رێڤەبەرێ ھولا گرتیا زاخۆ: مە چو دەمان خەمساری ل گەل یانا زاخۆ نەکریە
زاخۆ,ھشیار دوبانکی:
کارگێریا ھولا گرتی یا ناڤەندا وەرزشی ل باژیرێ زاخۆ دیارکر ھەتا نوکە دەرگەھێ ھولێ بۆ تیمێن یانا زاخۆ د ڤەکرینە و ئەوان چو خەمساری بەرامبەر ئەوان نەکریە چو دەمان.
زیدەتر خدر ئەحمەد مەلا ریڤەبەرێ ھولا گرتیا ناڤەندا وەرزشی ل زاخۆ د داخویانیەکێ دا بۆ روژناما ئەڤرۆ دبێژیت : چەندین سالە مە دەرگەھێ ھولێ بۆ تیمێن پێگەھشتی و لاوێن یانا زاخۆ ڤەکریە ھەردیسان بۆ تیما ئێکێ و ھەموو یاریێن ئەوان ژێ ل ھولا گرتیا ناڤەندێ دھێنەکرن و چو خەمساری مە ل گەل تیمێن زاخۆ نەکرینە سەرەرای کێمبوونا میلاکێ مە ئەم ب خوە سەخبیری و پاقژکرنا ھولێ دکەین و گەلەک جاران ھەتا دەرنگ شەڤ کارمەندێن مە ھول پاقژکریە ئەڤ چەندە ھەمی دکەین بتنێ بۆ بەرژوەندیا لاوێن زاخۆ خەلکێ زاخۆ.
ناڤبری زێدەتر گوت: ئامیرێ ئەلکترونی ژ کارکەفتیە و مە داخوازی ژ رێڤەبەریا وەرزشی یا دھۆکێ کریە ئامیری ھولێ بۆ مە دروست بکەن ئەوان سوز دایێ ھەر تشتەکێ د شیانێن ئەوان دا بیت بۆ بکەن لێ پێدڤیە یانا زاخۆ ژێ خوە ل ھولێ بکەنە خودان و ھاریکاریا مە بکەن بۆ سەخبیری و چاڤدێریا ھولێ ژبەرکو نوکە قارەمانیێن ناڤەندا نەماینە بتنێ تیما زاخۆ مفا دارا ژ ڤێ ھولێ .
ل دووماھیێ ناڤبری سوپاسیا رێڤەبەرێ وەرزشی یێ پارێزگەھا دھۆکێ دکەت بۆ پشتەڤانیا ئەوی یا بەدەوام ل رێڤەبەریا ناڤەندا وەرزشی ل زاخۆ .