ژبەر رێگریێ ل بەرهەمێ کوردستانێ بوهایێ کەسکاتی و فێقی ل بەغدا گران بوویە
ئەڤرۆ نیۆز،زنار تۆڤی:
پشتی ئەنجامدانا گشتپرسیێ و رێکارێن بەغدا ل دژی کوردستانێ،ل باژێرێن ناڤەراست و ژێریا عێراقێ کەسکاتی و فێقی گران بوویە،ئەڤەژی ژ بەر هندێ یە کو نێزیکی 80% یا کەسکاتی و فێقیێ وان دەڤەران ژ کوردستانێ دهێتە هنارتن.
هەروەسا ئەگەرێ گرانیا بازاری ژی ڤەدگەریت بۆ رێگریکرنا دەرگەهێن عێراقێ ل وان شۆفێرێن کورد یێن کو کەسکاتی و فێقی و هەر جۆرە بەرهەمەکێ دی بۆ بەغدا ڤەدگۆهێزن،دیسا ل سنورێ دیالا و ل خالس کو خەلکێ وێ دەڤەرێ خالێن پشکنینێ داناینە و رێکێ ب شۆفێرێن کورد نادەن،کو کەلوپەلا بەرەف بەغدا ڤە ببەن.
رۆژانە ل دەروازێن بەغدا زێدەتر ژ 500 ترۆمبێلێن بارھەلگر یێن باژێرێن باشۆرێ کوردستانێ دھاتنە ناڤ باژێری دا کو 80% ژ پێدڤیێن خەلکێ دابین دکرن،لێ نوکە ب ئەگەرێ گرژی و ئالۆزیێن سیاسی بتنێ ژ وان 500 ترۆمبێلا نێزیکی 80 ترۆمبێلێن بارھەلگر رۆژانە دچنە بەغدا.
ھەیسەم ماجد، خودانێ فرۆشگەهەکا کەسکاتی و فێقیە ل دەڤەرا بەغداد جدیدە،کو ئێکە ژ دەڤەرێن میللی یێن وی باژێری و دبێژیت،بوهایێن کەسکاتی و فێقی بەراورد ب مانگا بوری بلندبووینە،ب رەنگەکێ کو هندەک رۆژان بوهایێ خیاران ل بازارێ کەسکاتی و فێقی ل (عەلوان) دگەهیتە هزار و 250 بۆ هزار و 500 دیناران.
پێش گشتپرسیێ بوهایێ کەسکاتی و فێقی ل بەغدا دناڤبەرا 500 دینارا بۆ هزار دینارا دابوو،بەلێ نوکە دناڤبەرا دو بۆ سێ هزار دیناران دایە.
ئەیوب سەمتی،خەلکێ بەغدایە دبێژیت ل کەرادە و زەیونە بوهایێ کیلۆیەکا باجان سورکان گەهشتیە دو ھزار بۆ دو ھزار 500 دینارا.
