دێ بودجا کوردستانێ بڕین
ئەڤرۆ نيوز:
سەرۆکێ فراکسیۆنا دەولەتا قانوونێ ل پەرلەمانێ عیراقێ راگەھاند” ھەڤپەیمانیا نیشتمانی یا شیعی یا مژوولی دانوستاندنێ یە بۆ بڕینا پشکا بودجێ ١٧% یا ھەرێما کوردستانێ د پرۆژێ قانوونا بودجا عیراقێ یا سالا ٢٠١٦ ێ.
عەلی ئەلئەدیب سەرۆکێ فراکسیۆنا دەولەتا قانوونێ ل پەرلەمانێ عیراقێ بۆ رادیوا (مربەد) گوت” ھەتا نوکە حوکمەتا ھەرێما کوردستانێ ئێک دینار ژ داھاتیێ ھنارتنا پەترۆلا ھەرێمێ رادەستی حوکمەتا ناڤەندی نەکریە و رێککەفتنا خوە ل گەل بەغدا یا پیشێلکری، لەوما ھەڤپەیمانیا نیشتمانی ل بەر ١٧% پشکا کوردستانێ د بودجا عیراقێ یا سالا ٢٠١٦ێ دا ببڕیت”.
عەلی ئەلئەدیب زێدەتر گوت” بریارە ئەوە پرۆژە قانوونا بودجا گشتی یا ٢٠١٦ ێ یا عیراقێ ل مەھا چریا ئێکێ یا داھاتی بھێتە ھنارتن بۆ پەرلەمانێ عیراقێ، ھەڤپەیمانیا نیشتمانی ژی دخوازیت دەنگ ل سەر وێ برگا گرێدای ب ھنارتنا پشکا ١٧% ژ بودجا ھەرێما کوردستانێ نەدەت کو ب راستی پێدڤیە ١٣% بیت”.
خویاکر ژی” بەرپرسێن حوکمەتا ھەرێما کوردستانێ ل گەل وەزیرێ پەترۆلا عیراقێ رێککەفتبوون کو رۆژانە ٥٥٠ ھزار بەرمیلێن پەترۆلێ بھنێرنە بەغدا، د بەرامبەر دا بودجا ھەرێما کوردستانێ د پرۆژە قانوونا بودجا ٢٠١٥ێ دا بھیچتە جھگیرکرن، بەلێ ھەولێرێ پێگیری پێ نەکر”.
ئاماژە دا وێ چەندێ ژی” ئەڤ بابەتە د دانوستاندنێن بودجا ٢٠١٦ ێ دا ل پەرلەمانی دێ ھێتە بەحسکرن و پێدڤیە پشکا ھەرێما کوردستانێ ١٣% بیت نەکو ١٧%”.
