ئەڤرۆ ل زانكۆیا زاخۆ 838 قوتابیان باوه‌رنامێن به‌كالوریۆسێ ب زانستێن جودا جودا وه‌رگرتن
ئەڤرۆ نیۆز،زنار تۆڤی:
ئه‌ڤرۆ سپێدێ 12-10-2017 ل هولا وه‌رزشی یا زانكۆیا زاخۆ ب ئاماده‌بوونا پارێزگه‌رێ دهوكێ و دکتۆر داود ئه‌تروشی نوونه‌رێ وه‌زاره‌تا خواندنا بلند یا حوکمه‌تا هه‌رێما كوردستانێ ودکتۆر عەلی ته‌ته‌ر به‌رپرسێ لقێ 8 یێ پارتی دیموكراتی كوردستان و چه‌ندین به‌رپرسێن حزبی و حکومی رێورسمێن ده‌رچوونا گه‌را (7) یا بناڤێ (خولا كوردستان)یا قوتابیێن زانكۆیا زاخۆ هاتنه گێران.
ل به‌راهیێ رێپیڤانا قوتابیێن ده‌رچوویی وجڤاتا زانكویا زاخو هاتنه ئه‌نجامدان و سرودا نیشتمانی یا كوردستانێ ئه‌ی ره‌قیب و سرودا نیشتیمانی یاعێراقێ هاتنه لێدان.
ل دووڤدا چه‌ند ئایه‌تێن قۆرئانا پیرۆز هاتنه خواندن، پاشی په‌یڤا بخێرهاتنێ ژلایێ دکتۆر عەبدولوەهاب خالدی ڤە هاته خواندن و تێدا بخێر هاتنا به‌رهه‌ڤبوویان كر و ته‌كه‌زكر كو پاشه‌رۆژا كوردستانێ ل سه‌ر ملێن قوتابیێن ده‌رچوویی دێ هێته ئاڤاكرن و پیرۆزباهی ل هه‌موو ده‌رچویان كر.
پاشی پرۆفیسۆر لەزگین عەبدی سه‌رۆكێ زانكۆیا زاخۆ په‌یڤه‌ك خواند و،گوت:ده‌رچوونا گه‌را حه‌فتێ یا قوتابیێن زانكۆیا زاخۆ یا هه‌ڤده‌مه ل گه‌ل ئه‌نجامدانا ریفراندوما سه‌ربەخویا كوردستانێ كو ئه‌و ژی هیڤیا هه‌موو گه‌لێ كوردستانێ یه و خواست وه‌لاتێن جیهانێ پشته‌ڤانیا كوردستانێ بكه‌ن و سوپاسیا پیشمه‌رگێ كوردستانێ كر،كو ل دژی تیرۆرستان شه‌ركریه،هه‌روه‌سا سوپاسیا هه‌موو لایه‌نان كر یێن کو پشته‌ڤانیا زانكۆیا زاخۆ كری و پیرۆزباهی ل قوتابیان و مالباتێن وان كر و سه‌ركه‌فتن بۆ خواست.
ل دووڤدا په‌یڤا قوتابیێن ده‌رچوویی هاته خواندن و خواست كو حوکمه‌تا كوردستانێ ده‌رچوویێن زانكۆیا زاخۆ ب دامه‌زرینیت.
هەروەسا خه‌لاتێن رێزلێنانێ ل سه‌ر چه‌ند ماموستایێن زانكۆیێ یێن خانەنشینكری و باشترین ڤه‌كۆله‌ر و پشكێن سه‌ركه‌فتی هاتنه به‌لاڤكرن.
هه‌ژی گوتنێ یه د گه‌را( 7)یا ده‌رچوونا قوتابیێن زانكویا زاخۆ دا (838) قوتابییان باوه‌رناما به‌كالوریوس ب زانستێن جودا جودا وه‌رگریته و بریار ئه‌وە کو ئه‌ڤ ساله كۆلیژا پزیشكی ژی ل زانكۆیا زاخۆ بهێته ڤه‌كرن.
