ئهگهر پێشمهرگهیـى شهڕ كربـا
پشتى ههردو داستان و بهرگیریێن مهزن و ناڤدارێن پردێ و زومار ل ههفتیا بۆرى و وێ خۆراگریا مهزنا پێمشهرگهیـى كرى و سهرهرایى سێ پێشهاتێن گرنگ “ووڕهیێن نزمێن ژدهستدانا كهركووكێ و چهكێ كێم و سادهیێ د دهستێ وی دا و هێزا مهزن و چهكدارا حهشد و لهشكرێ عیراقێ “نوكه باوهریهكا خورت و كاڕا ل نك ههر كوردهكى دروست بوویه كو ئهگهر پێشمهرگهیى شهڕ ل كهركووكێ كربا ئهڤه ههموو ب دووڤ دا نهدهات و كهركووك و جهێن دى ژى نه دچوون، فاكتهرێ دهمى د دهستێ كوردان دا بوو و ژ ئهنجامێ خۆراگریا كوردان و زیانێن مهزنێن حهشد و لهشكرێ بهغدا د دیتن دا نهچاربن جهنگێ راگرن و جڤاكێ دهولهتى ژى دا زویتر د ههوارا مه هێت و سهرتیرا ئیرانێ ژى مینا كورد دبێژن دا ب بهرى كهڤیت.
بێگومان من نهڤێت بێژم پێشمهرگهیى شهڕ نهكر، ئهز ل مانشێتێ ڤى گۆتارى ژى لێڤهبووم..! پێشمهرگه ئهو سهرباز نینه جهنگێ نهكهت و یێ خۆراگر نهبیت، پێشمهرگه ژى بێى جوداهیا ژێیاتیا وى یا سیاسى و دهڤهرگهرى، پێشمهرگه ههر پێشمهرگهیه خهلكێ كهركووكى بیت یان سلێمانیێ و دهۆكێ و ههولێرێ لێ سهركردێن هندهك ژ وان ههتا ههتایێ خوه تووشى شهرمزاریێ كر و خوه دا دهستێ دۆژمنێ خوه و هندهك دا وێرانتر ژى كهن ئهگهر ب هندهك پلانێن ژیر سهرهدهرى نههاتبا كرن و خۆڤهكێشانێن پلاتبودانایى نهبان، مهبهست پێ تهقهكرنا ژپشتڤهیا ل دژى پێشمهرگهیه. ئهگهر ئهو ل كهركووكێ نههاتبا كرن یا مه ب چاڤێن پهقى دیتى نوكه دا رهوش ب شێوهكێ دیتربیت و كورد ژى ل ڤێ قووناغێ نهدبوون. بهانا هێزا مهزنا حهشدێ و لهشكرێ عیراقێ و گرانیا چهك و ژمارا سهربازێن وان ژى چ رێز و بهایێ خوه نینه، چ راستى ژى بۆ نینه، بهلگه ژى ئهو جهنگ و خۆراگرى بوو یا نه ب تنێ كوردان، بهلكو عهرهبێن عیراقێ و جیهانێ ههمیێ ل پردێ و زومار دیتى.
ههردو داستانێن پردێ و زۆمار كۆمهكا خالێن گرنگ ههمبێز دكهن، هێزێن هێرشكهر چهند جاركى تهمهت هێزا پێشمهرگهیى بوو ژبهر پرت و بهلاڤهییا هێزا كوردان ل ههموو بهرهیێن بهرگیریێ (مهخموور ـ گوێر ـ پردێ ـ باشیك ـ تلسقۆف و هتد..)، ئهو چهكێ حهشد و لهشكرێ بهغدا هێرش پێدكر چ دهمهكى عیراقێ نهبوویه، ئهمریكا و ئهورۆپا ئهو چهكێ نوو بۆ جهنگا دژى تیرۆرێ ب لهشكرێ عیراقێ دابوو، هێزا مهزنا دهرهكیا حهشدێ ههیى پێشتر نهبوویه، مهبهست پێ پاسدارێن ئیرانێ و فهیلهقا قودس و سهرپهرشتیا راستهوخۆیا ژهنهرالێن ئیرانى یه، دبیت هندهك خالێن دیتر ژى ههبن لێ خالا ههره ب هێز و مهزنا بهرچاڤبوویى ئهو ئیرادا مهزنا بهرگیرى و خۆراگریێ بوو یا پێشمهرگهیى د وى كاودانێ ب زهحمهت ددا نیشادایى، دهلیڤهك بوو ووڕه د نزمبوون، خهلكهكى نه ب تنێ دگهل خوه دگۆت، بهلكو باوهریهكا كارا ههبوو كو ئهڤه رۆژێن دووماهیێ یێن بارزانى و پارتى و دیمۆكراتى كوردستانن و هندهكان ژى تهرازى و قهپانێن خوه دانابوون كو دێ بارزانى ب دهستان گرن و كێشنه دادگههـێ.
ژ ئهنجامێ خوه ب دهستڤهبهردانا كۆمهكا رێبهر و سهركردێن پێشمهرگهیى و ساده خواندنا وان بۆ دوورهێلى ب مخابنى ڤه چهڤهنگا پێشمهرگهیى كهفته همبهر گۆمانێ، ئهو هێزا برایێن مه یێن عهرهب ل عیراقێ ب چهڤهنگ ددیت یێ دبینن د دو دهمژمێران دا كهركووك بهردا و ئالایێن عیراقێ و حهشدێ پڕى ناڤ باژێرێ كهركووكێ بوون و رۆژا پاشتر یێن گههشتینه لیوارێن ههولێرێ، ههمان دهم ژى چهڤهنگهك بۆ حهشدێ چێكر و هندهكان ل بهغدا گۆت: نێزیك دێ فراڤینێ ل دهۆكێ خوین. هندهكێن دى ژى گۆت: ژ ئهڤرۆ پێڤه هوون دێ ل شكهفتان ژین. لێ یا راست ئهڤهیه پێشمهرگه ههر ئهو چهڤهنگه یێ هێزا داعش شكاندى پشتى ههردو لهشكرێن مهزنێن سووریا و عیراقێ پاشڤهبرین و دههـ دوازده باژێرێن مهزن ل ههردو وهلاتان داگیركرین، حهشد ژى دێ ههر ئهو هێزا چهكدارا مللى بیت یا نهشێت سنوورێن بۆ هاتینه دانان دهرباس بكهت و چ جاران نهشێت ببیته چهڤهنك و تشتهكێ نه چاڤهرێكرى ب دهستڤهبینیت.
ب درێژاهیا سهد سالێن بۆرى پێشمهرگه زێرهڤانێ ڤێ ئاخێ بوویه و باوهریهكا خورستى ههیه كو سهد سالێن بهێت ژى پێشمهرگه دێ ههر ئهو هێزا مهزن بیت یا بهرژهوهندیێن بلندێن مللهتێ كورد بپارێزیت، چنكو ب ئاسانى ئهو هێز خودان بیر و باوهره نهكو فهرمانبهره و ب دهمژمێرێن دهوامێ و مۆچهیێ مههانه ئهركێن خوه بجهـ دئینیت، هێزهكا هۆسا دڤێت ل پاشهرۆژێ پتر چاڤدان بۆ ههبیت، پتر گرنگى ب مهشق و راهێنانا وى بهێته دان و باشتر بهێته چهكداركرن، پتر گرنگى پێبهێته دان و دبینیكا چاڤان دا بهێته چاڤدان.
