شاسوار عەبدولواحد کۆمپانیەکێ بۆ دژایەتیا سەربەخۆیا کوردستانێ بکرێ دگریت
ئەڤرۆ نیۆز،زنار تۆڤی:
رێڤەبەری کۆمپانیا نالیا کۆمپانیەک بۆ دژایەتیکرنا سەربەخۆیا کوردستانێ بکرێ دگریت.
ل دووڤ راپۆرتەکا مالپەرێ (ئیراک بیزنس نیۆز)، شاسوار عەبدولواحد،رێڤەبەرێ کۆمپانیا نالیا هەولێن چاڤپێکەفتنێ ل گەل بەرپرسێن ئەمریکا و دروستکرنا کەمپینەکێ ل وی وەلاتی بۆ دژایەتیکرنا سەربەخۆیا کوردستانێ ددەت.
هەروەک د وێ راپۆرتێ دا هاتی،شاسوار عەبدولواحد بۆ ڤێ مەبەستێ کۆمپانیا مێرکۆری (Mercury) بکرێ گرتیە،هەتاکو دیدار و چاڤپێکەوتنێن وی ل ئەمریکا بۆ رێک بێخیت و کەمپینەکێ ل دژی سەربەخۆیا کوردستانێ ڤەکەت.
رێڤەبەرێ کۆمپانیا نالیا برێیا ئەیال فرانک، جێگرێ سەرۆکێ کۆمپانیا مێرکۆری ڤێ هەولێ ددەت،کو ئەیال فرانک پسمامێ شێری کراهاما هەڤژینا قوباد تاڵەبانی، جێگرێ سەرۆکێ حوکمەتا هەرێما کوردستانێ یە و ئەگەرێ هندێ ژی هەیە،ب رێیا قوباد تالەبانی وی فرانک نیاسیبیت.
ل سەرەتایا راگەهاندنا رۆژا ئەنجامدانا ریفراندۆما سەربەخۆیا کوردستانێ، شاسوار عەبدولواحد و کەنالێ وی ب چەندین شێوان دژایەتیا ریفراندۆمێ و سەربەخۆیا کوردستانێ دکەن و ل ماوێ کێمتر ل دو هەیڤان دا،ئەڤە دو جاران سەرەدانا ئەمریکا کر و ل سیمینار و دیداران خوە دا هێرشێن توند کرینە سەر حوکمەتا هەرێما کوردستانێ.
شاسوار عەبدولواحد،کو هەر وەک خۆدانێ پشکێن پارکا چاڤی لاند (کو کۆمپانیا نالیا زۆرینەیا پشکان هەیە)،خەلک دبێژن، چەندین سالە پارێ ئەوان نەدایە و مافێن وان خوارینە،هەروەسا وی ل بەرە لیستەکێ بۆ بەشداریکرنێ ل هەلبژارتنێن پەرلەمانێ کوردستانێ دروست بکەت و ئاماژە ب هندێ ژی کریە،هەروەسا دیارکریە ژی کو وی ل بەرە ببیتە سەرۆکێ حوکمەتا هەرێما کوردستانێ ژی.
