یا خۆیا یه‌ هه‌ر ژ په‌یدابوونا جڤاكێ مرۆڤایه‌تیێ هه‌تا ئه‌ڤرۆ، مرۆڤایه‌تی د گه‌له‌ك قوناغان دا ده‌رباز بوویه‌ ل بن گه‌له‌ك جورێن په‌رده‌یان مرۆڤ راستی زولم و زوریێ هاتنه‌، ئه‌ڤجا چ ل بن په‌رده‌یێن كه‌لتورو دابو نه‌ریتان بیت چ ژی ل بن په‌رده‌یێن بكار ئینانا په‌یامێن ئاینی بیت وه‌كی به‌رژه‌وه‌ندا زه‌لامێن په‌رستگه‌هان خواستی، لێ گه‌له‌ك كه‌سان دڤێ كێشڤه‌ كیشا ئالۆز دا ملێ خۆ دا یه‌ به‌ر ڤی باری هه‌ست ب پێدڤی یا جڤاكی ب رزگاره‌كی كریه‌ و هزرا وان جڤاك و مرۆڤێن وی ژ تاریێ به‌ره‌ڤ رۆناهییێ ئاراسته‌ كرینه‌ وه‌كو شوره‌شا هزری یێن كو ژلایێ مارتن لۆسه‌رێ ئه‌لمانی و سه‌ركێشیا وێ دژی زولما كه‌نیسه‌یێ كری یان ژی په‌یدا بوونا شوره‌شا فره‌نسی ل سالا 1789 و دانانا گرێبه‌ستا جڤاكی ژلایێ جان جاك رۆسۆ یێ فره‌نسی ڤه‌، ئه‌گه‌ر ل دیرۆكێ بزڤرین دێ بینین پتریا وه‌لاتێن رۆژئاڤا بزاڤا ئازاد كرنا مرۆڤان و تاكێن جڤاكی پێنگاڤا ئێكێ ژ لایێ هزرمه‌ند و نڤیسكارێن وان ڤه‌ بویه‌.

رۆژهه‌لاتا ناڤه‌راست هه‌تا نهۆ ژی دره‌وشه‌كێ دایه‌ كو كه‌سه‌ك سه‌را هه‌لویسته‌كێ خۆ دهێته‌ گه‌ڤ باران كرن رسوا كرن ئه‌ڤچا ئه‌ڤ رسوایه‌ چ ل بن ناڤ و نیشانێن جڤاكی بیت یان ئاینی یان عه‌شیره‌تی و هنده‌ك جاران ئه‌ڤ گه‌فه‌ دگه‌هنه‌ ئاستێ گیان ژ ده‌ستدان و گوری بوونێ یان ژی مێڤان بوون ل شڤشێن زیندانان و كاره‌ساتا مه‌زن ئه‌وه‌ نڤیسكارێن ڤان وه‌لاتان د گوپیتیكا بێده‌نگیا خۆ دانه‌، نه‌ بتتێ ئه‌ڤه‌ به‌لكو ئه‌ڤرۆ خه‌لك یێ د كومه‌كا قه‌یرانا دا ژ وانا قه‌یرانا ئازادیێ د هزكرنێ دا به‌لكو د هنده‌ك ره‌وشادا نه‌ یا شاشه‌ ئه‌گه‌ر هنده‌ك مرۆڤ ب به‌نده‌ بهێنه‌ ناڤ كرن ژ به‌ركو ره‌وشا ئه‌و تێدا و ئه‌و سه‌ره‌ده‌ریا كار بده‌ست دگه‌ل دكه‌ن نه‌یا دووره‌ ژ یا به‌نده‌یه‌كێ چ هه‌ست ب هه‌بوونا خۆ نه‌كه‌ت، ئانكو ل هنده‌ك وه‌لاتان بتنێ ناڤ یێ رۆژ هه‌لاتێ یه‌ ئه‌گه‌ر نه‌ رۆژا ژیانێ یا ئاڤایه‌ و ل بن ئێشان و سته‌ما هه‌موو ره‌نگێن ده‌ستهه‌لاتان هه‌رئێكێ ب رێژه‌كێ د نالن و مرۆڤێ وێ هه‌ست ب هه‌بوونا خۆ وه‌كو ( مرۆڤ ) نا كه‌ت.
هه‌رێما كوردستانێ خه‌لكی گه‌له‌ك باوه‌ر ژ درۆشما كر و گه‌له‌ك خه‌باتكر ژ پێخه‌مه‌ت ئازاد بوونێ و بیست چار سالان دگه‌ل ڤان ئۆمێدان ژیا، لێ ئه‌ڤرۆ ئه‌م یێ د سالا 2015 دا دژین هێشتا هه‌ست ب هه‌بوونا جوداهیه‌كا مه‌زن دناڤبه‌را كه‌سه‌كی و ئێكێ دی دا هێته‌ كرن هێشتا هه‌تا سه‌ر هه‌ستی هه‌ست ب نالینێ ژ نه‌بوونا دادپه‌روه‌یا جڤاكی دا هێته‌كرن ئه‌ڤه‌ ژی ل بن په‌ردێن هه‌موو ره‌نگێن ده‌ستهه‌لاتان، له‌وما دڤێت نڤیسكارێن مه‌ ده‌ست بده‌نه‌ شوره‌شێن هزری لێ ئه‌گه‌ر نڤیسكار ل بن سیبه‌را به‌رژوه‌ندا خۆ بنڤیت یان ژی ب پله‌و پایان بهێته‌ رازیكرن گه‌لۆ دێ ته‌ چ ئۆمێده‌ك مینیت ئه‌گه‌ر پێنڤیس ببیته‌ ده‌رگه‌هێ رسقی! ئه‌رێ ئاسویێن روهن دێ په‌یدا بن؟ بێ گومان نه‌خێر، له‌وما د ره‌وشه‌كا ژڤی ره‌نگی دا نڤیسكار پتر ژ هه‌ر تاكه‌كێ دی یێ داخاز كریه‌ بهێت و سه‌رێ به‌رچمه‌كا گوڤه‌ندا گهورینێ بگریت، لێ ئه‌گه‌ر نڤیسكاری بۆ ژیانا خۆ نڤیسی هنگی ل سه‌ر ره‌فاتكێن په‌رتوكخانه‌یان دێ نڤیسینێن وی بنه‌ وارگه‌هێ تۆزێ و خه‌لك ژی دێ ژ ده‌ردێ چاڤه‌رێیا په‌یدا بونا ده‌لیڤه‌كێ بۆ ژیانێ به‌ره‌ڤ گورستانێ ده‌ته‌ رێ.

یا بێ گومانه‌ ئاخ پشكه‌كا گرنگه‌ ژ ناسناما هه‌ر ملله‌ته‌كی ژ به‌ركو ملله‌تێن بێ وه‌لات هه‌بوون و ره‌سه‌ناتییا وان دكه‌ڤیته‌ د گومانێ دا له‌وما ژی پارستن و خو گوری كرن بۆ ئاخێ و وێ پارچا جوگرافییا یا ناڤ لێ دهێته‌ دانان وه‌لات ژ بلی كو جهێ شانازییكرن و سه‌ر بلندییێ یه‌ به‌لكو ب به‌رێ خو دانه‌كا نه‌ته‌وه‌ی و ئاینی و جڤاكی ژی ئه‌ركێ هه‌ر تاكه‌كه‌سه‌كی یه‌ یێ كو وه‌لاتیێ ڤی وه‌لاتی بێی خۆ بزانیت. وه‌لاتێ خۆ بڤێت ڤیانا وی دگه‌ل هه‌بوونا خو تێكه‌ل بكه‌ت و هه‌ر گه‌فه‌كا ‌ ل سه‌ر ‌وی ب گه‌ف لسه‌ر كه‌رامه‌ت و پیرۆزیێن خۆ بزانیت.
تاكێ كورد دڤی چارچوڤه‌یی دا راسته‌ پشكا پترا وی تاكه‌كێ وه‌لات په‌روه‌ره‌ و یێ به‌رهه‌ڤه‌ ب هه‌می ره‌نگێن قوربانییێ وه‌لاتێ خۆ ب پارێزێت لێ راسیه‌ك هه‌یه‌ جاران د هنده‌ك ده‌رفه‌تان دا ژێیاتییا تاكێ كورد به‌ره‌ڤ نزمییێ دچیت و ئه‌ڤ خاله‌ ژ لایێ نه‌یارێن وی ڤه‌ ب ده‌رفه‌ت دهێته‌ دیتن كو وه‌لاتێ كوردان ب ده‌ستێن كوردان ب ده‌نه‌ وێران كرن دبن په‌رده‌یێن جۆرا و جۆر ڤه‌ تاكێ كورد بۆ خو رابكێشیت بكه‌ته‌ ئامرازه‌كێ دا گیركرنێ بۆ وارێ وی.
دیرۆك ب به‌ر په‌رو روودانێن خۆڤه‌ پرانییا جاران بۆ ملله‌تێن جیهانێ دبیته‌ ژێده‌ره‌ك بۆ پشت به‌ستنێ بۆ ئێكلاكرنا گه‌له‌ك كێشه‌یان یان ژی وان بابه‌تێن پتر ژ بۆچونه‌كێ لسه‌ر هه‌ی دبیته‌ به‌لگه‌یه‌كێ ئێكلاكه‌ر بۆ هه‌ر دوو لایه‌نێن بۆچوونێن جۆدا هه‌ین، ملله‌تێ كورد ئه‌گه‌ر بۆ بابه‌تێ ژێیاتییێ ل دیرۆكێ ژی بزڤرین گه‌له‌ك جاران عه‌شیره‌تێ یان ژی دینی یان هتد. .. بار ۆ پشكێن خۆ هه‌بووینه‌ د ژێیاتییا تاكێ كور دا ئانكو گرێدانا وی، ڤیانا وی، به‌رهه‌ڤییا وی نه‌بتنێ بۆ ئاخێ بوویه‌ و ئه‌و راستییا ته‌حلا هه‌ی ئه‌وه‌ كو د هنده‌ك ده‌لیڤه‌یێن دیرۆكێ دا ڤیانا ژێیاتییا ئاخێ ل ده‌ڤ مرۆڤێ كورد ل پله‌یێن دوو و سییێ ژی هاتییه‌ به‌لكی ژی د هنده‌ك ده‌مان دا هه‌بوونا ژێییاتییێ بۆ ئاخێ تا وی ئاستی یا لاواز بیت كو هه‌ست ب هه‌بوونا وێ نه‌هاتیبیته‌ كرن، لێ هنده‌ك جاران دهێته‌ گۆتن كو فه‌ره‌ مفا ژ سه‌ربۆرێن دیرۆكێ بهێته‌ كرن و شاشیێن وێ بهێنه‌ راستڤه‌كرن و رێ ل دووباره‌ بونا وان بهێته‌ گرتن، پرسیارا كو لڤێرێ دهێته‌ پێش گه‌لۆ ئه‌ڤرۆ ب هه‌موو رامانان ڤه‌ مرۆڤێ كورد یێ گرێدایه‌ ب ئاخا خۆڤه‌؟
بێ گۆمان هه‌موو تشت یێ رێژه‌یی یه‌ و نه‌یا ره‌وایه‌ ته‌رو هشك د به‌رسڤا ڤێ پرسیارێ دا ب هه‌ڤرا بهێنه‌ سوتن، لێ جاران هه‌ست دهێته‌ كرن كو تاكێ كورد ل ڤی سه‌رده‌می ژی هندی كه‌فتییه‌ بن باندۆرا دروشمێن پارتێن سیاسی چارچوڤه‌یێن جڤاكی یێن به‌رته‌نگ و پاراستنا به‌رژوه‌ندیێن كه‌سوكی هند نه‌كه‌فتیه‌ بن سیبه‌را پارستنا ئاخێ، ئه‌گه‌ر بیرا مه‌ ل هه‌وێن هه‌لبژارتنان بهێت ل سالێن بوری هندی‌ كاندیدا گرێدانا خۆ ب عشیره‌تێ و پابه‌ندبوونا خۆ ب سیسته‌مێ وێ ده‌ردبری هند داكوكی ل پاراستنا پیرۆزیێن ڤی نه‌ته‌وه‌ی نه‌دكر یان ژی هه‌ر ده‌ما ئالۆزیه‌ك د هێته‌ هه‌بوونێ و ره‌وشه‌كا نه‌ ئارام په‌یدا دبیت ئێكه‌مین رێیا قورتال بوونێ یا هژماره‌كا خه‌لكی هزر تێدا دكه‌ت ره‌ڤه‌ و به‌رخودان دفه‌رهه‌نگا وان دا نامینیت ژبلی ڤێ چه‌ندێ ئه‌ڤرۆ ژماره‌كا گه‌نجان هه‌نه‌ ئه‌گه‌ر ده‌رگه‌هه‌كێ بچویك ژی ل به‌ر ڤه‌ ببیت بۆ هندێ كو به‌ره‌ڤ پشت سنورێن ڤی وه‌لاتی ب ده‌ته‌ رێ ئه‌و بۆ ڤێ چه‌ندێ یێ دوو دل نابیت، یا ژ من ڤه‌ ئه‌ڤ نمونه‌یێن دناڤ ڤی جڤاكی دا تێرا هندێ هه‌نه‌ مرۆڤ بگه‌هیته‌ وێ باوه‌ریێ كو دناڤ به‌را تاكێ كورد ئاخێ و ڤیانا وێ و پیرۆز راگرتنا وێ گه‌له‌ك ناڤبر هه‌نه‌ ئه‌ڤجا هنده‌ك د دێرینن و هنده‌ك ژی د سه‌ر ده‌مانه‌ نه‌، له‌وما ژی لێزڤرینه‌كا ب رژدی دره‌هـ و ریشالێن ڤێ كێشێ دا به‌لكی ژ نان و ئاڤان گرنگ تربیت ژ بۆ ئێك رێزییا ڤی ملله‌تی و گرێدانا مرۆڤێ كورد ب وه‌لاتێ وی ڤه‌ ئه‌ڤه‌ ژی دێ هنگی هێته‌ هه‌بوونێ كو بزاڤ دهێته‌ كرن تاكێ كورد ب تایبه‌تی ژی گه‌نجان ڤیانا وه‌لاتی ب كریار ل ده‌ڤ په‌یدا ببیت ژ درۆشمی به‌ره‌ڤ كریارێ بچیت ئه‌ڤه‌ ژی ب مه‌رجه‌كی ئه‌و هه‌می سه‌نته‌رێن ل بن دریشمێن ڤینا وه‌لاتی و هه‌ست و هزرێن نه‌ته‌وه‌یی كارێ خۆ دكه‌ن د بازنه‌یێ ئاڤاكرنا كه‌سایه‌تییا گه‌نجی دا دزڤرن یان ئه‌ و هه‌می رێكخراوێن بناڤێ جڤاكێ سڤیل بزاڤێن خو دكه‌ن و دیسان هه‌موو كه‌رتێن دی یێن كو ده‌نگ و په‌یاما وان ب ره‌نگه‌كێ ئێكسه‌ر باندۆر لسه‌ر مرۆڤێ جڤاكی هه‌ی ب رۆلێ خۆ رابوون و ئه‌ڤ ئه‌ركه‌ نه‌داپال چ سازیێن دی و د بجهـئینانا وی دا رێكێن سه‌رده‌میانه‌ گرتنه‌ به‌ر هینگێ دێ رێژه‌یا وه‌لات پارێزیێ د مێشك و ناخێن مرۆڤێ كوردا به‌ره‌ڤ بلندیێ چیت و ئه‌گه‌ر گه‌نجی خونه‌دیت یێ جودا ژ وه‌لاتێ خۆ و ئه‌ڤ ئاخه‌ ب پشكه‌كا ژیانا خۆ زانی دێ پلانێن دۆژمنان یێن داگیركاری هه‌می به‌ره‌ڤ پیچ بوونێ چن و ئێدی ده‌نگ و باسێن چوونا گه‌نجێن كورد بۆ ناڤ گرۆپێن تیرۆستی یێن ل دژی وه‌لاتێ وی شه‌ری دكه‌ن ناهێته‌ بهیستن و وه‌لات دێ رۆژ بۆ رۆژێ قوناغان به‌ره‌ڤ سه‌رڤه‌رازیێ و سه‌ركه‌فتنێ بریت هه‌تا دگه‌هیته‌ هه‌موو خه‌ونێن خۆ یێن دوور و نێزیك.

یا خوه‌یا بیێ هه‌بوونا قوربانیان گوریكرنا گیانان چ شۆره‌ش و سه‌رهلدان ل سه‌رانسه‌ر جیهانێ نه‌ هاتینه‌ هه‌بوونێ و بێ گوهۆرینا مرۆڤان د شۆره‌شان دا بده‌ستڤه‌هاتنا ده‌ستكه‌ڤتان دچیته‌ د چارچووڤێ مه‌حالیێ دا له‌وما ژی شه‌هیدان د هه‌موو شۆره‌ش و سه‌رهلدانان د بزاڤێن چه‌كداری دا ل جه‌م خه‌لكێ جیهانێ بها و پیرۆزیا خوه‌ هه‌بوویه‌ و هه‌رده‌م ل سه‌ر هه‌می ئاستان د ناڤ جڤاكی دا ب ڤی چاڤی ته‌ماشه‌ی وی كه‌سێ گیانێ خوه‌ دكه‌ته‌ قوربان ژ پیخه‌مه‌ت پیرۆزیا ئاخا خوه‌ هاتییه‌كرن ژ به‌ر كو ئه‌ڤ كه‌سه‌ پیرۆزترین هه‌بوویێ خوه‌ گۆری دكه‌ت ژ پێخه‌مه‌ت ئارمانجه‌كا پاقژ و پیرۆز كو ئه‌و ژی پاراستنا ئاخێ و هاژۆتنا كاروانێ ملله‌تی یه‌ به‌ر ب ئازادبوون و پێشڤه‌چوونێ. گه‌لێ كورد ژی ژبه‌ر كو دیرۆكه‌كا پر ژ شه‌ر ۆ و شۆر و شۆره‌ش و قوربانیدان گرتنا سه‌نگه‌رێن به‌ره‌ڤانیێ هه‌یه‌ و چو ده‌م و سه‌رده‌مه‌كی ده‌ست ل به‌رامبه‌ر زۆلم و زۆریا دۆژمنی نه‌ دهێلاینه‌ هه‌رده‌م هه‌موو ره‌نگێن قوربانیان داینه‌ ژ بوونا ژیانه‌كا ئازاد و ته‌نا و سه‌رڤه‌راز، له‌رما تومارا وی یا دیرۆكێ یا تژی یه‌ ژ ناڤێن شه‌هیدان و كاروانه‌كێ درێژ یێ گوریكرنێ هه‌یه‌ هه‌ركه‌سێ ل دیرۆكێ بزڤریت چ دیرۆكا كه‌ڤن چ یا نوو ئه‌ڤێ راستیێ چه‌ندێ ب ئاشكه‌رایی دسه‌لمینیت، ژ به‌ر كو چ دمه‌كی دوژمنان چاڤ پیرۆزیائا خامه‌ و جوامێریا ملله‌تێ مه‌ نه‌ رابه‌وینه‌ له‌وما به‌رده‌وام پیلانێن كرێت گڕیاینه‌ ڤیاینه‌ ژیانێ ل ڤی ملله‌تێ ژیان دوست تێك بده‌ن لێ گیانێ ئازادیێ تاكێ كورد چ سه‌رده‌مان رێ نه‌ دایه‌ خه‌ونێن وانیێن چه‌په‌ل بجهـ بهێن و ب روح و مال و هه‌رتشتێ خوه‌ بوویه‌ پارازه‌رێ وه‌لاتێ خوه‌، دووماهی گه‌فان نه‌یار و دوژمنان ژی هاتنا گرۆپێ تیرۆستی یێ ب ناڤێ داعش بوویه‌ ل خزیرانا سالا بووری ئاراسته‌كرنا وێ به‌ر ب كوردستانێ، هه‌لبه‌ت وی دهێته‌ هه‌موو ده‌مان ژ پێشمه‌رگه‌ی دهێته‌ چاڤه‌رێكرن ئه‌ڤێ جارێ ژی ملله‌تێ كورد داستانێن قاره‌مانه‌نه‌ تۆمار كرن نه‌هێلان دۆژمن بگه‌هیته‌ حه‌زێن خوه‌ یێن دڕندانه‌ سه‌ربۆرا ئازادا هه‌رێما كوردستانێ تێك بده‌ت لێ بێ گومان پشتی خویكا خوه‌ ژ شه‌هیدبوون برینداربوونا هژماره‌كا خوه‌شتڤیان ل به‌ره‌یێن جودا جودایێن شه‌ڕی دا یێ ئه‌ڤێ چه‌ندێ ژی گه‌لێ كورد ب پرانی خه‌مگین كریه‌ ژ به‌ر كو پتریا كوردان خوه‌ بینیت له‌شه‌ك كو ب ئێشانا ئه‌ندامه‌كی هه‌موو ئه‌ندامێن دیتر دئێشن خوه‌ ب هه‌ڤخه‌مێن هه‌ڤدو دزانن ئه‌ڤه‌ ژی هه‌رده‌م ژ چامێران دهێته‌ چاڤه‌رێ كرن، لێ یا كو دبیته‌ ئه‌گه‌رێ بێزاریێ و دلئێشانێ ره‌فتارا هنده‌ك كادر و په‌رپرسێن هنده‌ك پارتێن سیاسی یه‌ ل به‌رامبه‌ر ڤان شه‌هیدان كو هه‌ ئێك ژ وان شه‌هیدان ب یێن پارتا خوه‌ دزانیت ژ بیر كه‌ت كو ڤی كه‌سی ژ پێخه‌مه‌ت پاراستنا كه‌رامه‌ته‌ گه‌لێ خوه‌ خوه‌ گوری كریه‌ و بوویه‌ شه‌هید، لێ ئه‌ڤ به‌پرس و كادره‌ به‌لكی هنده‌ك جاران بۆ چوونا پارتا وی ژی نه‌ بیت لێ دێ دا خوه‌ یانییان هنده‌ك جاران ب شێوه‌كێ فه‌رمی هنده‌ك جاران ژی د جڤات و روونشتین جودا جودا دا دێ داخۆیانیێ ده‌ن بێژن پارتا مه‌ د ڤی شه‌ڕی دا هنده‌ شه‌هید هه‌نه‌ یان ل ڤلان شه‌ڕی پارتا مه‌ شه‌هید نه‌بوون !! پرسیارا كو ل ڤێره‌ دهێته‌ پێش مان ئاخا كوردستانێ هه‌موو ئێك ئاخه‌ هه‌ركه‌سه‌كێ شه‌هید دبیت خوه‌ گوری پیرۆزیا وێ دكه‌ت و د ده‌مێ‌ شه‌هیدبوونال وی دا وه‌لاتێ وی دمینیته‌ پاراستی و ئارمانجا مه‌زن پارستنا كوردستانێ یه‌.
د به‌رسڤێ دا دشیان دا هه‌ یه‌ بهێته‌ گۆتن هه‌ر كه‌سه‌كێ شه‌هید دبیت خوه‌ گۆری وه‌لاتێ خوه‌ دكه‌ت ئارمانجا وی ژ ئارمانجه‌كا به‌رته‌نگا حزباتیێ مه‌زنتره‌ له‌و ژی پیرۆزترین تشتێ خوه‌ بۆ ڤێ ئارمانجێ دكه‌ته‌ گوری، له‌وما ئه‌ڤرۆ پتر ژ هه‌ر ده‌مه‌كی فه‌ره‌ شه‌هید ب چاڤه‌كێ مه‌زنتر بهێته‌ دیتن و خه‌باتا وی د گۆشه‌یا پارتاتیا به‌رته‌نگ و بچوك دا نه‌هێته‌ دیتن، ئه‌ڤه‌ ژی دێ پتر وره‌یان ل ده‌ف خه‌لكی و پێشمه‌رگه‌یان ژ بۆ به‌رخوه‌دانێ به‌ر ب زێده‌بوونێ به‌ت، به‌لێ ئه‌ڤ چه‌نده‌ دێ وی ده‌می په‌یدا بیت ده‌ما سه‌ركردیێن ئێكێ ییێن هه‌ر پارته‌كێ ڤێ رێیێ ل داخویانیێن به‌رپرسێن خوه‌ و كادرێن خوه‌ یێن د ناڤا جڤاكی دا دخه‌بتن ب ریێیا ده‌ركرن بریار و ریێنماییان دگرن ژ به‌ر كو ئه‌ڤرۆ ئێكرێزی و ئێك په‌یامیا كوردستانییان ب هه‌موو ره‌نگ و پارتێن خوه‌ ڤه‌ ژ هه‌ر ده‌مه‌كی بۆ به‌رسنگرتنا دوژمنان گرنگتره‌، داكو بكارین ئه‌ڤرۆ بسه‌ركه‌ڤین و سوبه‌هیه‌كا زوو ب خه‌ونێن خوه‌ یێن مه‌زن شاد ببیت، له‌وا هه‌موو پێكۆل و بزاڤێن مه‌ بۆ كوردستانیه‌تێ بن نه‌ك بۆ بجهـهاتنا ئارمانجێن بچووك یێن پارتایه‌تی ئه‌گه‌ر به‌رۆڤاژی بیت و به‌رده‌وام ئه‌ڤ سڤكاتیه‌ ب خوینا شه‌هیدان بهێته‌كرن دێ یا ب زحمه‌ت بیت خودانێن مێشكێن بچووك ب ئارمانجێن مه‌زن شا دببن، له‌و فه‌ره‌ پێداچوونه‌ك بهێته‌ كرن بزاڤێن مه‌ بۆ بلندكرنا ناڤوده‌نگێ وه‌لاتی بین و رێزێ ل خوینا پیرۆزا شه‌هیدان بگرین بزانین ئه‌ڤ شه‌هیده‌ نه‌ك بۆ هندێ بووینه‌ قوربان كو ئه‌م موزادیدان ل سه‌ر ده‌زگه‌هێن راگه‌اندنێ ب خوینا وان بكه‌ین به‌لكو ئارمانجا وی پیرۆزتر پاقژتر مه‌زنتر بوویه‌.