پارتى و خوه ڤهكێشانا لایهنێن سیاسى ژ حكوومهتێ!
پشتى ههلبژارتنێن سالا 2013 ههڤكێشا سیاسى ل ههرێمێ گهلهك گهۆرین ب سهردا هاتن و لایهنێن ئۆپۆزسیۆنێ ژى بهشدارى حكوومهتێ بوون، بهلێ تشتێ سرنجراكێش ئهو بوو كو ههمى لایهن ب ئێك پرۆژه چوونه د بهرهیهكی دا دژى پارتى، ئهو ژى كێشا سهرۆكاتیا ههرێمێ بوو و ل وى دهمى نهوان لایهنان كاندید ههبوون و نهدڤیا ههلبژارتن ژی بێنه كرن ب تنێ دڤیا ئهو پۆست بۆ پارتى نهبیت و تایبهت دژى سهرۆكى و مالا بارزان بوون و ئهو پێنگاڤا ئێكێ بوو بۆ دژایهتكرنا پرۆژێ سهربخۆیێ و قهیرانهكا مهزن یا سیاسى ل ههرێمێ پهیدا كر و چ هزر بۆ بارودوخێ خهلكى و شهرێ داعش و قهیرانا دارایى نهكر.
درووشمێ خر لایهنان خزمهتكرنا خهلكى یه، بهلێ یا خویایه كو خزمهتكرنا خهلكى ب رێیا حكوومهتێ و دام و دهزگههێن میرى دئێته كرن نهكو ب رێیا درووشما و حزبێ، بهلێ رۆژ بۆ رۆژێ ئهڤ لایهنێن سیاسى ل ههرێمێ گهفێن خوه توندتر لێ دكهن دژى پارتى و ڤهكێشان ژ حكوومهتێ. ئهگهر ئهم ب هوورى سهحكهینه بابهتى دێ دیار بیت كو پرۆژێ خوه ڤهكێشان ژ حكوومهتێ ڤان لایهنان بهرى دو سالا ههبوویه و ههر دگهل پرۆژێ سهرۆكاتیا ههرێمێ بوو، بهلێ ل وى دهمى وان لایهنان باوهرى ب ئێك و دو نهبوو و چ لایهنان ئهڤ پێنگاڤه نههاڤێت و ترس ژ دهستدانا بهرژهوهندیێن خوه ههبوویه.
قهیرانا دارایى و گهندهلیێ دهڤێ ڤان لایهنان دژى پارتى ب ههمى رهنگان ڤهكر و ههر وهكى كو پارتى ب تنێ بهرپسیاره ژ ڤێ چهندێ بهلێ ئهڤه ماوهكه رۆژانه گهندهلیێن ڤان لایهنان یێ دهێنه ئاشكراكرن و باش دزانن دێ د ههلبژارتنان دا باجا ڤێ چهندێ دهن، لهورا دبینین كو رۆژانه ب رێیا راگههاندنێن خوه بهحسێ خوو ڤهكێشانێ ژ حكوومهتێ دكهن، داكو خوه حازر بكهن بۆ خاپاندنا خهلكى ب هندهك درووشمێن دى ل ههلبژارتنان و ڤان لایهنان شهرێ خوه دگهل پارتى ڤهگوهاستیه بهغدا و باشترین نموونه ههولا ژ ستاندنا باوهریێ بوو ژ هشیار زێبارى.
پشتى ئهڤ لایهنه تووشى شكهستنێن سیاسى یێن مهزن بووین ژ ههمى لاڤه و راستیا وان بۆ خهلكى دیار بووى نوكه یێ خوه رێك دئێخن و رێكهفتنا د ناڤبهرا ئێك و دو دا دكهن و راستیا دژایهتكرنا خوه بۆ پارتى و پرۆژێ سهربخۆیێ ب چهند درهو و شرۆڤێن بێ بنهما پهرجان دكهن و خویا دبیت كو ئهڤ لایهنه بۆ دژایهتكرنا پارتى و سهربخۆیا كوردستانێ دروست بووینه و ب ههمى هێزا خوه یێ كار دكهن و پیلانا دگێرن كو پرۆژێ سهربخۆیێ د چاڤێ خهلكی دا بشكێنن و بێخنه د چارچوڤێ ژیارا خهلكی دا.
بهلێ مخابن چ ژ ڤان لایهنان رێزهك بۆ ههستا خهلكى نهگرتیه و نهپارتى راستیا كێشا و قهیرانا بۆ خهلكى دیار كریه و ئهو پرۆژێ بۆ چاكسازیێ هاتیه راگههاندن ب دروستى جێبهجێ كر. و نهلایهنێن دى یێن سیاسى شیان ژ بلى دژایهتكرنا پارتى كارهكێ دى بكهن. لهورا زۆرا فهره بهرى ههلبژارتنا پارتى ڤى بارودوخى گهۆرینێن مهزن ب سهردا بینیت تایبهت بابهتێ چاكسازیێ و خهلكى ل راستى و دروستیا ڤان لایهنان هشیار بكهت. و خهلك ب خوه ژى چارهنڤیسێ خوه گورى رهفتارا هندهك كهس و لایهنا نهكهت و فهره ئهو خودانیێ ل پرۆژێ سهربخۆیێ بكهت.
