پەرسیڤا بەرازان ل ڤى وه‌لاتێ جيرانێ مه ب ده‌هان كه‌س كوشتن
ئەڤرۆ نیوز، ئەیاد بەرورای:
ژ ناڤەراستا مەھا چریا دویێ/ نوڤێمبەرا بۆری و ھەتا نوکە 112 وەلاتیێن ئیرانی گیانێ خوە ژدەستدایە ب ڤایرۆسێ پەرسیڤا بەرازان.
محەمەد مەھدی قویا سەرۆکێ پشکا نەخوەشیێن ڤەگر ل وەزارەتا ساخلەمیا ئیرانی، بۆ ئاژانسا دەنگوباسێن ئیرانی یا فەرمی (ئیرنا) گوت” 1190 کەس یێن تووشی ڤێ نەخوەشیێ بووین و ھەموو ژی یێن ل نەخوەشخانێ، ژ ناڤەراستا مەھا نوڤێمبەرا بۆری و ھەتا نوکە 112 کەسان گیانێ خوە یێ ژدەستدای”.
پتریا کەسێن گیانێ خوە ژدەستدای ژبەر ڤێ نەخوەشیێ، ل باشوورێ رۆژھەلاتا ئیرانێ ل نێزیک سنۆرێ پاکستانێ بوون.
ل مەھا خزیرانا 2009 ێ، پشتی چەند حالەتێن نەخوەشیا پەرسیڤا بەرازان ل ئەمریکا و مەکسیک بەپەیدابووین، رێکخراوا ساخلەمیا جیھانی باری نەئاسایی راگەھاند ژ بەلاڤبوونا نەخوەشیەکا جیھانی و ژئەگەرێ ڤێ نەخوەشیێ 18 ھزار و 500 کەسان ل 214 وەلاتان ھەتاکو تەباخا 2010 ێ گیانێ خوە ژدەستدابوو کو ل وێ دیرۆکێ بارێ نەئاسایی ھاتبوو ڕاکرن.
ئێکەمین حالەتێ بەرسیڤا بەرازان ل ئیرانێ ھاتیە تومارکرن بۆ خزیرانا 2009 ێ دزڤریت کو تووشی گەنجەکێ 16 سالی ببوو کو ژ ئەمریکا زڤری بوو ئیرانێ.