رۆژنامه‌كا بریتانى به‌حسێ تاكه ڕێیا ژناڤبرنا داعش دكه‌ت
ئه‌ڤرۆنیۆز، ئه‌یاد به‌روارى
رۆژناما ئه‌ندبندێنت یا بریتانی راپۆرته‌كا نڤیسه‌ر (یه‌فگینی لیبیدیف) به‌لاڤكریه كو تێدا ئاماژێ دده‌ت كو قۆناغه‌كا ژیانا خوه ل رۆژهه‌لاتا ناڤێن به‌راندیه و پێشنیارا رێكه‌كێ دكه‌ت بۆ ژناڤبرنا مه‌زنترین مه‌ترسی د سه‌رده‌مێ نوكه دا ئه‌وژی ده‌وله‌تا ئیسلامی (داعش) .
یه‌ڤگینی د راپۆرتا خوه‌دا دبێژیت” پێدڤیه هه‌ڤڕكی بهێنه لادان و هه‌ڤپه‌یمانیه‌ك دناڤبه‌را سه‌ركردێن رۆژئاڤای و سه‌ركردێن ده‌وله‌تێن ئیسلامی و سه‌رۆكێ روسیا فلادیمیر بوتین بهێته گرێدان بۆ شكه‌ستنا داعشێ كو چه‌كدارێن وێ ژ چه‌ندین ره‌گه‌زنامانه، لێ پتریا وان سووری نه.
دبێژیت ژی” ژ ده‌ستپێكا شه‌ڕی 200 هزار وه‌لاتیێن سووری یێن هاتینه كوشتن و 22 ملیۆن وه‌لاتی ژی یێن ده‌به‌رده‌ر بووین و وه‌لاتێن هه‌ڤسنۆر ب تایبه‌تی لوبنان كو وه‌لاته‌كێ فه‌قیره بوویه جهێ حه‌واندنا وان ل شوینا وه‌لاتێن كه‌نداڤی یێن زه‌نگین وه‌كو سعودیێ پێشوازیێ لێبكه‌ن كو هه‌تا نوكه وی وه‌لاتی ئێك ده‌ربه‌ده‌ر ژی وه‌رنه‌گرتیه”.
راپۆرتا ناڤبرى ئاماژێ دده‌ته وێ چه‌ندێ كو نه‌خشێ سووریا د به‌رده‌وام یێ د گوهۆرینێ دا و جهگیری ل وی وه‌لاتی په‌یدا نابیت بێ ژناڤبرنا داعشێ و رێز ژی ل سنۆران ناهێته گرتن و دێ هژمارا په‌ناهندان ژی زێده‌بن، چه‌كدارێن داعشێ ژی په‌نایێ دبه‌نه سه‌رژێكرنێ و هه‌تكرنێ و تۆپبارانكرنێ بۆ سه‌ركه‌فتنێ ب هه‌ر شێوه‌كێ هه‌بیت، لێ نه‌شێن سه‌ركه‌فتنا خوه ب راگه‌هینین هه‌تاكو پشتى ژناڤبرنا هزرا كۆم یا گه‌لێ سووری كو ب ده‌هان سالان یێ گونجای بوو ل گه‌ل هه‌ڤ، له‌وما دشیان دا نینه ئه‌ڤرۆ په‌یڤا (سووریا نوو) بهێته بكارئینان، ژبه‌ركو داعش شیا شوونوارێن ڤی وه‌لاتی ژناڤببه‌ت و ئه‌ڤ وه‌لاته زڤرانده چه‌رخێن ناڤین.
خویا ژى دكه‌ت” دبیت رۆژئاڤای رێیا هزركرنێ ل دۆر وێ پرسێ گوهۆری بیت و ئه‌میندارێ گشتیێ نه‌ته‌وێن ئێكگرتی دانپێدان ب شكه‌ستنێ ل سووریێ كر و رۆژناما ( سه‌ن) یا بریتانی دیاركریه كو 52% ژ وه‌لاتیێن بریتانی ل گه‌ل مایتێكرنا له‌شكری نه د سووریێ دا”.
دیاركر ژی” مایتێكرنا هه‌تا ئه‌ڤرۆ ژ هه‌موویان باشتر و كاریگه‌رتر ژ سه‌رۆكێ روسیا فلادیمیر بوتنی بوو ئه‌وێ دوپاتی ل سه‌ر پشته‌ڤانیا له‌شكری بۆ سووریێ كری ل هه‌مبه‌ری داعشێ و بوتینی گوت كو مه پێدڤیه‌كا فه‌ر ب پێكئینانا هه‌ڤپه‌یمانیه‌كا نێڤده‌وله‌تی نه ژبۆ نه‌هێلانا تیرۆرێ و توندوتیژیێ و بوتینی ئاشكراكر ژی كو وی ل دۆر ڤی بابه‌تی ل گه‌ل سه‌رۆكێ ئه‌مریكی باراك ئۆبامای یێ ئاخڤتی”.
د وێ راپۆرتا رۆژناما بریتانی دا هاتیه ژی كو نێزیكبوونا ئه‌مریكا ل گه‌ل كوبا و ئیرانێ ده‌لیڤه‌كا زێرینه و بوتین ژی یێ به‌رهه‌ڤیا دكه‌ت بۆ ژناڤبرنا داعشێ و ئه‌ڤ چه‌نده مه دزڤرینیته به‌ری 70 سالان ده‌مێ جۆدابوونێن ئایدیۆلۆژی دناڤبه‌را روسیا و رۆژئاڤای هه‌ین، لێ د سه‌ر وێ چه‌ندێ ڕا پێكڤه كاركر ژبۆ شكه‌ستنا نازیه‌تێ.
