بێوار حەمدی

هەر كەسێ ل قوتابخانێ خواند بیت یان ژی نەچۆبیتە قوتابخانێ دزانیت كو قوتابی بابەتێ هونەرێ دخۆینن، هونەر ژوان بابەتانە كو هەبوونا وێ گەلەكا پێدڤی یە دهەموو سیكتەرێن خواندنێ دا، بەلێ ئایا ئەم بهایێ وێ دزانین؟ یان ئایا هونەر وەكو پێدڤی دهێتە گۆتن ژلایێ ماموستایان ڤە؟ دەمێ ڤان پرسیاران ژخۆ دكەین دێ گەلەك نیشانێن سەرسورمانێ پەیدابن، هەر ژپۆلا ئێكێ و تاكو قوتابخانە ب دووماهی دهێن پتریا قوتابیان وەسا دهێنە تێگەهاندن كو هونەر بتنێ شێوەكاریە و چێكرنا هندەك وێنەیێن سروشتی وتڕۆمبێلا وگولایە، لێ یا ڕاستی هونەر ژڤان هەموویان گەلەك مەزنترە، چونكو بتنێ ئەڤە چبكەكن ژ دەریا هونەری، ئەو دەریایا كو دڤێت گەلەكێ مەلەڤانبی و تە ڕاهێنەرێن مەلەڤان هەبن، ب مخابنی ڤە جارێ ئەگەر بەرێ خۆ بدەینێ گەلەك ژوان ماموستایێن وانا هونەری دبێژن د تایبەتمەندن دڤی بیاڤی دا، ئانكو جاران ل دووف پێدڤیا قوتابخانێ ماموستایەك بو هونەری دهێتە هنارتن، ئەڤە ژی دبیتە ئەگەرەكێ مەزن كو قوتابی ب دروستی فێری هونەری و بەشێن هونەری نەبیت، ژلایەكێ دی بتنێ هونەرێ ( شێوەكاری) ل قوتابخانان دهێتە خواندن، ئەرێ ما ئەڤ سیستە مە یێ درستە؟ بێگومان نەخێر، چونكو هونەر نەبتنێ شێوەكاریە، بەلكو گەلەك بەشان بخۆڤە دگریت وەكو( سترانگۆتن، مۆزیك، شێوەكاری، شانۆ)لەوما ژی قوتابی ژڤان هەموو بەشان دهێتە بێ بەهركرن، دبیت د شیان دا نەبیت ئەڤ هەموو بەشە بو بهێنە گۆتن و ب دروستی فێرببیت، لێ هەر چو نەبیت دڤێت لایەنێ (تیۆری) بۆ بهێتە بەحسكرن، دا قوتابی ژی بها وگرنگیا هونەری بزانیت و ڕێزی ل وان كەسان بگریت یێن زەحمەتێ ب كارێن خۆ یێن هونەری ڤە دبەن.

بێوار حەمدی

دژیانێ دا چ مرۆڤ نینن کو بیرهاتنان دگەل خوە نەهلگریت و دڕاستی دا پتریا مە مرۆڤان حەز ژ بیرهاتنان دکەن ب تایبەت ئەگەر بیرهاتنێن خوەش بن چوجاران ژبیرا مە ناچن، هەر دبەرێ دا دەما ئەم قوتابی گەلەک جاران ئەم دچووینە سینەما نەورۆز د ناڤ بازاڕێ دهۆکێ دا کو تەماشەی فلمەکی بکەین، لێ دوی دەمی دا مە بهایێ سینەمایێ نەدزانی، بتنێ ئەو جوش و خڕوشا مە دگەل هەڤاڵان دبر گەلەک یا ب تام بوو و تاریاتیا سینەمایێ ژی گەلەک کەیفا مە دئینا دبیت نویاتیەک بیت دا کو مە دگەل سینەمایێ شارەزا بکەت.
هەرچەندە هەتا رادەیەکێ مەزن ئەم ژ فلمێن کوردی دبێ بەهربووین، چونکۆ بەهرا پتر فلمێن بیانی بوون، لێ هەر چەوابیت مە خوەشی دبرن و پەیوەندیێن مە یێن هەڤالینیێ بهێز تر دکەفتن.
دەما ئەم مەزن بووین ئەو خوەشیە بتنێ بوو مە بۆ بیرهاتنەک، ل هەمی جیهانێ هۆلێن سینەمایێ گرنگی و بهایەکێ ئێکجار مەزن هەیە و هەر دەمێ ببیتە جهەکێ کەڤنار ژی مرۆڤان ژ خۆە دوور ناکەت بەلکو پتر رێزو بوهایێ وێ دمینیت، دەمێ ئاریشەیەک ژی دکەڤیتێ هەر ئێکسەر جهێن پەیوەندیدار خوە لێ دکەنە خۆدان، چونکۆ هونەر ( ژیانە، ڕێزگرتنە، پێکڤە گرێدانا پەیوەندیانە، کوولتورە، ڕەسەنایەتیە) دەمێ هونەر نەمینیت هیچ جوانیەک ژی دژیانێ دا نامینیت.
سینەما نەورۆز جهەک بو پیرو لاو پێکڤە کومدکرن و دگۆتە وان ئەڤە هونەرە، لێ ئەڤ هونەرێ جوان هێدی هێدی بەرەڤ نەمانێ چو تاکو ب ئێکجاری وەکو دیوارەکێ لسەر بەفرێ کەفتی، ئەرێ گەلو ما سینەما نەورۆز یا ژ هەژی خرابکرنێ و نەمانێ بوو؟ بێگومان ئەو کەسێن هونەر دوست دێ بێژن نەخێر، دەما سینەما هاتیە ژناڤبرن وەکو تازیەکێ و ئەرد هەژەکێ بوو، ل شوینا نووژەنکرنا وێ و مەزنکرنا بهایێ وێ مە ئەو هەڕفاند، یا پێدڤی بو سینەما نەوروز ب ڕێز ڤە هاتبا نوژەنکرن و پتر بوها پێ هاتبا دان، جهێن وەسا وەکو دارەکا مەزنن و مرۆڤ خوە ب چەقێن وێ ڤە دگریت، سینەما نەوروز هەر ددلێ مە دا دمینە لێ ب مخابنی ڤە بتنێ وەکو بیرهاتنەک

بێوار حەمدی

د زمانێ مە یێ كوردی دا مە گەلەك دەستەواژە هەنە كو دەربڕینێ ژ كلتۆر و چاندا كوردی دكەن، هەر دیسان گەلەك پەیڤان ئەم بكاردئینین بێی كو ب دروستی ئەم دڕامانا وان یا راست بگەهین، ب تایبەت دڤی دەمی دا گەلەك پەیڤ دهێنە بكارئینان كو دبیت گەلەك ڕامان ژێ بچن و دبیتە ئەگەر یێ بەرامبەر جاران شاش تێ دگەهیت، لێ لڤێرە یامە دڤێت ل سەر ب ڕاوەستین كا ڕامان ژ پەیڤان ( خەلەت تێ نەگەهە) چیە؟ و بۆچی ئەم بكاردئینین؟ پتریا مە وێ چەندێ دزانن كو ئەڤ پەیڤە بۆ هندێ دهێتە بكارئینان كو یێ بەرامبەری مرۆڤی ب شاشی د ئاخفتنێ نەگەهیت ئانكو بەر ب چ ئاقارێن دی ڤە نەبەت، هەر ژبۆ وێ چەندێ كو دلێ وی ژ مرۆڤی نەمینیت، بەلێ گەلو ما باشتر نابیت ئەگەر ئەم ل شوینا بێژین خەلەت تێ نەگەهە، ئەم خەلەت نە ئاخڤین یانژی پتر هزرا خۆ دوێ ئاخفتنێ دا بكەین و پاشی بێژین، چونكو باهرا پتر دەمێ ئەم دبێژینە كەسەكی خەلەت تێ نەگەهە هەر ژنوی ئەو هزرە بو وی چێدبیت كو ئەو هزرەكا دی ژ مرۆڤی بكەت یان ژی بابەتی ژبۆ ئاقارەكێ دی ببەت ب كویری دناڤ هزرێن خۆدا دچیتە خوارێ، ژبەركو هەردەمێ ئەم باشتر هزر دهەر ئاخفتنەكا خودا بكەین، ئەو ئاخفتن دێ ب شێوازەكێ جوانتر و بڕێیەكا باڵكێش تر گەهیتە كەسێ بەرامبەر، ب ڕاستی ژی دەمێ دبێژین خەلەت تێ نەگەهە ئەم ب ڕێیەكێ یێ كەسێ دی بتنێ ڕازی دكەین لسەر تشتەكی كو پێ توڕە نەبیت، ئانكو ژلایەكی ڤە ئەم یێ ڕاستیا بابەتی ژی ل ڤی كەسی د ڤەشێرین، ڕاستە جاران گۆتنا هندەك ڕاستیان یا تەعلە و كەسێ بەرامبەر پێ دئێشیت، لێ جاران ژی ل شوینا ئەم قەنجیەكێ ل گەل بكەین داكو بتنێ توڕە نەبیت بەرۆڤاژی ئەم خرابیەكێ دگەهینینێ، باشترە هەموو بزاڤ بهێنە كرن كو بابەت پتر ب شەفافی و ئاشكرای بهێتە گۆتن، ب تایبەت ئەگەر بابەت گرێدای خەلەتیەكا كەسێ بەرامبەر بیت، چونكو گەلەك یا گرنگە جاران مرۆڤ ب هەموو وێرەكی بابەتی بگەهینیت.

بێوار حەمدی

كوردستان خودان كلتۆر و پێگەهەكێ گەلەك جوان و بەركەفتیە، هەموو دەمان شوناسا كورد بوویە جهێ سەرنجێ بۆ دەوروبەران، ئەڤجا بگرە ژ دیلانێ و جلوبەرگان و دیسان دیمەنێن جوانێن وەلاتی، دیسان مە وەكو كورد رەنگە پتری (100) دیلانێن كوردی هەنە و هەر ژ دەسپێكا ڤەژاندنا كوردبوونێ دیلانێن مە د زێدەونێ دانە، ل كیرا دونیایێ دیلانەك جوانتر هەیە ژ( شێخانی و قولیچ و سێ پێ و…هتد) بێگۆمان نینن، چونكو دیلانێن كوردی بەرهەمێ خۆمالی و دیاركرنا كلتۆرێ ڕەسەنێ كوردایەتیێ یە، لێ یا ئەم لێ مەندەهوش دبین هندەك وەلاتان مینا توركان بتنێ ئێك جۆرێ دیلانێ هەیە، لێ ب مخابنی ڤە هندەك كەس دجڤاكی دا چاڤلێكرنا دیلانێن وان دكەن و وەكو خومەزنكرنەك یان ژی نوویاتیەك وجیوازیەك دێ ل ناڤا شەهیانێن خوە دیلانێن وان كەن ئەڤجا چاڤلێكرنا دیلانا هەر وەلاتەكی بیت، ئەرێ گەلو ل وەلاتێن بیانی تاكۆ یێن جیران ژی جارەكێ دیلانێن كوردی دكەن و شانازیێ پێ دبەن، بێگۆمان نەخێر، لێ گەمژەییە ئەم كەلتورێ وان تێكەلی كەلتورێ خویێ ڕەسەن بكەین، ئەم كورد ب جوانیا سرۆشتێ خوە و ب مەزناهیا وەلاتێ خوە دجوانین، ئەڤرۆ گەلەك تیپێن هونەرێ مللی یێن دیلانێ و یێن مۆزیكێ و سترانێ یێ خزمەتا وەلاتێ مە دكەن بتنێ بۆ هندێ شوناسا مە بەرزەنەبیت و كوردینیا خوە ب پارێزین، دێ چەند یا جوان بیت ئەگەر دناڤ هەر ئاهەنگەكێ یان شەهیانەكێ ئەم جلێن كوردی ل بەرخوە بكەین و دیلانێن كوردی یێن هەمەجۆر بكەین، هەر چەندە هەتا ڕاددەیەكێ باش مە دیلانێن خۆ نەهێلاینە و بەردەوام گرنگی پێ دهێتە دان، لێ ژلایەكی هێدی هێدی خەلكەك یێ چاڤ ل كلتۆرێن بیانی دكەت، ئەڤجا دا پێكڤە ڕێزێ ل نەتەوا خوە و كلتۆرێ خوە بگرین بلا چاڤێ هەموویان ل سەر هێزا كوردبوونێ بیت.

بێوار حەمدی

جڤاکێ کوردی هەر ژکەڤن دا گرنگی ب هونەری و جورو شێوازێن هونەری دایە، بتایبەتی ژی دەنگ و ڕەنگێ هونەرمەندێ کەڤنار چجاران ژبیرناچیت وسەنگ و جوانی و هێزەکا دی یە ژبۆ گوهدار و بینەرێن وان، پتریا وان هونەرمەندێن دەنگخۆش و جوانە مەرگ یێن کو دژیانێ دا نەماین لێ هەر دناڤا دلێن مەدا دساخ وەکۆ ڕێزگرتن ژبۆ گیانێ وان یێ پیرۆز و دەنگێ وان یێ زێرین پەیکەر ژبۆ وان هاتینە دروستکرن و ئەڤ پەیکەرە وەکو دیار دناڤا پارکا و جهێن گشتی دا دهێنە دیتن، ژبۆ وێ چەندێ کو هەردەما مرۆڤ نێزیک دبیت و پەیکەرێ وی دبینیت ئێکسەر بیرا مرۆڤی پتر لێ دهێت و تاکو بووینە جهێ وێ چەندێ گەلەک کەس وێنەیان ژی دگەل دگرن ژبۆ بیرهاتن کو لدەڤ وان بمینن، لێ ئەرێ بۆچی پەیکەر بتنێ ژبۆ هونەرمەندێن دژیانێ دا نەماین دهێنە دروستکرن و ژبۆ ساخان نینن؟ ب دیتنامن بلا چێکرنا پەیکەران لدور وێ چەندێ نەبیت کۆ دەمێ دژیانێدا نەمینن ژنوی ئەم پتر بۆهای بدەینێ و پەیکەران بۆ دوست بکەین، بەلکو باشترە هونەرمەند ب ساخیا خۆژی پەیکەرێ خو ببینیت و بزانیت تاچ ڕاددە ژبۆ خەلک و جەماوەرێ خۆ گرنگە و ڕێز لێ هاتیە گرتن و ئەڤ چەندە نە بتنێ ژبۆ هونەرمەندی دێ خۆشیەک بیت و بیرهاتنەک بیت بەلکو بۆ حکومەتێ و دەستهەلاتێ ژی دێ گرنگیا خوە هەبیت، ژ بەر دوو ئەگەران ئێک ژوان: دەمێ پەیکەرەکی ژبۆ هونەرمەندەکی دروست دکەن وێ چەندێ دیاردکەن کو کورد گەلەک گرنگیێ ب کەلتور و هونەر و هونەرمەندێن خوە ددەن و یا دووێ ژی بۆ وێ چەندێ دەمێ گەشتیار ووەڵاتیێن بیانی ژی قەستا هەرێمێ دکەن و پەیکەرێن هونەرمەندا ل سەر جادە و پارک وجهێن گشتی دبینن، ل وی دەمی دێ زانن کو ئەم وەڵاتەکین ڕێز و بهایی ددەینە هونەرمەندێ خوە و د هونەر دوستین و دگەل هندێ دا ژی ئەڤ وەڵاتیێن بیانی وێنەیان دگەل پەیکەران دگرن و دبەنە وەلاتێن خۆ، ئەڤجا بدیتنا من باشترە پەیکەر بۆ ساخان ژی بهێنە دروستکرن لدویڤ مێژویا وی یاهونەری و پێگەهێ وی دناڤ جڤاکی دا سەرەدەری دگەل بهێتەکرن.

بێوار حەمدی

دەمێ كو هەلبژارتنێن هەرێما كوردستانێ دهێنەكرن دێ بینین تاكێ كورد گەلەك دجۆش و خڕۆشەكا جودا دایە  كو جیاواز ژ هەلبژارتنێن پەرلەمانێ ئیراقێ، رەنگە ئەڤە بۆ چەند خالەكا بزڤڕیت، رەنگە تاكێ كورد وەسا هاتیە پەروەردەكرن كو زێدەتر حەزژ وەلاتێ خۆ بكەت و ڕێزێ ل ئالایێ خۆ بگریت و دیسا ژ لایەكێ دی كورد پتریا جاران پشتەڤانێن ئێك بووینە د بابەتێن گشتی دا، ب تایبەت دەما كو هەلبژارتن دهێنەكرن ب هەمی هێزا خۆ ڤە بڕیارێ ددەت كو بچیت دەنگێ خۆ بدەت ب وێ چەندێ كو ب ڤێ ڕێكێ ژی داخوازا مافێ خۆیێ ڕەوا بكەت كو رەنگە ب ڕێیا هەلبژارتنا كەسێن هەژی بشێت ئەو كێماسیا د ژیانا وی دا هەی چارەسەر بكەت، لێ بەروڤاژی دەما كو هەلبژارتنێن ئیراقێ دهێنەكرن تاكێ كورد ئەو رۆل و خڕۆشا جاران نامینیت، دبیت ژبەر وێ چەندێ بیت كو ژ ئیراقێ ژی بێ هیڤیە یان ژی رەنگە باوەریا وی كێمتر بیت، بەلێ دڤێت ڤێ چەندێ بزانین كو هەلبژارتنێن ئیراقێ ژی گرنگیەكا ئێكجار مەزن بۆ مە كوردان هەیە و پێدڤیە رۆلێ خۆ تێدا ژ بیرنەكەین، خۆ ئەگەر ئەم كەسێن نۆرمال ژی بین و نەبەربژارێن پەرلەمانی، ژی بین بەلكو دڤێت ئەم ئێكگرتنا خۆیا جاران ژبیرنەكەین، ب تایبەت هەلبژارتنێن ئەڤ ساڵە یێن پەرلەمانی ئیراقێ دڤێت مە كوردان، رۆلەكێ مەزنتر هەبیت و پتر شیانێن خۆ بمەزێخین، بۆ وێ چەندێ كورد د چاڤێن وان دا دلاواز و بێ دەستهەلات نەبن، نەخێر مە ژی بەربژارێن ژ هەژی هەنە، لێ یا ژ هەژیتر ئەم بزانین دێ چاوا كەسێن هەژی هەلبژێرین، چونكو هەلبژارتن نەوەكو وێ چەندێ یە كارەكە دێ هەر زوی ژخۆ ڤەكەی ول دەڤ خو وەكو سەرگێژیەك ل قەلەم بدەی، بەلكو دڤێت ل دەسپێكێ مە پشتەڤانی هەبیت ژبۆ بەربژارێن خۆ و پاشی بەربژارێن هەژی بهەلبژێرین و دویڤدا دێ بارگرانیا ژ هەمیێ مەزنتر دەسپێكەت كو ئەوژی دێ مینتە ل سەر ملێن بەربژاران و بتایبەت ئەو كەسێن دەردچن ژبۆ پەرلەمانی، پێدڤی یە ئەڤجارە زێدەتر گڤاشتنێ ل سەر وان بكەن و بشێن پێگەهێ خۆ و جهێ خۆ پتر د ناڤ پەرلەمانی دا ببینن، بۆ وێ چەندێ مافێ رەوا یێ تاكێ كورد نەهێتە خوارن و نەبینە خوارنەكا ب ساناهی بۆ دوژمنی، لەوما ژی داپێكڤە كاربكەین و بۆ وان بسەلمینن كو كورد چ جاران ژ كەفتنان ناترسن، ژبەركو هەر زوی ڕادبنەڤە، دەما كو یاریكەرەكێ تەپاپێی یێ سەركەفتی بیت یان ژی بشێت سەركەفتنێن مەزن تۆمار بكەت ئەڤە هەمی ب خێرا پشتەڤانایە، لەوما ئەڤەژی وەكی وێ یە دڤێت پشتەڤانیا بەربژارێن خۆ بكەین داكو پتر ڕۆمالا وان ژی بلند ببیت و پتر بەرەڤ پێشڤەبرنێ ڤە بچن.

بێوار حەمدی

ب شێوەیەكێ گشتی د ژیانێ دا تاكی حەزا لڤاندنێ وخوەدیتنێ و خوەنیشادانێ هەیە، هەر كەس ب ڕێیەكێ بزاڤێ دكەت خۆ بینیتە پێش و خوە نیشا چاڤێ جڤاكی بدەت یان ڕەنگە حەزدكەت ژ چارچووڤەیەیێ جڤاكا خوە ژی دەربكەڤیت و كار بكەت تاكو خوە نیشا جیهانێ بدەت، دەما هەلبژارتن ژی دهێنەكرن ژبۆ وێ چەندێ كا دێ كی شێت دەنگێن پێدڤی خڕڤەكەت داكو بشێت كورسیكەكا پەرلەمانی بدەست خوە ڤەبینیت، ئەڤجا بدەستخستنا ڤێ كورسیكێ ژی ئێك ژ دویانە یان ژبۆ وێ مەرەمێ یە داكۆ بڕێیا وێ كورسیكێ خزمەتا جڤاكێ خوە بكەت ژبۆ وێ مەبەست و تایبەتمەندیا خۆ یاكۆ پێ دەربازبووی، یان ژی ژبۆ وێ چەندێ یە بتنێ وی كەسی حەزا خۆنیشادانێ و دەرخستنێ هەیە، بتنێ حەزدكەت بچیتە سەر وێ كورسیكێ بۆ هندێ بەرنیاس ببیت و پارەیان خڕڤە بكەت، ئەڤجا دڤێت ل دەسپێكێ ئەم بوهایێ وێ كورسیكێ بزانین، ئەرێ یا ڕەوایە كورسیكەكا پەرلەمانی بهێتە كڕین؟ ئەرێ یا ڕەوایە تو بچیە سەرڤێ كورسیكێ بتنێ دا خۆ پێ بنیاسی؟ ئەرێ ئەو كورسیك دێ بوهای دەتە تە یان تو دێ بوهای دەیە وێ كورسیكێ؟ ئەڤە چەندین پرسیارن كو پێدڤی یە خۆدانێ كورسیكێ ژخوە بكەت، كا ئەرێ یێ بەرهەڤە یان نە، ب سروشتی دەما كو مرۆڤ دچیتە د ناڤ هۆڵەكا ڕێكخستنا چاڵاكیەكێ دا یان مێهڤانداریەكێ یان هەر جهەكێ فەرمی و نەفەرمی ژبلی دەستهەلاتێ، بێگۆمان كورسیكا مرۆڤی ل سینگی بیت یان ل دوماهیێ بیت كورسیك نە چ ژ مرۆڤی كێم دكەت و نە زێدە و دیسا گرنگە بزانین كورسیك بهای نادەتە مرۆڤی بەلكو مرۆڤە بهایی ددەتە كورسیكێ، بەلێ ڕەنگە كورسیكا پەرلەمانی ب شێوەیەكی یا جیاواز بیت و خودان بوها بیت، بەلێ بۆچی؟ چونكو كورسیكا پەرلەمانی گەلەك تشتان دبێژیتە مە وەكو ئەگەر تو یێ (باوەریێ نەبی، خۆدان ڕەفتار و رەوشت نەبی، خودان پێگەهەكێ مەعریفی و زانستی نەبی، دل پاقژ نەبی، خۆدان نیازێن پاك نەبی، گەندەڵ بی) دبێژیتە مە من ئەڤ كارە هەمی دڤێن، گەرتە ئەڤ خالێن باشیێ یێن ئەرێنی نەبن لسەر من نەروینە خار و بوهایێ من و خۆ هەردویان ژدەستنەدە، لەوما ژی كورسیكا پەرلەمانی ڕەنگە بوهایەكێ مادی نەبیت، لێ بوهایەكێ مەزن یێ مەعنەوی هەیە، فەرە هەر كەسێ بزاڤ كرین كو لسەر ڤێ كورسیێ بڕوینیت یان ژی یێ نوها چوویە وێری دڤێت ڤان خالان ل پێش چاڤ وەربگریت، ئەو كورسیكە یا دبێژیتە مە ئەز بەرپرسیاریەكا مەزنم، ئەگەر تەشیانێن هەلگرتنا بەرپرسیاریا من هەبن هەلگرە و گەرتە نەبن من ژبیربكە و خوە نێزیكی من نەكە.

بێوار حـەمـدی

گەلەك جاران دەمێ كەسەك دبێژیت من دڤێت بگەهمە گۆپیتكێ یان ژی من دڤێت فلان كاری بكەم، ئێكسەر ئەو كەسێ بەرامبەر دبێژیتێ (كریار شەڕتە)، چۆنكو پتریا مە خەونێن مە زن هەنە و حەزدكەن بگەهنە هەمی هیڤی و ئارمانجان، لێ دیسا دبێژین كریار شەڕتە، ئەرێ گەلۆ مادەم نەهات ژ ئاخفتنێن كۆڵانكی و بێ كریار ڤەبین، ئەرێ مادەم نەهات بێژین و بكەین، بێگۆمان مە هەمیان دڤێت كریارێن خۆ بكەینە د وارێ پڕاكتیزەكرنێ دا و بكەینە كریار بەلێ چەوا؟ ولكیڤە ؟ خەون و ئارمانجێن مەزن هەردەم پێدڤی ب كریارێن مەزنە، نابیت مرۆڤی خەونێن مەزن هەبن و كریارێن بچویك، دا پێكڤە خۆ ژڤێ فەلسەفەیا جادێ ڕزگاربكەین، دا بەس بهای بدەینە مەدحەیان و خۆ بكەینە خودانێن خۆدان بەرپرسیاریێن مەزن و بێ كریار، پتریا ئەوكەسێن نەشێن ئاخفتن و گۆتنێن خۆ بكەنە كریار ئێك ژ ڤان ئەگەرانە، یا ئێكێ: ئەو كەسەكە بتنێ حەزدكەت خۆ بدەرئێخیت و نیشا هەمیان بدەت كۆ خەون هەنە یان ژی دشێت گەلەك كاران بكەت و قازانجی بكەت و د هەمان دەمدا وی حەزا پێشڤەچوونێ نینە، یان ژی دبیت وی كەسی باوەری ب خۆ نەبیت كۆ گۆتنا خۆ بكەتە كریار، چونكو نەباوەری بخۆبوون هەمی هیڤیان دكۆژیت و دبیتە ڕێگرەكا مەزن ل هەمبەر خەون و ئارەزۆیان، یانژی دبیت وی كەسی ئەو گۆتنا كری ژ وی و شیانێن وی مەزنترە، ئەڤەژی یان ژبەر وێ چەندێ یە كو ئەو ڕاست دبێژیت لێ وی چ د دەستان دا نینە و یێ بتنێ یە وەكو مەزن دبێژن (دەستەك بتنێ دەنگ ژێ ناهێت) ویێ پێدڤی ب هاریكاریا خێزانێ یە، لێ پا ل ڤی دەمی ژی دڤێت ئەم پێنگاڤێن خۆ ل دویڤ ئاست و شیانێن خۆ بهاڤێژین، نابیت هندەك گۆتنان بكەین كو نەشێین لێ ببینە خۆدان و بكەینە كریار، بەلێ ئەم دشێین بباشی و دروستی هزرا خۆ د هەر كار و كریارەك وگۆتنەكا خۆدا بكەین و تشتێ ژ هەمیێ گرنگتر د ڤی بابەتی دا (باوەری بخۆبوونە) چونكو هەردەمێ مە باوەری ب گۆتنا خۆ هەبیت ئانكو مە هزرا خۆیا كری و پلانا خۆ یا دانای، ئەڤجا داپێكڤە خۆ ژ گۆتنێ بتنێ دوور بكەین داپێكڤە بۆ سەركەفتنێن ب كریار خۆ بەرهەڤ بكەین.

بێوار حەمدی

ب گشتی سترانبێژ ئەو کەسەکە یێ خودان دەنگێ خوە یێ تایبەت بیت و کۆمەکا بەرهەم و سترانان هەبن تایبەت ب وی ڤە، هەتا کو بشێت حەز ژێکەران ل دەوروبەرێن خوە کۆمڤە بکەت و سەرنجا خەلکەکی بخوە ڕاکێشیت، ئەڤجا چ ب دەنگێ خوە بتنێ یان ژی ب ڕەنگێ خوە یان کەسایەتیا خوە، هەر دکەڤن دا جڤاکێ کوردی خۆدان چەندین سترانبێژ بوویە یێن خودان دەنگێن ڕەسەن و چیایی، گەلەک ژوان سترانبێژێن کەڤنار نها دژیانێ دا ماینە و گەلەک ژی دژیانێدا نەماینە، یا ژهەژیە بێژین ب تایبەت ئەو سترانبێژێن کو دژیانێ دا نەماین و خودان دەنگێن زەڵال و بینەرەکێ زۆر دنوکە دا هەرچ تشتێ بەرامبەر سترانێن وان بهێتە کرن ئەو نەشێن بەرەڤانیێ ژێ بکەن هەر چەند دناڤ دلێن مەدا دساخ ژی بن، لەوما سترانێن وان و فولکلۆرێ وان دێ بیتە ئەرکەک لسەر ملێن هەر تاکەکێ کورد کۆ بپارێزیت وبەڕەڤانیێ ژێ بکەت، لێ تشتێ سەیر ب مخابنی ڤە جاران ئەم دبینین کو سترانێن وان هونەرمەندان تا ڕاددەیەکیبێ بۆها دکەن ب هەر ئەگەرەکێ هەبیت، ژوان ئەگەران ژی ( دێ سترانێن وان دسۆشیال مەدیایێ دا هێنە دانان لسەر هندەک تشتێن بێ بوها یان دێ سڤکاتی پێ هێتە کرن ب هندەک لڤینان، یان دێ وێ سترانێ ژوی چواچۆڤێ پیرۆز دەرئێخن،، یان ژی سترانبێژەکێ کۆ چ بنەمایێن سترانگۆتنێ لدەڤ نینن و تاکۆ خودان
دەنگەکێ باش ژی نینە و کەس ژێ ڕازی نینە دێ هێت و سترانێن وان هونەرمەندێن نەمر بێژیت کو هەر دبنیات دا دگەل ستایلێ وی یێ سترانگۆتنێ ناگۆنجن) لەوما بلا ئەم هەمی ڕێزێ ل هونەرێ کوردی بگرین، چونکۆ بتایبەت هونەرمەندێن بەرێ خودان ڕێز بوهایەکێ تایبەتن، ئەرکە لسەر ملێن مە هەمیان خوە ل دەنگێن وان یێن پیرۆز بکەینە خودان.

بێوار حەمدی

بێگومان هەر تاكەك ل هەرجهەكی بیت ب ئازادی ژدایك دبیت، دەرگەهێن ژیانێ وهەبوونێ دڤەكرینە ژبۆ هەر بۆنەوەرەكێ ژنوی گەشەیێ دكەت، هەركەس داخوازا ئازادیێ دكەت و هەركەس ب ئازادیێ د ژیانێ دا دلخۆش و بەختەوەر دبیت، ژبەركو ژیان مولكێ چ كەسان ب تایبەت نینە، لێ ل ڤێرێ دبیت ئەم گەلەك جاران پرسیارێ ژخوە دكەین ئەرێ سنوور ژبۆ ئازادیا تاكی هەنە؟ یان ژی تاك چ بكەت یێ ئازادە و كەسێ ماف نینە بەرسینگێ كەسێ بگریت، یا پێدڤی وگرنگە ئەم باش دراڤەكرنا چەمكێ ئازادیێ بگەهین و بزانین ب چ ڕێك ئالایێ ئازادیێ بلند بكەین، كەواتە ئەگەر ب دروستی د ناڤ بابەتی دا بچین، بەلێ و بێگومان سنوور ژبۆ ئازادیا تاكی هەنە، بەلێ ل كیڤە وكەنگی و بۆچی؟ وەكو مە گۆتی مرۆڤ د سروشتێ خوە دا دڤێت یێ ئازاد بیت، بەلێ جاران ئەم خەلەت د ڤی تێگەهی دگەهین، هندەك كەس وەسا هزر دكەن هەر چ تشتێ بكەت ئازادیا تاكی یە وكەسێ چ ماف لسەر نینە، ئەم ل ڤێرە دێ ب ڕستەیەكا كورت بێژین (مرۆڤ كەواتە هەر تاكەك هەتا وی سنووری یێ ئازادە كو ئازادیا بەرامبەر تێكنەدەت) ئانكو تاك یێ ئازادە كو بخۆینیت، بگەڕیت، بنڤیت، كارێن تایبەت هەبن یێن كو كەس نەشێت مایێ خوە تێ بكەت كو گرێدای كەسایەتیا وی ڤە بن، لێ هندەك كەس وەكو مە گۆتی ب شاشی تێدگەهن بۆ نموونە، دێ چن ئازادیا كەسەكێ دی تێكدەن وەسا هزر دكەن كۆ ئەو دئازادن و وان سنور نینن، نابیت مرۆڤ تشتەكی بكەت كو ئازدیا بەرامبەر تێكبدەت یان شیرازا جڤاكی تێك بدەت، نموونە: مرۆڤ ل بەر دەرێ مالەكێ بیت د تڕومبێلێ دا و ل هۆڕنێن ترومبێلێ بدەت ل وی دەمی یێ ئازادیا هندەك كەسێن دی تێكددەت، یان ژی بچیت بێ ئەگەر ژینگەهێ پیس بكەت، ل وی دەمی شیرازا جڤاكی تێكدا، یان ب هەر جۆرەكی دەستدرێژیێ بكەتە سەر كەسەكی یان تشتەكێ وی، ئەڤە ژی نە ئازادیە بەلكۆ تاوانە و بنبڕكرنا ئازادی ومافێن بەرامبەرە، دشێین بێژین ل وی دەمی ئەم دئازادین د هەر كار و كریارەكێ دا دەمێ ئازادیا كەسێ بەرامبەر یان ژی كۆمێ تێك نەدەین.