كوردستان و مه‌دیایا فاشیستی
هه‌كه ئه‌م ته‌ماشه‌ی دیرۆكا سه‌ربۆرێن جیهانێ بكه‌ین، دێ گه‌له‌ك نموونێن وه‌كی ڕه‌وشا كوردستانێ یا ئه‌ڤرۆ بینین. ئه‌ڤا ئه‌ڤرۆكه ل كوردستانێ ڕوودده‌ت، ژ بلی هندێ كو شه‌ڕه‌كه د ناڤبه‌را دو هێزێن خودان دیتن و پرۆگرامێن جودا دا، كو ئێك ژ وان دڤێت وه‌ڵاته‌كی سه‌ربخوه ژ بۆ كوردان ئاڤا بكه‌ت و یا دی ژی دڤێت ل گه‌ل وان ده‌وله‌تێن كوردستان داگیركری بژیت و نه هێلیت كوردستان ژ ڤان وه‌لاتان جودا ببیت. كورت و كرمانجی ئه‌گه‌رێ ڤان قه‌یران و خڕه‌جڕ و بگڕ و ڤه‌كێشا هه‌می ئه‌ڤه‌یه نه تشته‌كێ دیه.
لێ یا ژ ڤێ مه‌ترسیدارتر ئه‌و ماكینا مه‌دیایا فاشیسته یا كو ئه‌ڤرۆكه خه‌لكێ كوردستانی تووشی دوودلی، ب هیڤیبوون و ڕه‌وشه‌كا ده‌روونی یا گه‌له‌ك خراب كری. فاشیزم نه ته‌نێ ده‌سه‌ڵاتا مۆسۆلینی، هێتله‌ری و سه‌دامی یه، لێ ئه‌و تێگه‌هێ ئیدۆلۆژیه كو ب ڕێیێن له‌شكری، سیاسی و مه‌دیایی تێكهه‌ل ل گه‌ل ترس و خوه‌سه‌پاندنێ هزر و دیتنێن خوه ل سه‌ر خه‌لكی دسه‌پینیت و وان نه‌چار دكه‌ت كو بكه‌ڤنه بن بارێ وێ هزرێ.
ئه‌ڤرۆكه ژی وه‌ك پشكه‌ك ژ وی شه‌ڕێ ل دژی سه‌رخوه‌بوونا كوردستانێ دئێته كرن ب سه‌رپه‌رشتیا ئیرانێ و بجی ئینانا هنده‌ك هێزێن كوردان، مه‌كینه‌یه‌كا مه‌دیایی یا فاشیستیا گه‌له‌ك ب مه‌ترسی كه‌تیه كاری و ئه‌ز دشێم بێژم كو تا ڕاده‌یه‌كێ شیایه ئارمانج و پیرۆزیێن خه‌لكێ كوردستانێ ل به‌ر دلێ هه‌ژماره‌كا مه‌زنا خه‌لكی ڕه‌ش بكه‌ت و ئه‌وره‌كێ تاری بێخیته سه‌ر ڤی ناڤوده‌نگێ مه‌زنێ پێشمه‌رگه‌ی و كوردستانێ په‌یدا كری ل جیهانێ ب شه‌ڕێ ل دژی داعش و دودلی و بێهیڤیاتیه‌كێ د ناڤ خه‌لكی و ب تایبه‌تی گه‌نجان دا په‌یدا بكه‌ت و به‌رێ وان بده‌ته ده‌رڤه و كوردستانێ ژ وێ هێژا مه‌زنا كاریگه‌ر ڤالا بكه‌ت.
ئه‌ڤ ماكینه‌یا مه‌دیایا فاشیست گه‌له‌ك ب شاره‌زایی دئێته بكارئینان و شیایه گه‌له‌ك ڕاستیان ل به‌رچاڤێن خه‌لكی تاری بكه‌ت و چارچۆڤه‌یه‌كێ وه‌سا نیشا وان بده‌ت كو ئه‌و د وه‌ڵاته‌كی پڕی قه‌یران، نه ئارام، هه‌ژار، بێ سه‌رۆك، بێ ڕێڤه‌به‌ری و بێ پاشه‌ڕۆژ دا دژین!! و گه‌له‌ك جاران وه‌ل خه‌لكی دكه‌ت كو ڕاستیا ل به‌ر چاڤێن وان لێ ئه‌و نه‌شێن ببینن ژ ئه‌گه‌رێ ڤێ هێرشا مه‌دیایا فاشیست. بۆ نموونه ژێده‌ره‌ك دبێژیت كو چل هزار كاركه‌رێن بیانی ل دهۆكێ د تۆماركرینه، ئه‌م دێ بێژین بلا بیست هزار ژ وان د ناڤ كاری دا بن، ئه‌ز باوه‌ر دكه‌م ل هه‌ولێر و سلێمانیێ ژی هه‌ژمارێن وان گه‌له‌ك پترن، گه‌لۆ ما ئه‌ڤه ژماره‌یه‌كا بچووكه؟ لێ ڤێ مه‌دیایا فاشیست وه‌ل گه‌نجان كریه كو وه‌ڵاتێ خوه بهێلن و به‌رێ خوه بده‌نه چاره‌نڤیسه‌كێ نه‌دیار ل وه‌ڵاتێن بیانی و ده‌مێ تۆ پسیارا گه‌نجه‌كی بكه‌ی ژی بێژیێ: دێ بۆچی چیه ده‌رڤه؟ دێ بێژیته ته: بۆچی نه‌چم پا چ بكه‌م كار نینه ما دێ چكه‌م؟ باشه هه‌كه كار نه‌بیت پا ئه‌ڤ هه‌ژمارا هنده مه‌زنا بیانیا چاوا كار دكه‌ن ل كوردستانێ؟ هه‌كه ئه‌م هه‌موو هزار خوه د ڤێ دا بكه‌ین دێ زانین كو به‌لێ كارێ هه‌ی له‌وما كوردستان ته‌ژی بیانی بوویه. لێ ئاها ئه‌ڤه‌یه ئه‌نجامێ كارێ مه‌دیایا فاشیست كو وه‌كی شڕكاكێ رۆژێ سه‌د جارا دبێژیت كار نینه ئێدی ئه‌ڤه دكه‌ڤیته د سه‌رێ خه‌لكی دا و باوه‌ر دكه‌ن، هه‌روه‌كی ئاخفتنا ب ناڤوده‌نگا گۆبلزێ نازی دبیژیت: دره‌وێ بكه و دره‌وێ بكه هه‌تا تۆ بخوه باوه‌ر ژ خوه دكه‌ی.
هه‌لبه‌ت ئه‌ڤ مه‌دیایه ژی یا دیاره و هه‌ر كه‌س دزانیت كیژ ده‌زگه‌ه و كه‌نالن و ئارمانجا وان ژی لێدانا پارتی دیمۆكراتی كوردستان و سه‌رۆك بارزنی یه كو ئه‌و پێشه‌نگیا هزرا سه‌رخوه‌بوونا كوردستانێ دكه‌ن، لێ به‌ختڕه‌شیا وژ وێ مه‌زنتر ئه‌وه كو ڤێ مه‌دیایا فاشیست نه ته‌نێ خه‌لك ئێخستیه بن كاریگه‌ریا خوه به‌لكی هنده‌ك ده‌زگه‌هێن سه‌ر ب پارتی دیمۆكراتی كوردستان ژی ڤه یان ژی نێزیكی وێ و ب پارێن وێ هاتینه دامه‌زراندن، ئه‌و ژی جار جار دكه‌ڤنه ناڤ گۆڤه‌ندا ڤێ مه‌دیایا فاشیست و خوه دهه‌ژینن. چونكی ڤێ مه‌دیایێ ژینگه‌هه‌كا مه‌دیایی یا وه‌سا ئافراندیه كو هه‌ركه‌سێ پتر دره‌و و بێبه‌ختیا بكه‌ت، زمان پیس بیت، سڤكاتیێ ب پێشمه‌رگه‌ی و سه‌ركه‌فتنێن وی بكه‌ت، زمان درێژیان بكه‌ت، هێرشێ بكه‌ته سه‌ر سه‌رۆك بارزانی و سه‌رخوه‌بوونێ، ئه‌و شرۆڤه‌كاره، سیاسه‌تمه‌داره، رۆشه‌نبیره، چاڤدێرێ سیاسیه و ئه‌و ب زێڕا ژی ب ده‌ست ته‌له‌ڤزیۆن و رۆژنامه و رادیۆیان ناكه‌ڤیت.
هۆسا مه‌دیایا فاشیست كارێ خوه دكه‌ت و گه‌ل و وه‌ڵاتان خراب دكه‌ت و ئه‌م ژی دگوهێ گای دا دنڤستینه، یان ژی ژ به‌ر باندێن خوه یێن بازرگانی و ڤیللا و ره‌ز و باغێن چاڤ قه‌تره نه‌كه‌ن و گه‌له‌ك تشتێن دی.. . هایا مه ژ ڤان تشتان نینه!!
