راهێنه‌رێ فوتسالا زێره‌ڤانى ل سه‌ر پشكدارينه‌كرنێ د خولا عيراقێ دا هاته ده‌نگ
ئه‌ڤرۆ نيوز، نيوار محه‌مه‌د سه‌ليم:
پشتى پشكدارينه‌كرنا تيما فوتسالا كچێن زێره‌ڤانى د هه‌ڤركيێن دووماهيا فوتسالا عيراقێ دا، راهێنه‌رێ تيمێ هاته ده‌نگ.
سۆبه‌هى ب ئه‌نجامدانا سێ ياريان دووماهيا فوتسالا كچان دێ ل به‌غدا ل كوليژا په‌روه‌ردا وه‌رزشى برێڤه‌چيت و نوونه‌را ئێكانه يا هه‌رێمێ دێ تيما فوتسالا كچێن هه‌ولێر بيت يا به‌ر ب به‌غدا چووى ژ بوو پشكداريكرنێ د وێ قاره‌مانيێ دا.
ب گۆره‌ى داخۆيانيه‌كا ئێك ژ ئه‌ندامێن ده‌سته‌يا راگه‌هاندنێ ل يانا زێره‌ڤانى، ژ به‌ر كو ئه‌و قاره‌مانى دێ ل به‌غدا هێته كرن و نه ل پايته‌ختێ هه‌رێما كوردستانێ، هه‌ولێر، ئه‌وان بڕيار دايه پشكداريێ د قاره‌مانيێ دا نه‌كه‌ن، سه‌ره‌راى حه‌زا زێده يا ياريكه‌رێن وان بۆ پشكداريكرنێ د ڤێ قاره‌مانيێ دا.
پێشتر ل هه‌ولێر ڤاڤارتنێن ده‌سپێكى يێن ڤێ قاره‌مانيێ هاتبوونه كرن و زێره‌ڤانى مافێ پشكداريكرنێ د ڤێ قاره‌مانيێ دا ب ده‌ست خوه ڤه ئينابوو پشتى ئه‌نجامێن مه‌زن ل سه‌ر هه‌ڤركێن خوه تۆماركرى.
د ڤێ ده‌ربارێ دا، وه‌كو كاردانه‌ڤا ئێكێ يا پشكدارينه‌كرنا ڤێ تيمێ د قاره‌مانيێ دا، راهێنه‌رێ ڤێ تيمێ كه‌ريم نوسه‌يف جه‌سيم هاته ده‌نگ و ل سه‌ر تۆرا جڤاكيا فه‌يسبۆكێ پۆسته‌ك ل سه‌ر ڤى نۆچه‌ى به‌لاڤكريه و نڤيسيه: ” كنا الفريق الأوفر حظاً… بالحصول على لقب الدوري العراقي…؟؟؟؟؟”، كو ب كوردى دبيته “ئه‌م تيما ژ هه‌موويان ب به‌ختربووين بۆ ب ده‌ستڤه‌برنا ناسناڤێ خولا عيراقێ… ؟؟؟”.