رێكێش سه‌یرانى دێ كۆنسێرته‌كێ بۆ ئه‌ڤیندارا گێریت
ئه‌ڤرۆ، رێوار مزیرى:
سترانبێژێ ده‌ڤه‌را زاخۆ رێكێش سه‌یرانى بۆ ئه‌ڤرۆ نیۆز ئاشكرا كر كو ل هه‌یاما بۆرى ب مه‌ره‌ما گێرانا چه‌ندین كۆنسێرتان وى سه‌ره‌دانا ژ ده‌رڤه‌ى وه‌لاتى كربوو و گۆت: من كۆنسێرته‌ك ل وه‌لاتێ ئیسرائیلێ گێرا و نێزیكى پێنج هزار كه‌سان لێ ئاماده‌ببوون و پاش بۆ گێرانا كۆنسێرتان چوومه وه‌لاتێن ئه‌مریكا و سوید.
ناڤهاتى ئاماژه دا وێ چه‌ندێ كو نوكه ئه‌و مژوولى كلیپكرنا سترانه‌كێ یه بۆ شه‌هیدان ژ په‌یڤ و ئاوازێن (ئه‌مین بۆتانى) و ده‌رهێنانا (شرین هار هار) و نوكه د قووناغا مۆنتاژێ دایه و ره‌نگه د ڤێ حه‌فتیێ دا به‌لاڤ بیت و گۆت: “ره‌نگه گۆره‌پانا سترانا پێشمه‌رگه‌ى ببیته جهێ وێ چه‌ندێ كو هنده‌ك سترانبێژ خوه پێ به‌رنیاس بكه‌ن، به‌لێ هه‌ر سترانبێژه‌كێ ژ ده‌رهه‌قێ سترانا شه‌هیدى نه‌ده‌ركه‌ڤیت بلا چو سترانان ب شه‌هیدان نه‌بێژیت، چونكو مه‌زنترین پله یا خزمه‌تا وه‌لاتى شه‌هیدبوونه”.
د لایه‌كێ دى دا رێكێشى ئاشكرا كر كو بۆ جه‌ژنا ئه‌ڤینداران ل 14ى ڤێ هه‌یڤێ ئه‌و و هه‌لبه‌ستڤان شه‌عبان سلێمان دێ كۆنسێرته‌كێ ل دووڤ شیانێن خوه بێ به‌رانبه‌ر ل مازى مۆل ل دهۆكێ گێرن و گۆت: “راسته به‌هرا پتریا كۆنسێرتێن خوه ئه‌ز ژ ده‌رڤه‌ى وه‌لاتى دگێرم، چونكو ب دیتنا من هێشتا خه‌لكێ مه فێرێ سیسته‌مێ كۆنسێرتان نه‌بوویه و ره‌وشا نوكه ژى نه‌یا گۆنجایه بۆ گێرانا كۆنسێرتان، به‌لێ سه‌ره‌رایى ڤێ چه‌ندێ نوكه ئه‌ز یێ بزاڤێ دكه‌م كۆنسێرتان ب شێوێ به‌رنامێن ته‌له‌ڤزیونێ پێشكێش بكه‌م و بۆ ڤێ مه‌ره‌مێ ژى من ئه‌ڤ بابه‌ته ل گه‌ل چه‌ندین ته‌له‌ڤزیۆنان به‌حس كریه لێ هه‌تا نوكه من بڕیار نه‌دایه كا دێ ل كیشك ته‌له‌ڤزیۆنێ پێشكێشكه‌م”.
