د ناڤبهرا رهفتارا سیاسى و ئهقلیهتا پاشكهفتى دا!
بێگومان د دونیا سیاسهتێ دا ئهگهر ئهم ب هوورى تهماشا بكهین دێ بینین كو ئێك تشتی گهلهك گرنگیا خوه یا ههى و دشێم بێژێم كو فهره ههر هێزهكا سیاسى پهیرهو بكهت ئهو ژی رهفتارا سیاسى یه چ ههمبهر پارتێن دى یێن سیاسى بیت و چ بهرامبهر جهماوهر و لایهنگرێن خوه. ههر وهسا د سیاسهتێ دا هندهك پرهنسیبێن ههین كو لادان ژ وان دبیته ئهگهرێ تێكچوونا بهلانسا سیاسى و ئهو ژی بێگومان ژلایێ دهروونى ڤه كارتیكرنێ ل وهلاتیێن وى نشتیمانى دكهت و پێدڤى یه پارتێن سیاسى ئهڤێ چهندێ ب هند وهرگرن و نههێنه ژبیركرن. ههلبهت ئهوا د ناڤ هندهك ژ پارتێن سیاسى یێن كوردستانێ دا دبینم جیاوازیهكا زۆر دگهل هێزێن دى یێن جیهانێ ههیه و دبینین كو پێنگاڤ و كریارا وان ب هیچ شیوهیهكی دگهل درووشمێ وان یێ پارتایهتى ناگونجن و جهێ داخێ یه كو هند پارتێن كوردى كار بۆ بهرژهوهندى یێن گهلێ كورد ناكهن، بهلكو ژ ب حهزا خوه یان بێ حهزا خوه بریارێن دژى بهرژهوهندى یا كوردستانێ ددهن و ههلویستێ وان چ جیاوازیهك دگهل ههلویستێ نهیارێن كوردان نینه و ههتا د هندهك بابهتان دا بزاڤێ دكهن، داكو د ڤێ گۆرهپانێ دا بهرا نهیارا راكهن و ببنه قارهمانێن ڤێ گۆرهپانێ و جهێ داخێ یه ڤێ چهندێ بۆ خوه دكهنه شانازى. دیسان وهكو ئهز دبینم ئێدى ژبۆ ملكهچكرنا سهركردایهتیا سیاسى ل ههولێرێ كار ب دهستێن بهغدایێ پێدڤى ب چ پێنگاڤێن راستهوخۆ نینه و پلانا وان تهنها دهرز ئێخستنه د ناڤبهرا لایهنێن كوردى كو د ڤێ چهندێ دا سهركهفتى بووینه و گههشتیه ڤێ رادهى دا كو ههتا د پرسێن چارهنڤیساز دا ئێدى پرسێ ب ئێكو دو ناكهن و ئێكگرتى نینن و ههر لایهنهك دههولهكێ لێ دهت. ب راستى ئهگهر ب تایبهت بهرێ خوه بدهینه ههلویستێ ڤێ دووماهیێ یێ ئێكهتى یا نشتیمانى و بزاڤا گۆڕان دبینین كو چ جیاوازیهك دگهل ههلویستێ دهولهتا یاسایێ نینه كو ئهڤه پتر ژ دو سالانه بریار د برسیكرنا گهلێ كورد دایه و جهێ سهرسورمانێ یه هندهك جاران زاردهڤێ وان دئاخڤن و تهنها ئهگهر ب زمانێ كوردى نهئاخڤن مرۆڤ ههست ب كوردبوونا وان ناكهت. د بهرامبهر دا پارتێن دیترێن ههین كو ب ههمان نهفهسا بهرێ كار ژبۆ بدهستڤهئینانا مافێ گهلێ كورد دكهن و ب ههمى شیانێن خوه بزاڤێ دكهن پرۆژێ نهتهوهی و سهربخوبوونا كوردستانێ بهێنه جێبهجیكرن و ههتا گههشتیه وى رادهى كو گهلهك مافێن خوه بكهنه قوربانى لایهنێن دی پێ خهمهت ئێك ههلویستى یا سیاسى یا كوردى و ل گهلهك بابهتا نهخاسمه ژلایێ پله و پۆستا داگێران بۆ لایهنێن دی یێن كوردى كریه. ل ڤێره پرسیار دهێنه كرن كو ئایا پارتى دیموكراتى كوردستانێ ئهڤ چهنده نهكریه؟ ئایا ئهوا ئهو لایهن دكهن دهستكهفته یان ئهوا پارتى دكهت؟ ئایا ئهو لایهنێن دژى پرۆژێ نهتهوهى قهد هزر د ڤێ چهندێ دا كریه كو پۆستان هیچ گرنگیهك بۆ پارتى نینه و ئاماده بوویه دلێ زۆربهیا كادرێن خوه بهێلیت و ههمى پۆستێن عیراقێ و بهغدا بدهته لایهنێن دى پێخهمهت گههاندنا ڤى پرۆژهى بۆ كهنارهكێ ئارام؟ ئایا هزر ل ڤێ چهندێ كریه كو ئێدى جهماوهرێ وان راستى و دروستى یا بابهتى باش تێ دگههن و ئێدى نهئامادهنه ل دووڤ بچن؟ ژبهركو ئهگهر ب ڤى رهنگى نهبیت بۆچى ههر دهمێ دهولهتا یاسا و دژكارێن ههلویستێ جهنابێ سهرۆك بارزانى باسێ ههلویستێ جیاوازێ پارێزگهها سلێمانیێ ل سهر سهربخۆبوونێ و ریفراندۆمێ دكهن هیچ لایهنهك ل ڤێ دهڤهرێ داخویانیهكێ بهلاڤ ناكهت و دژى ناراوهستن و وان لایهنا ب درهوین نادهرێخن ئهڤه د وى دهمى دایه كو سهرۆكێ ههرێمى ب سیاسهتا خوهیا حهكیمانه شیایه سرنجا زۆر وهلاتان بۆ كوردستانێ رابكێشێن و ههرێمێ بكهته ناڤهندهكا بریاردانێ. ئێدى بریار بۆ ههمى گهلێ كوردستانێ یه بێژێن كیژ دهستكهفته, یێ وان یان یى مه؟.
