دلوڤان امجد بارزانی
ل كوردستانێ چو جاران چ ئاریشه‌یێن ئاینی یان نه‌ته‌وه‌یی نه‌بووینه‌ د ناڤ جڤاكی ب تایبه‌تی و هه‌رێمێ ب گشتی.
له‌وما دهێته‌ گۆتن و دبێژن (كوردستان لاندكا پێكڤه‌ژیانا هه‌می ئایین و ئوول و مه‌زهه‌ب و نه‌ته‌وه‌یێن جودا جودایه‌).
ئه‌ڤه‌ راسته‌ و ئه‌م ملله‌تێ كورد و هه‌می جیهان ژی ئه‌ڤێ راستیێ ب باشی دزانن و یا ل پێشچاڤێن وان ل ده‌مێ به‌حسێ وه‌كهه‌ڤی و ئاشتی و پێكڤه‌ژیانێ دهێته‌ كرن هه‌رێما كوردستانێ ب نموونه‌ دهێته‌ وه‌رگرتن و به‌حسكرن ب تایبه‌تی ل ڤێ دووماهیێ ژی به‌رێ ڤان كاره‌ساتێن دل ته‌زین و ل دژێ مرۆڤایه‌تیێ ئه‌ڤێن هه‌مبه‌ری ملله‌تێ مه‌یێ كورد هاتیه‌كرن ب گشتی.
كوردێن ئێزیدی و نه‌ته‌وه‌یێن دیێن هه‌رێمێ دژین كو هه‌می جیهانێ ب چاڤێ خوه‌ دیت كا چ ب سه‌رێ مه‌ كوردان هات و چ تاوانه‌كا مه‌زن و هه‌ژیه‌ بێژم كو ئێكه‌م جار بوو تاوانه‌كا وه‌سا درندانه‌ ل دژی مرۆڤان هاتیه‌ ئه‌نجام دان.
هه‌تا من ب چاڤێن خوه‌ نه‌دیتی من باوه‌ر نه‌دكر، چونكی خه‌لكێ هه‌رێما كوردستانێ چو جاران هزره‌كا وه‌سا نه‌دكر، كو هنده‌ك جۆرێن مرۆڤان یێن هه‌ین وه‌سا ده‌رهه‌قێ مرۆڤان دا هزردكه‌ن و جوداهیێ د ناڤبه‌را ئایین و ئۆل و مه‌زهه‌بان دا دكه‌ن.
ئه‌م كورد دهه‌ق بووین باوه‌ر نه‌كه‌ین ئه‌گه‌ر به‌رپه‌رێن دیرۆكا كوردان هه‌لڤه‌ده‌ین كو ئه‌ڤه‌ چه‌ند سه‌ده‌یه‌ و سه‌دان ساله‌ ئه‌وێن به‌ری مه‌ و ئه‌م ژی ل كوردستانێ دژین ب هه‌بوونا ڤان هه‌می ئایین و نه‌ته‌وا چو جاران كوردان ئاریشه‌ ل سه‌ر ئاینی و نه‌ته‌وه‌ ی نه‌بووینه‌.
براینی و وه‌كهه‌ڤی و ئاشتی ل كوردستانێ به‌رقه‌راربوون.
هه‌می مرۆڤ ل هه‌رێما كوردستانێ وه‌ك هه‌ڤبوون بێ جوداهی مافێ وان دهاته‌ دان وه‌كی ئێك.
له‌وما هه‌رێما كوردستانێ دهاته‌ نیاسین ب ناوچه‌یه‌كا ئارام و لاندكا پێكڤه‌ ژیانا هه‌می ئایین و نه‌ته‌وه‌ و ئۆلانه‌ بێ جوداهی و نها ژی یا وه‌سایه‌ و دێ هه‌ر مینیت وه‌سا ژی.

دلۆڤان ئه‌مجه‌د بارزانى
خۆیایه‌ كو ل رێكه‌فتێ (٢٢/١١/٢٠١٨) رۆژا پێنجشه‌مبیێ، سه‌رۆكێ هه‌رێما كوردستانێ مسعود بارزانی ل گه‌ل شاندا یاوه‌را د گه‌ل دا گه‌هشتنه‌ به‌غدا و ل ئه‌نجوومه‌نێ وه‌زیرانێ عیراقێ و ژ لایێ (عادل عه‌بدولمه‌هدی) سه‌رۆك وه‌زیرانێ عیراقێ پێشوازیه‌كا گه‌رم لێ هاته‌ كرن كو فه‌رشێ سۆر هاتبوو دانان، ب راستی ژی چوونا بارزانی بۆ به‌غدا هه‌می خه‌لكێ كوردستانێ و عیراقێ دلخۆشكر، ب تنێ ئه‌و جاش و خوه‌فرۆش نه‌بن ئه‌ڤێن هه‌ر لس ه‌ر جاشاتیا خوه‌ د به‌رده‌وام و ل دژی سه‌رخه‌بوونا كوردستانێ بوون.
د ڤێ سه‌ردانێ دا و شێوازێ پێشوازیكرنا مه‌رجه‌عێ كوردان دیاربوو بێ بارزانی هه‌رێما كوردستانێ ب تایبه‌تی و كۆمارا عیراقێ ب گشتی ب رێڤه‌ ناچیت و ل ئاریشان قورتال نابیت.
یا سه‌یر د ڤێره‌ دا ئه‌وه‌ كو به‌ری ساله‌كێ حوكمه‌تا عیراقێ داوا دادگه‌كرنا سه‌رۆك بارزانی دكر ب ئه‌گه‌ر هندێ كو داخوازا سه‌رخوه‌بوونا ملله‌تێ كوردا كری ریفراندۆم ئه‌نجامدا ب سه‌ركه‌ڤیت.
ئه‌ڤرۆ ژی سه‌رۆك وه‌زیرێن عیراقێ د خۆشیێن ئاماده‌بوونا بارزانی باوه‌رنه‌دكر.
هه‌روه‌سا سه‌روك وه‌زیرێ عیراقێ (عادل عه‌بدولمه‌هدی): بارزانی ب ئه‌ندازیارێ عیراقا فیدرال و دیمۆكراسیه‌تێ ب ناڤكر و راگه‌هاند و گۆت:ـ دێ هه‌می ئاریشه‌یێن هه‌ولێر و به‌غدایێ چاره‌سه‌ركه‌ین.
بێگومان هه‌ر جهه‌كێ بارزانی بچیتێ دێ ئاڤه‌دان بیت و چ ئاریشه‌ نامینن.
هه‌روه‌سا سه‌رۆك و وه‌زیرانێ عیراقێ سه‌ردانا سه‌رۆك بارزانی ب دیرۆكی ناڤكر و گۆت ژی بارزانی ئه‌ندازیارێ عیراقا نوو و فیدرال و دیمۆكراسیێ یه‌، به‌ریا نها په‌یوه‌ندیێن هه‌ولێر و به‌غدا هاتینه‌ تێكدان و هنده‌ك كه‌س هه‌بووینه‌ كو مه‌ره‌ما وان تێكدانا ره‌وشێ بوویه‌، لێ ب پشته‌ڤانیا بارزانی دێ هه‌می ئاریشه‌یێن هه‌ولێر و به‌غدایێ چاره‌سه‌ركه‌ین و په‌یوه‌ندیان دێ دێ ڤه‌گه‌رینه‌ڤه‌ بۆ ره‌وشا ئاسایی.
مه‌ خه‌لكێ كوردستانێ باوه‌ریه‌كا گه‌له‌كا مكوم و ته‌ماما ب سه‌رۆكێ خوه‌ هه‌ی، هه‌تا سه‌رۆكێ مه‌ نه‌چیته‌ به‌غدا كه‌س به‌حسێ مافێ كوردان ناكه‌ت، هه‌تا ئه‌و ده‌مێ مافێن كوردستانێ ل وێرێ بن، دڤێت سه‌رۆك بچیت و گه‌نگه‌شه‌ و شه‌رێ وه‌رگرتنا ماف و مانه‌ڤا ده‌ستكه‌فتیێن ملله‌تێ كورد بكه‌ت، هه‌روه‌سا به‌غدا ژی بۆ چ جاش و خوه‌فرۆش و كه‌سێن بێ بها ب جێهناهێلین.
هندی ل بیرا من دهێت و دهێته‌ به‌حسكرن هه‌می ده‌مان سه‌رۆكێ مه‌ كوردان كارێ كری بۆ بده‌ستڤه‌ئینانا ده‌ستكه‌فتیێن كوردان و ژ هه‌ولدان و پێكۆلكرنێ رانه‌وه‌ستایه‌ ئارمانجا بارزانی خزمه‌تكرن و پێشخستنا كوردستانێ بوویه‌ و ئازادی و سه‌رخوه‌بوونا هه‌رێما كوردستانێ كارێ سه‌ره‌كیێ بارزانی نه‌.
بۆ مه‌به‌ستا نیازپاكی و رازیكرنا مه‌رجه‌عێ كوردان سه‌رۆك بارزانی كو بچیته‌ ڤێ سه‌فه‌را به‌غدا، ئه‌نجوومه‌نێ نوونه‌رێن عیراقێ ب قانوونه‌كێ ته‌مامیا وان بریاران هه‌لدوه‌شینیته‌ڤه‌ ئه‌ڤێن عه‌بادی ل دژێ كوردان ده‌ركری. لێ ئه‌ڤه‌ ئێكه‌م ده‌ستكه‌فتیا ڤێ سه‌ردانێ یه‌، پشتی ڤێ چه‌ندێ كو هه‌لبژارتنان دووماهیك ب ژیانا سیاسیا ئه‌ڤانه‌ ئینا كو په‌نجا هه‌ره‌شێ ل كوردان دهه‌ژاند.
ئه‌ڤرۆ ژی دێ دووماهیێ ب بریارێن وا ئینیت ل سه‌ر ده‌ستێ سه‌رۆك و پێشمه‌رگێ كورد و كوردستانێ، له‌وما ئه‌ڤا روون و ئاشكرایه‌ كو پێنگاڤێن سه‌رۆك بۆ سه‌ر ئێخستنا ریفراندۆم و ب ئه‌نجام گه‌هاندنا وێ یه‌، ده‌رئه‌نجاما ڤان پێنگاڤا ژی زۆر د روون و ئاشكرانه‌ و دێ د ماوه‌یه‌كێ كێم دا ئه‌م هه‌می بخوه‌بینین.
(عادل عه‌بدلمه‌هدی) سه‌روك وه‌زیرانێ عیراقێ بۆ رێبه‌رێ نه‌ته‌وا كورد سه‌رۆك بارزانی دبێژیت :ـ بارزانی ئه‌ندازیارێ پرۆسه‌یا بنیاتنانه‌ڤا په‌یوه‌ندیان بوویه‌، نه‌ك ب تنێ ل عیراقێ به‌لكو ل ڤێ ناوچه‌یێ و هه‌می جیهانێ ژى دا.
و دبێژیت ژی شه‌ره‌فمه‌ندین ب سه‌ردانا مسعود بارزانی بۆ به‌غدا بارزانی مه‌زنتره‌ ژ هندێ كو پێناسا وی بكه‌ین، ئه‌و خه‌باتكاره‌كێ دێرینه‌، هه‌تا چیایێن كوردستانێ ژی بارزانی باش دناسن، كو سه‌ركردایه‌تیا پرۆسه‌یا گوهۆینا و به‌ر ب دیمۆكراسیبوونێ ل عیراقێ دكر بۆ ژناڤبرن و هه‌رفاندنا دكتاتۆریێ.
سه‌رۆك بارزانی خه‌بات و خزمه‌تا ل پێناڤ گه‌لێ عیراقێ و گه‌لێ كوردستانێ یا كری.
دگۆت ژی مه‌ پێشوازیا ل رێبه‌ره‌كێ مه‌زن كری، ئه‌و كه‌سه‌كه‌ هه‌می سیفه‌تێن سه‌ركردا یێن تێدا رێزه‌كا زۆرا هه‌ی.
ب راستی دڤێت ئه‌م هه‌می كورد ل هه‌ر جهه‌كێ جیهانێ بین خوه‌ سه‌ربلند ببینین كو بارزانی سه‌رۆكێ مه‌یه‌ و شانازیێ پێ ببه‌ین.

دلۆڤان ئه‌مجه‌د بارزانی

پێكڤه‌ژیان و ته‌ڤایی، وه‌كهه‌ڤی و ئازادیا هه‌می دین و ئۆل و مه‌زهه‌بان بێ جوداهی دبن سیبه‌ڕا ئێك سه‌رۆك و ئێك ئالا دا ل هه‌ڕێما كوردستانی دا دژین. هه‌رێما كوردستانی جهێ پێكڤه‌ژیانێ یه‌ كو گه‌له‌ك ئایین و نه‌ته‌وه‌ تێدا دژین وه‌كی (ئێزیدی، مۆسلمان، توركمان، ئه‌رمه‌نی، عه‌ره‌ب، كاكه‌یی كلدان و ئاشۆری و … گه‌له‌كێن دی)، هه‌روه‌سا د به‌رێ دا جوهی ژی ل كوردستانی هه‌بوون هه‌می پێكڤه‌ وه‌كی خووشك و بڕایان د خۆشی و نه‌خۆشیان دا پشكدار دبوون بێ جوداهی كار كریه‌ و به‌ڕه‌ڤانی ژ ئاخا پیڕۆزا كوردستانێ دكر. كوردستان سیمبۆلا ئاشتی و پێكڤه‌ژیانێ بوو ل به‌ڕێ دا و هه‌تا نها ژى هه‌ر وه‌كی خۆیه‌، لێ به‌لێ پشتی هاتنا چه‌كدارێن ده‌وله‌تا ئیسلامی یا ب ناڤێ داعش و ب ڕه‌نگه‌كێ زۆرێ دڕندانه‌ هێڕش كڕه‌ سه‌ر چه‌ند ناڤچه‌یێن كوردستانێ داگیركرن و وێڕان كڕن. ئاڕمانجا وان ژناڤبڕن و بنبڕ كرنا كوردیێن ئێزیدی ب تایبه‌تی و كوردستانێ ب گشتی بوو، هه‌روه‌سا ئارمانجا وان ل داگیركڕنا “شنگالێ” و ناڤچه‌یێن ده‌وروبه‌رێن شنگال ژناڤبڕن و كۆمكۆژكڕنا كوردێن ئێزیدی بوو، به‌س ژبه‌ر هندێ كو كوردن و ئێزیدینه‌. ڕێژه‌یه‌كا زۆرا زه‌لام و زاڕۆیان ب ڕه‌نگه‌كێ زۆرێ هۆڤانه‌ كوشتن و بنئاخكڕن، د هه‌مان ده‌م ژی دا ب هه‌زاران كه‌چ و ژنێن كوردێن ئێزیدی ل گه‌ل خوه‌ برن و ل بازاران كڕین و فرۆتن پێ دهاته‌ كڕن، هه‌روه‌سا ل ئه‌میڕێن داعشێ دهاتنه‌ ماره‌كرن و ب زۆرێ دینێ ئیسلامی ل سه‌ر دهاته‌ سه‌پاندن. دڤێت وێژی ژبیر نه‌كه‌ین كو پێشمه‌ڕگه‌ێن قاڕه‌مانێن كوردستانێ ب سه‌رپه‌رشتیا سه‌رۆكێ هه‌رێما كوردستانێ “مسعوود بارزانی” رۆله‌كێ به‌ڕچاڤ گێڕا ل ئازادكرن و رزگاركڕنا كوردێن ئێزیدی، كو ب هزاران كه‌س ئاواره‌یێ چیایی شنگالێ ببوون چه‌ند ڕۆژه‌كا مه‌نه‌ د ناڤ چیای دا بێ نان و ئاڤ گه‌له‌ك ژبرسان و تێنان دا مرن، د وی ده‌می دا هێزێن پێشمه‌ڕگێن قاڕه‌مان نه‌راوه‌ستان هه‌تا گه‌هشتینێ و رزگار كڕین. ب راستی كوردێن ئێزیدی گه‌له‌ك نه‌هامه‌تی و ده‌رده‌سه‌ری دیتن، ژ به‌ر هندێ یا فه‌ره‌ بێژم ژبه‌ر ڤان تیرۆرستێن داعش و وێڕانكڕنا ده‌ڕبه‌ده‌ركرنا كوردێن مه‌ یێن ڕه‌سه‌ن ل سه‌ر زێدێ بابۆ باپیڕێن وان هه‌می ئاواره‌ بوونه‌ ناڤچه‌یێن دیێن كوردستانێ، هه‌روه‌سا ڕێژه‌یه‌كا زۆرا خه‌لكێ قه‌ستا وه‌لاتێن بیانی كر ب تایبه‌تی ئه‌لمانیا كو ب قاچاغی خوه‌ گه‌هاندنه‌ ده‌رڤه‌ هه‌می ڕێبێن بتڕس و گڕان دگرتنه‌ به‌ر به‌س دا ل ڤێ زه‌لاما چه‌كداڕێن ده‌وڵه‌تا ئیسلامی رزگارببن و بگه‌هنه‌ ئه‌ورۆپا، ب سه‌دان زارو و گه‌نج و پیڕ د ده‌ریایا ئیجه‌دا نقۆم بوون و هه‌تا نها ژی بێ سه‌روشوونن. ڕێژه‌یه‌كا زۆرا كوردێن ئێزیدی ژی نها ل كوردستانێ مانه‌ و مل ب ملێ پێشمه‌ڕگا به‌ڕه‌ڤانیێ ژ ئاخا پیڕۆزا كوردستانێ دكه‌ن بێ جوداهی، چونكی كوردستان وه‌لاتێ هه‌مووانه‌. هه‌روه‌سا د داموده‌زگه‌هێن حوكمه‌تێ ژی دا هه‌می نه‌ته‌وه‌ و ئاین پشكداڕن و پێكڤه‌ كاردكه‌ن بۆ پاڕاستن و پێشكه‌فتنا كوردستانێ، د په‌رله‌مانی دا ل ئه‌نجوومه‌نێ دا ژ هه‌می داموده‌زگه‌هێن حكومی و حزبی دا هه‌می نه‌ته‌وه‌ و ئاینێن ل كوردستانێ دا دژین بێ جوداهی پشكدارن و هه‌ر ئێك كارێ خوه‌ بڕێڤه‌دبه‌ت. كوردستان هه‌ر ژ به‌رێ دا جهێ پێكڤه‌ژیانێ بۆیه‌ هه‌می پێكڤه‌ د به‌خته‌وه‌ر و خۆشبه‌خت بوون د هه‌می هه‌لكه‌فت و بیره‌وه‌ریان ل گه‌ل ئێك بوون هه‌می ئایین و نه‌ته‌وه‌ و ئۆل تێكه‌لی ئێك دبن، ژیان ب هه‌می ڕه‌نگان و پێكهاته‌یان یا خۆشه‌، له‌وما دێ بێژم كوردستان و هه‌می ڕه‌نگێن ژیانێ.

دلۆڤان ئه‌مجه‌د بارزانى
ژیان ل ڤی وه‌لاتێَ ئه‌م تێدا دژین، هه‌روه‌كو رۆژ بۆ رۆژێ یا نه‌خۆش دبیت و گه‌له‌كا ب زحمه‌ته‌ ئه‌ز نزانم كا به‌خت و چاره‌نڤیسا مه‌یا وه‌سایه‌ و ژ ده‌ف خودایێ مه‌زن ئه‌ڤ نه‌خۆشیه‌ بۆمه‌ هاتینه‌ یان هنده‌ك كه‌سان ژیان ل كوردستانا من به‌ر ب ژناڤچوونێ ڤه‌بریه‌.
راستی مخابن ئه‌ڤ ملله‌تێ هندێ دلسۆز و باش و ب كه‌رامه‌ت وه‌سا بهێته‌ ره‌زیلكرن و مافێن وان بهێنه‌ پێشێلكرن.
هه‌تا وی راده‌ی كو رێیێن وه‌سا سه‌خت و دژوار دگرنه‌ به‌ر و دزانن ژ ٩٠% ده‌ربازبوونا وان نینه‌ و هه‌ر به‌ر ب وێ رێیێ دچن بۆچی؟ پێخه‌مه‌ت چێ؟
پێخه‌مه‌ت هندێ دا بگه‌هنه‌ وێ ژیانێ ئه‌وا هه‌ژی وان و بگه‌هنه‌ وی وه‌لاتی ئه‌وێ مافێ وان ب دروستی بده‌تێ، چونكی مرن و ژین د ڤێ ره‌وشا نها ئه‌م تێدا وه‌كی ئێكن و چ جوداهی نینه‌.
رۆژانه‌ ئه‌م ب ساخی یێن دمرین و دبینین و روودانا ڤان كاودان ئه‌ڤێن ئه‌م ب چاڤێن خوه‌ دبینین.
كا چاوا بێرێزی و پێشێلكرنا مافان به‌رامبه‌رمه‌ دهێنه‌ كرن.
ب تایبه‌تی خوه‌نده‌ڤانان چ بها نینه‌ ل وه‌لاتێ من.
چ گرنگیه‌ك ب باوه‌رنامێ ناهێته‌دان، ب ره‌نگه‌كێ گشتی دامه‌زراندن نه‌مایه‌.
بلا نه‌هێینه‌ دامه‌زراندن به‌لێ كار ل كه‌رتێ تایبه‌ت ژی نینه‌ و بۆ گه‌نجان ناهێته‌ ره‌خساندن دڤێت رێیه‌چاره‌یه‌ك هه‌بیت دا خه‌لكێ مه‌ بشیت كار بكه‌ت چونكی د ناڤ مه‌دا ل هه‌رێمێ مه‌ گه‌له‌ك گه‌نج و كه‌سێن زیره‌ك و دانا یێن هه‌ین زۆر پێگه‌هشتی خودان هزر و بیرێن باشن تشتێ نوو و ب مفا یێ ل ده‌ف وان هه‌ی، به‌لێ مخابن چاوا بكاربینن ب چ رێك بێ پشته‌ڤانی ب راستی ئه‌ڤه‌ كاره‌ساته‌.
ئه‌رێ چاوا بژین و ب چ بژین؟
هه‌می ته‌مه‌نێ مه‌ چوو هه‌تا بووینه‌ خودان باوه‌رنامه‌، لێ به‌لێ مخابن باوه‌رنامێ ژی چ بهایێ خوه‌ نینه‌.
ب كورتی و دروستی ئه‌م هزر دكه‌ین كو مه‌ چو پاشه‌رۆژ ل ڤی وه‌لاتی نینه‌.
ئه‌گه‌ر مرۆڤ ژی یێ بێ پاشه‌رۆژ بیت وه‌كو مرنه‌كێ یه‌.
ب راستی گه‌له‌كا نه‌خۆشه‌ مرۆڤ یێ بێ كار بیت و چ ل ژیان و پاشه‌رۆژا خوه‌ نه‌زانیت.
هیڤیدارم حوكمه‌تا هه‌رێما كوردستانێ كار بكه‌ت و هنده‌ك پرۆژان دابنیت دا رێژا بێكاریێ كێم ببیت و گه‌نجێن مه‌ژی ببنه‌ خودان كار.

دلۆڤان ئه‌مجه‌د بارزانى
هێشتا برینا 16 ئوكتوبه‌رێ ساخنه‌بوو یا نوو بوو ژبۆ مه‌ خه‌لكێ كوردستانێ ب گشتی و كه‌ركووكا خۆراگر ب تایبه‌تی.
جاره‌كا دی ئه‌ڤان هه‌ر خیانه‌تا خوه‌ كر و هه‌ر به‌رده‌وامن ل سه‌ر جاشاتیا خوه‌ و بریارا ل قاسم سوله‌ێمانی وه‌ردگرن، چونكێ ئه‌و چو جاران ل گه‌ل سه‌ربه‌خوه‌یا كوردستانێ نه‌بووینه‌ وه‌كی به‌ری نوكه‌ ژی مه‌دیتی چه‌ند كاندیدێن دیار یێن ئێكه‌تیێ ل دژێ كوردان به‌رگری ژ عیراقێ دكر.
بلا عیراقه‌كا ئێكگرتی و ئێكرێزیا عیراقێ پیرۆزێ ئێكه‌تیا نشتیمانی بیت چونكی وان ئێك پارچه‌یا عیراقێ دڤێت.
هه‌روه‌سا پارتی دیمۆكراتی كوردستانێ هیڤیا وێ ئه‌وه‌ كوردستان ببیته‌ ده‌وله‌ت و ژ عیراقێ جودابین و ب سه‌ربه‌خوه‌یی بژین، چونكێ پارتی بنده‌ستی و جاشایه‌تی چو جاران قه‌بوول نه‌كریه‌ و قه‌بوول ژی ناكه‌ت.
مه‌ كوردستانه‌كا ئێكگرتی و ئێك پارچه‌ دڤێت نه‌ك عیراق.
به‌س د ڤێره‌ دا پارتی دیمۆكراتی كوردستان ژی یا شاشبوو چونكێ نه‌دبوو وه‌سا ب ساناهی باوه‌ریا خوه‌ لایه‌نێ دى ئینا با پشتی 16 ئوكتوبه‌رێ ئه‌و خیانه‌تا مه‌زنا به‌رامبه‌ری ملله‌تێ كورد كری.
پارتی هندی هندا نیازپاك و دلسۆز و راست و دروسته‌ به‌ر هندێ دڤێت هه‌می تشت ب ئاشتی و لێك تێگه‌هشتن چاره‌سه‌ربن.
مه‌زنا یا گۆتی: “ئه‌و كه‌سێ گرت ب شیری به‌رناده‌ت ب پیری “.
ئه‌و حزبێن خیانه‌ت ب شیری یا گرتی و باش بزانن ژی چو جاران به‌رناده‌ت خوه‌ ب پیری ژی.
دڤێت ئه‌م خه‌لكێ كوردستانێ ژی بخوه‌ باش بزانین و تێبگه‌هین كا كێژ پارت و لایه‌ن د به‌رژه‌وه‌ندیا كوردستانێ دایه‌ و بۆ كوردستانێ كاردكه‌ت ئه‌م ل گه‌ل وی لایه‌نی دابین.
به‌س تشتێ سه‌یر د ڤێره‌ دا ئه‌ز نزانم به‌ربژارێ خوه‌ بۆ سه‌رۆك كۆمارێ عیراقێ كرى د وی ده‌می دا كو كه‌سه‌كه‌ ژمه‌ هه‌میان ب چاڤێ خوه‌ دیت نه‌شیا سه‌رۆكاتیا پارته‌كا بچووك ژی بكه‌ت ڤێجا دوورا سه‌رۆك كۆماری یه‌.
به‌س هیڤیا ڤانه‌ به‌س كورسی و پۆسته‌ وه‌كی سه‌رۆكێ به‌ری نها یێ كۆمارا عیراقێ.
هه‌تا نها ژی بلا ئێك بێژیت فلان شۆل یان كارێ بۆ هه‌رێما كوردستانێ كری د ڤان سالێن سه‌رۆك كۆماری كری چ كریه‌؟ چنه‌ كریه‌…!!
وه‌كی گوله‌كا بێ بهێن بوو چ فایده‌ بوو كه‌سێ نه‌بوو.
ل دووماهیێ بلا ئه‌م پسیاره‌كێ ژ خوه‌ بكه‌ین:ـ
ئه‌رێ ئه‌و ئێكه‌تیا كه‌ركووك فرۆتیه‌ عه‌ره‌ب و شیعا وه‌سا ب ساناهی چاوا پۆستێ سه‌رۆك كۆماری وه‌رناگریت؟ ئه‌رێ بێژنه‌ من دێ چاوا دێ پارته‌كێ كه‌نه‌ سه‌رۆك كۆمار كو هه‌ول و كار بۆ دروستكرنا ده‌وله‌ته‌كا سه‌ربه‌خوه‌ دكه‌ت دڤێت ل عیراقه‌كا ئه‌نفالچی و زۆردار جودا ببینن.
ئه‌و ژی پارتی دیمۆكراتی كوردستانه‌ خودان هێز و خه‌مخۆڕا ملله‌تێ كورده‌.

دلۆڤان ئه‌مجه‌د بارزانى
ئه‌ز دێ ل ده‌سپێكێ به‌حسێ ده‌سه‌لاتدار و زه‌نگین و پله‌دارێن رۆژهه‌لاتا ناڤین ب گشتی و عیراقێ و هه‌ڕێمێ ب تایبه‌تی كه‌م.
ئه‌گه‌ر مه‌ گۆت زه‌نگین یان ده‌سه‌لاتدار یان پله‌دار و بالاده‌ست یان گه‌له‌كێن دی یێن وه‌سا رامانا وێ ئه‌وه‌ كو مال و سامان و پاره‌كێ بێ هه‌ژمارێ هه‌ی و یێن ده‌ستێن وان دا، به‌س كا دا ته‌ماشای وان بكه‌ین كا ڤی مال و دارایی چاوا بكاردئینن و دمه‌زێخن.
ــ ئه‌رێ ئه‌ڤێن زه‌نگین چاوا پارێ خوه‌ بكاردئینن؟
ــ ب زۆری گرنگیێ ب چ دده‌ن …؟
ــ ئه‌ڤ ده‌سه‌لاتدار و زه‌نگینه‌ زۆرتر ب دووڤ چ ڤه‌نه‌؟
دێ ب ره‌نگه‌كێ تێكه‌ل و كورت به‌رسڤا ڤان پسیاران ده‌م:
ئه‌گه‌ر ئه‌م هزر د ڤان زه‌نگین و ده‌سه‌لاتدار و ئه‌ڤێن خودان داراییه‌كێ زۆر دا بكه‌ین، دێ بۆ مه‌ دیار بیت كو ڕێژه‌یا (95%) ژ سه‌دێ گرنگیێ دده‌نه‌ سێ تشتان ئه‌و ژی:
1ـ ماله‌كا جوان و سه‌رنجراكێش.
2ـ كچكێن جوان و نازك.
3ـ ئۆتۆمبێل یێن ب بها گران و خوارنێ.
ئه‌گه‌ر ئه‌م بچینه‌ سه‌ر راستیێ ئه‌ڤ هه‌رسێ تشته‌ نه‌ د وی ئاستی دانه‌ كو هند گرنگی پێ بهێته‌دان، نابێژم باش نینه‌ و چنینه‌ نه‌ دڤێت هه‌بن.
لێ به‌لێ تشتێ ل ڤان گرنگتر و ب بهاترێ هه‌ی ده‌سه‌لاتدار و زه‌نگینێن رۆژهه‌لاتا ناڤین ب گشتی و هه‌ڕێما كوردستانێ ب تایبه‌تی كو هه‌می مال و سامانێ خوه‌ تێدا بمه‌زێخین و بكاربینین.
هه‌كه‌ هاتوو ڤان ده‌وله‌تێن جیرانێن هه‌رێما كوردستانێ ده‌رگه‌هێن سنۆری یێن خوه‌ ل سه‌ر هه‌ڕێمێ گرتن و نه‌هێلا چ تشته‌ك داخلێ هه‌ڕێمێ بیت، پاشی دێ چ رووده‌ت ئه‌ڤ سێ تشته‌ دێ چ كه‌ن دێ چ گرنگیا خوه‌ هه‌بیت؟.. هیچ.!
له‌وما من دڤێت بێژم یا باش ئه‌وه‌ ئه‌ڤ ده‌سه‌لاتدار و زه‌نگین و پله‌دارێن حوكمه‌تێ وی مال و سامانی و دارایێ خوه‌ د ڤه‌كرنا كۆمپانیێن وه‌به‌رهێنانێ و چاندنا به‌رووبومێ كشتوكالی و ڤه‌كرنا كارگه‌ه و كۆمپانیێن وه‌سا كو هه‌می پێدڤیێن ملله‌تێ مه‌ پێ بهێنه‌ دابینكرن، دا چاڤێن كه‌سێ ل به‌رووبوم و ئالاڤ و داهێنانێن ده‌وله‌تێن جیران و بیانی نه‌بیت هه‌می تشت لێ بهێنه‌ دروستكرن (made in Kurdistan) بن و بێ منه‌تێ ده‌وله‌تێن دی، هه‌روه‌سا ئه‌گه‌ر هاتوو ده‌رگه‌هێن سنووری ژی ل سه‌ر مه‌ هاتنه‌گرتن د ووی ده‌می دا دێ تشته‌كێ ئاسایی بیت و كارتێكرنێ ل وه‌لاتی ناكه‌ت و چ ژێ كێم نابیت.
له‌وما یا فه‌ره‌ گرنگیه‌كا باش ب هه‌می ڤان كارگه‌هو كۆمپانی و پرۆژان بهێته‌دان.
ئه‌ڤه‌ گه‌له‌كا باشه‌ بۆ هه‌ڕێمێ ب تایبه‌تی و عیراقێ ب گشتی، چونكێ دێ بیته‌ ئه‌گه‌رێ نه‌هێلان یان كێمبوونا قه‌یرانا ئابووری ل سه‌ر هه‌ڕێما كوردستانێ.
ئه‌گه‌ر بێمه‌ سه‌ر زه‌نگین و ده‌سه‌لاتدارێن ده‌وله‌تێن بیانی ئه‌و به‌روڤاژی زه‌نگین و ده‌سه‌لاتدارێن روژهه‌لاتا ناڤین.
ئه‌ڤ ده‌وله‌تێن بیانی ئه‌گه‌ر ئه‌م ته‌ماشا بكه‌ین یا دیار و پێش چاڤه‌ كو هه‌می به‌رهه‌م و داهێنانێن وان هه‌ریێن وه‌لاتێ وان بخوه‌نه‌ ئه‌و بخوه‌ هه‌می تشتێ پێدڤی چێدكه‌ن. هه‌روه‌سا فرێ دكه‌نه‌ ده‌وله‌تێن دی ژی.
زه‌نگین و ده‌سه‌لاتدارێن وان هه‌می مال و سامان و پاره‌ی د ڤه‌كرنا كارگه‌هێن جۆراو جۆر و كۆمپانیا و چاندنا به‌رووبومی و گه‌له‌ك تشتێ دی دا دمه‌زێخن.
هه‌تا وی ڕاده‌ی كو یێ هنده‌ك داهێنانان دكه‌ن د هزرا مه‌ژی دا نینه‌ و ئه‌م پێ سه‌رسام دبین.
هه‌روه‌سا چ قه‌یران ژی نه‌شێن كارتێكرنێ ل وه‌لاتێ وان بكه‌ن و خه‌لكێ وان زۆر ب باشی دژین سه‌ره‌رای هندێ ژی كو ڕێژا ئاكنجیێن وان ده‌ه جارا ژی پتری ده‌وله‌تێن رۆژهه‌لاتا ناڤینن.
ئه‌ڤه‌ ژی وێ چه‌ندێ بۆ مه‌ دیار دكه‌ت كو ئه‌ڤ ده‌وله‌ته‌ سیسته‌مێ برێڤه‌برنێ دا گه‌له‌ك زیره‌ك و دانا و شاهره‌زانه‌.
سامان و داراییێ خوه‌ د تشتێ بێ مفادا نامه‌زێخن.
هیڤیدارم ئه‌ڤ زه‌نگین و حوكمه‌ت و ده‌سه‌لاتدارێن رۆژهه‌لاتا ناڤین ب گشتی و هه‌ڕێما كوردستانێ ب تایبه‌تی چاڤ ل ڤان ده‌وله‌تێن پێشكه‌فتی بكه‌ن دا بشێن ڤان ئاریشا چاره‌سه‌ر بكه‌ین و نه‌هێلین.
ئاریشا هه‌ڕێما كوردستانێ ئه‌وه‌ نزانن ڤی دارایی بكاربینن، چونكێ ژلایێ دارایی ڤه‌ ئه‌م ژ هه‌میان زه‌نگینترین به‌س نه‌زانین د سیسته‌مێ بكارئینانێ دا ئه‌مێن به‌ر ب قه‌یرانێ ڤه‌ برین.
ئه‌گه‌ر نه‌ ئه‌م یێن د ناڤ خه‌زینێ دا زێرێ ڕه‌ش، ئاخا عیراقێ هه‌می “گازه‌” چه‌نده‌ها بیر و شه‌ریكێن گازێ یێن هه‌ین ل عیراقێ، ئه‌رێ ئه‌و داهاته‌ هه‌می كێڤه‌ دچیت چلێ دهێت.
ئه‌ز دێ پسیاره‌كێ ژ هه‌وه‌ كه‌م خۆنده‌ڤانێن هێژا هوون به‌رسڤێ بده‌ن:
ئه‌رێ بۆچی خه‌لكێ كوردستانێ د ناڤ گازێ دایه‌ و یێ بێ گازه‌ ژی..؟

دلۆڤان ئه‌مجه‌د بارزانى

به‌ربژارێن هێژا سۆز و په‌یمانێن مه‌زن نه‌ده‌نه‌ خه‌لكی كو جێبه‌جێكرنا وان د شیانێن هه‌وه‌ دانه‌بیت.
هه‌می لایه‌نان دڤێت ناما خوه‌ یا تایبه‌ت هه‌بیت هه‌روه‌سا هه‌ر به‌ربژاره‌ك نوونه‌راتیا پارتا خوه‌ دكه‌ت و زۆر ژى ئاسایه‌ به‌ربژار بێژن ئه‌م دێ به‌رنامێ پارتا خوه‌ جێبه‌جێكه‌ین، به‌لێ یا ژ هه‌میێ گرنگتر ئه‌وه‌ كو د په‌رله‌مانی دا ئێكگرتی و ئێك هه‌لۆێست بن، راسته‌ دڤێت پارتا وان و به‌رنامێ پارتا وان ل ده‌ف یا گرنگ بیت و ل دووڤ بچن به‌س دڤێت ب ڕه‌نگه‌كێ گشتی كار بۆ هه‌ڕێما كوردستانێ بكه‌ن.
زۆرا خراپه‌ به‌ربژار به‌رژه‌وه‌ندیێن گشتی بكه‌ته‌ قوربانی به‌رژه‌وه‌ندیێن تایبه‌تی یا پارتا خوه‌ به‌رۆڤاژی ڤێ چه‌ندێ دڤێت به‌رژه‌وه‌ندیێن تایبه‌تی بكه‌نه‌ قوربانی به‌رژه‌وه‌ندیێن گشتی.
به‌لێ ل وی ده‌می دا ئه‌گه‌ر بزانن ئه‌و به‌رژه‌وه‌ندیا گشتی بۆ ته‌ڤایا ملله‌تێ كورد یا باشه‌، چونكی هه‌می به‌ربژار دێ ب نوونه‌راتیا خه‌لكی ب تایبه‌تی وان كه‌سێن ده‌نگێ خودایێ دێ چنه‌ د ناڤ هۆلا په‌رله‌مانی دا.
له‌وما پێدڤیه‌ ئێك ده‌نگ بن هه‌ولا بجهئینانا وان هه‌می په‌یمان و سۆزێن دایه‌ خه‌لكی به‌ری ده‌نگدانێ بده‌ن و ببنه‌ جهێ ره‌زامه‌ندیا خه‌لكی د به‌رژه‌وه‌ندیا خه‌لكی دا كار بكه‌ن.
ل ڤێره‌ دڤێت ئه‌م هه‌می خه‌لك بزانین كا شۆلێ ئه‌ندام په‌رله‌مانی چیه‌ د په‌رله‌مانی دا؟، كا به‌ربژاری شاره‌زایی د چ وار دا هه‌یه‌ و تایبه‌تمه‌ندیا وی چیه‌ و دێ ل دووڤ وی بیاڤێ شۆل كه‌ت یێ ئه‌و تێدا شاره‌زا.
هه‌روه‌سا به‌ربژار ژی نابیت سۆزێن مه‌زن بده‌ته‌ خه‌لكی كو ئه‌م سۆر و سۆر دزانین كو ئه‌و نه‌شێت وێ سۆزێ جێبه‌جێ بكه‌ت.
له‌وما به‌ربژار بلا بارێ خوه‌ گران نه‌كه‌ت بلا وان سۆزان بده‌ت كو د شیانێن وی دا هه‌بن و بشێت ل هه‌مبه‌ر سۆزا خوه‌ ده‌ربكه‌ڤیت دا ئه‌و شه‌رم و زار نه‌بیت و خه‌لك ژی بێ هێڤی نه‌بن و په‌شیمان نه‌بن كو ده‌نگێ خوه‌ یێ دای.
من ل چاڤ پێكه‌فتنه‌كا تی ڤی یێ دا دیت یا خولا چووی یا هه‌لبژارتنا نوونه‌راتیا په‌رله‌مانی عێراقێ دا كو به‌حس ل دستوور و مووچه‌یا دهاته‌كرن.
من دڤێت ڤێ چاڤپێكه‌فتنێ ب نموونه‌ وه‌ربگرم، هه‌رچه‌نده‌ یا به‌ربژارێن نوونه‌راتیا په‌رله‌مانی عیراقێ بوو وان ئه‌ڤ چه‌نده‌ دگۆت به‌س من دڤێت دوباره‌ بكه‌مه‌ڤه‌ دا به‌ربژارێن په‌رله‌مانی هه‌رێما كۆردستانێ ڤێ شاشیێ دووباره‌ نه‌كه‌ن: نابیت به‌ربژار بێژیته‌ خه‌لكی ده‌نگێ خوه‌ بده‌نه‌ من و به‌حسێ دستووری بكه‌ت و بێژیت دێ ڤێ خالا دستووری جێبه‌جێ كه‌م، نه‌خێر چ به‌ربژاره‌ك یان لایه‌نه‌كێ سیاسی نه‌شێت خاله‌كا دستووری بتنێ جێ به‌جێ بكه‌ت.
ئه‌گه‌ر هه‌می لایه‌نێن سیاسی یێن هه‌می پارتێن كوردی پێكڤه‌ كار ل سه‌ر نه‌كه‌ن و نه‌بنه‌ ئێك.
هه‌روه‌سا یا چاره‌سه‌ركرنا مووچه‌یان كو بێژن دێ مووچێ فلان جهی یان باژێری چاره‌سه‌ركه‌ین، نه‌خێر ئه‌و ژی ب تنێ ناهێته‌ كرن چۆنكی په‌رله‌مان دێ ب زۆریا ده‌نگان بڕیاران په‌سه‌ند كه‌ت، لایه‌نه‌ك یان پاڕته‌ك یان به‌ربژاره‌ك ب تنێ نه‌شێت وان تشتان بكه‌ت، ل وی ده‌می دێ گه‌له‌ك ئه‌ندامێن پارتێن دی یێن عه‌ره‌بی نه‌رازی بن ل پێناڤ چاره‌سه‌ركرنا ئاڕیشێن هه‌رێما كوردستانێ و دانا مافێ خه‌لكێ هه‌ڕێمێ.
ل وی ده‌می دا دێ ب زۆریا ده‌نگان بڕیارا هێته‌ په‌سه‌ندكرن.
ژبه‌ر هندێ ئه‌م بۆ په‌رله‌مانێ عیراقێ و نها ژی بۆ په‌رله‌مانی هه‌رێما كۆردستانێ هه‌ر ته‌كه‌زیێ دكه‌ینه‌ سه‌ر ئێكگرتنێ چونكی ئێكگرتن سه‌رێ هه‌میێ یه‌.
بێ ئێكگرتنا هه‌می پارتان چ تشته‌ك ب ده‌ست مه‌ڤه‌ ناهێت، چوونا وان دێ یا بێ مفابیت و دێ وه‌كی ڕووبۆتا بن د ناڤ په‌رله‌مانێ دا لێ هێن، ل ده‌مێ بریاره‌ك دهێته‌ په‌سه‌ندكرن به‌س دێ ده‌ستێن خوه‌ بلند كه‌ن ئه‌و ژی د وی ده‌می دا ئه‌گه‌ر وا خیره‌تكر نه‌چووبنه‌ د هزرێن كویر دا.

دلۆڤان ئه‌مجه‌د بارزانى
كاره‌ساتا شنگالێ ئه‌وا ل 3/8/2014، ب سه‌رێ كوردێن ئێزیدی دا هاتی كو كاره‌ساته‌ك، تاوانه‌ك بوو هه‌تا نوكه‌ ژی د هزرا چ مرۆڤان دا نه‌بوو، تاوانه‌كا هندا مه‌زن به‌رامبه‌ری دیانه‌ته‌ك، نه‌ته‌وه‌كا بچووكا هه‌ڕێما كوردستانێ بهێته‌كرن، كو ئه‌و ژی كوردێن ئێزیدینه‌، هه‌روه‌سا یا ژ هه‌میێ گرنگتر كوردێن ڕه‌سه‌نن.
ئه‌گه‌ر ئه‌م بچینه‌ سه‌ر بنیاتێ كوردان، دێ دیرۆك بۆ مه‌ دیاركه‌ت كو ژ ئیزیدیاتیێ یا هاتی، له‌وما دڤێت رێز ل هه‌بوونا وان بهێته‌ گرتن.
ــ ئه‌ڤه‌ چار سال ب سه‌ر كاره‌ساتا شنگالێ دا ده‌ربازبوون، كو ب دڕنده‌ترین و داخبارترین كاره‌ساته‌ ب سه‌رێ ملله‌تێ مه‌یێ ئێزیدی دا هاتی، بێگومان ژی ئه‌ڤ برینا كوڕ چ جاران د دلێ مه‌ و هزرا مه‌دا ده‌رناكه‌ڤیت دێ هه‌ر مینیت برینه‌كا كوور، چونكی چو جاران ل پێش چاڤێن مه‌ ناچیت ئه‌ڤ تاوانا دژێ مرۆڤایه‌تیێ.
ــ هێرشا ده‌وله‌تا ئیسلامی یا ب ناڤێ “داعش” بۆ سه‌ر شنگالێ و ب دڕنده‌ترین كاره‌سات دهێته‌ هژمارتن كو د ڤان سالا دا هاتینه‌كرن، د ڤی ده‌می دا جیهان د بلندیا پێشكه‌فتن و پێشڤه‌چوونان دا بوو.
لێ مخابن ئه‌ڤ هووڤ و درنده‌ ب ناڤێ ئیسلامێ هاتن و ئه‌و بخوه‌ ژی دوور و دژێ ئیسلامێ بوون، هه‌ولدان ناڤێ ئیسلامێ ژی كێم بكه‌ن و ئه‌م هه‌می دزانین كا كویلێن ده‌ستێ كێ بوون و چ ده‌وله‌ت بوون.
هه‌ر ل ده‌سپێكا هاتنا وان بۆ كوردستانێ بوو، چونكی هاتن و هه‌ولا هه‌می ده‌وله‌تێن جیران و ئه‌وێن دی یێن رۆژهه‌لاتا ناڤه‌ڕاست ژناڤبرن و قیركرنا كوردانه‌ ب ئێكجاری، ئه‌گه‌ر ب وان بیت یێ كوردبیت ل سه‌ر روویێ عه‌ردی نامینیت، به‌س هزر و بیرێن وان د به‌تال و فاشلن، چونكی كورد چو جاران ب دووماهى نابن، هندی دنیا ژی هه‌بیت كورد دێ هه‌ر هه‌بن.
ــ لێ وان ڤێجارێ كوردێن مه‌ یێن ئێزیدی كرنه‌ ئارمانج وان دڤیا كوردێن ئیزیدی نه‌هێلن و ب ته‌مامی ژناڤببه‌ن، ب تنێ ژبه‌ر هندێ كو كوردن و ئێزیدینه‌.
بێگومان ژی ئه‌ڤا ب سه‌رێ كوردێن ئێزیدی دا هاتیه‌كرن جینۆسایده‌، ئه‌گه‌ر ئه‌م به‌حسێ هێرشا ل سه‌ر شنگالێ بكه‌ین، دڤێت بێژین جینۆسایدكرنا كوردێن ئێزیدی ژلایێ ده‌وله‌تا ئیسلامی ڤه‌ یا ب ناڤێ “داعش”.
ب راستی ئه‌و تشتێ ئه‌م كوردستانی هه‌می ئێشاندین و برینداركرین كو هندی د ژیانێ دابین ئه‌ڤ برینه‌ د دلێ مه‌دا ساخ نابیت دێ هه‌ر یا ئازریایی و كووربیت، ئه‌و ژی برنا كچ و ژنێن كوردێن مه‌یێن ئیزیدی بوون. ژبلی كوشتن و ژناڤبرنا چه‌ندین زه‌لام و زارۆیان ب ساخی بن ئاخكرن و ب دڕنده‌ترین شێوه‌ ئه‌شكه‌نجه‌دان، ب زۆری دینێ ئیسلامێ ب سه‌ردا دسه‌پاند، هه‌تا وی ڕاده‌ی ئه‌و كه‌سێ نه‌ببا موسلمان دكۆشتن و سه‌ر ژێ دكرن.
هه‌روه‌سا ب زۆری و زۆرداریێ شه‌هده‌ پێ دئینا و نڤێژ پێ دكرن، گوهۆرینا دیانه‌ته‌كێ ب دارێ زۆریێ ب راستی ئه‌و بخوه‌ ژی كاره‌ساته‌كا گه‌له‌كا مه‌زنه‌ د دیرۆكا جیهانی دا.
ــ هه‌روه‌سا چه‌ندین هه‌زار زارۆ و گه‌نج و پیر د چیایێ شنگالێ دا مان بێ نان و ئاڤ ژ برسان و ترسان و تێهنی بوونێ دا مرن و بوونه‌ قوربانی، هه‌تا هێزێن پێشمه‌رگێن قاره‌مان گه‌هشتینێ و رزگاركرین.
له‌وما پێدڤیه‌ ل سه‌ر مه‌ كو به‌حسا كاره‌ساتا شنگالێ دكه‌ین قاره‌مانی و مه‌ردایه‌تیا پێشمه‌رگا ژبیرنه‌كه‌ین كو وان هه‌می هه‌ولێن خودان بۆ ئازادكانا كوردێن ئێزیدی ئه‌وێن ل چیایێ دا مای و شیان ب زووترین ده‌م وانا رزگار بكه‌ن ب هه‌ر ڕه‌نگه‌كێ هه‌بیت.
ــ هه‌روه‌سا دڤێت ئه‌م خه‌لكێ هه‌ڕێما كوردستانێ ب گشتی و كوردێن ئێزدی ب تایبه‌تی هه‌رده‌م سۆپاسیا ده‌ڤه‌را به‌هدینان و خه‌لكێ دهۆكێ و ده‌وروبه‌ر بكه‌ین و چو جاران باشی و ئه‌ركێ وانێ مرۆڤایه‌تیێ ژبیرنه‌كه‌ین، چونكی وان ب هه‌می ڕه‌نگان ده‌رگه‌هێن مالێن خوه‌ و دلێ خوه‌ بۆ ئاوارێن شنگالێ و ده‌وروبه‌ر ڤه‌كرن و هه‌روه‌سا ده‌رگه‌هێن خواندنگه‌هان و مزگه‌فتان ژی هاتنه‌ ڤه‌كرن.
زۆرا ب زحمه‌ته‌ راستی ملله‌ته‌كێ ل سه‌ر ئاخا وان وه‌لاتێ وان زێدێ باب و باپیرێن وان ده‌ربه‌ده‌ر بكه‌ن و ل مال و حالێ وان بكه‌نه‌ ده‌رێ و مال و ملكێ وان تالان بكه‌ن، یا ژ هه‌میێ نه‌خۆشتر د ناڤ وه‌لاتێ خوه‌دا ببنه‌ ئاواره‌ و ئه‌و بخوه‌ خودانێن ڤی وه‌لاتی و ئاخێ بن.
ــ ئه‌ز بخوه‌ سه‌رێ رێز و ته‌قدیرێ و به‌ژنا خوه‌ دچه‌مینم بۆ هه‌می خێزانێن سه‌ربلندێن شه‌هید و قوربانیێن كاره‌ساتا شنگالێ ، بۆ وان هه‌می خه‌باتكار و قه‌هره‌مانان و هه‌می پێشمه‌رگا و شه‌رڤانا ئه‌ڤێن كو هه‌می هه‌ولێن خودایی و شه‌ڤ و رۆژێن خوه‌ كرینه‌ ئێك بۆ رزگاركرنا كه‌سوكارێن مه‌ یێن ئێزدی.
ئه‌ڤان كوردبوونا خوه‌ سه‌لماند، كورد هه‌می ئێكن بێجوداهیا دین و نه‌ته‌وه‌، ئه‌م هه‌می د ڤێ كوردستانێ دا وه‌كی برایان بووینه‌ و دێ هه‌ر مینین برا ژی.
سه‌رشۆڕی و شه‌رمه‌زاری ژی دێ هه‌ر به‌هرا دوژمن و نه‌حه‌ز و نه‌یارێن كوردستانێ بیت.

سیاسه‌ت و دیانه‌ت ئه‌ڤ هه‌ردو بابه‌ته‌ یێن بووینه‌ قسه‌ و به‌حسێن ل سه‌ر ده‌ڤێ هه‌می ته‌خوچینێن جڤاكی، هه‌ر ژ زارۆیان بگره‌ هه‌تا گه‌نج و دانعه‌مران.

ـ ل هه‌ڕێما كوردستانێ ب تایبه‌تی و ل رۆژهه‌لاتا ناڤین ب گشتی بچیه‌ هه‌ر جڤاته‌كێ یانژی ده‌ف ئێك یان ژی هنده‌ك ژ هه‌ڤالان یان ژی هه‌ر جهه‌كێ دی كۆ بۆنه‌وه‌رێن ب ناڤێ مڕۆڤ لێ بن.
به‌س به‌حسێ دو تشتان دهێته‌كرن:ـ
1ـ سیاسه‌ت.
٢ـ دیانه‌ت.
ـ ب بۆچوونا من ئه‌ڤ هه‌ردو بابه‌ته‌ د تایبه‌تن و ب كه‌سایه‌تیا مڕۆڤی ڤه‌ دگرێداینه‌؟
لێ مخابن ئه‌ڤه‌ د ناڤ خه‌لكێ كۆردستانێ و رۆژهه‌لاتا ناڤین دا یا بوویه‌ دابونه‌ریت، هه‌تا وی ڕاده‌ی كو ل ده‌سپێكا هه‌ڤنیاسینا دو كه‌سان دا ئه‌ڤ دو پسیاره‌ ل ده‌سێكێ دهێنه‌ كرن ئه‌و ژی:ـ
ـ ئه‌رێ تۆ لایه‌نگیرێ كیژ پارتا سیاسی؟
ـ ئـه‌رێ بیروباوه‌رێن تـه‌ چنه‌؟ تـو ل سـه‌ر چ ئاینی؟
هندی ئه‌م ب دووڤ ڤان تشتان ڤه‌ بین چ جاران ئه‌م پێشناكه‌ڤین و چ جاران ئه‌م د وه‌لاته‌كێ دا و ل بن سێبه‌را ئێك ئالا دا ناژین.
ئه‌ڤ چه‌نده‌یه‌ بۆیه‌ ئه‌گه‌رێ په‌یدابوونا لاوازیا هزری و بێهێزیا پێشڤه‌چوونان ل رۆژهه‌لاتا ناڤین.
ئه‌گه‌ر ئه‌م ب درستی ته‌ماشایێ وه‌لاتێن ئه‌ورۆپی بكه‌ین، پاشی ته‌ماشای رۆژهه‌لاتا ناڤین بكه‌ین، دێ بۆ مه‌ دیاربیت كا ئه‌و چه‌ندێن پێش مه‌دا و چه‌ندێن پێشكه‌فتی.
به‌روڤاژی وان ئه‌م چه‌ندێن ڤه‌مای و د ناڤ پاشكه‌فتنا خوه‌دا ئه‌م یێن نقۆمبووین.
راسته‌ دڤێت ئه‌ڤ هه‌ردو تشته‌ ل ده‌ف مڕۆڤی هه‌بن سیاسه‌ت و دیانه‌ت:ـ
سیاسه‌ت:ـ یه‌عنی نێزیكبوون ژ چاكیێ و دووربوون ژ خربپیێ، سیاسه‌ت هۆنه‌رێ بڕێڤه‌برنا وه‌لاتی یه‌ ل سه‌ر بنه‌مایه‌كێ راست و دروست كو د به‌رژه‌وه‌ندیا گشتی دابیت.
دیانه‌ت:ـ ئه‌وه‌ كو مرۆڤ پێ نێزیكێ خودێ بیت و ڕێیا خودێ پێ بناسیت ، مرۆڤی به‌ر ب باشیێ و میهره‌بانیێ ڤه‌ دبه‌ت، زۆرێ پیرۆزه‌ و یێ گرێدایی یه‌ ب كه‌سی خوه‌ڤه‌ د ناخێ مرۆڤی دا شۆل دكه‌ت و شین دبیت.
لێ به‌لێ هه‌تا نها ژی خه‌لكێ مه‌ ب دروستاهی د ڤان هه‌ردو بابه‌تان نه‌گه‌هشتینه‌ و ب دروستاهی ل ێك ناده‌نه‌ڤه‌، هه‌ر لایه‌نێ نه‌ڕینی دگرن و چو جاران ئه‌ڕینی نه‌بوونه‌.
ـ ئه‌رێ بۆچی ئه‌م خه‌لكێ هه‌ڕێما كۆردستانێ ب تایبه‌تی و رۆژهه‌لاتا ناڤین ب گشتی ئه‌م ناهێین ل جیاتی ڤان هه‌ردو تشتێن ب مرۆڤی ڤه‌ گرێدایی، به‌حسێ بابه‌تێن ره‌وشه‌نبیری و زانین و پێشكه‌فتنا و داهێنانێن نوو بكه‌ین.
دا بشێین خوه‌ وه‌ك كه‌س پێبگه‌هینین و وه‌لاتێ خوه‌ ده‌وله‌تا خوه‌ به‌ر ب پێشڤه‌ ببه‌ین وه‌كی هه‌ر ده‌وله‌ته‌كا دی یا ئه‌ورۆپی.
ئه‌رێ ماچیێ ژ مه‌ كێمه‌ مه‌ژی وه‌كی وان دو ده‌ست و دو چاڤ و دو پێ نینه‌ كو بشێن ببینین و كاربكه‌ین و ل سه‌ر پێم خوه‌ راوه‌ستین.
بێگومان ئه‌م ژی وه‌كی وان مرۆڤین، لێ به‌لێ هزرو بیروبۆچوونێن مه‌ ل گه‌ل هزرو بیروبۆچوونێن وان زۆر زۆر د جودانه‌.
له‌وما دڤێت ئه‌م ده‌سپێكێ ل خوه‌ ده‌ست پێ بكه‌ین، خوه‌ چێكه‌ین مرۆڤایه‌تیێ و ئێكدی قه‌بوولكرنی بكه‌ینه‌ پیڤه‌رێ سه‌ره‌كیێ ژیانا خوه‌، چاڤێن خوه‌ ڤه‌كه‌ین دا بشێین جیهانێ ب رۆنی ببینین د ژیانێ بگه‌هین، ب دله‌كێ مه‌زن هه‌می كه‌سان قه‌بوول بكه‌ین ل سه‌ر بنه‌مایێ مرۆڤایه‌تیێ و ئێكگرتنێ بێ جوداهیا دین و نه‌ته‌وه‌ و هه‌ر تشته‌كێ دی.
بلا هه‌رده‌م ل بیرا وه‌بیت كو”هه‌ڤالینی و براینی ژ هه‌مــی تشتان پیرۆزتر و ب قه‌درترن، به‌س كو ل سه‌ر بنیاته‌یه‌كێ راست و دروست بن”.

دلۆڤان ئه‌مجه‌د بارزانى
پارتی دیمۆكراتی كوردستان یا به‌رهه‌ڤیان دكه‌ت بۆ كۆنگرێ هه‌شتێ یێ ئێكه‌تیا لاوێن دیمۆكراتا كوردستانێ، كو هه‌ژی به‌سكرنێ یه‌ بێژین بڕیارا ئه‌نجامدانا كۆنگرێ هه‌شتێ ل رێكه‌فتێ (10/7/2018) هاتبوودان كۆ بهێته‌گێران. ناڤێ كۆنگره‌ی ژی ب ناڤێ كۆنگرێ “پێشمه‌رگه‌”یه‌، وه‌ك ڕێزگرتنه‌ك و به‌رامبه‌ری خه‌بات و تێكۆشان و قاره‌مانیا وان و پیرۆزی و گرنگی و شكۆیا پێشمه‌رگه‌یێن كوردستانێ. كو ئه‌ڤرۆ ئه‌م ملله‌تێ كورد ژ سایا خه‌باتا وا یێن ب ئازادی و ئاشتی و ئارامی ل كوردستانه‌كا سه‌ربه‌خوه‌ دا دژین. له‌وما پێدڤیه‌ ئه‌م ژی خزمه‌ت و جانفیدایا وان ژبیرنه‌كه‌ین. ل رێكه‌فتێ (8/7/2018) رۆژا ئێكشه‌مبیێ سه‌رۆك “مسعود بارزانی ” ل گه‌ل جڤاتا سكرتاریه‌تا ئێكه‌تیا لاوێن دیمۆكراتا كوردستانێ كۆمبوو. د ڤێ كۆمبوونێ دا كۆنگرێ هه‌شتێ هاته‌ پاشخستن كو بڕیاربوو ل رێكه‌فتێ (10/7/2018)، كۆنگرێ ئێكه‌تیا لاوێن دیمۆكراتا كوردستانێ بهێته‌ ئه‌نجامدان. به‌لێ بۆ رێكه‌فتێ (1/8/2018) هاته‌ پاشخستن. ژبه‌ركو سه‌رۆكێ هه‌رێما كوردستانێ گه‌شته‌كێ بۆ ده‌رڤه‌ی وه‌لاتی دكه‌ت و نه‌شێت ل كۆنگره‌ی دا به‌رهه‌ڤه‌بیت له‌وما هاته‌ پاشخستن. سه‌رۆك بارزانی د په‌یڤه‌كێ دا ده‌ستخۆشی ل ستافێ سه‌ركردایه‌تی و هه‌می ئه‌ندامێن ئێكه‌تیا لاوێن دیمۆكراتا كوردستانێ كر و ئاماژه‌ ب رۆل و كاریگه‌ریا ئێكه‌تیێ دا، د قووناغێن جودا یێن بزاڤا رزگاریخوازا گه‌لێ كوردستانێ. هه‌روه‌سا سه‌رۆك بارزانی گۆت ژی پێدڤیه‌ فه‌رهه‌نگا پێشمه‌رگایه‌تیێ ل ناڤ لاوان دا وه‌رارێ بكه‌ت. وه‌كو یا دیاره‌ دێ پارتی گۆرانكاریان ژ ئێكه‌تیا لاوێن دیمۆكراتا كوردستانێ دا كه‌ت ژبۆ ڤێ كۆنگری. هه‌كه‌ ئه‌م بچینه‌ د ناڤ دیرۆكا دێرینا لاوان دا ل هه‌می قووناغێن خزمه‌تا گه‌لێ مه‌، جهێ ده‌ستێ وان یێ دیاره‌. جهێ پێگه‌هاندنێ و په‌روه‌ردا كوردایه‌تیێ و نیشتمانپه‌روه‌ریێ دا چاڤنه‌ترس بوون و د ڤێ رێیێ دا قوربانیێن داین. گه‌نج و لاو رۆلێ هه‌ری گرنگ د وه‌لاتی دا دبینن. بۆ بنیادنانا بنیاتێ ده‌وله‌ته‌كا موكوم و ب هێز و پێشكه‌فتی، ل سه‌ر گه‌نج و لاوێن زیره‌ك و تێگه‌هشتی دمینیت. چونكێ گه‌نج ئاڤاكه‌رێن وه‌لاتینه‌. له‌وما پێدڤیه‌ رێز و بهایێ گه‌نجان نه‌هێته‌ ژبیركرن. دیرۆكا دروستبوونا ئێكه‌تیا لاوێن دیمۆكراتا كوردستانێ ژ سالا (1953) هاته‌ دامه‌زراندن كو حه‌تا نها حه‌فت كۆنگره‌ یێن ئه‌نجامداین. كۆنگرێ ئێكێ ل سالا (1953) یێ هاته‌ ئه‌نجامدان و دووماهی كۆنگره‌ ژی كو كۆنگرێ حه‌فتێ بوویه‌ ب ناڤێ (سه‌ركه‌وتن) ژ سالا (2009) ژ هۆلا سه‌عد و هۆلا پێشه‌وا ل هه‌ولێرا پایته‌خت هاته‌ گێران. هه‌روه‌سا بڕیار یا هاتیه‌دان كو پشتی نه‌ه سالان كۆنگرا هه‌شتێ ب ناڤێ “پێشمه‌رگه‌” د ئه‌ڤ ساله‌ دا ل رێكه‌فتێ (1/8/2018) دێ هێته‌گرێدان. گه‌لێ مه‌ و هێزێن پێشمه‌رگێن كوردستانێ خۆراگری و قوربانیێن داین به‌رامبه‌ر دكتاتۆران راوه‌ستان و شیان ژناڤبه‌ن و بشكێنن. هه‌روه‌سا كار و ئه‌ركێ لاوێن مه‌ ژی د ڤێ ده‌می دا زۆرا ب زحمه‌ت و گرانه‌، چونكی یێن د بارۆدوخه‌كێ گه‌له‌ك نه‌خۆش دا، له‌وما دڤێت پتر خوه‌ بوه‌ستینن و كاربكه‌ن، چونكو ئه‌ركێ لاوێن دیمۆكراتا كوردستانێ خزمه‌تكرنا ملله‌تێ كورد ده‌ هه‌می كاودانان دا ..