سنۆرێن ژیبوونێ!

مرۆڤ ب هه‌می هه‌ستێن خوه‌ڤه‌ گرێدایێ وه‌لات و كه‌لتۆرێ خوه‌یه‌ و ژیانا مرۆڤی دئێته‌ گرێدان ب وه‌لات و دۆز و ملله‌تێ وی ڤه‌ و ل گه‌ل مه‌زن دبیت هه‌تا دگه‌هیته‌ ژییه‌كی چاڤێن وی ڤه‌ دبن و شاره‌زا دبیت و راستی و شاشیان ژ هه‌ڤ جودا دكه‌ت و هه‌كه‌ ئاسته‌كێ ره‌ۆشه‌نبیری هه‌بیت دێ هه‌ول ده‌ت خه‌باتێ بكه‌ت ژ بۆ په‌یداكرنا ژیانه‌كا ئارام و دادپه‌روه‌ر و وه‌كهه‌ڤی ژ هه‌می لایه‌كی ڤه‌ و هه‌لبه‌ت دڤێت وه‌لات و ده‌سهه‌لات هه‌می پێدڤیێن ژیانێ بۆ په‌یدا بكه‌ت ل گه‌ل ده‌رفه‌تا كاری ئانكو ئه‌رك و ماف ب دروستی بێنه‌ دابینكرن، به‌لێ هه‌كه‌ وه‌لاتی نه‌ ئه‌رك و نه‌ماف نه‌بن و د وه‌لاتێ خوه‌ دا یێ لادای بیت و هه‌ست ب ئارامیێ نه‌كه‌ت و ئاسۆیه‌كی گه‌ش ل پێش نه‌بیت به‌لكی مه‌ترسی ل سه‌ر ژیانا وی و زارۆیێن وی په‌یدا بیت هه‌لبه‌ت دێ هزرێن وی به‌ر ب هانده‌ران و ئاوه‌ریێ چیت و ده‌ست ژ مال و مولك و وه‌لات و ملله‌تێ خوه‌ به‌رده‌ت و چیته‌ كۆلان وه‌لاتان و چاڤێن وی ل ده‌ستێ خه‌لكێ بیت، یان مافێ په‌نابه‌ریێ بده‌نێ یان ده‌ركه‌ن و سه‌رێ وی و زارۆیێن وی ل دونیایێ بێ سه‌میان مینن و زۆر زه‌حمه‌ته‌ ڤه‌گه‌ریته‌ وه‌لاتێ خوه‌. هه‌لبه‌ت ده‌سهه‌لات یا به‌رپرسیاره‌ ژ دابینكرنا هه‌می پێدڤیێن ژیانێ بۆ وه‌لاتیان، ئه‌و ژی یێ به‌رهه‌ڤ بیت گیانێ خوه‌ گۆری وه‌لات و ملله‌تێ خوه‌ بكه‌ت هه‌ر ده‌مێ پێدڤی بیت. لێ مخابن زكێ تێر ئاگه‌ه ژ یێ برسی نینه‌ و هنده‌ك دبن خودان كۆمپانی و كۆچك و ته‌لار بانكێن جیهانێ دپرن ژ پارێن دزیێ و گه‌نده‌لیێ و زۆربه‌ی ملله‌تی نانێ شیڤێ نینن، ئه‌ڤه‌ دبیته‌ ئه‌گه‌ره‌كێ هه‌رێ مه‌زن كو باوه‌ریا خه‌لكێ ب وه‌لاتی نه‌مینت و به‌رێ خوه‌ بده‌ته‌ رێكا هات و نه‌هاتێ و باوه‌ری نه‌ ب وه‌لات و نه‌ ب ملله‌تێ خوه‌ نه‌مینت ببیته‌ په‌نابه‌ر و ده‌وله‌ت بۆ خوه‌ بازرگانیێ ب وان بكه‌ن و ئه‌و دئێنه‌ حه‌لاندن د ناڤ كولتۆرێ رۆژئاڤا یێ نه‌گونجیت ل گه‌ل دابونه‌ریت و كولتۆرێ مه‌ یێ دێرین و ره‌سه‌ن و هه‌زار مخابن پرۆسێ په‌نابه‌ریێ یێ به‌رده‌وامه‌ و وه‌لات دئێنه‌ ڤالاكرن و ده‌ستێ كاری یێ نیڤ به‌ها بۆ كۆمپانیێن كاپیتالزمێ دچن و خوینا وان دمێژیت و به‌رزه‌ دبن د ناڤ كولتۆری و ێرانكه‌ری ئه‌ورۆپا دا ل ده‌مه‌كی كو وه‌لاتێ وان زۆر یێ پێدڤی وانه‌ هه‌كه‌ باوه‌ریێ بۆ وان چێكه‌ت د وه‌لاتێ وان دا و دادپه‌روه‌ی و وه‌كهه‌ڤی و قانوون و ئازادی هه‌بیت و مه‌ترسی ل سه‌ر ژیانا وان نه‌مینت كه‌س به‌رێ خوه‌ ناده‌ته‌ په‌نابه‌ریێ و ئه‌م هیڤیدارین دیمۆكراسی و دادپه‌روه‌ری ل هه‌می وه‌لاتان په‌یدا ببیت و گه‌نده‌لی و دزی نه‌مینت و ئه‌ڤێ پێدڤی ب خه‌باتێ و به‌رخوه‌دانێ هه‌یه‌، دا كو مرۆڤ ب وه‌لاتێ خوه‌ڤه‌ بێته‌ گرێدان نه‌چیته‌ په‌نابه‌ریێ و هانده‌ران و كۆلان خه‌لكی.

کۆمێنتا تە