رێبهرێن كوردان و دهزیێ معاویهى
خهلیفێ موسلمانان (معاویێ كورێ بابێ سوفیانى) ئێك ژ كهسایهتیێن عهرهبان یێ بهرنیاسه ب زانین و ژیراتیێ. جارهكێ كابرایهكێ عهرهب پرسیار ژێ كر كانێ ئهو چهوا شیا بیست سالان وهك ئهمیرێ شامێ و بیست سالان وهك خهلیفه حوكمرانیێ بكهت و سهرهدهیهكا سهركهفتیانه ل گهل وان ههموو روودان و پێشهاتێن ل سهردهمێ وى هاتینه پێش بكهت. د بهرسڤدانێ دا گۆت “ئهز ناهێلم دهزیێ پهیوهندیێ د ناڤبهرا من و یێ بهرامبهر دا بێته قهتاندن، دهما ئهو د كێشێن ئهز ل دیف بهردهم و دهما ئهو بهردهت ئهز د كێشم”. ئهڤ گۆتنه یا بوویه پهندهكا عهرهبان ل سهر چهوانیا مرۆڤ دێ كهسهكێ سهركهفتى بیت د رێڤهبرنێ دا ل سهر ههموو وارێن رێڤهبرنێ و پهیوهندیان. ئهڤرۆ رێبهرێن مه كوردان ل كوردستانێ ل سهر ئاستێ سیاسى یێن ژێك دوور كهفتین و پهیوهندیێن وان یێن د خرابترین ئاست دا د بۆرن، ب تنێ دهزیێ پهیوهندیێ ئهوێ ماى پشكداریا وانه د حكومهتا ههرێما كوردستانێ دا. ئهگهر ههلسهنگاندهنهكا كورت بۆ كارێ حكوومهتێ بكهین، دێ بینین كو یا سهركهفتیه د بادهكێن ئاسایشێ و رێڤهبرنا شهرى و پهیوهندیێن دهرڤه دا و د ههماندهم دا یا د قهیرانهكا ئابورى و دارایى را دبۆریت كو بوویه ئهگهرێ پهیدابوونا بێ باوهریهكێ د ناڤا مللهتى دا. د ڤێ ئالۆزیان دا حكوومهت و مللهت كهفتیه تێدا پێدڤیه ل سهر لایهنێن سیاسى ئهوێن بهرپرس و بهرپرسیار ئێك بگرن و پێكڤه ل رێكێن چارهسهریێ بگهریێن بۆ نههێلانا وان قهیرانا. لێ بهروڤاژى پێكڤه كاركرنێ ئهو د ئاماده نینن ل گهل ئێك كۆم ببن و گوه بدهنه بیر و بۆچوونێن ئێ كو دو.
ئێكهتى وهك لایهنهكێ سهرهكیێ حوكمرانیێ ل كوردستانێ، سهركردایهتیا وێ د ناڤخۆیی دا د پر ئاریشهنه و پشتى نهخۆشیا سكرتێرێ گشتى یێن ماینه بێ سهر و ئێكهتیا وان د ناڤ ئێكهتیێ دا یا كهفتیه د مهترسیێ دا. ئهگهر دوبهركیا وان چارهسهر نهبیت دێ رهنگڤهدانهكا خراب ئێخته سهر رێڤهبرنا كوردستانێ و چهوانیا سهرهدهریكرنا وان ل گهل لایهنێن دى. بزاڤا گوران یا د وهرزێ بهنڤهدانێ دا و یا كار دكهت خوه بكهته سهركێشا جهمسهرهكێ ل سولهیمانیێ و ههڤركیا ههولێرێ بكهت كو ههلگرێن ڤێ هزرێ د ئاماده نینن بۆ دان و ستاندنێ و پێكڤه كاركرنێ. پارتى ب تنێ یا بوویه سهرێ خهمان و ههموو لایهنێن دى ئهو یا كریه ئارمانجا هێرش و رهخنان و هزر د كهن كو پارتى خودانا كلیلا چارهسهریێ یه. ئێكگرتوو و كۆمهلێ كۆمبوونان دكهن ل سهر هزرا ڤهكێشانێ ژ حكوومهتێ. ب دیتنا من، ههر ڤهكێشانهكا ئێكگرتوو و كۆمهلا ئیسلامى ژ حكوومهتا ههرێما كوردستانێ دێ بارودوخى ئالۆزتر لێ كهن و دێ كوردستانێ بهر ب ئاقارهكێ نهدیارڤه بهن. ئهگهر ئهو هزر دكهن دێ ب ڤهكێشانێ ههلویستهكى وهرگرن بهرامبهر پارتى و مفاژێ ئێته وهرگرتن د ههلبژارتنێن سالا 2017 دا، بلا باش بزانن كو ل سهرڤى دهست و دانى هیچ ههلبژارتنهك نائێته كرن. باشترین سیناریویا ژ ڤهكێشانا وان دهربكهڤیت دابهشكرنا كوردستانێ یه ل سهر دو یان سێ زونێت لاواز و ل بن دهستێوهردانا هێزێن عیراقى و یێن دهولهتێن ههڤسنوورێ كوردستانى و ئهو خهون و هیڤیێن مه ب كوردستانێ ڤه ددیتن و ههین دێ بنه ئاخ و ئاخینك. ئهڤرۆ كوردستان یا د شهرهكێ مهزن دا و ب سهدان هزاران ژ كورێن ڤى مللهتى یێن ل بهروكێن شهرى و بهرگریێ ژ ئاخا كوردستانێ دكهن و مللهتێ كورد دپارێزن ژ دروندهترین دوژمن كو پێدڤیه هزرا ههر تاكه كوردهكى و ب تایبهت رێبهران، بێته تهرخانكرن بۆ پشتهڤانیا پێشمهرگههى و سهركهفتنا ئێكجارى د ڤى شهری دا. ئهگهر رێبهرێن كوردان بڤێت كوردستانهكا ئێكگرتى و خودان سهنگ ئاڤا بكهن پێدڤیه ل شوینا تۆمهتباركرنێ و ڤهكێشانێ و خوه ڤهدزینێ ژ بهرپرسایهتیێ، ههموو پێكڤه دهزیێ معاویهى بكهنه لاستیك و هزر د چارهسهریا كێشان دا بكهن و ل دیف داخوازیا سهرۆكاتیا حكوومهتا ههرێمێ ئامادهى كۆمبوونێ ببن و ل وێرێ ههر گازندهكا ههبیت ئارستهى سهرۆكاتیا حكوومهتێ بكهن و ژ نێزیك گوهداریا وان بكهن دا بزانن ئهگهرێن قهیرانێ چنه و چهوا دێ چارهسهر بن. بلا كهس نهبیته ئهگهرێ قهتاندنا دهزیێ پهیوهندیێ د ناڤبهرا هێزێن كوردان دا ژ بهرقهتیانا وى دهزى ڤهقهتیانا مللهتى یه و پرت و بهلاڤبوونا ئاخا كوردستانێ یه.
