كۆمسیۆنێ مه‌رجێ پلێتا ئاهێن خوارنێ بۆ ده‌نگده‌رێن ده‌رڤه‌ی وه‌لاتی راكر
ئەڤرۆ نیۆز،زنار تۆڤی:
كۆمسیۆنا بلند یا سه‌ربه‌خۆ یا هه‌لبژارتن و راپرسیێ ل هه‌رێما كوردستانێ کێشە‌یا ده‌نگده‌رێن ده‌رڤه‌ی وه‌لاتی چاره‌كر و مه‌رجێ هه‌بوونا پلێتا ئاهێن خوارنێ راكر.
ئارام نه‌جمه‌دین رێڤه‌به‌رێ گشتی یێ فه‌رمانگه‌ها هه‌ولێرێ یا كۆمسیۆنا بلند یا سەربەخۆیا هەلبژارتن و راپرسیێ ل هه‌رێما کوردستانێ دیارکریە:ژبەر مه‌رجێ هه‌بوونا پلێتا ئاهێن خوارنێ بۆ پشكداریكرنا ده‌نگده‌رێن ده‌رڤه‌ی وه‌لاتی د ریفراندومێ دا ببوو كێشه و پتریا كه‌سێن ل ده‌رڤەی وەلاتی پلێتا ئاهێن خوارنێ نه‌مایه، له‌ورا جڤاتا كۆمسیاران پرۆژه‌یه‌ك به‌رهه‌ڤكر و راده‌ستی كۆمسیۆنێ كر و د پرۆژه‌یی دا، مه‌رجێ هه‌بوونا پلێتا ئاهێن خوارنێ هاتیه راكرن.
هەروەسا گۆتیە ژی: ئه‌ڤرۆکە پرۆسا خۆ تۆماركرنا ده‌نگده‌رێن ده‌رڤه‌ی وه‌لاتی ده‌ستپێكریه،هەتاکو نوکە 70 كه‌سان ناڤێن خوه تۆماركرینه، ژبه‌ركو پتریا وان ئه‌و كێشه هه‌بوو، له‌ورا ئه‌و مه‌رجه هاتیه راكرن و ئه‌ڤرۆ دێ چه‌ندین رێنمایێن نوو ده‌ركه‌ڤن، داكو ده‌نگده‌رێن ده‌رڤه‌ی وەلاتی بشێن ب ساناهی ناڤێن خۆ تۆمار بكه‌ن.