ناڤێ سەرکردایەتیا سیاسی یا کوردستانێ – عێراق هاتە گوهۆرین

ئەڤرۆ نیۆز،زنار تۆڤی:

د کۆمبوونا سەرکردایەتیا سیاسی یا کوردستانا – عێراقێ دا ناڤێ ئەنجوومەنی بۆ ئەنجوومەنێ بلند یێ سیاسی یێ كوردستانێ هاتە گوهۆرین

دەقێ راگەهاندنا ئەنجوومەنێ بلند یێ سیاسی ل کوردستانێ

رۆژا چارشەمبی 11. 10. 2017 ل سەلاحەدین ب سەرپەرشتیا بەرێز مەسعود بارزانی ئەنجوومەنێ بلند یێ سیاسی ل كوردستان کۆمبوو.

ل دەستپێکا كۆمبوونێدا ئامادەبوویان بۆ رێزگرتن ل گیانێ سەرۆك مام جەلال و گیانێ شەهیدێن رێیا ئازادی خولەكەکێ راوەستیان و ل سەر هندێ هەڤرابوون كو باشترین وەفا بۆ رۆحا سەرۆك مام جەلالی و سەرجەم شەهیدێن كوردستانێ ئێکریزی و برایەتی و ئێکهەلویستیا هێزێن سیاسی یێن كوردستانێ یە.

پاشی ئامادەبوویێن كۆمبوونێ دوماهی گوهۆرینێن سیاسی و كارڤەدانێن نێڤدەولەتی و هەرێمایەتی و عێراقی ل بەرامبەر گشتپرسیێ گوتۆبێژکرن و گەهشتنە ڤان ئەنجامێن ل خوارێ:

ئێكەم:ئەڤ كۆمبوونە پابەندە ب ئیرادا گەلێ كوردستانێ كو ب رێیا بەشداربوون و دەنگدانێ د گشتپرسیا 25 ئیلوونا 2017 ب ئازادانە دەربرییە،هەروەسا جێبەجێكرنا ئەنجامێن گشتپرسیێ ژ روویێ زەمەنیڤە گرێدایە ب دیالۆگەکا بنیاتنەر،لەورا كۆمبوونێ، ئامادەیا خۆ دەربریە بۆ دەستپێكرنا دیالۆگەکا ڤەکری ل گەل بەغدا بێێ مەرج و بێی سزادان و ئابلۆقەدانێ، هەروەسا رەخساندنا دەمێ پێدڤی بۆ سەرخستنێ.

دویەم: سەپاندنا سزا ب سەر گەلێ كوردستانێ نەیاسایی و نە بەرپرسیارانە و گرژتركرنا بارودۆخێ سیاسی خزمەتا بەرژەوەندیا هیچ لایەكێ ناكەت.

سێیەم:ئەڤ كۆمبوونە بۆ رایا گشتی یا جیهانی و هەڤپەیمانیا نێڤدەولەتی رادگەهینیت كو گەلێ كوردستانێ روو ب رووی ئابلۆقە و سزادانا ب كۆمەل و هێرشا ب كارئینانا هێزێ هاتیه کرن و ئەڤە بارودۆخێ مرۆڤی و ژیانا خەلکێ و ئاواران ل عێراق و كوردستانێ دبەتە قۆناغەکا مەترسیدار و داخواز دکەت سنوورەک بۆ ڤان هێرشا و ئابلۆقێ و سزادانا ب كۆمەل بهێتە دانان.

چارەم: ئامادەبوویێن كۆمبوونێ بریار دا كۆمبوونا حزب و لایەنێن سیاسی ل،ژێر ناڤێ ئەنجوومەنێ بلند یێ سیاسی یێ كوردستانێ بەردەوام بیت.

ئەنجوومەنێ بلند یێ سیاسی یێ كوردستانێ

11. 10 .2017

کۆمێنتا تە