بازرگانەک: هه‌كه لایەنێن سیاسی رێکەڤن دێ بازاڕ باشتربیت
ئەڤرۆ نیوز:
بازرگانێن ئەردو خانیان ئیماژە بڤێ چەندێ دکەن، پشتی ھاتنا قەیرانا دارایی و ئەڤێ رەوشا نوکە ھەرێما کوردستانێ ڤەگرتی، بھایێ ئەردو خانیان بشێوەیەکێ بەرچاڤ نزمبوویە و کڕیار نەماینە ل بازاڕێ، مامۆستایەکێ زانکۆیێ ژی ئاشکراکر، ئەگەر رەوشیا سیاسیا ھەرێمێ بەرەف باشیێ بچیت دێ جارەکادی بازاڕ گەرمبیت، بەلێ بازاڕێ بەرێ نابیت.
شیمال عەبدولا، خوەدیێ کۆمپانیا پەلتین بۆ بازرگانیا ئەردو خانیا بۆ رۆژناما ئەڤرۆ گۆت” نوکە بازاڕ داکەتیە و خەلک یێ بەرھەڤ نینە مالێ خوە ب ئەرزانی بفرۆشن، ڤێ قەیرانێ کڕیار نەھێلاینە پتریا کڕیارێن نوکە تێنە بازاڕی وەلاتیێن عەرەبن، بەلێ عەرەبژی ئەگەر پشتەڤانی نەبیت یێ بەرھەڤ نینە چو مالەکی بکڕیت، بەری ھاتنا قەیرانا دارایی رۆژانە ل کۆمپانیا من گرێبەستێن کڕین و فرۆتنا ئەردو خانیان دھاتنەکرن، ھەیڤێ پتری ٣٠ی گرێبەست ھەبوون، نوکە ھەیڤێ سێ چوار گرێبەست دھێنەکرن، بھایێ ئەردو خانیان زۆر ئەرزانبوویە، لێ کڕیار نینە، بۆ نموونە ئەردێ بەری نوکە ھەشت دەفتەرا نوکە نیڤا بھای کێمبوویە و کێمترە ژ چوار دەفتەرا ڤێجا چو کڕیارنینە بکڕن، خانیێن بازرگانی ھەر ئێکجار ئەرزانبووینە، خانیێن بھایێ وان یێ بلند ھەتا ٢٠ دەفتەرا نزمبووینە و بشێوەیەکێ گشتی ٥٠%ێ بھایێ ئەردو خانیان ئەرزانبوویە.
سرود، بازرگانێ ئەردو خانیان بۆ رۆژناما ئەڤرۆ دیارکر، کڕیارێن کڕینا ئەردو خانیان زۆر کێمبووینە و تنێ خەلک ل خانیێن کڕێ دگەڕیت ب مەرجەکی کڕیا ئەرزانبیت، ئەڤێ قەیرانا نوکە ھەرێما کوردستانێ کاریگەریەکا زۆر کریە سەر بازاڕی، وەلاتی پارێ خوە ناکەنە ملک تنێ بۆ مەزاختیێن رۆژانە نەبن، چو بازاڕێن دی نینە، خەلک چاڤەڕێ رێکەفتنا لایەنێن سیاسینە، ئەگەر بھێت و لایەنێن سیاسی بگەھنە رێکەفتنێ و رەوشا سیاسی باشتربیت، ئەڤە دێ لڤین کەڤنە بازاڕی و ئەڤ رەشبینیا خەلک تێدا نامینیت، ژبلی قەیرانا دارایی رەوشا سیاسی کاریگەری کریە سەر بازاڕی.
عەبدولڕەحمان شێروانی، مامۆستایێ زانکۆیا سەلاحەدین و شەھرەزایێ ئابووری بۆ رۆژناما ئەڤرۆ گۆت” ئەف بھایێ بەرێ جارەکادی ناڤەگەڕیت ئەگەر رەوشا سیاسی و ئابوری ژی باشتربیت، چونکو بھایێ ئەردوخانیان بھایەکێ خەیالی بوو، بێگومان ئەگەر رەوشا سیاسی و ئابوری باشتربیت، دێ دوبارە بازاڕ گەرمبیت و وەکی نوکە نابیت، ژبەرکو لھەر وەلاتەکی ئەف قەیرانە ھەبایە دا رەوشا بازاڕی خراپتربیت، وەک دھێتە گۆتن سەرمایەدار تشتەکێ ترسنوکە، ھەر دەڤەرا مەترسی کەفتە تێدا سەرمایەدار بەرھەڤ نینە سەرمایێ خوە تێدا بکار بینن.
