د. جەعفەر ئیبراهیم

ئەگەر ل گۆرەی دستوور و یاسایێ بیت، ل گۆرەی بەرژەوەندییێن بلند یێن هەرێمێ بیت، بەرسڤ یا بساناهییە نەشێت، لێ ئەگەر ل گۆرەی کاودانێن سیاسی یێن رۆژەڤا ئەڤرۆکە بیت، ژەهر وەکو بارانا ل زڤستانێ ل هەر جهی ل کوردستانێ بباریت؛ دابڕانا سیاسی دگەل پارتی رۆژ بۆ رۆژ زێدەتربیت، زمانێ زڤرێ راگەهاندنێ و ب تایبەتی سوشیال میدیا بەردەوام پتر دژوارببیت، ئەگەر ئەڤ زمانێ دژوار یێ رۆژانە ببیتە جێگرێ دیالوگ و دانوستاندنێن راستەقینە، بەرسڤ گەلەک یا ب زەحمەتە، هینگێ رەوش یا باش نابیت، و دێ ئەڤ رەشا خراب خرابتربیت و کەسەک نەشێت هزر ل چارەسەریەکا باش بکەت.
دیارە ل پڕانیا جیهانێ، دیالۆک ئالوزیێن گران ڤەدکەت، دانوستاندن کاودانێن خراب چارەسەردکەت، لێ هێشتا ل دەف مە کوردان هزر دناڤ خورکمانان دا یێن خندقین، وەکو پێدڤی هزر ل چارەسەریەکا واقعی نائێتەکرن، کوردان گەلەک دەردێ بێتفاقی و دووبەرەکیێ دیتیە، هەمی دزانن دڤێت ئەڤ رەوشە زوی بهێتە چارەسەرکرن داکو نەگەهتە قووناغا دووماهیێ یا کانسێرا سیاسی.
دناڤ کاودانێن ناڤخۆ دا زەمینا چارەسەریێ هەیە، زەمینا جڤاکی سیاسی، زەمینا فشارا رایا گشتی، زەمینا بەرژەوەندیێن هەڤبەش و ئەزموونا حوکمرانیا هەڤبەش،ل ناڤ کوردان ژی کەسەک ژ پارتی و ئێکەتی باشتر زمانێ ئێکودو نوزانن ، کەسەک ژوان پتر نێزیکی هەڤدو نینە ( مام و برازا) واتە ئێک خێزان و ئێک دەرد و ئێک دەرمان، لێ زەمینەسازیێ پێدڤی ب ئێک پێنگاڤ هەیە، پێنگاڤەکا نەیا ئاسایی، هەمی کەس نەشێن وێ پێنگاڤێ بهاڤێژن، پێنگاڤەکا ستراتیجی و گران ، کو هەمی یاریا سیاسی ل هەرێمێ و ل عراقێ بگوهۆڕیت، پێنگاڤەک پڕ ژیری، پڕ خەمخۆری، پڕ مەسئوولیەت.
وەخت هەم دەردە و هەم دەرمانە، بلەز دچیت و پاشڤە نازڤڕیت، دڤێت پارتی و ئێکەتی ڤێ مارەسۆنا پڕ ژان، پڕ سترێس بدووماهی بینن، رۆژەک زویتر کابینا دەهێ ل سەر بنگەهێ باوەریەکا زێدەتر، هەڤگرتنەکا زێدەتر، تفاقەکا بهێزتر، بۆ هندێ کابینەیەک ژ دایک ببیت وەکو پێشتر و هێشتا پتر یا بهێزبیت، حوکمەتەکا ساڤا نەبیت دناڤ کاودانێن هەستیار یێن دەڤەرێ دا ب خەندقیت، بەلکو حوکمەتەکا شارەزا و پڕ شیان و ئەزموون بیت، کاروانێ ئاڤەدانیێ وەکو نوکە بهێز و هێشتا بهێزتر بەردەوام بکەت، حوکمەتەک بیت سلێمانی و هەلەبجە بکەتە هەولێر و دهۆک و دهۆک و هەولێر بکەتە سلێمانی و هەلەبجە، ئێک کابینە و ئێک حوکمەت، ئێک ئاراستە و ئێک بەرنامە و ئێک بڕیار.
ئەڤ بڕیارە ژیرترین بڕیارە، ئەو ژی بدەستێن مە ب خۆیە، کورد ژی بەردەوام خودان خەونێن مەزن بووینە لەورا من باوەری ب قەدەر و پاشەڕۆژەکا گەش هەیە.