ل زاخۆ ژنەکێ دەست و پێن زارۆیێ خوە شکاندن
ئه‌ڤرۆ نيوز:
پاریزەکێ دادگەھا زاخۆ بۆ روژناما ئەڤرۆ دیار کر کو سکالایەک ب ڤی رەنگی ل دادگەھا زاخۆ ھاتیە تومار کرن، ژنەکێ دەست و پێن زارۆیێ خوە یێ ھەشت ھەیڤی زێدەتر ژ پێنج جھا شکاندینە و ھندی زارۆیێ خوە گڤاشتیە خوون رشتیە ھناڤێن وی ھەڤژینێ وێ سکالایێ ل سەر تومار دکەت و بەر ددەت، دەرووناسەک وەسا ئاشکرا دکەت کو ژ سەد ئافرەتا 12 ئافرەتا ئەڤ حالەتە لدەف پەیدا دبیت، لەوا پێدڤیە ل دادگەھێ نوژدارەکێ دەروونی ھەبیت.
پارێزەر حسێن زێوکی ل دادگەھا زاخۆ دیار کر کو زەلامەکێ سکالا ل سەر ھەڤژینا خوە تومار کریە، ژبەرکو ھەڤژینا وی زارۆیێ وان یێ ھەشت ھەیڤی ئێشاندیە و دەست و پێن وی شکاندینە و گوت: سپێدەیەکێ ژنێ دەستێ زارۆیێ خوە شکاندیە و بریە نەخوشخانێ و گۆتیە نوژدارا کو د لاندکێ دا کەفتیە و پشتی ئێڤاری زەلام ھاتیە مال دبینیت دەست و پێن زارۆیێ وی د چار جھێن دی ڕا شکەستیە و رۆژا پاشتر ئێکسەر زەلامی قەستا دادگەھێ کریە و سکالا ل سەر ھەڤژینا خوە تومار کریە و ھەڤژینا خوە بەردایە.
پارێزەری زێدەتر گۆت: ل دەستپێکێ ژنێ دانپێدان نەکرن، لێ پشتی راپورتێن پزیشکا داد ئەڤ چەندە دوپات کری کو ئەڤ زارۆیە ئێکێ وەلێ کریە و دەست و پیًَن وی شکاندینە و ھندی گڤاشتیە و خوون رشتیە دناڤ لەشێ وی دا لەوا ژنێ دانپێدان کریە و وەسا دیار کر کو ھندی خەسوویا وێ و زەلامێ وێ ل گەل د خراب بوون و نەخوشی دگەھاندنێ نەخوشیا دەروونی لدەف پەیدا بوو.
نزار عسمەت ماموستایێ زانکویا زاخۆ پشکا دەروونناسیێ لدۆر ڤێ روودانێ دبێژیت:
ژ بەر ھندەک ئەگەرێن بایلوجی پشتی ژنێ زارۆ پەیدا دبیت گەلەک نەخوشی بۆ پەیدا دبن و حەتا تووشی جورە خەموکیەکێ دبیت، ھەروەسا کێم ئوکسجین بۆ ژنێ دچیت و ھندەک ھورمونا ژ دەست ددەت ھەتا زارۆ دھێتە سەر دونیایێ و ئەڤە دبیتە ئەگەرێ گۆھورینا فسیولوجی دناڤ بایلوجیا ژنێ دا و لدووڤ ڤەکولینێن ساخلەمیا دەروونی یا جیھانی دیار بوویە کو ھەر 100 دایکا12 دایک تووشی ڤی جورێ نەخوشیا دەروونی دبن.
چەوا دێ ھێتە زانین کو ئەڤ حالەتە یێ لدەف ژنەکێ پەیدا بووی؟ ماموستایێ زانکویێ گوت: دەمێ دلێ ژنێ نەچیتە خوارنێ و کێشا وێ ھاتە خوار و زەلامێ وێ و زارۆیێن وێ ل بەر دلێ وێ رەش دبن ھینگێ دی َمرۆڤ زانیت کو ئەڤ حالەتە یێ لنک پەیدا بووی.
ماموستا نزار ڤان رێیە چارەیان پشنیاز دکەت و دبێژیت: د ڤی دەمی دا ژن پێدڤی ب چارەسەریا نوژداریە کو ھندەک ب رێیا دەرمانا دەرمانا دا ھاوسەنگیا کیمیایی دناڤ بایلوجیا وێ دا دروست ببیت، ھەروەسا دڤێت ئەڤ ژنە نەمینتە ب تنێ و ھندەک کەسێن نێزیکی وێ زارۆیی نەھێلنە لدەف و دڤێت زەلام دلینیێ ب کار بینیت .
ھەروەسا نزار عسمەت دبێژیت: بەردانا ژنێ ل سەر ڤی حالەتی نە چارەسەریە و دڤێت زەلام بزانیت کو رێژەیەکا ئافرەتا ئەڤ حالەتە لنک پەیدا دبیت، ژبەرکو دەمێ زارۆ دھێتە سەر دونیایێ خەموکی لنک ژنێ پەیدا دبیت و ھندەک گۆھورینێن بایلوجی ل سەر ژنێ دا دھێن لێ ئەڤ گۆھۆرینە بۆ دەمەکێ یە جارەکا دی ژن دزڤریتە ل سەر سرۆشتی َخوە یێ درۆست و حەز ژ زارۆ و زەلامێ خوە دکەت و تشتێ ژ ھەموویێ گرنکتر ئەوە دڤێت ل ھەر دادگەھەکێ نوژدارەکێ دەروونی ھەبیت.