ژنەک: 9 ھەیڤە ل مالا بابێ خوە نە من دزڤرینیت و نە من بەرددەت
ئەڤرۆ نیوز:
دیاردا دەرێخستنا ژنێ ژ مالێ بۆ مالبابێ یا بوویە جھێ ھندێ کو ژن نەوێریت داخوازا بەردانێ بکەت و ھزر دکەت ھەکە داخواز کر چ تشت بۆ ناکەڤن، زەلام ژی ئەوێ دھێلتە ھەلاویستی و بۆ ماوەکێ درێژ نە بەردەت نە دزڤرینیت، شارەزایەکا جڤاکی دبێژیت: چونکو ژنا بەردایی دچاڤێ جڤاکی دا یا سرۆشتی نینە زەلام ھەول دەت ئەوێ سزا بدەت.
ژنەکێ نەڤیا ناڤێ خوە ئاشکرا کەت بۆ ئەڤرۆ گۆت: ئەڤە ھەشت ھەیڤە یا زیز ل مالا بابێ خوە، ھندی من ژێ داخوازکر من بزڤرینن مالا من، لێ ئەوان ئەز دەرێخستم، ھەتا جارەکێ من داخواز ژ زەلامێن مەزنێن بنەمالا خوەکر من ببەنە ڤە بەلکو من قەبیل بکەن وەکو بووکا مالێ ژبەر من ھەست ب شەرمێ دکر و ھەموویا دگۆت ھوشیار بی دڤێـت ھەدارێ بکەی نەکە دێ مافێ تە ھێتە خوارن، بەلێ پشتی بریمە ڤە ب تنێ 16 رۆژا جارەکا ئەز دەرێخستمە ڤە.
ژنەکا دی بەحس دکەت و دبێژیت: ئەڤە دەە ھەیڤە ئەزا زیز ل مالا بابێ خوە من دڤیا بزڤرم، لێ زەلامێ من گەف ل من کرن گۆت دێ چمە دەرڤەی وەلاتی و تو دێ ل مالا بابێ خوە بسکا ڤەھینی و تە نابەردەم ژی، دووڤ دا ترسیام کو ئەو بچتە دەرڤە و ھەموو مافێن من پێشیل ببن، گۆتژی پشتی من ل گەل پارێزەری ئاخفتی بابەت ھەموو بەرۆڤاژیە ئەگەر چو دەرڤەی وەلاتی پشتی سالەک دبوریت دڤێت ھەموو مافێن من بدەت و داخوازا بەردانێ بکەم چ مافێن من بەرزە نابن. مەنتیقا تاھر شارەزایا جڤاکی دیارکر کو ئەو ژنێن ژ مال دھێنە دەرێخستن و زیز دبن و بۆ ماوەکێ درێژ دمینن ل مالا بابێ خوە، پاشی ھەڤژینێ وێ ئەوێ ڤەگەرینتە مال ئەگەرەکێ سەرەکیە ئەوە زەلامی دڤێت وێ ئازار بدەت و گۆت: وەکو تولڤەکرن کو نە ب دلێ زەلامی و مالا وی بیت ھەتا گەلەک جارا ئەڤە دبیتە ئازار دانا دەروونی داکو بمینتە ل مالا بابێ خوە و یا دبن فشارا بەردانێ ڤە بیت و یا ئازاد نەبیت، دیسا ژی داکو ئەو ژنە شوو نەکەتەڤە دا ھەر ناڤێ بەردانێ ل سەر بیت.
پارێزەر تانیا زکری ل دادگەھا دھۆکێ خویا دکەت کو ئەڤ حالەتە ھاتینە دادگەھێ پشتی گەلەک دمینن ل مال بابێ خوە بێدەنک دمینن و نەوێرن داخوازا مافێ خوە بکەن ئەڤە دزڤریتە ھندێ کو مافێ خوە یێ قانوونی نزانن ژبەر ھندێ ژی ھەر ژنەکا زیان لێ بیت و ل مال بابێ بیت مافێ ھەی داخوازا بەردانێ بکەت ئەگەر چەند ھەیڤ ژی بن تایبەت ئەگەر ژ سالی بوری ژنێ مافێ ھەی داخوازا خانیەکێ شەرعی بکەت ژبۆ ھندێ تێدا بژیت و ھەموو مافێن وێ یێن تایبەت ژی دێ بۆ ھێنە جێ بەجێکرن ئەگەر بێ ئەگەر ژ مال ھاتبیتە دەرێخستن، گۆتژی ھەکە ل دادگەھێ وەسا ئاشکرا بۆ کو بێ ئەگەر یا دەرێخستی و زەلامی دڤێت وێ دەربێخیت ئاھا ل وی دەمی دێ دادوەر بریارێ دەت مارا پێشەکی و پاشەکی بدەتە ژنێ، دیسا مەزاختیێن وێ دوان سێ ھەیڤان دا و ل گەل مەزاختیێن زارۆیا و ل گەل وان زێرێن بو کرین بو ژنێ دکەڤن.
