13 گوندێن شێلادزێ و دێره‌لوك داخوازا چێكرنا جادده سه‌ره‌كى یا گوندێن خوه دكه‌ن
ئه‌ڤرۆ نیوز ، نه‌وزاد هلورى:
زێده‌ترى 30 سالایه وه‌لاتیێن 13 گوندێن شێلادزێ و دێره‌لوك كو ب گوندێن زێباریان دهێنه نیاسین هاتن و چۆنێ لسه‌ر رێیه‌كا نه‌ته‌مامكرى و كاركه‌فتى دكه‌ن و دخوازن كو رێیا وان بهێته قێركرن.
عه‌بدوللا محه‌مه‌د سه‌دیق موختارێ گوندێ هلورا دیاركر كو چوو مفایێ وان د پرا دناڤبه‌را شێلادزێ و گوندێ لاتكا دا نینه و ئه‌ڤه زێده‌بارى كو جاددا سه‌ره‌كى یا هه‌موو گوندێن زێباریان سه‌ر ب شێلادزێ و دێره‌لوك ژى یا ژ كاركه‌فتیه و بۆ ئه‌ڤرۆ نیوز گۆت : ( ئه‌م 13 گوندێن شێلادزێ و دێره‌لوكێ كو ب گوندێن زێباریان دهێنه نیاسین دخوازین كو حكومه‌تا هه‌رێما كوردستانێ رێیا سه‌ره‌كى یا گوندێن زێباریان قێر بكه‌ت ژبه‌ركو ئه‌ڤه زێده‌ترى 15 سالایه هاتیه چێكرن و نه‌هاتیه ته‌مامكرین و نها هه‌موو بویه ره‌گله و كه‌ندو كیر و ژ كاركه‌فتیه )
زێده‌تر گۆت: ( گوندێن كو دكه‌ڤنه ده‌ڤه‌را زێبار و رێیا وان نه‌هاتیه چێكرن و ب كێر هاتن و چۆنێ ناهێت ژ گوندێ هاریكێ ده‌ستپێكه‌ت و ل گوندێ هلورا دوماهى دهێت كو هه‌موو ژى نێزیكێ 20كم ، و خه‌لكێ وان گوندان روله‌كێ كارا هه‌بوویه د شوره‌ش و راپه‌رین و بزاڤا رزگاریخوازیا كوردستانێ و دیسان ژى رێنبه‌ر و كاركه‌ر و خودان كارن و چاندن و ده‌رامه‌تى دكه‌ن و نكارن ژبه‌ر نه‌بوونا رێكێ بفروشن و زێده‌تر گرنگیێ بكارێن خوه بده‌ن ، ئه‌ڤه زێده‌بارى كو نه‌خوش ل وان گوندان هه‌نه و هاتن و چوونا ماموستا و قوتابیان و وه‌لاتیان دكه‌ڤیته سه‌ر رێكێ و هه‌موو ترومبێلێن وان پیچ بوون)
جیهاد موسته‌فا موسته‌فا ئه‌و ژى وه‌لاتیه‌كێ ده‌ڤه‌را زێبارێ یه دیاركر كو ئه‌وان وه‌كو گوندێن زێبار یا سه‌ر ب ناحیا شێلادزێ بنڤیسار رێڤه‌به‌ریا ناحیا شێلادزێ ئاگه‌هداركریه به‌لێ هه‌تا نها چوو به‌رسڤ نینن و گۆت: ( ئه‌گه‌ر رێك ژى نه‌هێته چێكرن بلا په‌ره‌كا دن دناڤبه‌را سیریێ و چوار گوندێن رۆژهه‌لاتێ درۆست بكه‌ن داكو رێكا مه كورت تر بیت خوه ئه‌گه‌ر پره‌كا ده‌مكى ژى بیت)
