ل دۆر برینداربوونا برایێ خوه ل قه‌ندیلى، ده‌میرتاش هاته ده‌نگ
ئه‌ڤرۆ نیوز،زنار تۆڤى:
هه‌ڤسه‌رۆكێ هه‌ده‌پێ رادگه‌هینیت:پلانه‌ك بۆ داخستنا پارتیا وان ل توركیا برێڤه‌دچیت و ژلایێ راوێژكاره‌كێ ئه‌ردوگانى سه‌رۆكایه‌تى لێ دهێته‌كرن،ره‌تكر ژى كو برایه‌كێ وى د بوردۆمانكرنا فرۆكێن توركى دا ل قه‌ندیلى بریندار ببیت،سه‌لاحه‌دین ده‌میرتاش هه‌ڤسه‌رۆكى هه‌ده‌پێ د كونفرانسه‌كێ رۆژنامه‌ڤانى دا ل ئه‌نقه‌رێ راگه‌هاند:هه‌وله‌ك درێدایه بۆ هندێ كو پارتیا دیموكراتا گه‌لان(هه‌ده‌په) بهێته داخستن، ئه‌گه‌ر ب وان بیت به‌ر ل دوماهیا ئه‌ڤ ساله دێ دائێخن بۆ هندێ به‌ربه‌ستێن زێده‌تر بۆ ئه‌ردوگانى سه‌رۆك كۆمارى و پارتا وى درۆست نه‌كه‌ت.
ده‌میرتاشى گۆت ژى: ئه‌و پلانه ژلایێ ئێك ژ راوێژكارێن ئه‌ردوگانى ڤه دهێته برێڤه‌برن بناڤێ بورهان كوزو كو به‌رى نوكه بۆ ماوێ سێ خۆلان ئه‌ندامێ په‌رله‌مانێ توركیا بوویه،د یاسایا ده‌ستۆرى دا شاره‌زایى هه‌یه.
ده‌میرتاشى ئاماژه ب هندێ ژى دا:هه‌ده‌په د هه‌لبژارتنێن پێشوه‌خت دا ناترسیت،چونكى رۆژ ب رۆژ،پارتیا وان گه‌شه‌یا زێده‌تر دكه‌ت.
سه‌باره‌ت به‌لاڤبوونا ده‌نگۆیێ برینداربوونا نوره‌دین ده‌میرتاش برایێ مه‌زنێ سه‌لاحه‌دین ده‌میرتاشى ل قه‌ندیلى،ده‌میرتاشى گۆت:برایێ من ل قه‌ندیل نینه،به‌لكو برایێ من ل سه‌نگه‌رێن به‌ره‌ڤانیێ یه دژى داعش و به‌رگریێ ژ ملله‌تێ خوه دکەت.