خوه‌شیا كورسیكێ و زه‌لامباشێن حزبان
به‌ریا ب سه‌دان سالان سیاسه‌تڤان و ره‌وشه‌نبیرى ئیتالى، ((نیكۆلا میكیاڤللى)) ده‌رباره‌ى سه‌ركرده‌یێ سیاسى، وه‌ها ئیماژه‌دایێ كو فه‌ره ئه‌و سه‌ركرده نه تنێ رووڤى بت، فه‌ره بۆ هێزا خوه د هه‌مان ده‌م دا شێر ژى بت، ژ به‌ر كو هه‌كه رووڤى تنێ بت نه‌شێته گورگى ده‌مێ كورسیكێ وه‌ردگرت.
دبت هه‌كه نوكه میكیاڤللى ژیابا و جیهانا رۆژهه‌لاتا ناڤین ب چاڤێ خوه دیتبا، سه‌رۆك و رێبه‌رێن رۆژهه‌لاتا ناڤین ب حه‌فتیار ل قه‌له‌مدابانه، ژ به‌ر كو ساخله‌تێن شێرى ل جه‌م وان گه‌له‌ك لاوازن و تنێ بۆ گه‌لێن خوه شێر و رووڤینه. واته هه‌رده‌مێ گه‌لێن وان دكتاتۆران فه‌رمانێن وان بجه نه‌هینان هێزێ ب كاردهینن و ته‌په‌سه‌ر دكه‌ن. جاران ژى وه‌ك رووڤیان فێلبازیان ل گه‌ل دكه‌ن و لاوازییا هشیاریا وان بۆ ئازادیێ ب كه‌یس (استغلال) دبینن و وه‌كى خوه سه‌ره‌ده‌ریێ دگه‌ل دكه‌ن. ده‌مێ كورسیكگرێن رۆژهه‌لاتا ناڤین رووڤى و حه‌فتیاربن، ل سه‌ر مرارێ خه‌لكه‌كێ دى بژین و كێلبێن خوه بۆ هه‌ڤركێن خوه یێن ناڤخوه‌یى قیچ بكن و بۆ نه‌یارێن ده‌رڤه خوه بچه‌مینن، دێ ره‌وش ئه‌ڤه بت و ئه‌و دێ وه‌ك خوه حه‌كمى كه‌ن. ژ به‌ر هندێ كورسیك ل رۆژهه‌لاتا ناڤین گه‌له‌كا خوه‌شه مرۆڤ وه‌ربگرت، چونكى چو هه‌ق و حساب ل سه‌ر خودانێ وێ نینن، ژ لایێ حزبا خوه‌ڤه پارێزمه‌ندی (حصانه) هه‌یه، چ بكه‌ت؛ به‌س خیانه‌تێ ل حزبا خوه نه‌كه‌ت چو ل سه‌ر نینه و هه‌ر دێ وه‌ك خوه مینت خودانێ كورسیكا زێڕین. خه‌لكێ رۆژهه‌لاتا ناڤین ژى ئه‌ڤ خه‌لكێ نه هشیاره، تنێ ده‌ستێ خوه دده‌ن به‌ر سه‌رێ خوه داكو كه‌س كو چو مستان لێنه ده‌ت. د سه‌ربۆهرا هه‌رێما كوردستانێ یا 25 سالى دا ژ حوكمداریێ دیاربوو، خوه ئه‌و كه‌سانێن نه سیاسه‌تڤان و حه‌ژ سیاسه‌تێ ژى نه‌كن ژ به‌ر وێ خوه‌شیا ژ كورسیكێ دبینن ب هه‌مى ره‌نگان بزاڤ كرینه، تایبه‌ت د هه‌لبژارتنان دا كو وێ كورسیكێ ب هه‌ر رێكا هه‌یى ب ده‌ستڤه بینن، ژ به‌ر كو كه‌سانێن كورسیكێ ب ده‌ستڤه دهینن ل دووڤ حه‌ز و مه‌ره‌قێن خوه سه‌ره‌ده‌ریێ ل گه‌ل خه‌لكێ خوه دكه‌ن.
هه‌لبه‌ت ژ به‌ر لاوازیا قانوونێ د كوردستانێ دا، كورسیك گه‌له‌كا شرینه، ته بڤێت نه‌ڤێت هه‌ى و نه‌یى حزبن د ڤى وه‌لاتى دا، ل ڤێره ده‌مێ هه‌ر ئاڕیشه‌یه‌ك بۆ خه‌لكێ مه چێدبت به‌هرا پتر ژ وى خه‌لكى چه‌پ دده‌ن و خوه هه‌وجه‌ى زه‌لامباشێن حزبان دكه‌ن، ژ به‌ر كو هه‌ر كورسیكگره‌كێ د داموده‌زگه‌هێن حوكمه‌تێ دا هه‌یى هه‌ر ب (ته‌زكیا) وان به‌رپرسێن حزبان گه‌هشتینه وێ كورسیكێ. واته به‌رئاقل نینه به‌رپرسه‌كێ حوكمه‌تێ به‌رپرسه‌كێ حزبێ دانا بیت و فه‌رمانا وى بكه‌ت و تشتێ وى بڤێت ل دووڤ قانوونا لاستیك بۆ وى ب رێڤه نه‌به‌ت.
هه‌لبه‌ت ده‌مێ خودانێ كورسیكێ دبینت هه‌مى پێدڤى وێنه ستۆیێ خوه بۆ خواهر بكه‌ن دا كو وجا وان بقه‌تینت، ڤێجا ئه‌و وژدانا خوه، كانێ دێ د چارچۆڤێ (كودایه‌تیێ) دا شولا وان برێڤه‌به‌ت یان ل دووڤ حه‌ز و ئارمانجێن خوه یێن تایبه‌ت شولا وان قه‌تینت یان دبنى دا ناقه‌تینت.
