه كوردى،بۆ هندێ داكو ب ساناهى هاتنوچوونێ ل باژێرێن كوردستانێ بكه‌ن و تێدا خۆجهـ ببن و بشێن بساناهى مۆلك و مالى و ترۆمبێلان بۆ خوه بكرن.
ئه‌ڤ بریارا حوكمه‌تا عێراقێ ژلایێ وه‌زیرێ هه‌رێمێ بَو كاروبارێ ده‌ڤه‌رێن كوردستانى یێن ده‌ڤه‌ى ئیدارا هه‌رێما كوردستانێ ژى ته‌عریبه‌كا نوویه.
نه‌سره‌دین سندى وه‌زیرێ نافچه‌یێن كوردستانى یێن ده‌رڤه‌ى ئیدارا هه‌رێمێ دبێژیت:به‌غدا ب رێكێن جودا دڤێت رێكێ ل ڤه‌گه‌راندنا نافچه‌یێن كوردستانى بۆ سه‌ر هه‌رێما كوردستانێ بگریت،ئه‌ڤ بریارا حوكمه‌تا عێراقێ ژى ته‌عریبه‌كا نوویه.
نه‌سره‌دینى گوت ژى:ئه‌ڤا نوكه به‌حس لێ دهێته‌كرن بتایبه‌تى ل باژێرێ كه‌ركووكێ جهێ قه‌بۆلكرنێ نینه و پێدڤیه هه‌رێما كوردستانێ هه‌لویستى وه‌ربگریت و رێكێ ل جێبه‌جێكرنا ڤێ بریارێ بگریت.