ئاشتی هه‌ورامی ل نیڤه‌كێ دا
پشتی بێ ده‌نگبوونه‌كا درێژ، وه‌زیرێ سامانێن سروشتی ل هه‌رێما كوردستانێ (ئاشتی هه‌ورامی) ل دیدارا (مێر) یا سیێ ل هه‌ولێرێ، ل سه‌ر پاشه‌رۆژا قووناغا رزگاركرنا پشتی مووسلێ ژ ده‌ستێن داعشێ بێ ده‌نگی شكاند و وه‌ها خویا كر كو هه‌كه په‌ترۆل بچیته 100 دۆلاران ژی و رێكه‌فتن ژی دگه‌ل به‌غدا بهێته كرن، هه‌ر كریزا دارایی یا هه‌رێمێ چاره نابیت. راسته (هه‌ورامی) خه‌لكێ هه‌رێما كوردستانێ ب ڤی په‌یامی ئێكجار ره‌شبین و بێ هیڤی كر، چونكی خه‌لكه‌ك ل هیڤیێ بوو، تایبه‌ت توێژا مامۆستایان و فه‌رمانبه‌ران كو په‌یامه‌كا خوه‌ش ده‌رباره‌ی مووچه و پاشكه‌ڤتی بۆ سالا نوو ب بهیسن، لێ سوحبه‌ت به‌رۆڤاژی ده‌ركه‌فت و نه‌خوه‌شیێن خه‌لكه‌كی زێده‌تر لێ هاتن. هه‌لبه‌ت ئاخافتنا وه‌زیرێ سامانێن سروشتی د جهێ خوه دایه و جامێری راستیا خوه گۆت، ژ به‌ر كو ئه‌و ده‌رگه‌هڤانێ سه‌ره‌كیێ داهاتێ هه‌رێمێ یه و نهێنیێن هوور و گر دزانیت و خه‌لكی ناكه‌نینیت و ب حوكمێ لۆژیكێ واقعێ هه‌یی دگرینیت. ئه‌ڤه وێ گۆتنێ دهینته بیرا من ((ده‌رمان یێ ته‌عله لێ چاره‌یه)). واته هه‌كه ناڤبری ئه‌ڤ ئاخافتنه نه گۆتبا ئانكو ئه‌و خوه ژی دخاپینیت و خه‌لكه‌كی ژی دخاپینیت و خه‌لكێ هه‌رێمێ دا هه‌ر ل (هیڤیا فریێ گای مینیت). ئه‌ز ل ڤێره وه‌ك كه‌سه‌ك ره‌وشا هه‌رێمێ دبینم ڤان گۆتنان دبێژم، نه وه‌ك شاره‌زا و ئابوورناسه‌ك، لێ راستیا گۆتنا (هه‌ورامی) ناهێته مانده‌لكرن و ئه‌وا گۆتی كێمه و هێشتا وێڤه‌تره. كه‌واته، هه‌كه هه‌رێما كوردستانێ، وه‌ك واقع دو ئیداره‌یی بیت، ناكۆكیێن ناڤخوه‌یی د گوپیتكا خوه دا بن، كه‌س خوه ب كه‌سێ نه‌ده‌ت و داگێڕانێ بۆ یێ دی نه‌كه‌ت، ئابووره‌ك هه‌بیت پتر ژ 30 ملیار دۆلاران یێ ده‌یندار بیت، 700 هزار مووچه‌خوارێن بن دیوار هه‌بن، پرۆژه‌یێن خزمه‌تكاری نیمچه راوه‌ستیای بن، خه‌لكێ مه هه‌می به‌ر‌خوار بیت (مستهلك)، شه‌ڕێ داعشێ هێشتا یێ گه‌رم بیت، دزی، گه‌ندلی د جهێ خوه دا بن، په‌ڕله‌مان ژ كار كه‌تبیت، ده‌ستهه‌لات ده‌ستهه‌لاتا حزبان بیت و دووماهیا نه‌دووماهی دۆسه‌یا فرۆشتنا سامانێن سروشتی یێن هه‌رێمێ نه‌زه‌لال بیت و ب تنێ هنده‌ك كه‌س بزانن، هه‌لبه‌ت بهایێ په‌ترۆلێ بچیته 200 دۆلاران ژی ب ڤی ده‌ستوداری قه‌یران چاره نابیت و رۆژ بۆ رۆژێ دێ خرابتر لێ هێت و ته‌په د مه‌یدانا حزبێن هه‌رێما كوردستانێ دایه و چ ئالی دبێ گوننه‌ه نینن، لێ ب رێژه‌یی هه‌ر سڤۆره و به‌ر و منێن خوه، به‌رپرسیاریا تلۆڤه‌یێن قه‌یرانێن نه‌چاره بوویێن هه‌رێما كوردستانێ وه‌ردگریت.
