ئێدی ب چو رەنگان مێلاکا مریشکێ ناھێتە ھاوردەکرن
ئەڤرۆ نیوز:
وەزارەتا ساخلەمیا ھەرێما کوردستانێ راگەھاند، ژ بەر زوو خراب بوونا مێلاکا مریشکێ، ئێدی ب چو رەنگان رێ ناھێتە دان مێلاکا مریشکێ ژ دەرڤەی ھەرێمێ بھێتە دناڤ ھەرێما کوردستانێ دا. ھەروەسا دانا مۆلەتێ بۆ کافێ یێن کێشانا نارگیلان ژی ئێدی ناھێنە دان.
ل گۆرەی وێ راگەھاندنا وەزارەتا ساخلەمیا ھەرێما کوردستانێ قەدەغەکرنا ھاوردەکرنا مێلاکا مریشکێ ژ بۆ پاراستنا ساخلەمیا وەلاتیێن ھەرێمێ یە، چونکو مێلاک زوو خراب دبیت و ئێکسپایەر دبیت، ب تنێ مارکێتان ماف ھەیە مێلاکا مریشکێ یا خۆمالی بفرۆشن و گۆت: نھا تیمێن چاڤدێریا ساخلەمیێ ھاتینە راسپاردن بۆ چاڤدێریکرنا بازاری و جھێن گشتی بۆ رێگرتنێ ل فرۆتنا مێلاکا مریشکا دەرڤەی ھەرێمێ.
ھەروەسا بریار ژی ھاتیە دان کو ئێدی ب چو رەنگان مۆلەت بۆ ڤەکرنا کافێن کێشانا نارگیلان نەھێنە دان، چونکو کافێ یێن ب ڤی رەنگی گەلەک زێدەبووینە و پێدڤیە رێ ل ڤەکرنا وان بھێتە گرتن.
ل پەی دووڤچوونا رۆژناما ئەڤرۆ کری، داخوازیەکا مەزن ل سەر بدەستڤەئینانا مێلاکا مریشکێ ھەیە، بەلێ ب رێژەیا 2%ێ ل بازاری دھێتە دیتن و بازرگانەکی دیار کر ھەتا ئەو 10 کارتوکێن مریشکا خۆمالی وەردگرن ب تنێ ئێک کارتونا مێلاکا مریشکێ ددەنە وان و یا بیانی ژی ل بازاری قەدەغەیە.
مێھڤان جەمیل، بازرگان د بیاڤێ فروتنا گوشت و مریشکان ل پارێزگەھا دھۆکێ دیار کر کو ھاتن مێلاکا بیانی قەدەغەیە و ناھێتە فروتن، ب تنێ مێلکا مریشکێ یا خۆمالی ھەیە ئەو ژی گەلەک ب رێژەیەکا کێم دگەھیتە وان و دھێتە فروتن و گۆت: خەلکی داخوازیەکا ئێکجار زۆر ل سەر مێلاکا مریشکێ ھەیە و گەلەک پرسیار دکەن، بەلێ ژبەر قەدەغەبوونا وێ، نەشێن دابین بکەن و بفرۆشن.
د. دیار تەیب، رێڤەبەرێ ڤێتێرنەری ل پارێزگەھا دھۆکێ بۆ رۆژناما ئەڤرۆ دیار کر، دو جۆرێن مێلاکا مریشکێ ل بازاری ھەنە، یا خۆمالی و یا بیانی کو ژ بەرازیل و تورکیا دھێت و گۆت: فروتنا مێلاکا مریشکێ یا خۆمالی ب شێوەیەکێ نۆمال و ئاسایی دھێتە فروتن، ل ھەولێر و سلێمانیێ ژی ھەر ئەڤ رێنمایەنە، بەلێ مێلاکا بیانی ئەڤە دۆرێن حەفت سالانە ل ھەرێما کوردستانێ ئینان و فروتنا وێ ل بازاری یا ھاتیە قەدەغەکرن.
د. دیار دا زانین کو ل ڤێ دووماھیێ عیراقێ چاف نقاندنەک بۆ ئینانا مێلاکێ مریشکێ کریە و تەڤلی عیراقێ دبوو و ب رێکا وێ ھندەک جاران ب قاچاخی بەرەڤ ھەرێمێ ژی دھات، ھەتا نوکە بابەت ژی ب ڤی رەنگی برێڤەدچیت و ھژمارەکا کێم ل عیراقێ مۆلەتا ئینانا ڤێ مێلاکی ھەیە و گۆت: ئەوا ب قاچاخی ژی دھێتە فروتن، ژ لایێ چاڤدێریا بازرگانی ڤە دھێنە دەستەسەرکرن.