عەبدولرەحمان مەحموود

هەیڤا ڕەمەزانێ ب هەیڤا پەرستن و باشی و چاكیان بەرنیاسە، هەیڤەكا جودایە ژ هەمی هەیڤێن دی، یا ڤێ هەیڤێ ژ هەیڤێن دی جودا دكەت ئەوە د ڤێ هەیڤێ دا قورئانا پیرۆز هاتییە خارێ و خودایێ مەزن سیستەمەكێ ڕێك و پێك بۆ ژیانا مرۆڤایەتیێ داڕێتیە و ڕێكێن ڕاست و دروست ژێك ڤاڤارتینە و جیهان ژ پێ لێدانا مافا و زۆلم و ستەمێ هشیاركریە و بەرێ مرۆڤان دایە وێ یەكێ تۆڤێ حەژێكرن و برایەتی و دلوڤانیێ د دلێ ئێكدا بچینن و دلان ژ ئیرەیی و چاڤتەنگی و هەر تشتەكێ نەباش بشۆن، هەر دیسان دڤێ هەیڤێ دا خودایێ مەزن گرتنا ڕۆژیان لسەر موسلمانان فەرزكرینە بۆ بیرئینان ژمرۆڤێن هەژار و زك برسی و ڕەمەزانێ بكەتە وێستگەهەك بۆ ڤەزڤڕینا موسلمانان ژ هەر كریارەكا نەباش و بەرێ مە بدەت وێ یەكێ قەنجی و چاكیان دگەل مرۆڤێن هەژار و دەستكورت بكەین و بەرەف ڕێكا ڕاست و سەرفەرازیێ ڤە بچین و دەرونێن خۆ ژ ژەنگا خڕابی و گونەهان تافیربكەین ب مەرەما وێ یەكێ داكو ئەجر و پاداشتەكێ مەزن ب بەندەیێن خۆ لسەر وێ پەرستنا دڤێ هەیڤێ دا ئەنجام ددەین ببەخشیت، هەیڤەكە بگشتی دل ب پەرستنا خودێ ئارام دبن و مڕۆڤ دكەشەكێ ئیمانی و ڕۆحانی دا ڕۆژێن خۆ دبەتە سەر و پتر نێزیكی خودایێ مەزن دبیت و زمانێ مڕۆڤی پتر ب زكر و لاڤا و پەرستنا خودێ ڤە مژیلن و دل و دەرونێ باوەرداران ب خۆشی و تاما باوەریێ د شاد و بەختەوەرن، هەروەكو خودایێ مەزن دقورئانا پیرۆزدا دبێژیت(أَلا بِذِكْرِ اللَّهِ تَطْمَئِنُّ الْقُلُوبُ) واتە بتنێ ب بیرئانین و پەرستنا خودێ دل ئارام دبن، ژبەر ڕێز و بەهایێ ڤێ هەیڤێ پێغمبەری سلاڤ لسەربن و هەڤالێن وی شەش هەیڤان بەری هاتنا هەیڤا ڕەمەزانێ خۆ بەرهەڤ دكر داكو ب جوانترین شێوە و باشترین پەرستن و خۆ شكاندن پێشوازیێ ل ڤێ هەیڤا پیرۆز بكەن و شەڤ و ڕۆژێن ڤێ هەیڤێ ب پەرستنا خودێ و خواندنا قورئانێ و كرنا باشیان ساخبكەن، ئەڤرۆ ژی ئەم وەك دیڤچوویێن ڕێبازا پێغمبەرێ خۆشتڤی ب دلخۆشی و باوەریڤە پێشوازیێ لڤێ هەیڤا پیرۆز دكەین، ئەڤجار یا فەرە دڤێ هەیڤێ دا گیانێ لێبورین و هاریكاری و دل فرەهیێ بكەینە ژ پێشینەیێن كارێ خۆ، بەرێ مە ل وێ یەكێ بیت كا هەژار یان نەساخ و بەلنگازەك ل كیرێ هەبیت دەستێ خۆ یێ دلوڤانی و هاریكاریێ هندی دشیاندا بیت بۆ درێژبكەین.

عەبدولرەحمان مەحموود

شیرەت بۆ هەر كەسەكی ل هەر تەمەنەكێ هەبیت گەلەك یا پێدڤیە، د ئایینێ ئیسالاما پیرۆز دا گرنگیەكا تایبەت ب بابەتێ شیرەتێ هاتییەدان، ب مەرەما وێ ئێكێ مرۆڤان ژ هەر كریارەكا شاش هشیاربكەن و جڤاكەكا ئارام و بەختەوەر پەیدابكەت، مرۆڤێن شیرەتكار مینا پەڕژانەكینە بۆ ڕاگرتن و دەربازنەبوونا گەلەك مرۆڤان بۆ ناڤ ژیانەكا ئالۆز و پڕ سەرگێژی، خۆیایە چ مرۆڤ د ژیانێ دا نینن تووشی شاشیان نەببن، لێ یا مرۆڤی جارەك دی ڤەدگەڕینیتە ڤە ل سەر ڕێكا ڕاست و درست، ئەوژی گوهدانە ب هەرشیرەتەكا باش یا هەر كەسەكێ ئاراستەی مڕۆڤی دكەت، لەومان یا فەرە هەمی دەما مرۆڤ ببیتە فاكتەرێ چاكی و باشیێ بۆ كەسانێن دەردۆر و جڤاكا خۆ، یانژی ژ وان كەسان بیت هەمی دەما گوهێن خۆ بۆ هەر جۆرە شیرەتەكا مرۆڤی ڤەكەت ژ هەر جۆرە كارەكێ نەباش و شاش دویر دئێخیت، ئەم هەمی پێدڤی ب گوهدانا شیرەتاینە، چ دكاودانێن بەرتەنگ و نەخۆش دا دلێن خۆ ب هندەك شیرەتێن دل ئارامكرنێ تەنا بكەین، یان دەما مرۆڤ كریارەكا شاش و نە دڕێ دا ئەجام ددەت و كەسەك شیرەتان ل مرۆڤی دكەت بۆ دوبارەنەبوون ژڤێ كریارا شاش، یان ئەو دەما مڕۆڤ دەست بكارەكی دكەت و نەزانیت كۆ ئەڤ كارە دبەڕژەوەندیا وی دایە یان نە، گەلەك مڕۆڤ ژ ئەنجامێ گوهنەدانا شیرەتان تووشی ئاریشێن مەزن بووینە و بەروڤاژی گەلەك كەس هەبووینە گوهداری بۆ هەر كەسەكی كریە یێ شیرەتەكا خێرێ لێكربیت، گەر بزڤڕینە سەر دەمێ باب و باپیرێن خۆ خەلكی گۆهداریەكا باش بۆ شیرەتێن هەركەسەكێ ل وی سەردەمی هەبوون، دەما كەسەكی شیرەت ل ئێكی كربان ب سوپاسیڤە گوهداریا وی دكر و ب قەنجی ڤە شیرەتێن وی وەردگرتن و دزانی ڤی كەسی بۆ بەرژەوەندیا وی و پاراستنا وی یە ژهەر تشتەكێ نەباش، لێ لڤی سەردەمی ئەم دبینین هێدی هێدی شیرەت یا كێم دبیت و گوهدارێن شیرەتان ژی زۆر كێم بووینە و هەر ئێك لدویڤ زانین و تێگەهشتنا خۆ ژیانێ دبەت سەر و ناڤبڕەك مەزن كەفتیە د ناڤبەرا وی و گوهداریا شیرەتان دا، مە دیتیە گەلەك جاران كەس هەبووینە شیرەت ل كەسەكی كرینە داكو ل شاشی و كریارێن خۆ یێن نەباش بزڤڕیت ل جهێ ئەو گوهداریێ بۆ بكەت و ل خۆ بزڤڕیت یانژی سوپاسیا وی بكەت بۆ وان شیرەتێن وی لێكرین خۆ ژێ تۆڕەكریە و بەلكو ب حەسوود و چاڤ پێ نەڕابووی ل قەلەم دایە ب تایبەت ئەگەر دەست ب كارەكێ نە ژهەژی كربیت و ئەو كار نە د بەڕژەوەندیا وی دابیت، وی وەسا هزركریە كو كەسێ شیرەتكار نەڤێت بۆ خۆ شۆل بكەت یانژی نەڤێت زەنگین و حال خۆش ببیت، ب ڤان پەڕێن ڕەشێن مە ئێخستینە پێش چاڤێن خۆ دێ ل گەلەك تەلهە و داڤێن ژیانێ هلنگڤین، ئەڤجار یاباش ئەوە هزرێن خەلەت ژ وان كەسان نەكەین یێن دهێن و شیرەتێن چاك ل مە دكەن بۆ وێ یەكێ دا وان ڕێكێن تاری یێن ژیانێ ل مە ڕۆن بكەن، بەرۆڤاژی دڤێت مە سنگەكێ بەرفرەه هەبیت بۆ گوهداریا هەركەسێ بڤێت مە شیرەت بكەت و ب دلخۆشی و سوپاسیڤە شیرەتێن وان وەربگرین.

عـەبدولـرەحمان مەحموود

گەلێ كورد ب درێژاهیا دیرۆكێ و هەتا ئیرۆ د گەلەك قۆناغێن سەخت و دژواردا دەربازبوویە و شیایە خۆ ل بەر گەلەك پیلان و هێرشێن ناڤخۆ و دەرڤە بگریت و بهیز ل هەمبەر هەر گرژی و ئالۆزیەكا دەڤەر كەفتییە تێدا ڕاوەستیت، ب ڤێ خەباتا دویر و درێژ كورد ل ڤێ پارچەیا ئازادكری شیان قەوارەیەكی بۆ خۆ درستبكەن و هندەك ژ مافێن خۆ بدەستبێخن، ل گەل هندێ ژی دژایەتیەكا زۆر بۆ ڤی قەوارەی دهێتە كرن، لێ بۆ هەر گرۆپ و ئالیەكی باش ڕۆن بوویە لاوازكرن یانژی ژناڤبرنا ڤی قەوارەی كارەكێ ئاسان نابیت، ژ وێ خەبات و مۆڕالا ب هێزا خەلكێ كوردستانێ، هەرێما كوردستانێ شیایە مینا شیرهەكا پولایین لبەر هۆڤایەتیا هەر دوژمنەكی ڕابوەستن و خەونێن وان ل گۆڕ بنن، ئیرۆ ئەم دبینین هەرێما كوردستانێ وەك قەوارەكێ یاسایی و دەستووری ڕۆلەكێ كاریگەر ل ڕۆژهەلاتا ناڤەڕاست دگێڕیت، چ ژلایێ سیاسی ڤە یانژی ئابووری و ئێمناهیێ ڤە، نها كورد بووینە ژمارە ل دەڤەرێ، حسابەكا تایبەت ژلایێ ڤان وەلاتێن هەڤسووڤە بۆ دهێتە كرن و هیچ وەلاتەكێ ناڤچێ نكاریت كوردن د ڤێ كێشمەكێشا دەڤەر كەفتیە تێدا پشت گوه پاڤێژیت، نەخاسمە د ڤان كاودانێن هەستیار و ڤان گوهۆڕینێن ژنشكەكێ ڤە بسەر دەڤەرێ دا هاتینە خار، ژ هێزا كوردان و خواستا وان بۆ بەرقەراربوونا ئاشتی و ئارامیێ و ڕۆلێ وانێ ئەكتیڤ و كاریگەر ل ڤێ دەڤەرێ، ئیرۆ نە بتنێ وەلاتێن هەرێمی ب چاڤەكێ مەزن تەماشە دكەنە ڤی قەوارەی، بەلكو وەلاتێن زلهێز ژی ب هەمان بەرێخودان و تێگەهشتن تەماشەی هەرێما كوردستانێ دكەن، چونكی بۆ هەر وەلاتەكی ڕۆن و ئاشكەرابوویە چارەسەركرنا پڕسگرێكێن ڕۆژهەلاتا ناڤەڕاست بێی بەژداریا كوردا ئەنجام دێ د بەرۆڤاژی خواستێن وان بن وەكی ئەو ژێ هزردكەن، و ل داویێ هەر دێ دنەچاربن بال كوردان و خواستێن وان بزڤڕن، ئەڤەژی تشتەكێ زورێ گرنگە بۆ هەرێما كوردستانێ باشتر ڕۆلێ خۆ د مەیدانا سیاسیا وەلاتێن هەرێمی دا بگێڕیت و گڤاشتنێ بێخیتە سەر ڤان وەلاتان ژبۆ چارەكرنا پڕسا گەلێ كورد ل هەر چار پارچەیان و نەچاربكەن ژ ڕكمانیا خۆ بەرامبەر گەلێ مە بهێنە خار و دانپێدانێ ب مافێن گەلێ مە بكەن، نها باشترین دەلیڤەیە هەرێما كوردستانێ بهەمی پارت و ئالیێن خۆڤە وەك ئێك تیم كاربكەن بۆ بهێزتركرنا قەوارێ هەرێمێ و بدەستڤەئینانا مافێن خەلكێ كوردستانێ و بزاڤێ بكەن ڤی قەوارەی ب پارێزن ژڤان كاودانێن نەیێن خۆ جهێن دەڤەر كەفتییە تێدا، د هەمان دەمدا فەرە لسەر پارتێن پڕانیا كورسیێن پەڕلەمانی ب دەستخۆ ڤە ئێخستین لەزێ د پێكئینانا حوكمەتەكا بهێز و فرە لایەنی دا بكەن و بەڕنامەیەكێ تۆكمە ل دویف ڕەوشا ئەڤرۆ دەڤەر كەفتییە تێدا دابڕێژن و كار پتر لسەر بهێزكرنا پەیوەندیێن دبلوماسی بكەن نەخاسمە دگەل وەلاتێن بڕیار بدەست دا.

عەبدولرەحمان مەحموود

پڕانیا مە د ژیانێ دا بزاڤێ وێ یەكێ دكەن شوون تبلێن باش ل دووف خوە دا بهێلیت و هەر پاشبەندەكێ چاك ژ سالوخەتێن باش لبەر ناڤێ خوە  زێدەبكەت و ببیتە نموونەیا ڕەوشت بەرزیێ دناڤ جڤاكێ خوە دا و حەزا هەر ئێكی ژمە ئەوە كەسایەتیەكا بهێز و كاریگەر ل دەف خوە پەیدا بكەت و ببیتە ژێدەرێ دلخۆشی و بەختەوەریێ بۆ دەوروبەرێن خوە، لێ بەرۆڤاژیا ڤێژی كەسانێن وەها هەنە دبیت بۆ وان هندا گرنگ نەبیت كا ب چ شێوە سەرەدەریێ بكەن و یانژی چ سالوخەت و جۆرێ كەسایەتیێ ل خوە  پەیدابكەن، بەلكو تێگەهشتنا وی بۆ ژیانێ نە ل ئاستێ پێدڤیە و خەما وی ئەو یەك نینە دەوروبەرێن خوە ژخوە ڕازی بكەت و سنورەكی بۆ كەسایەتیا خوە دابنیت كۆ وێ ڕێكێ نەدەت كەس دەربازی وان سنوران ببیت و چ بكەت و چ بێژیت بۆ وی هندا گرنگ نینە كا یێ بەرامبەر دێ پێ تۆڕەبیت یان نە، دلێ كێ بشكێنیت یان بهێلیت بۆ وان زۆرا ئاساییە، ڤان كەسان پەردێن ڕەش بسەر دلێن وان دا هاتینە خار و ب مرۆڤێن گۆزەكشكێن (شەقلەشكێن) دهێنە نیاسین، یان ئەم زەلالتر بێژین زەوق دڕینك، مرۆڤێن شەقلەشكێن ئەوێن هەموو دەمان لبەر دەڤێ مرۆڤی د ڕاوەستیای كا دێ مرۆڤ چ بێژیت و یان چ كاركەت ئێكسەر دێ ل دەقێ مرۆڤی دەن و ب هندەك ئاخفتنێن نە ژهەژی كۆ مرۆڤ پێ ب هەڕشیت هەموو هەستێن مرۆڤی دناڤ ژەهرا ڤی سلوكێ خوە یێ كرێت وەركەت و مرۆڤی دزكدا بەن، هێشتا مرۆڤی ئاخفتنا خوە ب دووماهی نە ئینای دێ خوە هاڤێتە د بەر سوحبەتێ ڕا و وە ناكەت ب دروستاهی مەبەستا خوە ل سەر بابەتەكی بگەهینیت، یان دێ بێژیت ئەڤە نە شولا تەیە، یانژی ئەڤە نە چ سوحبەتن تۆ دكەی و تە چ ژ سوحبەتێ چێ نەكر و دبیت ئەڤ ڕەنگێ مرۆڤان ب خوە ناحەسن بڤی سالوخەتێ خوە یێ نەجوان بڤان ڕەفتارێن خوە یێن كرێت كا چەند هەستێن كەسانێن بەرامبەری خوە دشكێنن و دگەل هندێ ژی چەند بها و كەسایەتیا خوە دناڤ جڤاكێ‌ خوە دا ژدەست ددەن و وەدكەن خەلك ڕێكا خوە ژی ژیا وان ڤەگوهێزیتو هەر دیوانا ئەو لێ بن ژی خوە ژێ دووربكەن و پەیوەندیێن خوە یێن جڤاكی ژی دگەل قوت بكەن و ناڤێ وی ب ئێكجاری دناڤ فەرهەنگا خوە یا هەڤالینی و دوستایەتیێ دا ژێ ببەن، ل سەر ڤان ڕەنگێن مرۆڤان ئەوە پێداچوونەكێ دڤی سالوخەتێ خوە دا بكەن و ڤێ خالا ڕەشا دەقشكاندنێ ل بەر ناڤێ خوە ڕاكەن و ببنە هێمایەك بۆ دلخۆشكرن و بەختەوركرنا كەس و كار و هەڤال و برادەرێن خوە، ل جهێ ببنە ژێدەرێ دلشكاندن و تێكدانا هەستێن كەسانێن دەردۆرێن خوە.