ئەزبام من داخوازا لێبۆرینێ نەدکر!!
د.چنار سەعد: نادیە موراد ل سەر ئاستێ جیهانێ ناسناما گەلە و نوونەرا ئازارێن کوردێن ئێزدیە، رۆژا دووشەمبی 19/6/2016ێ، هەڤپەیڤینەکا د.چنار سەعد، ئەنداما سەرکردایەتیا پارتی و بسپۆڕ ل زانستێن جڤاکناسی، ل دۆر هێرشا داعش بۆ سەر شنگال و کۆمەلکوژیا کوردێن ئێزدی پشکا ئینگلیزیا رووداو بەلاڤ کر، و ل تۆڕێن جڤاکی گەلەک رەخنە لێ هاتەگرتن، لەورا ناڤبری ل 21/6/2016ێ و ل هەمان رۆژنامە ب زمانێ کوردی د رۆنکرنەکێ دا داخوازا لێبۆرینێ ژ کوردێن ئێزدی کر و ناڤبری د رۆنکرنا خوە دا گازندە ژ جودیت نیورینگن، رۆژنامەڤانا رووداو کرن و کو د وێ هەڤپەیڤینا ئەنجامدای دا دبێژیت: بابەتێن وێ گەلەک ژێک پچاندینە و ب دروستی پێکڤە نەگرێداینە و مەبەستا وێ دڤێت ب پێدڤی نەگەهاندیە.
دیسان د رۆنکرنا خوەدا چنارخان ئاماژە ددەتە بکارئینانا دەستەواژا جڤاکێ داخستی، کو ئەڤ چەمکە د زانستێن سۆسیۆلۆژی دا گەلەک ب کاردهێت و زانایێن جڤاکناسی بۆ پۆلینکرنا جڤاکان چەندین پۆلین هەنە، یەک ژ وان پۆلینان دابەشکرنا جڤاکانە بۆ سەر جڤاکێ داخستی و جڤاکێ ڤەکری، جڤاکێن پاشکەتیێن جیهانا سیێ ب تایبەتی ئەوێن کو هەتا نها دامەزراوێن جڤاکی یێن سڤیل د ناڤ دا وەک پێویست گەشە نەکری، کو گرێدانەکا ب هێز هەیە بۆ تیتال و ئۆل و دین و بهایێن جڤاکیێن تەقلیدی و پەیوەندیێن جڤاکی یێن خێزانی و خزمایەتی تێدا ب هێزن و هژمارا کەسێن خێزانێ ژی پێک دئینن گەلەکن و تێکەلێکن و ئەڤ رەنگێن جڤاکان وەک جڤاکێن عەرەبی، کوردی و مللەتێن دی ل رۆژهەلاتا ناڤین دکەڤنە د چارچوڤێ ئەڤێ پۆلینێ دا. لەورا پێکهاتا ئێزدیان ژی هەر د ناڤ جڤاکێ کوردی دهێتە هژمارتن هەر ئەوێ پۆلینێ وەردگریت. ئەڤ رەنگە ناڤ ئینانە قەت ب رامانا بێ بهاکرنێ نینە، بەلکو ئەڤ ناڤئانینەکا زانستیە و گەلەک ژ جڤاکێن پێشکەتی ژی د وان قووناغان دا دەرباز بوونە.
دیسان چنارخان دبێژیت من د هەڤدیتنا خوە دا ئاماژە دایە وێ چەندێ کو ژنێن ئێزدی مەزنترین قوربانیێن دەستێ داعشن، لێ گیانێ وانێ بەرهنگاربوونێ ل هەر چاخەکێ دی ب هێزترە، کو بەری وێ ڕوودانێ ژنێن ئێزدی وەک پڕانیا ژنێن کوردستانێ و دەڤەرێ ب دەستێ ستەمکاریا تیتالێن جڤاکی نەخوەشی دیتینە و بێ دەستهەلات بوونە، ئەڤرۆ ڕۆلێ وانێ قوربانیدانێ هاتیە گوهارتن بۆ ڕۆلێ سەرکردایەتیێ و من نادیە موراد کریە نموونە کو هەرچەندە ئەو ئێکە ژ قوربانیان، لێ ئەڤرۆ ل سەر ئاستێ جیهانێ و ل ناڤەندێن نێڤدەولەتی یا بوویە ناسناما گەل و نوونەرایەتیا ئازارێن کوردێن ئێزدی دەکەت. ئەڤڕۆ ژنێن ئێزدی وەک پێشمەرگە و وەک گەریلا ل گەل برایێن خوە بەرگریێ ژ خاکا کوردستانێ دکەن و بەرهنگاری داعش دبن.
یا من دیتی و خواندی ل وان شلۆڤەکرنێن هەرەشە کرینە سەر چنارخانێ پڕانیا وان شلۆڤەکاران ئەنتی پارتی بوون و ب دیتنا من هەکە چنار خان نە پارتی بایە ب ڤی دەنگی هەرەشە ل سەر نەدهاتنە کرن. لەورا ئەز دێ بێژمە وان گەلۆ ئەڤەیە رێزگرتن ل بەرامبەری کچا شەهیدەکی داخوازا لێبۆرینێ ژ کوردێن ئێزدی خواستی کو ب هزرا من پێویستی چ لێبۆرینا نەدکر، چونکى ئەوا بۆ رۆژناما رووداو گۆتی بەری هینگی وەک سمینار ل پەرستگەها لالش ژی گۆتبوو و ئێزیدخانێ ب رێزگرتن و خۆشحالی ڤە پێشوازی لێ کربوو.
هەکە مەبەست ئەو بیت کو مانشێتێ هەڤدیتنا چنارخانێ ب ڤی رەنگی بوو (ئەگەر داعش نەبا کەسێ ئێزدی ناس نەدکرن) بەرێز مام جەلال دبیت وەک نوکتە گۆتبوو (خوزی مە دو هەلەبجێن دی ژی هەبان دا کورد پتر هاتبانە ناسکرن!!). هەکە وەسا بیت دیارە بەرێز مام جەلال ژی ب کیمیا بارانا هەلەبجە دلخۆش بوویە، لێ ناکەڤیتە باوەریا چ کەسان کو مەبەستا جامێری ئەو بیت!!
دیسان ئەم باش دزانین کو ئەو داستانێن هێزێن پێشمەرگەی د شەرێ داعش دا تۆمار کرین، ل سەرانسەری جیهانێ پێشمەرگە کریە هێمایێ خوەڕاگری و بەرخوەدانێ و بوویە ناسناما گەلێ کوردستانێ ل تەڤ جیهانێ، ئەم دکارین بێژین هەگەر ئەڤ شەرێ چەپەلێ داعش بەرهنگاری مە کری نەبا وی دەمی و هەتا نها ژی (بەغدا) ددانێن خوە ل مە گر دکەت و ب رێکا حەشدا شیعی ل سەر کەرکووکێ و دەڤەرێن هاتینە دابڕین هەرەشا شەری ل مە دکەت، هەکە ئەو شەر نەبا کەرکووک و ئەو دەڤەر ڤەنە دگەڕیانە هەمبێزا هەرێما کوردستانێ و دیسان بەری هسنگی ژ بەر شەرێن ناڤخۆیی ئەم هەموو دزانین ناڤێ پێشمەرگەی کەتبوو د ناڤ لیستا رەش دا و نها ژی چاوا سووندا تەڤایان سەرێ پێشمەرگەیە؟ ئەڤا مە دیارکری نابیتە ئەگەرێ کێمکرنا بهایێ پێشمەرگەی و ئەوا چنارخانێ ژی گۆتی نابیتە ئەگەرێ کێمکرنا بهایێ ئێزدیان، لەورا ئەز نە ل گەل داخوازا لێبۆرینا چنارخانێ مە و ئەوا وێ گۆتی راستیەکە و هەکە ئەو راستی چەندا تاڵ ژی بیت!!
ئەز دبێژم راستە پتر ژ حەفتێ فرمانان ب سەرێ کوردێن ئێزدی هاتینە، لێ ژ تەمەتی ڤێ فرمانێ دۆزا ئێزدیان بەرچاڤ نەبوویە، ئەڤەیە ئازادی و سەرخوەبوونێ قوربانیدان دڤێن و دڤێت مرۆڤ گوهێ خوە نەدەتە هندەک کەس و لایەنان و مەرەمێن وانێن سیاسی، چ دبێژن بلا بێژن.
هندەک ژ بابەتی دەرچوونە و دابەزینە سەر شاشیێن کارێ چنارخانێ وەک وەزیرا کاروبارێن شەهید و ئەنفالکریان، یادیارە نەتنێ شەهید لێ پێشمەرگە و ئەنفالکری و زیندانیێن سیاسی و ب پەسەندا ڤی لایەنی و لایەنێ هە و ب دیدەڤانیا وی کەسێ هە و پارتێن کوردستانێ کەسوکارێن گەلەکێن نەهەژی کرینە مفادار، ما هەر وەزیرەک هەبیت چ دزانیت هەکە دەوروبەر و خەلک هاریکار نەبن؟ هەکە ئەو شاشی نەبانە ل هەموو وەزارەتان ئەڤرۆ پرۆژێ سەرۆک بارزانی یێ چاکسازیێ ب هەر رەنگەکی بیت نەدهاتە ئەنجامدان.
ئەز نزانم ما چنارخانێ چ یا خراب گۆتیە؟، چونکی هەتا پێش کیمیابارانا هەلەبجە گەلەک مللەتان کورد نەدناسین. لێ پشتی هینگی کورد پتر هاتنە ناسین، و چنارخانێ نە ب مەرەمەکا خراب و شکاندنێ ناڤێ ئێزدیا ئینایە، خوە دنیا بەرۆڤاژی نەبوویە، راستە گەلەک مللەتێن جیهانێ نەدزانی ئێزدی هەنە یان نە، مخابن نها کورد ل گەل ئێک ب هێجەتن و دوژمن ژی پیلانێن چەپەل و قرێژی ددانن، ما دونیا ب سەرێکدا هات ناڤێ ئێزدیان ئینا؟!
دیسان کەس نابێژیت ئەڤە نە کارێ منە و “نان بۆ نانپێژی و گۆشت بۆ قەساب” و هەر کەسەک ژ مە رابوو خەبەر و کڕێتی و سڤکاتی گۆتنە ڤی لای و لایێ هە، و رۆلێ ئاژاوەگێریێ گێڕا و ناڤێ خوە کرە سیاسەتمەدار!! ب دیتنا من هەتا کار گەهشتیە وێ چەندێ و خوزی دیتنا من درەو بیت کو ژ ئەنجامێ قەسێن وان کیندارێن ئەزماندرێژی ل هەمبەر ڤێ هەڤپەیڤینا رووداو ل گەل چنارخانێ کری دوژمن و نەحەز دەلیڤێ ب کاربینن و بالەخانا سەرەکیا میدیایێن رووداو ل هەولێرا پایتەخت بکەنە ئەنجام کو مخابن چەند کارمەند و پاسەوان بریندار کەتن.
