ئابۆرێ ئیراقێ دێ پاشڤە زڤڕیت
بانكا نێڤدەولەتی د نووترین راپۆرتا خۆدا یا كو ل دووماهییا مەها خزیرانا 2026ێ دا هاتییە بەلاڤكرن، پێشبینیێ دكەت كو ئابۆرێ ئیراقێ د سالێن بهێت دا تووشی پاشڤەچوونێ ببیت و ل سالا 2027ێ بگەهیتە نزمترین ئاست.
ل گۆرەی راپۆرتێ، پێشبینی دهێتە كرن ل سالا 2026ێ ئابۆرێ ئیراقێ ب رێژەیا 2.2% پاشڤەچیت ، ئەڤ كورتئینانە ل سالا 2027ێ دێ پتر لێ هێت و دێ گەهیتە 8.9%. ئەڤە د دەمەكیدایە كو ل سالا 2024ێ گەشەیا ئابۆرێ ئیراقێ تنێ 0.5% بوویە و بۆ سالا 2025ێ ژی پێشبینییا پاشڤەچوونا 1.5% هاتبوو كرن.
راپۆرتێ ئاماژە ب وێ چەندێ كریە، پشتی ڤێ زنجیرە پاشڤەچوونێ ، پێشبینی دهێتە كرن ل سالا 2028ێ ئابۆرێ ئیراقێ ڤەژاندنێ ب خۆڤە ببینیت و گەشەیەكا مەزن ب رێژەیا 12.2% تۆمار بكەت.
بانكا نێڤدەولەتی دبێژیت: ئیراق ئێك ژ وان وەلاتانە كو زۆرترین كارتێكرنا نەئارامییا دەڤەرێ ل سەر هەیە. د دەمەكێ دا كو بۆ سالا 2026ێ پێشبینی دهێتە كرن ئابۆرێ سعوودیێ 3.1% و ئیماراتێ 2.4% گەشە بكەن، ئیراق و كوەیت (ب رێژەیا 6.4%) تووشی پاشڤەچوونێ بووینە.
داتایێن بانكا ناڤبری دیار دكەن كو ئابۆرێ ئیراقێ د چار وەرزێن سالا 2025ێ دا بەردەوام د پاشڤەچوونێ دا بوویە، كو بلندترین داكەفتن ل وەرزی سیێ دا بوویە ب رێژەیا 3.7%، هەروەسا پێشبینی دهێتە كرن ل وەرزی ئێكێ یێ سالا 2026ێ دا پاشڤەچوون ب رێژەیا 2.3% بەردەوام ببیت.
ل سەر ئاستێ گشتی یێ دەڤەرێ ژی، بانكا نێڤدەولەتی پێشبینیێن خۆ بۆ گەشەیا ئابۆرێ رۆژهەلاتا ناڤین و باكوورێ ئەفریقایێ بۆ 1.6% ل سالا 2026ێ كێم كرینە، لێ پێشبینیێ دكەت ل سالا 2027ێ جارەكا دی بۆ 5.0% بلند ببیت.
