هه‌وا چاكسازیێ ده‌ستپێكر!!
ژ زارده‌ڤێ سه‌رۆك وه‌زیرێن حوكمه‌تا هه‌رێما كوردستانێ یا كو به‌ری ده‌مه‌كی گۆتی: (گه‌نده‌لی یا بوویه كه‌لتۆر)، وه‌ك دهێته زانین هه‌تا لڤینه‌ك یان دیارده‌ك جڤاكی ببیته كه‌لتۆر د چه‌ندین قووناغان دا ده‌رباز دبیت، تا بارا پێترا جڤاكی وێ دیاردێ یان لڤینێ په‌یاده بكه‌ت و بێی كو هه‌ستا ڤارێبوون، شاشی و گونه‌هباربوونێ ل جه‌م په‌یدا ببیت و جڤاك ژی وی كاری ب ئاسایی بزانیت.
كه‌لتۆر پشكه‌كه ژ پێكهاته‌یا ره‌وشتی، ده‌روونی و … هتد یا هه‌ر جڤاكه‌كی و مینا پیڤه‌ره‌كیه ملله‌ت پێ ژ هه‌ڤ دهێنه جودا كرن و هه‌ر ملله‌ته‌ك خوه‌دی كه‌لتۆره‌كێ تایبه‌ته. ئه‌‌ڤجا ئه‌گه‌ر گه‌نده‌لی ل ده‌ف مه بوویه كه‌لتۆر وێ رامانێ دده‌ت كو جڤاكێ مه یێ ل سه‌ر لێڤا هه‌رفته‌كێ له‌رزۆك و ب كزترین هه‌وایێ هه‌ر گرفته‌كێ وێ بهه‌ڕفیت و ئاینده‌كێ ره‌ش چاڤه‌رێی هه‌رێما كوردستانێیه چونكو بنه‌بڕكرنا دیارده‌كا كه‌لتۆری كاره‌كێ ئێكجار گرانه، هه‌كه نه‌بێژین هه‌ما نه‌كانه.
مرۆڤ نه‌شێت ب پشراستی بێژیت گه‌نده‌لی ل هه‌رێما كوردستانێ گه‌هشتیه قووناغا ب كه‌لتۆربوونێ به‌لێ دیسا ژی هنده‌ك راستی تێدا هه‌یه، ب هزرا من بژارده‌یا سیاسی، رایه‌دارێن پله بلندێن حوكمه‌تا هه‌رێما كوردستانێ، بازرگانێن مه‌زن و گه‌له‌كێن دن ژی ب تایبه‌ت ئه‌و كه‌سێن خوه نێزیكی ده‌ستهه‌لتدار و بژارده‌یا سیاسی دكه‌ن(ماستاوچی)، لێ وه‌كه دن ئه‌ڤ دیارده شۆر نابیته د ناڤ ته‌ڤ ته‌خێن جڤاكا كوردستانێ دا، ژ خوه گازندا خه‌لكێ هه‌رێمێ ژ ده‌ستهه‌لاتێ هه‌ر ژ به‌رده‌ست ده‌ركه‌فتنا لغاڤێ گه‌نده‌لیێ یه، هه‌كه نه ئه‌و ژی دا خوه بێده‌نگ كه‌ن و كه‌سێ پرسا فه‌راتیا چاكسازیێ و بنه‌بڕكرنا گه‌نده‌لیێ هه‌ر نه‌دكر.
ل هه‌رێما كوردستانێ به‌ره‌یێ دژی ب كه‌لتۆربوونا گه‌نده‌لیێ هندێ بهێزه كو باندۆر ل سه‌ر بژارده‌یا سیاسی كریه و ئینایه سه‌ر وێ باوه‌رێ كو ئێدی ب ده‌ستودارێ به‌رێ نه‌شێن فه‌روه‌ریێ ل هه‌رێمێ بكه‌ن و رێكا چاكسازیا هه‌مه‌لایه‌ن ببیته سه‌ردێرا پرۆگرامێ هه‌موو لایه‌نێن سیاسی و كه‌فتنه كه‌فت و له‌فتێ دا خوه ژ (كه‌لتۆرێ گه‌نده‌لیێ بداقۆتن) نموونا هه‌ری نێزیك ئه‌و بۆمبا حه‌مه‌ی حاجی مه‌حمودی د ناڤ بژاردا سیاسی دا په‌قندی.
كریزا سیاسی ل هه‌رێمێ به‌رهه‌مێ ڤێ چه‌ندێیه و ترسێ هه‌موو گه‌هێن بژاردا سیاسی، ده‌ستهه‌لاتدارێن پایه‌بلند و بازرگانێن مه‌زن(وه‌به‌رهێنه‌ر) گرتیه چونكو ئه‌ڤ ره‌وشا نوكه هه‌رێما كوردستانێ گه‌هشتیێ به‌رهه‌مێ شاش بكارئینانا ده‌ستهه‌لاتێیه و وه‌لاتیێن كوردستانێ بوونه قۆربانی هه‌لكانیا (جه‌عش) وان.
شه‌رێ دژی گه‌نده‌لیێ نه‌یێ كێمتره ژ شه‌رێ دژی تێرۆرێ و گه‌فێن ده‌ره‌كه ل سه‌ر حوكمه‌تا هه‌رێما كوردستانێ هه‌روه‌سا شیرازێ پێكڤه‌گرێدانا جڤاكی دێخیته د مه‌ترسیێ دا ب سایا گه‌نده‌لكاریا به‌لاڤ د ناڤ گه‌ودێ حوكمه‌تا هه‌رێما كوردستانێ دا ئه‌ڤرۆ هنده‌ك لایه‌نێن سیاسی و گه‌له‌ك ژ خه‌لكێ كه‌فتی بن بارێ كریزا ئابووری داخوازا ڤه‌گه‌رێ بۆ به‌غدا بكه‌ن كو ئه‌ڤ ره‌نگ هزر كرنه به‌ری ڤێ كریزێ ب تابۆ و خیانه‌تا نیشتمانی دهاته هه‌ژمارتن.
د سه‌ر هه‌موو گه‌فێن ل سه‌ر هه‌رێما كوردستانێ دا هه‌ین و هه‌ر كه‌سه‌ك هه‌ست پێدكه‌ت (شه‌رێ داش، كێشێن هه‌رێمێ ل گه‌ل به‌غدا و كریز ئابووریا هه‌رێمێ) لێ سه‌رۆكاتیا هه‌رێمێ ده‌ست ب پرۆسه‌سا چاكسازیێ كر، هه‌رچه‌نده گه‌له‌ك گیرۆ بوویه لێ دیسا هه‌ر باشه و نه‌گه‌هشتیه وی رادێ بێژین: روونێ ژ ‘اڤێ گرتیه، بۆچی دبێژم هێشتا نه‌بوویه (روونێ ژ ئاڤێ گرتی) هه‌روه‌كو ده‌زگێن راگه‌هاندنێ به‌لاڤكری كو هه‌ر ژ ده‌ستپێكا هه‌وا چاكسازیان (23 هه‌تا 35 هزار) مووچێن بندیوار و دووباره هاتنه دیاركرن و ئه‌ڤ مووچه هاتنه بڕین، پا هه‌كه وێڤه‌تر چوو دێ چه‌ندێن دن دیار بن؟
سه‌رۆكاتیا هه‌رێمێ پێنگاڤه‌كا باش و وێره‌كی هاڤێت و ژ مه هه‌موویان دهێته خاستن پشته‌ڤانیێ لێ بكه‌ین دا ئه‌ڤ پرۆسه‌سه سه‌ر بكه‌ڤیت و دیاردا نه‌گریسا گه‌نده‌لیێ بهێته بنبڕكرن و نه‌گه‌هیت ببیته (كه‌لتۆر)!! ل داویێ مه هیڤیه پرۆسه‌سا چاكسازیێ ل سه‌ر هێلا خوه یا راست بكه‌ڤیت رێ و نه‌بیته مه‌سه‌لا ده‌وسا هرچێ!!.
