ب وێنە پێنج یاریکەر بەربژارن پشتی دووماھیا چامپیونس لیگ ریال ب جھـ بھێلن
ئەڤرۆ، ھەژار مەعروف:
راپورتێن رۆژنامەڤانی ل ئیسپانیا وەسا داینە دیارکرن پشتی یاریا قارەمانیا یانێن ئورۆپا یانێن خولا پێنج یاریکەر بەربژارن یانا مەلەکی ب جھـ بھێلن ژبەر دەلیڤەیا کرنا یاریێ بۆ ئەوان ل وەرزێ ئەڤ سالە یا کێم بوو.
ھەردیسان ئەوان یاریکەران ژی ل چەند دەزگەھێن راگەھاندنێ ئاماژە ب وێ چەندێ کری یە ئەو دخوازن ل وەرزێ بھێت یانا ریال مەدرید ب جھـ بھێلن و بەر ب یانەکا دیڤە بچن داکو دەلیڤەیەکا باشتر یا یاریێ وەربگرن.
ئیسکو ئێک ژ ئەوان یاریکەرێن خودان شیان ل سەر ئاستێ وەلاتێ ئیسپانیا و پاشەرۆژەکا گەش ھەیە ل پێکھاتیێ وەلاتێ خوە لێ ھەر ھاتنا وی ل گەل یانا مەلەکی ل وەرزێ بوری نەشیا ب شێوەکێ بەردەوام خوە وەکو یاریکەرەکێ سەرەکی ل گەل پێکھاتیێ تیمێ بینت کو گەلەک ھەلکەفتنان دا راھێنەرێن ریال پشت بەستن ل سەر کری یە لێ بۆ ماوەکێ کێم و دبیت ل ڤەگوھاستنێن ھاڤینا ئەڤ سالە ب خولا ئینگلتەرا بچیت کو چەند یانێن بەرنیاس یێن خولا ئینگلتەرا ئیسکو کریە ئارمانجا خوە.
یاریکەرێ بەرنیاس یێ ھێلا بەرەڤانیێ پیپی ژی ئێک ژ بەربژارانە ل وەرزێ بھێت بەر ب یانەکا دی ڤە بچیت ھەر چەندە یاریکەرێ ناڤبری ئێک ژ یاریکەرێن سەرەکی یە ل گەل پێکھاتیێ یانا مەلەکی ل چەندین سالێن بوری و ھەتا نوکە راھێنەرێ ریال مەدرید پشت بەستنێ ل سەر کەت ل ھێلا بەرەڤانیێ لێ ژیێ وی وەسا دخوازیت ئەو ھزر ل یانەکا دی بکەت و یانا کەلەکی ژی ھزر ل ئینانا یاریکەرەکی کری یە ل جھێ وی، دەنگوباس وەسا داینە دیارکرن پیپی دخوازیت جارەکا دی ب ڤەگەریتە خولا پرتوگال .
خامێس رودرێگیز ستێرا کولومپی ئێک ژ ئەوان یاریکەرانە ئەوێن ب کوژمەکێ مەزن یانا ریال مەدرید ھەڤبەست ل گەل ئیمزاکری بەری دو وەرزان ئەوی دیارکری یە ئەو دخوازیت ل وەرزێ بھێت بەرەڤ یانەکا دیڤە بچیت ژبەرکو ئەو ناخوازیت یاریکەرەکێ یەدەگ بیت و یاریکەری ل دو وەرزێن بوری یاری ل گەل سێ راھێنەران یاری کری یە لێ نەشیا دروستی جھێ خوە ل گەل پێکھاتیێ ریال مەدرید دا بینت و وەکو یاریکەرەکێ سەرەکی بمینت کو تایبەت ل وەرزێ ئەڤ سالە ھەردو راھێنەرێن سەرپەرشتیا ریال مەدرید کری پشت بەستن ل سەر رودرێگیز نەکر، ھەرسێ یانێن مانچستەر سیتی و مانچستەر یوناید و چێلسی گرنگیەکا مەزن دایە ئەڤی یاریکەری و بەرھەڤیا خوە دیارکری یە ھەڤبەستێ ل گەل ئیمزابکەن بەرامبەر کوژمەکێ مەزن.
گولچیێ دوێ یێ یانا ریال مەدرید کیکو کاسیا ژی دبیت ئێک ژ بەربژارێن ب ھێز بیت یانا مەلەکی ب جھـ بھێلت لێ ب مەرجەکی ئەگەر ھاتو یانا ریال مەدرید ھەڤبەست ل گەل گولچیێ بەرنیاس یێ ئیسپانی دی خیا ئیمزاکر وی دەمی یانا مەلەکی دێ دەست ژ کاسیا بەردەت .
یانا ریال مەدرید ماندی بوونەکا مەزن بر ھەتا شیان یاریکەرێ بەرازیلی دانیلوی ب دەستخوڤە بینن لێ پشتی یاریکەری پەیوەندی ب یانا ریال مەدرید کری ل وەرزێ ئەڤ سالە یاریکەر نەبوو جھێ رازیبوونا جەماوەر و دەستەیا راھێنەریا ریال مەدرید ، یانا مەلەکی ھزر ل فروتنا ئەوی کری یە تایبەت پشتی یانا یوڤانتوس دەست ب دانوستاندان کری بۆ کرینا ئەڤی یاریکەری.