بێوار حەمدی
بێگۆمان مەرەم ژ داهێنانێ ئافراندنا تشتەکێ نوی یە، یانژی تشتەکێ سەرنج ڕاکێشە کو دبیت بەری نوکە هەبوونا وی نەبیت، یان ژی دبیت هەبیت، لێ ئەم نەشیاینە د ناڤ جڤاكا خۆ د ا داهێنانێ بۆ بکەین و دروست بکەین، ئەم هەموو دزانین کو چ جاران سەرکەفتن بێی دووڤچوون و وەستیان ناهێت، ئەگەر مە بڤێت داهێنانێ بکەین ل دەسپێکێ دڤێت هزرا سەرنشیفیان بکەین بەری سەر ئەڤرازیان، ئەرێ مە جارەکێ پرسیار ژخوە کریە بۆچی؟ دەمێ ئەم کەسەکێ داهێنەر ل ڕۆژئاڤا دبینین گەلەک پێ مەندەهۆش دبین و دبیت هەتاراددەیەکی باوەر نەکەین چاوا مرۆڤەک دشێت ڤێ داهێنانێ بکەت؟ بێگۆمان ئەڤە راستیە و نەخەیالەکە ئەم دبینین و ئەم ژی وەکو وان مرۆڤین، وان ژی مێشکێ هەی و مەژی یێ هەی و هەتا دوماهیێ ب ڤی شێوەی، لێ تشتێ مە ژوان جودا دکەت ئەوە کو ئەو پالپشتیا بۆ وان دهێتەکرن دبیت بۆ مە نەبیت، مەرەم ژ پشتەڤانیێ نەبتنێ ئەوە کو ژلایێ حوكمەتی ڤە هەبیت نەخێر، پشتەڤانیا دروست جارێ ئەوە دەمێ ئەم ب خوە كونترۆلێ ل سەر باوەرا خوە دکەین و ل وێ باوەرێینە کو دێ هەموو سنووران شکێنین و شێین سەرکەفتنێ ئینین، لێ ل ڤێرە ئەم پێدڤی ب پشتەڤانیا جڤاکی و تاکینە، رەنگە ئەڤرۆ گەلەک ژ گەنجێن کورد حەز و ئارەزۆیا وێ چەندێ هەبیت کو داهێنانێ بکەت و ببیتە ئافرێنەرەکێ دەست رەنگین، لێ تشتێ وی پاشڤە دبەت ترڕانەپێکرن و کێمکرن و سڤکاتیە ژ لایێ هندەک ژ تاکێن جڤاکێ ڤە، شەرم د وێ چەندێ دا نینە کو گەنجەک سابینەکێ دروست بکەت و سابینا وی بحەلیێت و ئەم ترانە و سڤکاتیێ پێ بکەین، بەلکو شەرم ئەوە ئەم لۆمەی خۆ بکەین کو هەتا نوکە مە وەکو وی گەنجی بزاڤ نەکرینە دەست ب داهێنانێ بکەین، بێگۆمان چ سەرکەفتن بێی کەفتن دروست نابن، ل شوینا ڤێ چەندێ، بلا ئەم ببینە پێشەنگ ژبۆ ئێکودۆ، ئەڤرۆ بلا سەرێ مە هەموویان ب گەنجێن مە یێ بلند دبیت خوە ئەگەر بزاڤەکا بچویک ژی کربیت، وەلاتێن پێشکەفتی پێدڤی ب پشتەڤانیا ئێکودونە و پێدڤی ب مێشکەکێ ڤەکری نە کو بشێن پێشوازیەکا گەرم ل داهێنانێن وان بکەن.
