ئیحسان حەسەن
ئەڤرۆ ئەلهویێن چیا چاڤەرێ تۆماركرنا دیرۆكەكا نوو نە بۆ وەرزشا كوردستانێ و ئیراقێ ب گشتی و پارێزگەها دهۆكێ ب تایبەتی، دەمێ دیدارا خوە یا دویێ و ڤەبر ژ فینالا خولا قارەمانێن یانەیێن كەنداڤی یا فوتبۆلێ هەمبەری مێڤانا خوە یانەیا قادسیە یا كوێتی دكەت، لسەر كاغەزێ ب گورەیی دیدارا ئێكێ ئەوا ل كوێتێ هاتیە كرن و بێ گۆل بداوی هاتی، دهۆك وەكو تەكنیك و شیانێن لەشی و دەرونی باشتر ژهەڤركا خوە دهێتە دیتن، چەكێ وێ یێ سەرەكی ژی دێ یاریگەه و جەماوەرە و زاخا یاریزانێن وێ بیت، لێ دڤێت ئەم بزانین كو فوتبۆل باوەریێ ب لوژیكێ نائینیت، ژبەركو ئەوا دناڤا روودانێن یاریێ دا دهێتە پێش دبیت بەروڤاژی هەموو پێشبینیان بیت، یانەیا قادسیە ژی دێ بەرگیرییێ ژ دیرۆكا خوەكەت ژبەركو خودانا 66 ناسناڤێن نافخویی، ئەرەبی و كێشوەرییە، شارەزاهییەكا باش ددیدارێن مەزندا هەیە، هند یا بساناهی نینە ئەم پێشبینیا ئەنجامی پێشوەخت بكەین، ژبەركو هەردو تیمان هێزەكا مەزن ژ یاریزانێن نافخو و بیانی هەنە، دشێن د هەردەمەكی دا ئەنجامی ب گوهۆڕن، ئەز بخوە هووسا دبینم ئاستێ تەكنیكی هند یێ جێواز نابیت ژ یاریا ئێكێ، دهۆك دێ كڤاشتن و كونترۆلا تەپێ بۆ پێشیێ كەت داكو ڕێ نەدەتە قادسیە ڕێكخستنا هێرشان رابیت، د بەرامبەر دا مێڤان دێ پشتبەستنێ لسەر شاشییێن هێلا بەرگیرییێ ل سێ گوشەیا دووماهییێ یا دهۆكێ‌ و هێرشێن هەڤدژ كەت، بێ گومان ئەڤە ژی چەكەكێ دو سەرە، پێدڤی ب شیانێن جەستەیی یێن بلند هەیە، ئەگەر تێدا ب سەركەڤت دبیت ب ساناهی ژ كویراتییا یاریگەها ئەلهوییان دەركەڤیت دیسان ڤەكری بهێلێت، یا ژمن وەرە هەردو تیمان بەرهەڤییەكا باش بۆ ڤێ یاریێ كریە، هەموو بۆچوون بۆ هندێ دچن ئەم یاریەكا خۆش ژهەژی ڤێ هەلكەڤتێ بینین، ب مەرجەكی ئەگەر دەستەكا دادڤانییێ ب ئەركێن خوە دروست رابوون، رێ نەدەن یاریزان هەموو رەنگێن گیرووبونێ وزارڤەكرنێ بكەن، من باوەریەكا تمام یا هەی كو ئەو تیم دێ سەركەڤتنێ بدەستڤە ئینیت، ئەوا بشێت بەرهەڤییەكا باش یا دەرونی بۆ یاریزانێن خوە بكەت، ژبەركو د ڤان رەنگە یاریاندا تیم پێدڤی ب ئارامییێ و مفا وەرگرتنێ یە ژكێمترین دەلیڤەیان، داكو ئەنجامی دبەرژوەندیا خوەدا ئێكلابكەت، هیڤیا مە ئەو ئەڤ دیدارە هند یا جوان بیت وەكو جوانییا سەقایێ باژێر و هەرێما مە یا خوشتڤی، ئەز دبێژم دەلیڤەكا زێرینە بۆ كورێن دهۆكێ ل ئەسمانێ ڤێ قارەمانییێ بفرن، دمەزنترین دەرگەهـ ناڤێ خوە ددیرۆكا ڤێ قارەمانییێ دا تۆماربكەن، ژبەركو ئێك ژ نهێنیێن پێشكەڤتنا یانەیا دهۆك دڤێ قارەمانییێ دا ئێكگرتن و جورێ وان یاریزانانە یێن بەرەڤانییێ ژ درێس و ناڤ و دەنگییا وێ دكەن، ژبلی هندێ راهێنەرەكێ وێرەك ل پشت وانە ئەوژی مەسعۆد میرالە یێ كو شیای كەسایەتیەكا تایبەت بۆ تیمێ دروست بكەت، ئەلهۆیان بكەتە تیمەكا خودان كارێزما، گەلەك یا بزحمەتە تیمەك بشێت ب تایبەت دناڤا ئەردێ وێ دا سەركەڤتنێ لسەر تۆماربكەت.

ئیحسان حەسەن

راستە دەمێ دبێژن پەیوەندییا دناڤبەرا جەماوەری و تەپێ دا مەزنترە ژ توخیبێن یاریگەهێ، ناڤەرۆكا ڤێ پەیوەندیێ و عەشقێ ب ئاشكرایی و ب كریار هاتە دیتن، دەمێ ئەم پشتەڤانێن یانەیا دهۆك ب وێ گەرم و گوریێ دبینین و ڤیانا وان یا بێ سنۆر بۆ ناڤێ باژێر و یانەیا خوە دهەڤركیێن تیما وان دا چ دخولا ستێرێن ئیراقێ دا، یان ژی دخولا قارەمانێن یانەیێن كەنداڤی، تشتێ دیار و دلخوش یێ ڤی جەماوەری ئەو خوشییە یێن كو ئەو بەری یاریێ و دناڤا یاریێ دا، دیسان پشتی یاریێ ب درێس و لۆگۆیێ یانەیا خوە ب تایبەت دەمێ سەركەڤتنان ب ستران و حەواریان دیاردكەن كو ب راستی وەكو كەڤالەكێ جوان دهێتە دیتن ئەم هەموو شانازیێ پێ دبەین،  ژبەر هندێ ئەگەر ئەڤرۆكە بارا پتر حەژێكەر و چاڤدێرێن فوتبۆلێ ب یاریزانێن ژمارە 12 دناڤا یاریگەهێ ددانن، ئەز بخوە ب یاریزانێن ژمارە ئێك قەلەم ددەم، وەكو مافەك بۆ خەمخوری و حەژێكرنا وان بۆ تیما وان ئەوێن ب كریار سەلماندین چ دیاریێن تیمێ دا دناڤا یاریگەها خوە، هەروەسا ژدەرڤە كو ئەو ژ هەژی ڤی ناسناڤی نە، باشترین بەلگە ژی ئامادەبوونا وان یا پێش وەخت دهەموو یاریێن تیمێ دا ب تایبەت د دیدارا ڤێ داویێ ژ خولا كەنداڤی، دەمێ پتر ژ دوو هزار كەسان خوە گەهاندینە سنورێن وەلاتێ كوێتێ هێشتا فیزێن وان نەدەركەڤتین، بۆ هندێ ئامادەی یاریا یانەیا خوە دگەل  قادسیە ببن و هاندنا تیما خوە بكەن ، ئەگەر دەرفەت پێ هاتبا دان و نەكەڤتبا ل بەرامبەر هندەك رێنمایێن گرێدای سیاسەتا وی وەلاتی، ئەز باوەرم یاریگەه هەموو دا هێتە پركرن، یا من دڤێت بێژم چونكو جەماوەر روودانێ د هەموو قارەمانیێن مەزن دا پەیدادكەت، ب هاندان و پشتەڤانییا خوە دهەموو رەوشاندا هەر لدەستپێكا یاریێ تا دووماهیك خولەك، فوتبۆل یاریا سەركەڤتن و دۆراندنێ یە، چونكو خوشییا سەركەڤتنێ مەزنتر لێ دهێت و یادۆراندنێ گرانتر لێ دهێت دەمێ تیما مرۆڤی ڤیان لسەر هەی نێزیكی دەستكەڤتەكێ دبیت، فەرە بۆ یاریا دویێ و ڤەبر ژ فینالا خولا كەنداڤی دگەل یانەیا قادسیە ئەوا دێ زۆربەی كەنالێن ئەرەبی ب تایبەت یێن كەنداڤی روودانێن وێ ڤەكوهێزن، چاڤەریێە پشتی دوو رۆژێن دی درێ ورەسمەكێ خەلاتكرنێ  یێن تایبەت دا لیاریگەها دهۆك ب ئامادەبوونا چەندین كەسایەتیێن دیار و رێكخەرێن ڤێ قارەمانییێ بهێتە كرن، ئەم دووبارە جوانترین وێنێن پشتەڤانییێ نیشان بدەین، بلا مە هەمیان تنێ ئێك دەنگ و حواری هەبن، ئەوژی دەنگێ بلندكرنا مورالا یاریزانێن مەبیت، ئەم وە بكەین هەتا یێن لبەر شاشان بەرێ خوە ددەنە یاریێ و دەرفەت بۆ چێ نەبووی حازربیت یان جهێ وی نەكربیت خوشییێ ژوان چالاكییان بینیت یێن كو دناڤا یاریگەهێ دا دهێنە نیشاندان، ژبلی هندێ دڤێت ب هەموو رەنگان ئەنجامێ یاریێ بهێتە قەبیلكرن ژبۆ پاراستنا وێ وێنێ جوان یێن كو هەتا نها هەوە نیشاندای، دگەل داخوازێن سەركەڤتنێ بۆ نوونەرا كوردستانێ و ئێكانەیا ئیراقێ ئەلهویێن چیای دڤێ یاریا دیرۆكی و مەزن دا.

ئیحسان حەسەن

مافێ جەماوەر پشتەڤانێن یانەیێن دهۆك و زاخۆ یە شانازیێ ب تیما خوە یا فوتبۆلێ ببەن، ئەوێن شیاین سەركەڤتنێن دیرۆكی و مەزن لسەر هەر ئێك ژ یانەیێن زەورا و شورتە دخولا ستێرێن ئیراقێ تۆماربكەن، ئەلهویێن چیا شیان پشتی حەفت یاریان سنورەكی بۆ گرێكا یانەیا زەورا بدانن ووانەكێ لسەر رێك و پێكییێ و خەباتێ دناڤا یاریگەهێ دا ب سەركێشییا راهێنەرێ خوە مەسعود میرالی نیشان بدەت، ئەوێ هەردەم هاندانا یاریزانێن خوە دكەت ژبۆ تۆماركرنا باشترین ئەنجامان، باش دزانیت دێ چەوا شیانێن یاریزانێن خوە بەرامبەر هەر تیمەكێ بكار ئینیت و مفای ژخالێن خوە یێن هێزێ بینیت، ژبلی وێرەكی و خواندنا وێ یا دورست بۆ تیمێن بەرامبەر، دیسان دانا بریارێن ڤەبر ددەمێن گونجای دا، هەروەسا پشت بەستن لسەر شێوازێ هێرشبریێ یێ هەڤسەنگ و بەرگیریا رێك و پێك و رێكخستی،  بجهئینانا پلانێن خوە یێن تەكتیكی، ئەڤ چەندە ب روونی  دڤێ یاریێدا دیار بوو پشتی پتر ژ دەمژمێرەكێ ب 10 یاریزانان یاری كری، ب گهورینەكا تەكتیكی شیا گۆلا دویێ‌ و سەركەڤتنێ تۆماربكەت، بێ نەڤێت ئەڤ چەندە دێ بیتە هۆكارەكێ مەزن كو دهۆك دخولا ڤی وەرزیدا ببیتە ئێك ژ هەڤركێن راستەقینە لسەر ناسناڤێ خولێ، بەرامبەری وێ كورێن خابووری ژی ئەوا پێدڤی دگەل هەلگرا ناسناڤی بۆ جارا دویێ لڤی وەرزی بجهئینا، پشتی سەركەڤتنا خوە دووبارەكری و ڤەگەریایە پێشەنگا خولێ، بێ نەڤێت رۆلێ كادرێ راهێنانێ ب سەركێشییا راهێنەرێ تیمێ تەلال ئەلبەلوشی یێ دیارو بەرچاڤ بوو د بلندكرنا زاخا یاریزانێن خوە و بەرهەڤكرنا وان ژلایێ دەرونی ڤە بۆ ڤێ دیدارا گرنك، زاخوییان باش دزانی ژبلی سەركەڤتنێ دڤێ یاریێ دا دبیت رێكا وان بەرەب بجهئینانا خەونا وان یا مەزن لڤی وەرزی بزحمەت بێخیت، ژبەر كو ئەوێ هەڤركییێ لسەر ناسناڤی دكەت، دڤێت خالان دناڤا یاریگەها خوە دقۆناغا دوێدا ژ دەست نەدەت، ئەگەر هەڤركێ وێ هەلگرا ناسناڤی ژی بیت، ژبلی هندێ ئەگەر ئەم رۆلێ گولپارێزێ تیمێ عەلی كازمی ژبیر نەكەین، ئەوێ شیای بەرگیریەكا بهێز ژگۆلا خوە بكەت، ل بەرامبەر هەموو بزاڤێن مەترسیدار ب راوەستیت، هەروەسا پێدڤییە ئەم مافێ فیقیێ یاریگەهێ جەماوەرێ دلسۆزێ یانەیا زاخۆ ژبیر نەكەین كو براستی یاریزانێن دوازدێ بوون، لدووماهییێ یا من دڤێت بۆ هەردو نوونەرێن كوردستانێ و بادینان یێن سەر بلند بێژم،  یا ژمن وەرە هەڤركییا ڤی وەرزی پشت بەستنێ ب تمامی لسەر ئەنجامێن هوون بدەستڤە دئینن بتنێ ناكەت، بەلكو هەتا ئەنجامێن تیمێن هەڤرك ژی دبیت كارتێكرنێ ل رێزبەندیێ بكەت، ئەگەر دڤێ یاریێدا دهۆكێ شیابیت چەنسەكی بدەتە برایێ خوە زاخۆ كو جهێ خوە ڤەگەرینیت، ئەز باوەرناكەم  ب گورەیی هەڤركییا نوكە هەی تیمەك بشێت ب ئەنجامێن خوە بتنێ بگەهیتە ناسناڤی، ئەگەر مفای ژ ئەنجامێن تیمێن بنێ لیستێ و یێن نیڤێ دگەل هەڤركیێن خوە نەبینیت، لەوما یاریێن مایی دێ هەموو دڤەبربن ژبۆ گەهشتنێ ب هیڤیێن خوە و پێدڤییە هێشتا ئەم چاڤەرێ بین.

ئیحسان حەسەن

هەردەم گوپیتكا دیدارێن ئەلهویێن چیا و كورێن خابووری جهێ پووتەدان و زاخا جەماوەر و پشتەڤانێن فوتبۆلێ یە، نەتنێ ل پارێزگەها دهۆكێ بەلكو لسەرانسەری كوردستانێ و ئیراقێ ژی، ژبەر وێ گەرموگوری و وێ تاما تایبەت ئەوا یاریێن وان ددێربییێ پارێزگەهێ دا هەر ژبەری یاریێ دیسان دناڤا یاریێ دا و هەتا پشتی یاریێ ژی بخوەڤە دگریت، دیارە یاریا وان ژ گەڕا 25ێ ژ خولا ستێرێن ئیراقێ ژی ئەوا چاڤەریێە ل رۆژا ئێك شەمبییا بهێت لیاریگەها دهۆكێ بهێتەكرن، دێ یا ڤەبر و ئاگرین بیت بۆ كاروانێ هەردو تیمان دخولا ڤی وەرزیدا، سەركەڤتن دڤێ یاریێدا دێ ب شەش خالان بیت نەك سێییان ، ژبەر كو زاخۆ ئەوا نها سەركێشا خولێ دكەت و دخوشترین دەمێن خوەدا دبوریت، باش دزانیت ژبلی سەركەڤتنێ دبیت رێزبەندیا ئێكێ ژ دەست بدەت و بۆ هەر ئێك ژ زەورا و شورتە بهێلێت، بەرامبەرێ وێ ژی دهۆك ژی ئەوا شیای ب سەرفەرازی بگەهیتە فینالا خولا قارەمانێن یانەیێن كەنداڤی و پێنچ یاریێن پاشخستی هەین و نها ل رێزبەندیا حەفتێ دهێت، ئەگەر بڤێت ببیتە هەڤركا راستەقینە یا ڤێ خولێ ژی، پێدڤییە چ خالان دناڤا جەماوەرێ خوەدا ژدەست نەدەت، ژبەر كو ئێدی دەلیڤەیا قەربووكرنێ نەمایە، ئەوژی دزانین دۆراندن دگەل تیمەكا هەڤرك دبیت وێ دووربێخیت ژ ناسناڤی، لەوما سەركەڤتن بۆ هەردوكان دێ یا ب بها بیت، ژبەر كو حیساباتێن تایبەت ل پشت هەنە، دڤی گوتارێ دا من نەڤێت ئەز بچمە دناڤا پلان و شرۆڤەكرن وپێشبینیان دا یان بووچونێن خوە دیاربكەم، كا كیژ تیم نێزیكترە بۆ سەركەڤتنێ، لێ یا من دڤێت بێژم كو ئەڤ دێربی یە ژهەژی هندێ یە پووتەكێ مەزنتر ژ هەموو لایەكێ ڤە پێ بهێتەدان، ژبەر كو تا نها هەردو یانەیێن مە شیاینە ب ئاستێ خوە یێ تەكنیكی و تەكتیكی یێ بلند، دیسان برێكا دەستەكێن پشتەڤان و حەزژێكەرێن خوە یێن دلسۆز ئەوێن دخوشی و نەخوشییان دا دگەل تیمێ، وێنەكێ جوان یێ فوتبۆلا كوردستانێ نیشا ملیونەها كەسان ل كێشوەرێ ئاسیا و وەلاتێن عەرەبی بدەن، لەوما دەم هات بۆ ڤێ یاریێ لدەستپێكێ دهۆك پێشوازیەكا گەرم ل برایێن خوە دناڤا یاریگەها خوەدا بكەت، جەماوەر و یاریزانێن هەردو تیمان ژی رۆلەكێ سەرەكی و كاریگەر بینن بۆ سەركەڤتنا ڤێ یاریێ بەری ئەنجامێ وێ، ژبلی هندێ پشتەڤانێن یاریێ خوە دوور بێخین ژ دروشم و حیوارێن كو ناگونجن دگەل كەلتورو رەوشتێ مە یێ كوردەواری، ئەم پشتەڤانییەكا پرۆفیشنال و فوتبۆلەكا ژ هەژی ناڤ و دەنگییا هەردو نوونەرێن پارێزگەهێ بینین، چونگو چ جوداهی دناڤبەرا واندا نینە، پشتی یاریێ ژی هەر ئەنجام دبەرژوەندیا كێ دا بیت، دەستخۆشی ل تیما سەركەڤتی بهێتە كرن، ب دەست قوتان داخوازا بەختەكێ باشتر ب تیما خوسارەت ژی بهێتە كرن، بلا ئەم وەبكەین كو ئەڤ دێربی و شەڤبیرییە بمینتە دبیردانكا دیرۆكا فوتبۆلا پارێزگەها مە و ئیدارا سەربەخویا زاخۆ دا، ئەم هەموو شانازییێ پێ ببەین.

ئیحسان حەسەن

رەنگە گەلەك ژچاڤدێر و شرۆڤەكارێن وەرزشێ دگەل بۆچوونا من نەبن كو راهێنەرێ كورد یێ فوتبۆلا یانەیا دهۆك یێ نها مەسعود میرال ئەوێ شیایی تیما خوە بگەهینتە فینالا خولا قارەمانێن یانەیێن كەنداڤی، دهێتە هژمارتن ئێك ژ باشترین ڕاهێنەران ددیرۆكا یانەیا دهۆكێ دا، هەتا پێش دكەڤیت لسەر وی راهێنەری یێ كو شیای ل وەرزێ 2009 و 2010ێ، ئەلهویێن چیای بۆ جارا ئێكێ بەر ب ناسناڤێ خولا ئیراقێ بۆ یانەیێن پلا نایاب ببەت، سەرباری سەربورا راهێنەری ئەوا كێمتر ژ وەرزەكی دگەل یانەیێ، یا كو مەسعود میرالی پێش دئێخیت لسەر وان هەموو راهێنەرێن بیانی و یێن نافخویی، چەواتییا ڕەفتارا وی یە دگەل یاریزانێن خوە، ئەو ژی مفا وەرگرتن ژ شیانێن وان یێن جەستەی و یێن تەكنیكی پێكڤە، ئەڤ چەندە بوو ئەگەرێ هندێ كو ئاستێ یاریزانان یاری بۆ یاریێ باشتر لێ بهێت و پێشكەڤیت و بڤێ رێك و پێكییێ دەركەڤیت، دیسان شیایە ب شارەزاهییا خوە گوهۆڕینەكا مەزن د عەقلیەت و شێوازی فوتبۆلا تیمێ پەیدا بكەت، ئەو تەكتیكا د هەردو یاریێن خوە یێن ڤێ داویێ دا دگەل تیمەكا ژ خوە باشتر وەكو دیرۆك و ناڤ و خودان یاریزانێن باشتر و بهاتر دقارەمانییا كەنداڤی دا، قەبارێ كارتێكرنا وی لسەر ئەنجامێن ئەلهویان، ژبلی هندێ جێوازیا هزرا وی دگەل راهێنەرێن بەرێ دیاركر، زێدەباری وێ باوەریا مەزن ئەوا وی ب شیانێن خوە هەی ژبۆ دەركەڤتنێ دهەر رەوش و دیدارێن مەزن دا، ب بلندكرنا زاخ و مورالا یاریزانێن خوە و پەیداكرنا باوەریێ لدەف وان، زێدەباری گیانێ شەركرنێ و خواندنا یاریان هەتا فیركا دادڤانێ یاریێ مەزنییا ڤی راهێنەری دیار دكەت، بەلكە ژی لسەر ڤێ چەندێ ئەو جوداهییا د ئاستێ هژمارەكا یاریزانێن مە یێن خومالی پەیداكرین، ئەكەر تو بەروارد بكەین دگەل ئاستێ وان ل دەستپێكا خولێ، ژبلی وێ  پەیوەندی و نێزیكبوونا وی یا باش دگەل كارگێریا یانەیێ و سەرپەرشتێن تیمێ و هەتا جەماوەرێ یانەیێ، راستە رێك و پلانێن هەر راهێنەرەكی دجێوازن، لێ ئەوا من تێبینی كری لسەر پلانێن تەكتیكی یێن ڕاهێنەرێ یانەیا دهۆك بۆ سەركەڤتنێ ئەوە، كونترۆلكرنە لسەر كلیلێن یاریێ یێن تیما بەرامبەر، پاشی بزاڤكرن بۆ گەهشتنێ لسەر گۆلا تیما هەڤڕك ب شێوەیەكێ گونجای برێكا هەموو ئەندامێن تیمێ، برەئیا من ئەڤە باشترین شێوازە تۆ ب هێمنی و ب كێمتر شیان بگەهیە گۆلێ، هەردەم بڤێ رێكێ دەلیڤە و گۆلان تۆماربكەی، ژبەر ڤێ چەندێ ئەز دبینم هەلبژارتنا ڤێ راهێنەرێ سەرباری وان تێبینی و گومانێن بەری دەستپێكرنا خولا ڤی وەرزی و چەند حەفتیێن پشتی دەستپێكرنێ، شیایە شوون تبلێن خوە لسەر ئاستێ تیمێ دیاربكەت، و بێژیتە هەموو رەخنەگران كو مرۆڤێ ئازا ئەوە یێ كو باوەری بخوە هەبیت و نەترسیت، گوهێ خوە نەدەتە ئەو دهێتە گوتن، ئەگەر تو جارەكێ ب هلنگڤی ژی یان ب كەڤی، هەر ئەڤ سالوخەتە نە یێ كو پێدڤینە لدەڤ راهێنەرێن مەزن هەبن.

ئیحسان حەسەن

پشتی چەند دەمژمێرێن دی نوونەرا ئیراقێ و كوردستانێ ئەلهویێن چیا دێ یاریا خوە یا دویێ یا چارەنڤیسی دگەل مێڤانا خوە ئیتفاق یا سعودی ژقۆناغا پێش داوییا خولا قارەمانێن یانەیێن كەنداڤی لیاریگەها خوە كەت، دیارە لسەر كاغەزێ دەلیڤەیا دهۆكێ مەزنترە ب گەهشتنێ بۆ فینالێ، پشتی شیایی د دیدارا ئێكێ دا دناڤا یاریگەها تیما مێڤان دا سەركەڤتنێ ب گۆلەكێ بێ بەرامبەر بینیت، دهۆكێ دو دەلیڤە لبەر دەست هەنە ژبۆ گەهشتن ب ئارمانجا خوە ئەوژی سەركەڤتنا خوە دوبارەبكەت یان وەكهەڤ دەركەڤیت، بەروڤاژی یانەیا سعودی تنێ ئێك هیڤی هەیە ئەوژی  سەركەڤتنە ب پتر ژ گۆلەكێ، ئەز باوەرم ب گورەیێ شارەزاهی و سەربۆرا كادرێ راهێنانێ یێ یانەیا دهۆك، هەر یارییەكێ سیناریو و رەوشا خوە یا تایبەت هەیە، كەس نەشێت پێشوەخت ڤێ‌ بێژیت كو ئەم دیاریا ئێكێ دا ب سەركەڤتین دێ شێن سەركەڤتنا خوە دوبارەكەین، ژبەركو ئەو باش دزانن تیما بەرامبەر ژی دێ هێتە دڤێ یاریێدا بۆ قەرەبوویا خوسارەتییا یاریا خوە یا ئێكێ بكەت، ژبەر هندێ ئەركێ دهۆكییان بساناهی نابیت، هەروەسا دزانن كا دێ ب چ شێوازێ گونجای رەفتارێ دگەل ڤێ رەوشێ كەت، ئەگەر ئەم بزانین چەكێ ژهەمیا مەزنتر ددەستێ ئەلهۆیێن چیادا جەماوەرێ وێ یێ دلسوزە، كو پێدڤییە هەموو پێرابوونێن كارگێری بۆ ساناهیكرنا هاتنا پشتەڤانان بۆ ناڤا یاریگەهێ پێشوەخت بهێنەكرن، یا دیتر باوەری دان ب شیانێن خوە ب تایبەت د رەوشێن بزحمەت دا ئەڤچەند ب كریار ددیدارا خوە یا ئێكێدا سەلماندن، ئەگەر دهۆكێ بڤێت بگەهیتە خەونا خوە پێدڤییە تنێ هزرێ د سەركەڤتنێ دا بكەت، خوە دووربێخن ژ گڤاشتنێن دەرونی و دەلیڤەیا دناڤبەرا سەركەڤتنێ و وەكهەڤییێ دا، ژبەركو دیرۆكێ گەلەك جاران نیشامەدایە خودانێ ئێك دەلیڤە شیایە سەركەڤتنێ لسەر خودانا دو دەلیڤەیان بینیت، لەوما پێدڤییە راهێنەرێ تیمێ مەسعود میرال پلانا خوە بۆ سەركەڤتنێ بدانیت و هزرا وەكهەڤییێ ژمێشكێ یاریزانێن خوە بینتە دەر، ئەڤچەندە دێ ژپێكهاتییێ وێ یێ سەرەكی دیاربیت، ژبەركو ب تەكتیكا بەرەڤانییێ دێ مەرەمێن وی بۆ ستێرێن تیمێ دیاربن و ئەڤە دێ بیتە مەترسییەكا مەزن لسەر تیمێ، ژبەركو زڤرین نوت خولەكان بۆ دەڤەرا خوە دبیت وەكهەڤی ژی بدەستڤە نەهێت، چونكو ئەڤرۆ یاریا مان و نەمانێ یە و شاشی ئانكو دەركەڤتن ژ قارەمانییێ هەتا ئەگەر تە دو دەلیڤەژی هەبن، پێدڤییە ئەم ئەنجامی لسەر تیما خوە گران نەكەین، هەردەم وی هەستی لدەڤ پەیدابكەین كو ئەم ژی یێن دگەل وان دناڤا مەیدانێ دا، ڤێجا ئەگەر ئەنجام یێ چەوا بیت پێدڤییە ب گیانەكێ وەرزشی قەبوولكرن، وینەكێ جوان یێ باژێرێ خوە نیشا جیهانێ بدەین، ب هیڤیا هندێ ئەلهویێن مە بشێن دڤێ دیدارا ئاگرین و ڤەكری دا ب سەرفەرازی بۆ فینالێ بفرن.

ئیحسان حەسەن

سوبەهی ئەلهویێن چیا دێ كەڤنە د تاقیكرنەكا گرنگ و دیرۆكی دا، دەمێ یاریا خوە یا ئێكێ ژ قۆناغا پێش داوییا قارەمانییا كەنداڤی یا فوتبۆلێ دگەل مێڤاندارا خوە یانەیا ئیتفاق یا سعودی ل دەمام دكەت، دیارە رەوشا یانەیا سعودیێ خودانێن ئەردو و جەماوەری وەكو دخولا كۆمان دا ژ هەموو تیمێن قارەمانییێ باشتر بوویە، بەرامبەری وێ یانەیا دهۆك وەكو ئێكەمین یانەیا ئیراقی شیا دئێكەمین پشكدارییا خوە دا پلێتا دەربازبوونێ بۆ ڤێ قۆناغێ ببیتە خودانا رێزا دویێ د كۆما ئێكێ‌ دا، دهۆك باش دزانیت ئەركێ وێ ب ساناهی نابیت ژبەركو وەكو لوژیك، دیرۆك، سەربۆر، ناسناڤ، هێزا خولێ و یاریزان بەرەڤانییێ ژ ناڤێ یانەیێ دكەن، بهایێ وان یێ ماركتینكێ رەنگە تیما وان پێنگاڤەكێ پێشتر بیت ژوان، لێ ئەڤە وێ چەندێ نا گەهینیت كو ئەلهۆیێن چیا نەشێت سنۆرەكی بۆ هیڤیێن وان بدانیت، یا پێدڤییە بەرێ خوە نەدەتە ئەوا دهێتە گوتن و نڤێسین لسەر جهێ هەڤركا وێ، دیسان پلەداریا خولا وان یا دەولەتی، ژبەركو فوتبۆلێ هوسا نیشامەدایە گرنك ئەوە تۆ دشێی چ دناڤا مەیدانا یاریێدا پێشكێش بكەی، بدرێژاهییا خولەكێن یاریێ چ نیشاندەی، بێ نەڤێت پلانا راهێنەرێ تیمێ مەسعود میرال دێ یا كاریگەر و ڤەبر بیت، ئەڤچەندە دێ پتر دیار بیت دەمێ پێكهاتییێ خوە یێ تەكتیكی دیاردكەت، ئەگەر پلانا بەرەڤانییێ بیت و هزرا وەكهەڤییێ بهێتە دیاریێدا، دێ بیتە مەترسییەكا مەزن لسەر تیما وی بدرێژاهییا نوت خولەكێن یاریێ، بێ گۆمان نە سەركەڤتن دهێت دبیت وەكهەڤی ژی نەهێت، پێدڤییە لسەر هەڤسەنگییەكێ دتیما خوەدا دروست بكەت، ژبلی هندێ رۆلێ ستێرین تیمێ ژی تایبەت كاپتنێ تیمێ بۆ كونتر ۆلا شێوازێ یاریێ و بەلاڤكرنا شیانێن جەستەی و دووركەڤتن ژ شاشیان دێ دیار بیت، ژبەركو هەر شاشیەك دێ‌ ب گرانی لسەر تیمێ راوەستیت، چونكو هێزا تیمان مێڤان وەكو من دۆڤچوونا یاریێن وان یێن ڤێ داویێ دگەل یانەیێن نەسر و تەعاون دخولا سعودیێ ب سەركێشییا راهێنەرێ خوە یێ نوو سەعەد ئەلشەهری كرین، كونترۆلكرنا وانە لسەر هێلا ناڤین و پشت بەستن لسەر تەكان، دگەلدا پاراستن دەڤەرا پشتێ و پەیداكرنا دەلیڤەیێن هێرشبرنێ یە و مفا وەرگرتن ژ شارەزاهی و سەربۆرا یاریزانێن خوە، ئانكو ب پلانا 3-5-2یاریێ دكەن، لەوما ئەز پێشبینیا یاریەكا مان و نەمانێ دكەم، ئارمانجا خودانێن ئەردی دێ ئەوبیت ئەنجامێ یاریا ئێكێ لیاریگەها خوە ئێكلابكەن، چونكو دجیهانا فوتبۆلێ دا جوداهییا لسەر كاغەزێ نابیتە پیڤەر بۆ پێشكەڤتنا تیمەكێ لسەر یا دی، بەلكو جوداهی ب پێن یاریزانان دهێنە پێش، ئەز هەست دكەم و من باوەری ب ئەلهویێن مە و دەستەكا راهێنانێ هەیە كو دێ شێن بۆ پشتەڤان و حەژێكەرێن خوە لسەرانسەری پارێزگەهێ و كوردستانێ ئەوا پێدڤی دڤێ دیدارا ئاگرین دا بجه ئینن.

ئیحسان حەسەن

دڤان رۆژێن بوریدا وەكو دیار و بەرچاڤ پشتەڤانێن فوتبۆلا یانەیا زاخۆ یێن بووینە ترێندا سوشیال میدیایێ نە تنێ لسەر ئاستێ كوردستانێ و ئیراقێ، بەلكو لسەر ئاستێ وەلاتێن دەرڤە ژی، بێ گۆمان ئەڤچەندە ژ ڤالاتییێ نەهاتیە بەلكو ژ ئەنجامێ حەژێكرن و ڤیانا وان یا بێ سنۆر بۆ تیما باژێرێ خوە، دیسان ئامادەبوونا وان یا كاریگەر دهەموو یاریێن یانەیا خوە دا چ ئەوێن دناڤا یاریگەهان واندا دهێنە كرن یان لدەرڤە، ژبلی وێ تێگەهشتنێ و بەردەوامییێ ئەوا دناڤبەرا كارگێریا یانەیێ و پشتەڤانێن خوەدا هەی، بدەستڤەئینانا ناسناڤێ باشترین پشتەڤان دخولا ستێرێن ئیراقێ دا تا نها لڤی وەرزی بەلگەیێ وەفاداریا وانە بۆ یانەیا خوە ئەوا دخوشترین دەمێن خوەدا دبوریت نها لسەر ئەنجامێ وی ئاستێ مەزن و بهێز لسەرێ لیستەیا خولێ دهێت، چونكو پشتەڤانێن زاخۆ بەرێ خوە ددەنە زاخۆ پتر ژ یانەیەكێ، ئەڤچەندە یا دیارە ژ عەشقا وان بۆ ناڤێ باژێرێ زاخۆ و گرێدانا وان ب ئاخ و كەلتور و رەوشەنبیریا خوە، چونكو خەلاتێ باشترین جەماوەرێ نموونە پشت بەستنێ لسەر ئامادەبوونا پشتەڤانان یا بەرفرەه بدرێژاهییا یاریێن وان دناڤا یاریگەها واندا چ یێن فەرمی یان ژی هەڤالینی، دیسان هاندانا یاریزانان دهەموو رەوشان دا چ یێن باش و چ یێن خراب، هەروەسا حەژێكرنا وان بۆ پیشەكاریێ و هاندانا تیمێ بدرێژاهییا یاریێ بێ راوەستیان، هەروەسا پشتەڤانیا تیمێ ددۆراندنێ دا بەری سەركەڤتنێ، دیسان گرێدانا وان یا رێكخستی دگەل یانەیێن هەڤرك و كونترۆلكرن لسەر خوە دهەموو رەوشاندا و رێزگرتنا تیما هەڤرك و نیشاندانا رەوشت و تیتالێن پاقژ دكەت، ئەڤ خالە هەموو لدەڤ پشتەڤانێن زاخۆ هەنە، دگەل باوەریا مە كو جەماوەر پشكەكا هەرا سەرەكی یە ژ خوشییا فوتبۆلێ ئەوا بێ پشتەڤان چ بهایێ خوە نینە، ژبەركو جەماوەر ئەوە یێ كو مورالا یاریزانێن خوە بلند دكەت داكو باشترین ئاست نیشان بدەن، كەیفا حەزژێكەرێن خوە بینن، فەرە دناڤا ڤان هەموو كاودانێن پری ئاشتی و ئازادی دا ئەم برێكا وەرزش و وەرزشڤانان و حەزژێكەرێن وەرزشی دگەل بدەستڤەبرنا ئەنجام و دەستكەڤتێن یاریان، هاریكار بین بۆ بدەستڤەئینانا ئارمانجێن خوە یێن نەتەوەیی، هەر دێ مینیت ئەو دروشمێ پشتەڤانێن زاخۆ لڤێ داویێ بلندكری 2+2=1ب رامانا هندێ ئەم هەر چار پارچە ئێكین چ جوداهی دناڤبەرا تیمێن كوردستانێ نینە، ئەم ئێك مللەت و نەتەوەینە و ئێك ئارمانج و چارەنڤیس هەیە، ترێندا هەرە بوهادار یا پشتەڤانێن كورێن خابوری دخولا ڤی وەرزی دا، ئەوێن سەلماندین كو كوردینی ب وەرزشێ ژی دهێتە كرن، دێ بنە هاریكار دگەل سەركردایەتییا خوە بۆ بجهئینانا خەونا مەزنا مللەتێ كورد و هەر ئەڤە یە ئارمانجا ژ هەموویان بهاتر.

ئیحسان حەسەن

یێ كو فوتبۆل كری و دۆیڤچوونا روودانێن وێ دكەت، باش دزانیت كو سەركەڤتن بارا پتر بۆ وان تیمان دچیت ئەوێن ژهەژی سەركەڤتنێ، ئەو ئەنجامێن یانەیێن وەرزشی ل مەیدانێن جودا تۆماركرن ژ ئاشوب و چیرۆكێن لسەر جادەیان و پەلوكێن یاریگەهان ناهێنە پێش، بەلكو ژئەنجامێ پلانێن زانستی و خواندنا دورست و شیان و ماندیبوونا و شەركرنا تیمان بۆ بدەستڤەبرنا خالان دیاردبن، ئانكو فوتبۆل ب شێوەیەكێ گشتی یاریەكا لوژیكییە و ئەنجام ب پێن یاریزانان و ناڤا یاریگەهێ دا دهێنە تۆماركرن، نەك ب هیڤی و خەونان، ئەڤجا دەمێن تیمێن كوردستانێ یێن پشكدار دخولا ستێرێن ئیراقێ دا خالان ژدەرڤەی یاریگەها خوە یان دناڤا جەماوەرێ خوەدا ژدەستدەن، دێ گەلەك یا بزحمەت بیت تۆ بەحسێ ناسناڤێ خولێ بكەی، هەرچەندە چ تشت ئەستەم نینە، لێ دڤێت تۆ خوە رازی بكەی كو تە كێماسی دناڤا تیمێ دا یێن هەین، ژبەركو هەر كەسەك دزانیت ئەو تیما ناسناڤی دبەت، پێدڤییە لسەر سەركەڤتنێ دهەردو مەیدانان دا بدەستڤە بینیت، نە تنێ لیاریگەها خوە، ژبەركو خالێن دناڤا پشتەڤانێن تە دا تێرا هندێ ناكەن بگەهیە ئارمانجا خوە، ئەز باوەرناكەم تیمەكا جیهانی هەبیت تنێ ب سەركەڤتنێن یاریگەها خوە گەهشتبیتە ناسناڤێ خولێ، لەوما پشتی بورینا 20 گەران دڤێت رێزێ ل هەر تیمەكێ بگری ئەوا تۆ یاریێ دگەل ئەنجامددەی، دڤێت تیمێن مە بزانن ب تایبەتی دقۆناغا دویێدا شەرێ خالان دێ گەلەك بزحمەتر بیت ب تایبەت دگەل وان یانەیان یێن هەڤركییێ لسەر ناسناڤی دكەن، دیسان ئەو یانەیێن بزاڤێن مانا خوە دخولێدا دكەن، پێدڤییە یانەیێن مە یێن كوردستانێ هزرەكا مەزن بۆ بكەن و چ جاران بەرێ خوە نە دەنە ئەنجامێن وان یێن بوری یان دووماهیك یاریا وان، هەردەم وان وەكو تیمەكا هەڤرك بدانن، ژبلی هندێ سەرپەرشتێن تیمان دیسان راهێنەرێن یانەیان ل پێش وەخت لدویڤ حەزێن جەماوەری ب داخویانێن خوە لدۆر ئەنجامێ یاریان نەچن، بزانن كا تیما هەوە د چ رەوش دایە و كێماسیێن وان چنە، خواندنەكا دروست بۆ هەڤركا خوە بكەن، زێدە یاریزانێن خوە نە ئێخنە لبن گڤاشتنێ ژبەركو دێ كارتێكرنێ ل ئاستێ وان كەت، هندەك جاران داخوازكرنا سەركەڤتنا پێشوەخت ژتیمێ دێ لسەر حسێبا یاریێ و خەلەتیێن تیمێ بیت، چونكو یانەیێن مە هێشتا 18 یاری ماینە، خالێن تیمان ب تایبەت هەشتێن ئێكێ نێزیكی ئێكن، لێكگوهارتنا رێزبەندیان دورنینە چەندین جاران بهێتە پێش، داكو یانەیێن مە بشێن بگەهنە هیڤێن خوە، پێدڤییە بەرێ خوە نەدەنە رێزبەندییا هەڤركێن خوە، بەلكو هزر ل پێشئێخستنا ئاستێ خوەبكەن، كار لسەر كێمكرنا شاشیێن خوە بكەن، ل ئەگەرێن ژدەستدانا خالان بگەرن، ژبەر كو فوتبۆلێ هووسا نیشا مەدایە كو چارەسەری هەردەم دناڤا یاریگەهێ دایە نە لجهەكێ دیتر.

ئیحسان حەسەن

بدەستڤە ئینانا فوتبۆلا یانەیا زاخۆ ناسناڤێ قۆناغا ئێكێ ژخولا ستێرێن ئیراقێ بۆ جارا ئێكێ ددیرۆكا خوە دا، دهێتە هژمارتن ئێك ژ دەستكەڤتێن هەرە مەزن بۆ وەرزشا ئیدارەیا سەربەخویا زاخۆ و پارێزگەها دهۆكێ و هەرێما كوردستانێ، دیارە زاخۆ لڤی وەرزی باشترینێ هەموو تیمێن خولێ بوویە، ژبەر ئاستێ وان یێ نموونە دزوربەی یاریان دا، دیسان تۆماركرنا چەندین ئامارێن دلخوشكەر ئەوێن هەتا نها لسەر ناڤێ خوە تۆماركرین، ژوانا خودانا مەزنترین رێژەیا سەركەڤتنانە ب11 سەركەڤتنان، دیسان شیایە 38 خالان كومبكەت بجوداهییا دوو خالان ژ نێزیكترین هەڤركا خوە یانەیا زەورا، هەر چەندە دشیانە دایە هەر ئێك ژ یانەیێن شورتە هەلگرا ناسناڤێ و یانەیا دهۆك خودانێن رێزێن سێیێ و چوارێ پتر گڤاشتنێ لسەر بكەن و خالان كێمتر لێ بكەن یان وەكهەڤ لیچ بكەن، تنێ جوداهییا گۆلان بهێلێن، ئەگەر شیان دیاریێن خوە یێن پاشخستی دا سەركەڤتنێ تۆماربكەن، ژبلی هندێ زاخۆ خودانا بهێزترین هێلا هێرشبرنێ یە ب 36 گۆلان و جوداهییا 19 گۆلان دبەرژوەندییا وێ دانە، بێ نەڤێت رۆلێ هەر ئێك ژ گۆلكەرێ ڤێ قۆناغێ و خودانێ هاتریكێ دیاریا داویێ دا یێ بەرازیلی كوستافو هێنرێك و هەڤالێ وی بهاترین یاریزانێ تیمێ ئەمجەد عەتوان ددروستكرنا دەلیڤەیان دا هەروەسا دتۆماكرنا گۆلان یێ دیار و بەرچاڤ بوو كو هەردووكان پێكڤە پتر ژنیڤا گۆلێن یانەیا خوە تۆماركرینە، ژبلی هندێ وەكرینە كو زاخۆ بڤێ هێزێ دخولا ڤی وەرزی دا دەركەڤیت، لێ دڤێت ئەم رۆلێ راهێنەرێ تیمێ یێ قەتەری تەلال ئەلبەلوشی، دیسان یاریزانێن تیمێ و كارگێریا یانەیێ، هەروەسا جەماوەرێ دلسۆز ووەفادارێ زاخۆ و سەرپەرشتێن ئیدارا سەربەخویا زاخۆ ژبیر نەكەین ئەوێن هەموو تشتەك بۆ سەركەڤتنا كاروانێ تیما خوە كرین تا كو گەهشتنینە ڤێ پلا سەرفەرازیێ، بەلێ یا من دڤێت ئەز بێژم سەرباری ڤان ئەنجامێن دلخوشكەر و چونكو ناسناڤێ قارەمانێ زڤستانێ یان قوناغا ئێكێ تێرا هندێ ناكەت كو تو ناسناڤێ خولا ڤی وەرزی بدەستڤە بینی، یان بگەهیە هەموو خەونێن خوە، بەلێ ناسناڤێ ڤێ قۆناغێ چەندین خالێن گرنگ بۆ كورێن خابوور هەنە یا ئێكێ، ب وەرگرتنا سەركێشیا خولێ دێ زاخوكەكا مەزن دەتە یاریزان و دەستەكا راهێنانێ و دێ پتر باوەریێ بۆ پەیداكەت كو بشێن هەڤركییێ لسەر ناسناڤی بكەن، یا دویێ دێ بۆ هەموویان دیاردكەت كو تیما وان نها یا درەوشەكا جیگیر یا تەكنیكی و تەكتیكی دا و دشێت ئاستی خوە بدرێژاهییا خولێ پارێزێت ب تایبەت پشتی وان هەڤبەستێن سەركەڤتی یێن كو لڤێ داویێ گرێداین، یا سێیێ دێ پتر گڤاشتنێ لسەر هەڤركێن خوە كەت و دێ وە ل وان كەت هەموو بزاڤان بكەن جوداهییا خالان كێمبكەن، ئەگەر ئەم هۆكارێن هنگاڤتنان و نەخوجهییا ئاستێ تیمان دیسان ڤەگوهاستنان ژێ بینە دەر، دگەل باوەریا مە كو هێشتا گەلەك زوویە ئەم بەحسێ قارەمانێ ڤی وەرزی بكەین، ب كورەی لێكهورینا رێزبەندییان ئەوا مە دگەێن بوریدا دیتی، بەلێ زاخۆ بڤێ دەستكەڤتا خوە یا ژهەژی دشێت ببیت هەڤركەكا هەرا بهێز بۆ بدەستڤە ئینانا ناسناڤی.