ئایا ئهڤه شهرێ داویێ یێ ئێكلاكرنا سنوورێن كوردستانێ یه؟!
دیاره ئهڤ خهونا ئازادیا كوردستانێ د دلێ گهلێ مه دا یا كهڤنه و ژ بهر هندێ ههمى شهڕ و شۆرهش و بهرخودانێن مللهتێ كورد بۆ ئازادى و سهربخۆیا كوردستانێ بووینه، بێگومان مه بۆ ڤێ خهونێ گهلهك دهردهسهرى دهرباز كرینه و دگهل ڤێ ژى خهبات و قوربانیدانا گهلێ كورد د ڤان سهد سالێن بۆرى دا یا دیاره و ل گۆر وان نههامهتێن ب سهرێ گهلێ مه هاتین ژى ههر پێخهمهت هندێ بووینه كو ئهو خهونا گهلێ مه ببیته راستی و ههلبهت ئهڤه بۆ رۆژهكا وهكى ئهڤرۆ گهلێ كورد د ههڤكێشێن نیڤدهولهتى دا بهایهكێ مهزن یێ ههى، چونكی د وارێ پراكتیكى دا ئهو راستیێن گهلێ مه بۆ ڤێ دونیایێ دیار بوون، ب تایبهتى ل سهر هێز و خۆراكریا گهلێ كورد د وان كاودان و رۆژێن نهخوازیار دا بهرامبهرى مهزنترین هێزا تیرۆرستێن داعشێ، لهوا ئهڤرو ئاخفتن و پێگههێ گهلێ كورد ل سهر ئاستێ وهلاتێن جیهانێ بلند دهێـه نرخاندن.
ئهڤرۆ گرنگی پێدانا گهلێ كورد و پشتهڤانیا نیڤدهولهتى دبیته ئاوری و ئاماژهیهك بۆ گشت دهولهتێن ههرێمى بۆ هندێ تێ بگههن مه سوبههیهكا ئازاد و گهش دڤێت و ئهڤه ئهگهر و دهرئهنجامێن بهرههڤى و پێشتڤهچوونا پێشمهرگێ كوردستانێ یه ل تهڤایا بهروكێن شهڕى و ل دویف تۆماركرنا وان سهركهفتن و داستانێن بێ وێنه دهێت كو ئهڤرۆ بووینه جهێ پرسیار وحێبهتیا ههمى ئالیێن جیهانێ، ب تایبهتى ئهمریكا و گوروڤا ڤێ یهكێ ل سهر نهخشه و پلانێن ڤێ داویێ بۆ گرتنا مووسلێ كو د ماوهیهكێ كێم دا پێشیرهوى و هێزا گهرماتیا پێشمهرگێ قارهمان شیا كونترۆلا دهڤهركا بهرفرهه بكهت و ژ دهستێ داعشێ بینته دهرێ، ههروهسا بۆ راستیا ڤى بابهتى و دێ پشتراست بێژین ژ زاردهڤێ مهزنه بهرپرسێن ئهمریكا هاتیه گۆتن” كو ئهمریكا شانازیێ ب وێ دوستایهتیێ و ههڤالبهندیا خوه دگهل مللهتێ كورد و ههرێما كوردستانێ دكهن”، ئهكید ئهڤ ههلسهنگاندن و مهزناهیه بۆ گهلێ كورد دبیته پشتهفاتیهكا ههروههر بۆ نههێلانا ههمى بهربهست و دهستێوهردانێن دژى گهلێ كورد، ههروهسا ئاماژهیهكه بۆ گههشتنا ئارمانجێن گهلێ مه، چونكی كورد و سهركردایهتیا كوردی ب سهركهتن و مرۆڤاتیا خوه بۆ جیهانا ئهڤرۆ دیار كریه و شیا دهنگ و رهنگێ گهلێ كورد ل ههمى سازیێن نیڤدهولهتى بهلاڤ بكهت و دیاره ئیرۆ باش تێته دیتن و خواندن، لهورا ئهم د وێ باوهریێ داینه كو پشتهڤانیهكا ب هێز و بهرچاڤ ژ لایێ چڤاتا نیڤدهولهتى ڤه بۆ گهلێ كورد و ههریما كوردستانێ ههیه و ل گۆر ڤێ یهكێ تێته دیتن كو رۆژێن سهركهتنا گهلێ مه نێزیك بووینه و رهنگه ئهڤه ئاماژێن مزگینیا رۆژێن خۆشن بۆ گهلێ مه، چونكی كورد ئهڤرۆ هێزهكا سهرهكیه ل دهڤهرێ و ئهكید ل سهر ڤێ چهندێ جهێ خوه كریه و دیاره بۆ كێشان و پیڤانا دهڤهرێ رهئى و بریارا خوه ههیه و ژبهر هندێ ئهڤرۆ زهمینه بۆ گهلێ مه خوه ش بوویه كو هندهك گاڤێن چارهنڤیس و پراكتیك ل سهر پاشهرۆژا گهلێ كورد بهێنه هاڤێتن. ژبهركو ژیان و سهركهتنا ههر گهل و مللهتهكى د ههلویست و ڤهلڤینا هێزا وى مللهتى دا بهلانس بۆ تێته گهۆرین و راستیا ڤێ چ دهمهكى وهكی ئهڤرۆ گهلێ كورد نهبوویه خودان هێز و پێگهه و بریارا خوه ههبیت و دیاره هێزا نیڤدهولهتى ههمى ل پشت گهلێ مهیه، چونكی ئیرۆ پهسنا كورد و ههرێما كوردستانێ تێته كرن.
بێگومان ئهڤه رامان و ئاماژێن وێ یهكێ نه، كو گهلێ كورد ژ مهترسى و پێلێكرنێنن جاران رزگار بوویه، بهلێ ئهگهر ههبن ئهوێن هێشتا مهژی گهمارگرتی و نیازێن یاریكرنێن ب چارهنڤێسێ گهلێ مه د دلێ وان دا ههبیت بلا ل وێ خهونێ نهنڤن و خوه ماندى نهكهن! چونكی نهشێن مێژوویا بۆرى بۆ خوه بزڤرینن و دێ پهشیمانێ وێ بریارێ بن، ئهڤجا دخوازین ئهڤ ئالیێن ههڤدژ خوه ژ وێ عهقلیهتا كهڤن و پاشكهتى دوور بكهن، خهلكێ مه ژى ئیرۆ چاڤهرێى ئیراده و بریارهكا ئێكگرتى یه بۆ پهیام و راگههاندنا سهربخۆیا كوردستانێ، چونكی باش رون و دیار بوویه ئهڤرۆ كورد بوویه ئالیێ راگرتن و ههڤسهنگیا زۆربهیا كێشێن دهڤهرێ، ههلبهت ئهڤه بۆ وێ یهكێ دزڤریت كو گهلێ كورد شیا رایا گشتى بۆ ئالیێ كورد و ههریما كوردستانێ بكێشیت.
ژ ئالیهكێ دی ڤه كورد شیاینه رێخۆشكرنێنن سیاسى دگهل ههمى ئالیهكى دروست بكهن و تێگههشتنێن ههڤپشك دگهل وان ئالیێن ههڤرك دژى كێشهیا كوردى راسڤه بكهن بۆ هندێ بێنه سهرمێزا دانوستاندنان و رازى بكهن داكو ئهو ئاوری و دیتنێن بهرێ ل سهر گهلێ مه بهرۆڤاژى بهێنه وهگرتن، ههروهسا ئهو ژى بهێته زانین كو كورد چ جاران نهبووینه مهترسى ل سهر چ لایهكى و ئهڤرۆ و ئایندهی ژى نابنه مهترسى ل سهر بهرژهوهندی و ئهولههیا هیچ لایهكى، بهلێ ئهوا گرنگ پێشهوازى لێ بێتهكرن ئهڤهیه ئاورێن دیموكراسیهت و مرۆڤایهتى بۆ گهلێ مه ههبیت، دا كو سوبههى ئهم ببینه ههڤسنوور و جیرانێن باش بۆ گشت وهلاتێن ههرێمى بۆ هندێ ئهو تێكهلیێن ههڤپشك و برایهتى بهێنه پاراستن. ژ لایهكێ دی ڤه ئهم دخوازین چ لایهك ب دووربوونێن خوه یێن كهڤن و ڤهشارتى و نهزهلال گهلێ مه نهبینن و نهخوینن، بهلكو بۆ ڤێ قووناغێ یا فهره كو ههمى ئالیێن دهرهكى خوه نێزیكى گهلێ كورد بكهن و نهبنه رێگر د رێیا خواست و ئارمانجێن مللهتێ كورد دا، چونكی ڤیا بزانن نهشیان ب چهوساندن و دژایهتیێ، گهلێ كورد بهرزه بكهن.
ئهڤرۆ دهنگێ گهلێ كورد ل ههمى ئالیێن جیهانێ بلند بوویه و ب تایبهتى پشتى شهرێ داعشێ، چونكی ئهڤ شهرێ هاتیه فهرزكرن ل سهر گهلێ مه ههمى راستیێن بهرێ و مێژوویا زۆرداریێ ل سهر گهلێ كورد بۆ جڤاكێ نیڤدهولهتى دیار بوون، لهوا ڤێ پشتهڤانیێ دكهن و دهست ژ كوردان بهرنادهن
لهورا فهره بێژین بلا رزگاركرنا مووسلێ ببیته دهرگههێ دهستپكهكا نوو یا ژیانا سیاسى دگهل ههمى ئالیێن عیراقی و ب تایبهتى یێن كوردى كو پێدڤیه ئێكگرتنا هێزێن سیاسى یێن كورد ببیته راستیهك بۆ بریار و پێگههێ گهلێ مه بۆ وێ خهونا چاڤهرێكریا دهولهتا كوردى، كو راگههاندنا دهولهتا كوردى یه.
