چاڤ پێ نهرابوونا ناڤ جڤاكى و تێكهلبوون د سیاسهتێ دا!
ههر دهمهكێ مه شانازى ب ئێك دو بر ل وى دهمى سهربخۆیى نه مهحاله. ئێك ژ دیاردێن كهلتۆره ههر ژ كهڤن دا د ناڤ جڤاكێ كوردی دا كو ههست پێ هاتیه كرن، ئهوه كو ئهم جڤاكهكین كهیف خۆش نابین ب سهركهفتنا یێ بهرامبهر، بهلكو بهرۆڤاژى كار سهر وێ چهندێ دكهین بهایێ وێ سهركهفتنێ كێم بكهین هندى د شیان دا بیت ههتا ئهگهر سهر حسێبا ژناڤچوونا مهژى بیت!. مێژوویا بزاڤا سیاسیا كوردستانێ ژى شاهدیا وێ راستیا تهعهل ددهت. ئهوێ راستیا كو نیشا ددهت، پیلانێن ئهوان لایهنا دژى سهركهفتنا لایهنهكى كو ژ بۆ دهستڤهئینانا مافهكێ رهوا بۆ ئهڤى مللهتێ زۆلم ل خوه كرى كار كریه. د گهرمه گهرما بهحسكرنا وهلاتهكێ سهربخۆ دا، د بارودوخهكێ ههستیار كو ئهگهرێن ژناڤبرنا سنووران ههیه ل ڤێ دهڤهرێ و ههولدانا هندهك لایهنا كو ئهڤێ دهلیڤێ ب بها وهردگرن و كار دكهن ژبۆ دروستكرنا سنوورێن وهلاتهكى ب ناڤێ كوردستان كو سنوورێن وێ ل سهر نهخشێ جیهانێ بێته وێنهكرن.
د بهرامبهر دا چهندین لایهن كار دكهن و ئاستهنگان دروست دكهن ژ بۆ ڤێ ههولدانا بهردهوام یا سهربخۆبوونا كوردستانێ. ل سهر ئاستێ ناڤخۆیى چهندین پارت و لایهن ب سازیێن خوه یێن راگههاندنێ و ب كور و سمینارێن بهردهوام بهحسێ لاوازیا پێگههێ سهرۆكاتیا ههرێمێ دكهن. و كار دكهن ژ بۆ بهرزهكرن و لهكهداركرنا وان ههولێن كو سهر ئاستهكێ بلند یێ نێڤدهولهتى مه نێزیكى وێ راستیێ دكهن یا كو خهونا چهندین سالان بوویه. ئهڤه دهمهكه سهرۆكێ ههرێما كوردستانێ سهرهدانێن گرنگ ئهنجام ددهت ژ بۆ ب هێزكرن و گههاندنا حهز و پهیاما گهلێ كوردستانێ بۆ وهلاتێن زلهێز، لێ ژ بهر ململانا سیاسى و ههڤركیا ناڤخۆیى، لایهنێن نهبهرپرسیار دهستێ نهحهزێن ڤێ دۆزێ درێژ دكهن ژ بۆ تێكدانا ئهڤان ههولێن بهردهوام. ئهم مللهتهكین سومبولێن مه جودانه و رهوشهنبیرێن مه هاتینه لێكڤهكرن، هونهرمهندێن مه یێن پارتانه و لهشكرێ مه پارچه پارچه بوویه، دهڤهردارى سهر مه زال بوویه. ئهڤجا ژ بهر ڤێ چهندێ كو ئهم رێزێ ل یهك دو ناگرین، رێز ژى ل مه ناهێته گرتن، ههتا نوكه كاربدهست و دهستههلاتدارێن مه نهشیاینه ب تهندروستى كارێ سیاسى ل ڤێ ههرێمێ ب رێڤه ببهن و سیاسهتێ تێكهلى بنهمایێن سهرهكى و پیرۆزیێن ڤى مللهتى نهكهن. ئارماجا ئهوان مانا وانه و شێلیبوونا بارودوخێ بازرگانیا ئهوانه.
دڤێن ب شانازى بهحسێ ههولێن وى سهرۆكێ ههلبژارتى د ناڤ وهلاتیان دا بێته كرن و پشتهڤانی ژى بۆ بێته كرن، چونكی بۆ ڤى دهمى یێ كو كوردان ژ ڤێ شكهفتا تارى دهرباز دكهت سهرۆكێ ههرێما كوردستانێ یه و ب پشتهڤانیا پارت و لایهن و وهلاتیێن كوردستانێ. بهرۆڤاژى ڤێ چهندێ ئهگهر كهسێ ب سهرۆكێ خوه نهزانین ل ڤى دهمى، دێ چ د خزمهتا مهدا بیت، ئهگهر مه نوونهرهك نهبیت دێ چاوا مافێن مه ب دهستڤه ئێن. یا كو دڤێت ههمى وێ راستیێ پهسهند بكهن ئهوه كو ئهڤرۆ ئهم پێویستى سهرۆكى نه كو مه ژ ڤێ قووناغێ دهرباز بكهت.
