كی ل پشت هه‌وا ڕه‌كلاما سه‌دامێ كوردكوژه و ئارمانج ژێ چیه ؟
ئه‌ڤه چه‌ند حه‌فتیه‌كه هه‌وه‌كا ڕه‌كلامێ د مالپه‌ڕێن فه‌یسبووكێ دا ژ بۆ دیكتاتۆرێ هۆڤ و خوینخوارێ بكوژێ كوردان سه‌دامێ فاشی ده‌ستپێكریه، ژ به‌ر هندێ من دڤێت چه‌ند رۆنكرنه‌كا ل سه‌ر ڤێ هه‌وێ دیار بكه‌م:
1- وه‌كی ئه‌م دزانین ئه‌ڤه ژی ئێك ژ وان هه‌ولانه یێن كو تێنه كرن ب ناڤێن جودا جودا وه‌كی ( بڕینا بودجا كوردستانێ ل به‌غدا، تێكدانا ڕه‌وشا شه‌نگالێ ب ناڤێ كانتۆن و تشتێن دی، په‌یداكرنا نه‌ئارامیێ ب ڕێیا سۆتنا باره‌گا و ترساندنا كۆنسولخانه وكۆمپانیایێن بیانی، په‌قاندنا بۆڕیێن په‌ترۆل و گازێ بۆ شه‌له‌ل كرنا ڕه‌وشا ئابووریا كوردستانێ و بایكۆتكرنا ده‌واما قوتابخانا بۆ تێكدانا سیسته‌ما په‌روه‌ردێ دا كو ساله‌كێ ژ كیسێ قوتابیێن كوردستانێ ببه‌ن و هاندانا خه‌لكی كو كوردستانێ بجی بهێلن و به‌ره‌ڤ ئه‌ورۆپا ڤه كۆچ بكه‌ن و خه‌له‌كا دووماهیێ ژی یا ڤێ پیلانا دوژمنكارانه ئه‌ڤ هه‌وا ڕه‌كلام كرنا هۆڤێ خوینخوار سه‌دامێ گۆڕبه‌گۆڕه. ئارمانج ژی ژ ڤان پیلانێن دوژمنكاری هه‌موویێ ئه‌وه كو ڕه‌وشه‌كا نه ئارام و تێكدانێ ل كوردستانێ په‌یدا بكه‌ن ژ به‌ر كو رۆژهه‌لاتا ناڤین ئه‌ڤرۆكه ل به‌ر قۆناغه‌كا نوویه و نه‌خشه‌یا ڤێ هه‌رێمێ دێ هێته گوهۆڕین و دوژمنێن مه دڤێن ڕه‌وشه‌كا وه‌سا ل كوردستانێ په‌یدا بكه‌ن كو ل ده‌مێ ڤان گوهۆڕینان كورد د ئاماده نه‌بن و نه‌بنه خودان پشك و بار دڤێ نه‌خشه‌یا نوو دا و نه‌شێن سه‌رخوه‌بوونا خوه ڕابگه‌هینن و هه‌ر بمینن كۆله و بنده‌ستێ
داگیركه‌رێن ترك و عه‌ره‌ب و فارس.
2- ئه‌ڤ كه‌س و گرۆپێن ڕه‌كلاما سه‌دامی دكه‌ن دوو پشكن:
ئا: پشكا ئێكێ: یا كو ئه‌ڤ هه‌وا ره‌كلامێ ده‌ستپێكری هنده‌ك تێشكه جاش و سیخۆر و كه‌ڤنه به‌عسی و خۆفرۆش و هنده‌ك مالپه‌ڕێن نێزیكی هنده‌ك ڕێكخستنێن سیاسی نه، كو وان ئه‌ڤ كاره ب پلان و زانین و ژ بۆ تێكدانا ڕه‌وشا كوردستانێ و په‌یداكرنا بێباوه‌ریێ ل كوردستانێ ده‌ستپێكریه.
هه‌ر ژ بۆ كو بشێن باشتر ژه‌هرا خوه بڕێژن و ئارمانجا خوه یا خیانه‌تكاری بجی بینن وان قه‌یرانا گیرۆبوونا مووچان كریه چه‌كه‌ك د ده‌ستێ خوه دا، دا كو بشێن ب وێ ڕێكێ كاریگه‌ریێ ل مه‌ژیێ هنده‌ك خه‌لكێ مه یێ ساده و دلپاك بكه‌ن و وان د سه‌ر دا ببه‌ن و وه‌ل وان بكه‌ن كو په‌سنا بكوژێ خووشك و برا و گه‌لێ خوه بكه‌ن. مخابن ئه‌و شیان ژی تا ڕاده‌یه‌كێ ڤێ ئارمانجا خوه یا هه‌ڕمی بجی بینن و هنده‌ك كه‌سێن ساده دسه‌ردا ببه‌ن.
ب: پشكا دووێ: یا كو ده‌ست دڤێ ڕه‌كلاما هه‌ڕمی دا هه‌ی، ئه‌و خه‌لكه بوو یێ به‌ری نوكه مه ئاماژه پێدایی كو خه‌لكه‌كێ ساده و دلپاكن و ژ نه‌زانینا خوه كه‌تنه بن كاریگه‌ریا پلانا وان تێشكه به‌عسیێن خوه‌فرۆش و ل دووڤ ئاوازێن وان كه‌فتنه دیلانێ و شیانه وه‌ل وان بكه‌ن ڕه‌كلاما بكوژێ گه‌لێ كورد بكه‌ن. هه‌لبه‌ت ئه‌ڤه ژی نزمیا ئاستێ زانین و هشیاریا هنده‌ك ژ خه‌لكێ مه دیاردكه‌ت، له‌وما ژی هۆسا ب ساناهی ژ ئالیێ دوژمن و خائینان ڤه تێنه خاپاندن و وه‌ل وان دكه‌ن كو ئه‌و بخوه دوژمناتیا خوه بكه‌ن مخابن.
3- ڤێ هه‌وا ڕه‌كلاما دوژمنكاری بۆ مه دیاركر كو ده‌زگایێن مه یێن ئاسایشێ و دادوه‌ریێ ( دۆزگه‌رێ گشتی ) به‌رامبه‌ر هێرشێن ئه‌له‌كترۆنی ل دژی گه‌ل و وه‌لاتێ مه نه هند هشیار و چاڤ ڤه‌كرینه، ئه‌گه‌ر نه پێدڤی بوو ئێك ئێك ل دووڤچوونا ڤان كه‌س و ماڵپه‌ڕان هاتبایه كرن و ل گۆره‌ی یاسایا دژه تیرۆرێ یان ژی یاسایا ڕیشه‌كێشكرنا به‌عسیان هاتبانه دادگه‌هكرن و ل ده‌زگایێن مه‌دیایێ ژی هاتبا به‌ڵاڤكرن دا كو جاره‌كا دی تێشكه جاش و به‌عسی و خوه‌فرۆش ل ڤی وه‌ڵاتی سه‌رهه‌لنه‌ده‌نه‌ڤه.
نوكه ژی هێشتا نه دره‌نگه و ئه‌ز ل ڤێرێ پێشنیار دكه‌م كو ده‌زگایێن ئاسایشێ و دۆزگه‌رێ گشتی دووڤچوونا ڤان كه‌س و مالپه‌ران بكه‌ن و پێڕابوونێن یاسایی لگه‌ل وان بكه‌ن.
