ئه‌ڤرۆ نيوز ئاماره‌كا ترسناك ل سه‌ر قوتابيێن خواندن هێلاين به‌لاڤ دكه‌ت
ئه‌ڤرۆ نيوز:
ل گۆرەی وان پێزانینێن رۆژناما ئەڤرۆ ژ وەزارەتا پەروەردا حوکمەتا ھەرێما کوردستانێ ب دەستخۆڤە ئیناین، ب تنێ د ماوێ چار سالێن بۆری دا ل ھەرێما کوردستانێ ژ پۆلا ئێکێ بنەرەت و ھەتا نەھێ بنەرەت، ٥٠ ھزار و ٥٦٧ قوتابیان خواندن ھێلایە و بەردەوامی نەدایێ. بریار بوو ژی ل سالا ٢٠١٣ ھەتا ٢٠١٥ پلانەکا دارشتی بھێتە دانان بۆ ھندێ رێژا نەخواندەڤانیێ ل ھەرێما کوردستانێ ژ ١٥% بۆ ٧% کێمبکەن، بەلێ ژ بەر قەیرانا دارایی ئەڤ پلانە ژی نەھاتیە بجھئینان.
ھشیار حاجی، رێڤەبەرێ خواندنا نە ئاسایی ل وەزارەتا پەروەردا حوکمەتا ھەرێما کوردستانێ بۆ ئەڤرۆ دیار کر، ل دەستپێکا سالێن ٢٠٠٠ رێژا نەخواندەڤانیێ ل ھەرێما کوردستانێ ٣٤% بوو، بەلێ ژ ئەگەرێ دووڤچوونا وان یا بەردەوام و ڤەکرنا خۆلێن تایبەت بۆ نەخواندەڤانان، ئەڤ رێژە گەلەک کێمتر لێ ھاتیە و گۆت: سالانە ئەم ٥٠٠ بنگەھێن نەھێلانا نەزانینێ ل ھەرێما کوردستانێ ڤەدکەین و ئەم شیاینە د ماوێ ١٥ سالێن بۆری دا رێژا نەخواندەڤانیێ ل ھەرێما کوردستانێ ژ رێژا ٣٤% بۆ رێژا ١٥% دابەزینین.
ناڤبری ئاماژە دا وێ چەندێ، بریار بوو ژی ل سالا ٢٠١٣ ھەتا ٢٠١٥ پلانەکا دارشتی بھێتە دانان بۆ ھندێ رێژا نەخواندەڤانیێ ل ھەرێما کوردستانێ ژ ١٥% بۆ ٧% کێمبکەن، بەلێ ژ بەر قەیرانا دارایی ئەڤ پلانە ژی نەھاتیە بجھئینان و گۆت: ب تنێ د ماوێ ١٥ سالێن بۆری دا، وەزارەتا پەروەردێ نێزیکی ١٠ ھزار و ٦٠٠ بنگەھێن نەھێلانا نەزانینێ ڤەکرینە و مفایەکێ زۆر ژ لایێ وەلاتیان ڤە ژێ ھاتیە دیتن.
ھشیار ئەو یەک ژی نە ڤەشارت، ژ ئەگەرێ ڤەکرنا بنگەھێن نەھێلانا نەزانینێ، ھەتا نوکە وەزارەتا پەروەردێ شیایە ٤٠٠ ھزار کەسان ژ نەخواندەڤانیێ رزگاربکەن و بکەنە کەسێن خواندەڤان و گۆت ژی: ئەم مژوولی دانانا پلانەکا نووینە بۆ نەھێلانا نەخواندەڤانیێ و ئەڤ پلانە دێ یا سێ سالی بیت و ئەنجامدانا وێ دێ سێ سالان ڤەکێشیت و ل سالا ٢٠١٨ دێ ب دووماھی ھێت و ب رێیا ڤێ پلانێ دێ رێژا نەخواندەڤانیێ ژ ١٥% بۆ ١٠% ھێتە خوار.
رێڤەبەرێ خواندنا نە ئاسایی خویاژی کر کو سەرەرای ھەبوونا ڤان ھەموو بنگەھێن نەھێلانا نەخواندەڤانیێ ل ھەرێمێ و ئەو بزاڤێن بۆ ڤێ چەندێ دھێنە کرن، سالانە ھژمارەکا زۆر یا قوتابیان ژ بەر ئەگەرێن جودا جودا خواندنا خوە بجە دھێلن، بەلێ ھەر چاوا بیت د نەزان نینن و خواندن و نڤێسینێ دزانن و گۆت: د ماوێ چار سالێن بۆری دا ل ھەرێما کوردستانێ ژ پۆلا ئێکێ بنەرەت و ھەتا نەھێ بنەرەت، ٥٠ ھزار و ٥٦٧ قوتابیان خواندن ھێلایە و بەردەوامی نەدایێ.
زێدەتر دبێژیت: کەسێن نەخواندەڤان پتر ژ رەگەزێ مێ نە، ب وی ئاستی کو ٦٦% ژ کەسێن نەخواندەڤان ل ھەرێما کوردستانێ رەگەزێ مێ نە و ب تنێ ٤٤% ژ رەگەزێ نێرن.