نارین شێخێ:سترانا کوردی وەکی کوردان پارچە بوویە
ئه‌ڤرۆ نیۆز،زنار تۆڤى:
خانما سترانبێژ نارین شێخێ كو خه‌لكا باكۆرێ كوردستانێ یه و ئه‌ڤه چه‌ندین ساله ل وه‌لاتێ ئه‌لمانیا دژیت و د هه‌ڤپه‌یڤینه‌كێ دا بۆ ئه‌ڤرۆ نیۆز دیاركر:سروشت و ژیانا سه‌رحه‌دێ وه‌كریه كو ئه‌ز به‌ره‌ف مه‌یدانا سترانگوتنێ ڤه بچم و ل ده‌ستپێكێ من سترانێن كوچك و دیوانا گوتینه و ل دووڤ دا من چه‌ندین كارێن شانۆیێ ژى ئه‌نجامداینه،هه‌روه‌سا د مالباتا مه دا بابێ من سترانبێژ بوویه و وى سترانێن فلكلۆرى دگوتن و ئه‌ز ژ وى فێرى سترانان بوویمه،هه‌روه‌سا وى پشته‌ڤانى ل من كریه كو ئه‌ز سترانا بێژم و ئه‌و رێ نیشانده‌رێ من بوویه،هه‌روه‌سا برایێ من ژى سترانبێژه و ئه‌ز د خێزانه‌كا هۆنه‌رى دا مه‌زن بوویمه و د ژیێ 12 سالیێ من ده‌ست ب سترانگوتنێ كریه و هه‌تا نوكه یا به‌رده‌وامم.
هەروەسا گوت ژى:ژنا كورد نه شیایه وه‌كو پێدڤى خزمه‌تا هۆنه‌رێ كوردى بكه‌ت،هه‌روه‌سا د پرانیا وارێن ژیانێ دا هێشتا ژنا كورد ل پاشه،هه‌ر چه‌نده هنده‌ك هه‌ولدان هه‌نه،لێ ئه‌ڤه وێ چه‌ندێ ناگه‌هینیت،كو ئه‌م بێژین ژنا كورد گه‌هشتیه ئاسته‌كێ باش،لێ ئه‌ز به‌رده‌وام هه‌ول دده‌م كو ئێش و ئازارێن ژنا كورد و ئه‌و ده‌رده‌سه‌ریێن ب سه‌رێ ملله‌تێ مه دا هاتین بكه‌مه هێڤێنێ سترانێن خوه و ئه‌ز هه‌رده‌م خوه ل كێشێن گه‌لێ خوه دكه‌مه خودان،هه‌روه‌سا سترانا كوردى وه‌كو ژیانا كوردان ئالۆز بوویه،سترانا كوردى وه‌كو كوردان هاتیه پارچه‌كرن،هه‌روه‌سا سازى و ده‌زگه‌هێن كوردان وه‌كو پێدڤى پشته‌ڤانیێ ل هۆنه‌رمه‌ندێن كورد ناكه‌ن.
ناڤهاتیێ دیاركر ژى:هه‌تاكو نوكه من 8 كلیپ چێكرینه،لێ ژبه‌ر ئاسته‌ته‌نگیا بارێ ژیانێ هێشتا من چو ئه‌لبۆم چێنه‌كرینه،لێ من به‌رهه‌ڤى بۆ چێكرنا ئه‌لبۆمه‌كێ كرینه،دیسا من پشكدارى د درامایه‌كا جڤاكى ژى دا كریه و ئه‌ز هه‌لبه‌ست و چیرۆكان ژى دنڤیسم،هه‌روه‌سا ل ڤان نێزیكان دێ سترانا خوه یا نوو یا ب ناڤێ”بهارا دلا” به‌لاڤكه‌م،كو ئاواز ڤێ سترانێ ژ فلكلۆرێ ده‌ڤه‌را سیواسێ یه و په‌یڤێن ڤێ سترانێ ژى یێن من ب خوه‌نه،دیسا نارین كۆمپانى ئه‌ڤ سترانه بۆ من كلیپ كریه و هه‌روه‌سا من ل به‌ره پشتى ڤى كارى دو سترانێن دى ژى كلیپ بكه‌م.
