ئارمانجا پێنج یانێن خولا کوردستانێ سوباھی سەرکەفتنە
ئەڤرۆ نیوز، ھەژار مەعروف:
بریارە سوباھی سێ یاری ژ گەرا چارێ و بەری دووماھیێ ژ کوما دوێ یا خولا فاستلینکا ھەرێما کوردستانێ بھێنەکرن کو دڤان سێ یاریان دا دێ چارەنڤێسی پێنج یانا بۆ حەفتیا دووماھیێ دیارکەت ژبەرکو ئەو پێنج یانا ھەڤرکیا دو پلێتێن دەربازبوونا چار گوشا زێرین کەن .
ل پارێزگەھا دھۆکێ بریارە دو یاریێن گرنگ بھێنەکرن کو تیما دھۆک دێ مێڤانداریا برایەتی کەت ل یاریگەھا خوە ھەکە دھۆک ب خوازیت بەردەوامی ب دەتە ھەڤرکیا دەربازبوونێ پێدڤی یە سێ خالێن یاریێ ب دەستخوڤە بینت داکو رێزا دوێ پارێزیت و ھەر ئەنجامەکێ نە چاڤەرێکری بۆ یانا دھۆک دێ مەترسی ل سەر دەربازبوونا دھۆکێ پەیدا کەت .
ل یاریگەھا گارە ھەردو یانێن گارە و نەوروز دێ ھەمبەری ئێک بەن و ژبلی سەرکەفتنێ چو ئەنجامێن دی د بەرژوەندیا ھەردو یانا دا نینە وەکھەڤیا ھەردو یانا دێ ھەردو ژ ھەڤرکیا دەربازبوونێ دورکەفن و تیما گارە ئەوا ل دو یاریێن بوری شیای دو سەرکەفتنا ل دیڤ ئێک بینت د بەرھەڤیەکا باش دایە بۆ ڤێ یاریێ بتنێ یاریکەرەکێ وی پشکداریێ ناکەت ئەوژی پیشەکارێ وێ یێ کوتیڤواری جونیور .
ژلایەکێ دیڤە یانا پێشمەرگە ھەولێرێ سەرکێشا ڤێ کومێ دێ یاریا خوە بەرامبەر یانا سولاڤ کەت کو ئەرکێ وێ یێ ب زحمەت نابیت ژبەرکو دێ ل گەل تیما خودانا رێزا دووماھیێ کەت و ھەمی ھیڤێن خوە ژ دەست داینە بەرامبەر تیما پێشمەرگە دخوازیت سێ خالێن یاریێ ب دەستخوڤە بینت و سەرێ لیستەیا خولێ پارێزیت
