بۆ وەرزێ سيێ ل دویڤ ئێک زاخۆ نەشیا سەرکەفتنێ ل کەربەلا توماربکەت
ئەڤرۆ نیوز، ھەژار مەعروف:
تیما تەپا پێ یا زاخۆ نەشیا خوە ژ گرێیا یانا کەربەلا قورتال بکەت ئەڤ جارە ژی توشی خوسارەتیێ بوو ل سەر دەستێ یانا کەربەلا ل یاریگەھا وێ ب گولەکێ بێ بەرامبەر ژ چارچوڤێ یاریێن گەرا دوێ ژ قوناغا ئێکێ یا خۆلا عیراقێ، کو دبیتە وەرزێ سێ ل دوویڤ ئێک تیما کەربەلا خوسارەتیێ گەھینتە یانا زاخۆ ل یاریگەھا خوە ب ڤێ خوسارەتیێ تیما زاخۆ ژ رێزا دوێ پاشڤە زفری رێزا چارێ د لیستەیا خۆلا عیراقێ یا کوما دوێ.
ژلایەکێ دووڤە ل یاریگەھا خوە تیما تەپا پێ یا ھەولێر شیا سەرکەفتنەکا باش ل سەر سەرکێشا کوما دوێ تیما مینا توماربکەت ب سێ گولان بەرامبەر گولەکێ ھەرسێ گولێن ھەولێرێ ژ لایێ یاریکەران محەمەد جەفال و ئەحمەد عەبدولەمیر و کوسرەت بایز ھاتنە تومارکرن، ب ڤی ئەنجامێ تیما ھەولێرێ خالێن خوە گەھاندنە ١٧ خالان ژ رێزا پێنجێ پێشڤە ھاتە رێزا سێ و کێمتر یاریەکێ ژ یانێن دی.
ھەردیسان ژ یاریێن دی یێن ئەڤرۆ ھاتینە کرن نەجەف بەردەوامی دا ئەنجامێن خوە یێن باش ب سەرپەرشتیا راھێنەرێ خوە یێ گەنج عیماد محەمەد ئەڤ جارە شیا سەرکەفتنەکا گرنگ ل سەر یانا حدود توماربکەت ب گولەکێ بێ بەرامبەر و پێشڤە ھاتە رێزا دوێ ب ١٩ خالان و ژ یاریێن کوما ئێکێ تیما زەورا سەرارای وەکھەڤیا خوە ل گەل نەفت ئەلجنوب بێ گول سەرێ لیستەیا کوما ئێکێ پاراست ب ٢٥ خالان و ھەلگرا ناسناڤێ وەرزێ بوری تیما نەفت وەست ب سەرکەفت ل سەر تیما کەرخ ب گولەکێ .