پلانه‌كا ريال مه‌دريد ل دژى ئه‌تله‌تيكۆ مه‌دريد ئاشكه‌را بوو
ئه‌ڤرۆ نيوز:
يانا ريال مه‌دريد پلان يا بۆ ڤه‌گۆهاستنا ئه‌نتۆان گريزمان، ستێرا يانا ئه‌تله‌تيكۆ مه‌دريد دانايه و دڤێت بۆ هاڤينا 2018ێ ئه‌وى ياريكه‌رى ببه‌ته ناڤ رێزێن خوه.
رۆژناما ليكيپ يا فره‌نسى ئاشكه‌را كريه كو ده‌سته‌يا كارگێرى يا يانا ريال مه‌دريد پلان بۆ ڤه‌گۆهاستنا ستێرا فره‌نسى دانايه و دڤێت گريزمانى بكه‌ته شوونگرێ كريستيانۆ رۆنالدۆى ئه‌وێ دێ ل وى ده‌مى بيته 33 سال.
ل به‌رامبه‌ر ڤێ چه‌ندێ مالپه‌رێ لى 10 سپۆرت يێ فره‌نسى ئاشكه‌ر كريه كو هاڤينا داهاتى گريزمان ئاتلێتى بجهـ ناهێليت و دڤێت ل ده‌مێ ڤه‌كرنا ياريگه‌ها نوو يا رۆخى بلانكۆس ل گه‌ل يانێ بيت.
ب گۆره‌يى راپۆرتێن رۆژنامه‌ڤانى يێن فره‌نسا، هندى ديگۆ سيميۆنى ل راهێنه‌ريا يانێ بمينيت، گريزمان ژى دێ يێ به‌رده‌وام بيت و هاڤينا داهاتى ئه‌وێ يانێ ب جهـ ناهێليت.
ئه‌ڤرۆ ل ده‌مژمێر 5:15 ده‌قيق ل دووڤ ده‌مێ هه‌رێما كوردستانێ هه‌ردو يانێن ريال مه‌دريد و ئه‌تله‌تيكۆ مه‌دريد د ياريه‌كا گه‌را 31ێ يا لاليگا دا ل دێربيێ مه‌دريد دێ روو ب روويێ ئێك بن.
