رونی پشتی بورینا ١٣ سالان دێ ڤەگەریتە یانا خوە یا بەری نوکە
ئەڤرۆ نیوز،ھەژار مەعروف:
رۆژنامەیێن نێزیکی یانا مانچستەر یوناید ل ئنگلتەرا وەسا دیاردکەن کابتنێ یانا مانچستەر یوناید واین رونی نێزیک بوویە جارەکا دی ڤەگەریتە یانا ئیڤەرتون کو رونی دەست ب وەرزشی ل ڤێ یانێ کریە و ھەر ئەڤ یانە بوو شیای رونی بکەتە ستێرەکا جیھانی.
رۆژناما میرو یا برێتانی دیارکریە پشتی ل وەرزێ ئەڤ سالە دا راھێنەرێ یانا مان یوناید پشت بەستن ل سەر رونی نەکری و کرنا یاریی ل گەل مان گەلەک یا کێم بوو دبیت بۆ وەرزێ ئەڤ سالە گەلەک کێمتربیت رێژەیا کرنا یاریا وی ژبەرکو راھێنەرێ مانچستەر یێ پرتوگالی بۆ رونی دیارکریە ئەو نابیتە رێگر ھەکە ئەو پەیوەندی ب یانەکا دی بکەت دبیت پتر دەلیڤەیا کرنا یاریێ بۆ وی ل یانەکا دی ھەبیت .
ئەوێ رۆژنامێ دیارکریە ژی واین رونی ھزر ل چوونا خوە ژ یانا مانچستەر یوناید کریە پشتی کرنا یاریێ بۆ ماوێ ١٣ سالان کو ئێک ژ گولکەرێن مێژویی یێ یانا مانچستەر دھێتە ھژمارتن کو ھەر ژ سالا ٢٠٠٤ ھەتا نوکە کو ٥٥٩ یاری ل گەل یانا خوە کرینە شیا ٢٥٣ گولان بۆ یانێ توماربکەت و ١٤٥ گول دروستک کرینە بۆ ھەڤالێن خوە ھەردیسان ١١٩ یاری ل گەل ھەلبژارتیێ ئنگلتەرا ئەنجامدای نە و ٥٣ گول تومارکرینە .
ل دویڤ ژێدەرێن نێزیک ل یانا مانچستەر یوناید کابتنێ وێ واین رونی یێ ٣١ سالی جارەکا دی دێ ڤەگەریتە یانا ئیڤەرتون پشتی بورینا ١٣ سالان دێ درێسێ ئیڤەرتون جارەکا دی ل بەر خوە کەت پشتی ل سالا ٢٠٠٤ ھاتیە ڤەگوھاستن بۆ یانا مانچستەر کو وی دەمی جەماوەرێ وێ یانێ ب توندی ژ ڤی یاریزانی تورەببون کو رونی ل سالا ١٩٩٦ ل گەل تیمێن ئیڤەرتون دەست ب یاریا تەپا پێ کریە کو بوو تیمێن تازەپێگەھشتی و پێگەھشتیان و لاوان کریە لێ ژبەر بلندبوونا ئاستێ وی راھێنەرێ ئیڤەرتون یێ وی دەمی د ژیێ ١٧ سالی دا یاریزان بۆ تیما ئێکێ سەرئێخست و یاری ھەر وێ سالێ ب رونی کر د ماوێ دو سالان دا رونی ل گەل ئیڤەرتون شیا ٧١ یاریا بکەت کو ١٥ گول تومارکربوون.
