كچه‌كا ئێزدی مافێ په‌ناپه‌ریێ ره‌ت دكه‌ت
ئه‌ڤرۆنیۆز، ئه‌یاد به‌روارى
كچه‌كا ئێزدی كو ژ ده‌ستێ داعشێ ڕه‌ڤی، مافێ په‌نابه‌ریێ ل ئورۆپا ره‌ت دكه‌ت و بریارا زڤرینێ بۆ هه‌رێما كوردستانێ دده‌ت كو د كه‌مپه‌كا ئاواراندا یا ئاكنجیه.
ل دووڤ ئاژانسا (فرانس پرێس) یا فره‌نسی، سه‌رۆكێ فره‌نسا (فرانسوا هۆلاند) ل ده‌مێ ڤه‌كرنا كونگرێ نێڤده‌وله‌تیێ قوربانیێن توندوتیژیا تایفگه‌رى ل رۆژهه‌لاتا ناڤین، د دیداره‌كا كورت دا ل پاریس ل گه‌ل ڤێ كچا ئێزدی داخواز ژێ كر نامه‌كا پشته‌ڤانیێ بۆ كوردێن عیراقێ ڤه‌گوهێزیت و گوته جه‌نانێ” ئه‌م هاریكاریا كوردان دكه‌ین بۆ به‌رهنگاریا داعشێ و پاراستنا وه‌لاتیان، پشته‌ڤانی و هه‌ڤالینیا مه بۆ هه‌موو كوردان دووپات بكه و ڤێ نامێ بگه‌هینه”.
سه‌رۆكێ فره‌نسی به‌حسێ هوورده‌كاریێن ڕه‌ڤاندنا جه‌نانێ ژلایێ داعشێ ڤه كر كو وێ كچا ئێزدی د په‌رتۆكه‌كێ دا به‌حس كری كو ل فره‌نسا هاتیه به‌لاڤكرن و گوت” كارتێكرن ل مه هه‌موویان كر” و خویاكر ژی” پێدڤیه هه‌موو ژنێن ته‌په‌سه‌ركری بهێنه پاراستن و ئه‌م دێته پارێزین ل فره‌نسا”.
كچا ئێزدی جه‌نانێ د به‌رسڤا سه‌رۆكێ فره‌نسی دا دبێژیتێ” هیڤیدارم هوون هاریكاریا ژنێن ده‌سته‌سه‌ركرى د ده‌ستێ داعشێ دا بكه‌ن و هیڤیدارم ژی هوون هاریكاریا گه‌لێ من بكه‌ن و قه‌ناعه‌تێ بۆ خه‌لكی دروست بكه‌ن كو مشه‌خت نه‌بن، چاره‌سه‌ری یا ل وێرێ، نه ل ڤێرێ یه”.
ڤێ كچا كورد یا ئێزدی ل دۆر ده‌سته‌سه‌ركرنا خوه ژلایێ داعشێ ڤه، گوت “من سێ هه‌یڤ د دۆزه‌خێ دا بوراندن و ئه‌م تووشی ئه‌شكه‌نجه‌دانێ دبووین هه‌تاكو ب زۆری ببینه موسلمان و ئه‌م ل به‌ر تاڤا رۆژێ هاتینه گرێدان و ل دووماهیێ ئه‌م نه‌چاركرین وێ ئاڤێ ڤه‌خوین یا مشكێن مری تێدا و ب كاره‌بایێ ژی ئه‌م ئازار دداین و به‌رده‌وام ژی ئه‌م د گرێدای بووین”.
جه‌نانێ ل دووماهیێ گوت” دانوستاندن یا ئه‌سته‌مه ل گه‌ل وان هۆڤان و ئایدیۆلۆژیا وان ژی مرنه”.
