پارتى و خوە حازرکرن بۆ قووناغەکا نوو
سەرەرایى کو کوردستانێ ب گشتى و پارتى ب تایبەتى قووناغێن گەلەگ سەخت و مەترسیدار دەرباز کرینە، بەلێ گومان تێدا نینە قووناغا داهاتى دێ قووناغەکا زۆرا ب زەحمەت و مەترسیدارتر بیت، لەورا پێدڤى خوە حازرکرنەکا گەلەک باشە ژ هەمى لاڤە.
پشتى راستیا پیلانێن هندەک لایەنێن سیاسى یێن هەرێمێ و یێن عیراقێ دیار بوویى کو هەولا دابەشکرنا هەرێمێ ددەن و دڤێت پارێزگەها سلێمانیێ ژ پارێزگەهەکا کوردستانى بکەنە پارێزگەهەکا عیراقى یان سەردەمێ دو ئیدارەیى بزڤرینەڤە! و پشتى پرۆژێ ئیرانێ د دەڤەرێ دا تووشى چەند گرفت و شکەستنا بووى تایبەت د پرۆسا ئازادکرنا مووسل دا و ب ئاشکرایى گەفکرن و دژایەتیا خوە بۆ پارتى و مالا بارزان نیشا دایى و پشتى کۆمارى د هەلبژارتنێن سەرۆکاتیا ئەمریکا دا ب سەرکەفتین دیار بوو کو دەڤەر ب گشتى یا بەرەف قووناغەکا چارەنڤیساز و زۆر مەترسیدار دچیت.
خوپیشادانێن سلێمانیێ د دەمەکی دانە کو بایکۆتا دەواما پەروەردێ ل سلێمانیێ هاتیە شکاندن و دەرگەهێن قوتابخانا هاتینە ڤەکرن و سەرەرایى وێ چەندێ کو هاتینە دەرکرن ژێ، بزاڤا گۆڕان ژ ترسێ نەشیا بریارا خوە ڤەکێشانێ ژ حکوومەتێ بدەت، لەورا دووماهیک هەولا ڤێ بزاڤێ و بالێ هێرویێ دگەل کۆمەلا ئیسلامى و پەکەکێ بوویە و مەرەم ئەڤە چەندەیە کو رێکخستنێن خوە بینە سەر جادا و درووشمێن دژى پارتى و مالا بارزان بلند بکەن! و ب دەنگەکێ بلند بێژن عەبادى عەبادى چونکى نە وێریان راستەوخۆ بێژن مالکى مالکى و داخواز کر کو راستەوخۆ مامەلە دگەل سلێمانیێ بێتە کرن و ئەڤ لایەنە باش دزانن بۆ ڤێ چەندێ دڤێت دەستوور بێتە گوهارتن ئان راستڤەکرن و د شیانا ڤان لایەنا دا نینە نوکە زۆرینەیا پەرلەمانى پەیدا بکەن بۆ بجهکرنا ڤى پرۆژەی و د بنەرەت دا ئەڤ پرۆژە و سیاسەتە یا ئیرانێ یە، کو دڤێت کێشا و گرفتێن مەزن دروست بکەت بەرامبەر سیاسەتا ئەمریکا یا نوو د دەڤەرێ دا.
کاودانێن کوردستانا تورکیا و گرتنا دەمیرتاشى و هەڤسەرۆکێن هەدەپێ و گڤاشتنێن قەندیلى ل سەر کوردستانا رۆژئاڤا و دروستکرنا گرفتا د باشوورێ کوردستانێ دا و بەردەوامبوونا قەیرانا سووریێ و چالاکیێن چەکدارى دژى ئیرانێ ل کوردستانا ئیرانێ و لاوازبوونا حکوومەتا عەبادى و توندبوونا گرفتا د ناڤبەرا شیعا و سونا دا و قەیرانێن هەرێمێ و شەرێ داعش ئەڤە هەمى ئەگەرن و گڤاشتنێن مەزنێن ل سەر پارتى کو خوە حازر بکەت بۆ قووناغەکا نوو کو زۆرا مەترسیدارە ژ هەمى لاڤە.
ئەڤە ئەگەر ئەم بزانین کو ئیران و تورکیا ل سەر دۆزا کوردى هەڤسەنگەرن و رێکەفتن هەنە کو رێگێریێ ل دروستبوونا هەر کیانەکێ کوردى بکەن و ئەڤ دووبەرەکیا ل هەرێما کوردستانێ هەی هەمى ژ ئەگەرێ سیاسەتا ڤان هەردو وەلاتانە، لەورا ئەڤ کاودانە و مەترسیە، پارتى راستى بەرپرسیاتیەکا مێژوویى کریە، کو ژبلى هەرێما کوردستانێ خوە ل پارچێن دی ژى بکەنە خودان و وەک پارتیا جاران رەنگڤەدانا خوە ل هەمى پارچێن کوردستانێ هەبیت و ب هێز و ب پرۆژەکێ نەتەوەیى کو بگونجیت دگەل خواست و قوربانیدانا خەلکى و دگەل کاودانێن نوکە د دەڤەرێ دا هەین دووبارە سیاسەتێ بکەت داکو ئەڤ دەلیڤا زێرین ژ دەست نەتەوا کورد نەچیت و بۆ ڤێ چەندێ پارتى پێدڤى خوە نووژەنکرنێ یە ژ هەمى لاڤە و بۆ ڤێ مەرەمێ فەرە پارتى هندەک ئورگانێن خوە یێن حزبى هەلوەشینیت و رێژا لقا کێم بکەت و ئێکەتیا ئافرەتا و ئێکەتیا لاوا و ئێکەتیا قوتابیا ببنە نڤیسینگەه سەر ب رێکخستنێ ڤە و سەنگێ رێکخستنا خوە بەتە د ناڤ سەندیکا دا و کونترۆلا تەخێن جڤاکى یێن گرنگ بکەت و سەرکردایەتیا پارتى بێتە هەلوەشاندن و ئەندامێن سەرکردایەتیێ بێنە دابەشکرن ل سەر چەند بازنەکا و بچنە د ناڤ خەلکى دا و خەلکى بۆ پشتەڤانیا پرۆژێ نەتەوەیى حازر بکەن.
خۆراگرتنا خەلکى بەرامبەر قەیرانا و بهێن فرەهیا وان بەرامبەر گەندەلیێ و کێم و کاسیا رۆژ بۆ رۆژێ یا لاواز دبیت و ئێدى ژ پاشەرۆژا خوە دترسن، لەوا فەرە پارتى ب جدى ل سەر ڤان کێشا راوەستیت و دووبارە ئەو ڤیان و باوەریا هەى د ناڤبەرا خەلکى و پارتى دا ڤەگەرینیتەڤە، چونکى پاشەرۆژا دەڤەرێ دێ خەلک دیار کەت نەکو لایەنێن سیاسى و ژبەر ڤێ چەندێ یە بەردەوام دوژمنێن کوردان ب هەمى رێکا یێ خەلکى بەرەف ئاقارەکێ دى دبەن کو ل دویف حەز و بۆچوونێن وانە، نەکو ل دویف بەرژەوەندیێن نەتەوا کورد.
ئەڤە د دەمەکی دایە کو زۆربەیا لایەنێن سیاسى یێن کوردى مژوولى بەرژەوەندیێن حزبینە و ل بن گڤاشتنێن ئەجیندا یێن دەرەکى کار دکەن و نەشێن خوە ژ قەیدێن ڤان ئەجیندا رزگار بکەن و بووینە هەڤسەنگەر دگەل وان دژى پارتى کو تاکە حزبا کوردیە هەتا نوکە بۆ دۆزا کوردى کار دکەت و بەرامبەر پیلانێن دوژمنا راوەستیایى و ئەڤ بارگرانیە هەمى ل سەر مێلێن پارتیە، لەورا بۆ قووناغا داهاتى فەرە پارتى حازریەکا تمام بکەت، داکو دۆزا کوردى بگەهینتە ئارمانجا وێ کو ئەو ژى سەربەخۆیى و دەولەتبوونە.
