قانوونێ کچا د بن 18 سالیێ دا ھاندایە دەھمەن پیسیێ بکەت
ئه‌ڤرۆ نيوز:
دەستدرێژیا سکسی دگەل کچکەکێ دھێتە ھژمارتن تاوان، د قانوونا سزایێن عیراقێ دا سزا بۆ ھاتیە دانان و ئەڤ قانوونە ل ھەرێما کوردستانێ ھاتیە راستڤەکرن و کار پێ دھێتەکرن، ئەگەر تاوانکاری ئەڤ تاوانە دگەل کچکەکا دبن ھەژدە سالیێ دا کر دێ ھێتە زیندانکرن کو نەزێدەتر ژ دەە سالان و نەکێمتر بیت ژ حەفت سالان و ئەگەر دگەل کچکەکا د بن پازدە سالیێ دا و ھەژدە سال تمام نەکر بن ھاتە کرن و ب رازیبوونا وێ نەبیت ئەڤە دھێتە ھژمارتن ب تاوانا ھەتکبرنێ و دێ ھێتە زیندانکرن ب ھەتاھەتایێ، یان بەروەخت و چێ دبیت سزایێ وی بگەھیتە سێدارەدانێ.
د. ئەحمەد مستەفا شارەزایێ قانوونا گشتی بۆ ئەڤرۆ دیار کر، قانوودانەری د دەقێ مادێ (394) دا ژ قانوونا سزایان یا کو ل ھەرێما کوردستانێ ھاتیە راستڤەکرن دیار کریە دەستدرێژیا سکسی یان لواتێ، کو نە د کڤانێ ھەڤژینیێ دا و دەستدرێژیا سکسی دگەل کچکەکێ ب رازیبوونا وێ ئەگەر پازدە سال ژ تەمەنێ خوە تمام کربن و ھەژدە سال ژ ژیێ خوە تمام نەکربن دێ ھێتە زیندانکرن کو کێمتر نەبیت ژ حەفت سالان و زێدەتر نەبیت ژ دەە سالان و گۆت “ئەگەر کچ یا رازی بیت ب وی کارێ دگەل دھێتەکرن چ ئەو رازیبوون ب شێوەکێ ئاشکرا بیت یان ب ئاماژە بیت”.
ھەروەسا د. ئەحمەد ئاشکرا دکەت، قانووندانەری ل دووڤ دەقێ مادێ (394) ژ قانوونا سزایێن عیراقی، دو رەوشێن ژێک جودا ھەنە، ئێک بریار ھاتیەدان سزا توندتر بیت ئەو ژی زیندانکرنە کو ژ دەە سالان زێدەتر نەبیت ئەگەر تاوانلێکری دبن پازدە سالیێ دابیت، دو بریارا زیندانکرنێ بۆ تاوانکاری ھاتیەدان ب ماوەیەکی کو ژحەفت سالان پتر نەبیت ئەگەر تاوانلێکری پازدە سال تەمام کربن و د بن ھەژدە سالیێ دا بیت.
شارەزایێ قانوونا گشتی خویا ژی کر کو ئەگەر تاوانکار ژ مرۆڤێن تاوانلێکریێ بیت ب پلا سیێ سزا زیندانکرنە ب ماوەیەکێ ژ پازدە سالان زێدەتر نەبیت، چونکو پەیوەستیا خوینێ و کەسوکاریێ دخوازیت شەرەفا وان کەسوکاران بھێتە پاراستن نەدەستدرێژی ل سەر بھێتەکرن. ھەروەسا ھەمان سزایێ زیندانکرنا ژ پازدە سالان زێدەتر نەبیت بۆ وان تاوانباران ھاتیە دانان کو ئەگەر تاوانبار ئەو بیت یێ تاوانلێکریێ پەروەردە دکەت یان تاوانبار خزمەتکار بیت یان فەرمانبەر بیت یان ژ کەسێن ئاینی بیت یان نوژدار بیت و ئەڤ کارە دگەل کچەکا نەپێگەھشتی کربیت و ژ ئەنجامێ وی کاری کچا پێنەگەھشتی تووشی نەخۆشیەکێ ببیت یان دوگیان بوو یان بۆ ئەگەرێ نەمانا پەردا کچینیێ.
د. ئەحمەد مستەفا شارەزایێ قانوونا گشتی ئاشکرا ژی کر ئەگەر کارێ دەستدرێژیا سکسی یان لیواتێ دگەل کچەکا پێنەگەھشتی ھاتەکرن چ پازدە سال تمام نەکربن یان د بن پازدە سالان دا بیت و ھەژدە سال تەمام نەکربن و ب رازیبوونا وێ نەبیت، ئەڤ کارە دھێتە ھژمارتن ب ھەتکبرن و تاوانبار دێ ھێتە سزادان ل دووڤ مادێ (393) ب سزایەکی کو دگەھیتە زیندانکرنا ھەتاھەتایێ یان بەروەخت کو سزا ژ پازدە سالان پتر نەبیت و رەنگە سزا دگەھیتە سێدارەدانێ.
ل دووماھیێ د. ئەحمەدی دیار کر، کو ل گۆر ڤێ قانوونێ ئەڤە ھاندان و رێدانە کو کچ د بن ھەژدە سالیێ دا ژ تەمەنێ خوە ب رازیبوونا خوە ل ژێر سیبەرا دەولەتەکا ئاینێ وێ ئیسلام بیت دەھمەن پیسیێ بکەت.
