ئیحسان حەسەن

دجیهانا وەرزشی یا ڤەكری و پێشكەڤتی دا، پیڤەرێ راستەقینە یێ پێشكەڤتنا وەلاتان ب زانست، پلانێن درێژ خایەن و بدەستڤەئینانا میدالیێن ئۆلمپی و دەولەتی دهێنە پێش، لێ مخابن ئەگەر ئەم كاروانێ وەرزشا ئیراقێ وپاشكۆبوونا وەرزشا كوردستانێ لدۆر ڤێ مژارێ ب هەلسەنگینین دێ بینین كو ئیراق هەموو یا كەڤتیە تەلها مۆدیلەكا بێ پلان یا كارگێری و ئیداری.
پاشكەڤتنا وەرزشا ئیراقێ: درووشمێن ڤالا، بێ پلانی، راستیێن تەحل
نیشانا هەرە دیارا یا ڤێ پاشگەڤتنێ ئەوە كو ئیراقێ ددیرۆكا خوە دا تا نها ئێك میدالییا ئۆلمپی یا فەرمی یا زێری نینە، نە دیاریێن هاڤینی و نە یێن زڤستانێ دا، چ ئەوێن لسەر ئاستێ خولا یاریێن ئاسیا بن، یان ژی د خولا یاریێن ئۆلمپی یێن جیهانێ بیت، بەلگەیێ هەرە مەزنێ ڤێ رەوشێ و پاشكەڤتنێ ئەو ئەنجامێن لاواز بوون ئەوێن دپشكداریا خوە یا ڤێ داویێ دا دخولا یاریێن ئاسیا ل ژاپۆنێ بدەستڤە ئیناین، دەمێ ئیراق ل رێزبەندیا 30ێ لسەر جەمێ 44 وەلاتان هاتی و تنێ 14 وەرزشڤانان ب حەڤت یاریان دا ژ كۆما 43 یاریێن خولێ پشكدار كری، تنێ پێنچ میدالی بدەستڤە ئیناین كو ئێك ژوان یا زێری نە بوو، ئەوژی دسێ یاریان دا هاتن! ئەڤە راستییا تەحل یا دیرۆكا وەرزشا ئیراقێ یا بێ پلان دیار دكەت، وێ چەندێ نیشانددەت كو هەتا نها ئیراق نەشیایە بخوە مفای ژ سەربۆرێن وەلاتێن پێشكەڤتی بینیت و هەتا ئەگەر ئەم براوەرد بكەین دگەل وەلاتێن دەوروبەر ژی وەكو بەحرێن، كوێت، ئیمارات و سعودیێ جوداهییەكا مەزن دناڤبەرا واندا هەیە، كو هندەك ژ ڤان وەلاتان هندی دوو پارێزگەهێن ئیراقێ نینن، بێ نەڤێت سەركەڤتنێن وان ژئەنجامێ ئاڤاكرنا ژێرخانەكا بهێز و گرنگیدان ب یاریێن تاك هاتینە پێش، شیاینە خوە لسەر ئاستێ ئاسیا و جیهانێ ب سەلمینن هەر ب رێژا پشكداریێن خوە، دیسان بدەستڤە ئینانا میدالیێن رەنگین دا، ئەگەر ئەم بەحسێ وەلاتێن وەكو چینێ وچاپان و كوریا باشوور نەكین یێن كو نها گەهشتینە گۆپیتكا پێشكەڤتنێ و هەڤركییێ دگەل مەزنترین وەلاتێن جیهانێ دكەن، ل بەرامبەری ڤێ چەندێ ئیراقێ هەموو سەرنجا خوە ئێخستیە لسەر یاریا فوتبۆلێ، لێ ئەنجامێن وێ دشەرمینن و نە ل ئاستێ هێخوازیێ نە، مخابن ئەڤ بێ پلانیا ئیراقێ كارەساتا خولا ئاسیا كاریگەرییەكا نەخۆش و ترسناك لسەر وەرزشا هەرێما كوردستانێ هەیە، سەرباری هندێ كو كوردستان خودان تایبەتمەندیەكا تایبەتە، بەرپرسێن وەرزشی دزانن كو چەند وەرزشا ئیراقێ یا پاشكەڤتی یە، لێ نە شیاینە سنوەركی بۆ ڤێ كاریگەریێ نێگتیف بدانن، خول و قارەمانی و سیاسەتێن پاشڤەمایی یێن برێڤەبرنێ بووینە پیڤەر بۆ یاریزان و یانەیێن مە ژی، دەمێ دەستهەلاتا وەرزشی ل كوردستانێ رازی دبن بڤێ كانیا لاۆاز، ئەنجام دێ ئەڤە بن یا كو ئەڤرۆ ئەم د وەرزشا هەرێمێ دا ژی دبینین، دەمێ یاریزانەكێ مە چ دیاریەكا تاك دا یان دگەل تیمەكێ لسەر ئەنجامێ پشكداریێ دقارەمانییەكا رۆژ ئاڤا ب رێژەیەكا كێم یا پشكداریێ رێزبەندیا دویێ یان سییێ بدەستڤە بینیت و ب دەستكەڤتێن دیرۆكی ل قەلم ددەن، رامانا وێ ئەوە كو ئەم ژی یێن بووینە پشكەكا سەرەكی ژ شكەستنا وەرزشا ئیراقێ، دیسان یێن بووینە ئێخسیرێن درویشمێن بریقەدار و بێ مفا كو ب چ رەنگان ناگەڤنە دبەرژوەندیا وەرزشا كوردستانێ دا.
وەرزشا كوردستانێ چەوا خوە ژ قەیرانێن هزری و پشكۆبوونا ئیراقێ قورتال كەت
ئەگەر هەرێما كوردستانێ بڤێت بگەهیتە قۆناغەكا پێشكەڤتی و بشێت ببیتە ژێرخانەیا بەرهەمئینانا ستێران و خوە دوور بێخیت ژ وەرزشا بێ پلان، پێدڤی ب شۆرەشەكا هزری، كارگێری و جڤاكی هەیە، یا ژ هەمیا گرنكتر ئەوە دەستهەلاتا وەرزشی و ناڤەندێن بریارێ ل كوردستانێ بگەهنە وێ باوەریێ كو وەرزش نهێنییەكا ئاسان یان بریارەكا دەمكی نینە، بەلكو زانستەكە كو پێدڤی ب پلانەكا درێژخایەن هەبیت بۆ هندێ وەرزشڤانێن هەرێما كوردستانێ بشێن پشكداریا راستەقینە دپێشبركێن دەولەتی، ئاسیا و ئۆلمپی دا بكەن، پێدڤییە دەستبەرداری پشتبەستنێ ب خۆلێن ئیراقێ ب تنێ نەكەت ، هەر نەمینە چاڤلێكرێن دروشمێن وان یێن ڤالا، ئێكەمین پەناگەها گرنك و ستراتیژی بۆ گۆهۆرینێ، ئەو مەزاختنا زێدە و بێ ئارمانج لسەر یاریا فوتبۆلێ بهێتە كێمكرن و گرنگی ب یاریێن تاكە كەسی بهێتە دان، وەكو یاریێن مەیدانێ و یاریێن جەنگی، تەپا مێزێ، تێنسا ئەردی، پایسكلان، مەلەڤانیان و هەتا داویێ، ئەڤە رامانا هندێ نادەت كو پووتە ب یاریێن كوم یێن مایی نەهێتە دان، بەلێ دخولێن ئۆلمپی دا یاریێن تاكو میدالییان دبەرژوەندیێن وەلاتێن خوە ئێكلادكەن، لڤێرە ئەم وەكو هەرێمەك دشێن ب كێمترین بودجە و تەرخانكرنا پلانێن زانستی بۆ تەمەنێن بچووك و قوتابخانەیان، ستێرێن دەولەتی دروست بكەین، دشیان دایە لدەسپێكێ هژمارەكا راهێنەران لدەرڤەی وەلاتی بینن بۆ چێكرنا یاریزانان، مفا وەرگرتن ژ كەسێن بسپور شارەزایێن خودان ئەزمون دناڤا كەرتێ وەرزشی دا، دیسان مامۆستایێن پەروەردەیی، دوورخستنا بریارێن وەرزشێ ژ دەستەواژەیێن سیاسی، یا من دڤێت بێژم دەركەڤتنا كوردستانێ بەرەڤ ئاسۆیێن بلند یێن جیهانی بێ پالپشتییا كۆمپانیێن خودان سەرما و پشت بەستن ب كەرتێ تایبەت نابیت، ژبەر كو حكومەتا هەرێما كوردستانێ تنێ نەشێت هەموو بارێ وەرزشی یێ ژێرخانە، چێكرنا یاریزان و گرێبەستێن وان و برێڤەبرناخول و قارەمانییان راكەت، ئەڤە دێ بیتە باشترین پێنگاڤا دیرۆكی بۆ ئازادكرنا وەرزشێ ژ قەیرانێن دارایی و بێ پلانییێ، ئەگەر ئەم وەكو هەرێم ڤان رێكاران ب ئاراستەیەكێ دروست و ئەكادیمی و بێ زڤرین جێبەجێبكەت، بێ گۆمان دێ شێت ل پاشەرۆژەكا نێزیك دا نەتنێ خوە ژبن سیبەرا شاشی و دروشمێن ڤالا یێن ئیراقێ قورتال دكەت، بەلكو دێ لایەنێ گەش و شارستانی و نەتەوەیی بدەستڤە ئینیت كو ئالایێ كوردستانێ ل بلندترین قارەمانیێن دەولەتی بلند بكەت، دێ بۆ جیهانێ دیاركەت، كو گەنجێن مە خودان شیانێن مەزنن، ئەگەر تنێ ژینگەهەكا زانستی و رێرەوەكا دروست و ساخلەم بۆ بهێتە دانان.

ئیحسان حەسەن

سەركەفتنا یانەیا دهۆك دگەل یانەیا زەورا دخولا ستێرێن ئیراقێ یا فوتبۆلێ دا، تنێ تاقیكرنەكا ئاسایی نەبوو، بەلكو دەرئەنجامێ راستەقینە و زانستی بوو ژ راوەستاندنا ورد لسەر وان خالێن لاواز و كێم وكووریێن كو لدەستپێكا خولێ تیم كەڤتیە تێدا، پشتی تیم ب رووییەكێ نوو دەركەڤتی دەر ئەنجامێ راستەوخوە بۆ وان راستڤەكرنێن توند و ژیرانە دماوەیێ بێهنڤەدانا ڤێ داوییێ دا دشێوازێ تەكتیكی و تەكنیكی دا،خواندنا دروست و پێشكەڤتی بۆ خالێن هێزێ و لاوازیا تیما بەرامبەر، دیسان كارێ پركرنا ڤالاهیێن ناڤەراستا یاریگەهێ و پاراستنا هێلا بەرگیریێ بوو، زێدەباری دەركەڤتنا یاریزانێن خودان ئەزموون و ستێرێن تیمێ لژێر فشارێن دەروونی و ڤەگەریا گیانێ خەباتێ و تێگەهشتنا بلند یا تەكتیكی بوو، دەمێ شیان ب ئاست و ئەنجام ب خالێن یاریێ دگەل ئێك ژ ستوونێن فوتبۆلا ئیراقێ دەركەڤن، تشتێ ژ هەموویان گرنكتر بۆ قۆناغا نها ئەوە كو دهۆك چ بكەت داكو بشێت بەردەوامییێ بڤی ئاستی بدەت و خوە پتر نێزیكی رێزێن پێشییێ بكەت، یا ژهەموویان گرنكتر ئەوە دەستەكا راهێنانێ ب سەركێشیا یەحیا گول محەمەدی بشێن پاراستنا ساقامگیریا پێكهاتییێ تیمێ بكەت و گوهۆرینیێن نە پێدڤی د پێكهاتییێ سەرەكی دا نەكەت، ژبەر كو ئارامییا دناڤا مەیدانا یاریێ دا باشترین گلیلە بۆ سەركەڤتنان و بەردەوامییێ ب ئەنجامێن باش، یا دیتر رێكەكێ بەرامبەر تیمێن خودان سەربۆرێن كێمتر بینیت، ب تایبەتی دوان یاریان دا یێن كو ژ دەرڤەی یاریگەها خوە دكەت، ژبەر كو ئەگەر تە بڤێت هەڤركییێ بكەی، دڤێت سەركەڤتنان ژ دەرڤەی یاریگەها خوە ژی بدەستڤە بینی،ژبلی هندێ پێدڤییە یاریزان ب سەلمینن كو ئاستێ بەرز و سەركەڤتنا دگەل زەورا ب هەروە نەبوو، بەلكو ژ ئەنجامێ نەخشەیەكێ هزری و تەكتیكی بوو،  پێدڤییە دهەر یاریەكێ دا و ل هەر جهەكی بهێتە پەیروكرن، هەروەسا پشتەڤانێن دلسۆزێن تیمێ پتر خوە نێزیكی یاریزان بكەن و زاخا وان بلند بكەن، وەكو هەر جار ببنە یاریزانێن ژمارە دوازدە دناڤا یاریگەهێ دا، یا ژ هەموویان گرنكتر كارگێریا یانەیێ ب هەر رێكەكا هەبیت چارەسەریەكا بنەرەت بۆ پشتەڤانییا دارایی یا تیمێ ببینن، ژبەر كو دناڤا هەڤركییان دا نابیت ژبلی هزركرنێ دپلانێن یاریاندا هزرا یاریزانان بكەڤیتە لسەر چ بابەتێن دی، ل دویماهییێ یا من دڤێت بێژم كو یاریێن بهێت یێن ئەلهویێن چیا دگەل وان هەموو تێبینییان یێن كو بۆ مە لسەر ئاستێ خولێ بدرێژاهییا هەر نەه گەرێن بوری هەین، هەر ژ رێكخستنا خولێ بگرە، تا دگەهیتە ئاستێ دادڤانێن یاریان و ئەنجامێن نەچاڤەرێكری ئەوێن هەتا نها پەیدابووین، دێ دڤەبر بن بۆ  چاڤدێر و رەخنەگر وحەژێكەرێن خوە دیاربكەن كو دشیانێن واندا هەیە جارەكادی ببنە هەڤركیێن بهێز بۆ خولا ڤی وەرزی، ژبەر كو دهۆك تیمەكا ئاسایی نینە، دڤێت هزرەكا باشتر بۆ بهێتە كرن، لەوما دڤێت ئەم چاڤەرێ بین.

ئیحسان حەسەن

یێ كو چاڤدێریا خول و قارەمانیێن جودا یێن تیمێن ئیراقێ لسەر ئاستێ نافخو و دەرڤە دكەن، پتر ژ تێبینیەكێ  وپرسیارێن كوور لدەڤ پەیدادبن، نە تنێ ژبەر ئاستێ تەكتیكی و تەكنیكی یێ یاریێن وان، بەلكو ژبەر وان رەفتارێن كومێنتار و شرۆڤەكارێن یاریان دكەن، ئەوژی بكار ئینانا وان پەیڤێن دوور ژ رەوشت و گیانێ وەرزشی كو نابیت ب چ رەنگان بهێنە گوتن، ب تایبەت دەمێ تیما وان یا فوتبۆلێ ئەنجامەكێ نەباش بدەستخوڤە بینیت، ئێكسەر شاشە و گوتنێن وان دبنە پەناگەهەك بۆ بریارێن توند و ب ئاشكرایی داخوازا دوور خستنا یاریزان و راهێنەران دكەن، ب سۆزداریا خوە پێلا پشتەڤانێن تۆرە دژی دەستەكێن برێڤەبرنا وان تیمان بەرفرهتر لێ دكەن ڤێجا چ یانە بن یان ژی هەلبژارتی بن، ئەڤ دیاردا خراب نەتنێ شرۆڤەكارێن ل پشت پەردەیێن بەرنامەیان دیاردبن، بەلكو كومێنتارێن  یاریان ژی ب خوە رووبەرەكێ مەزن ژ بێلایەنییا كارێ خوە ددەنە لایەكی و دبنە پشكەك ژ جەمسەریا دەڤەرداریێ، گەلەك جاران ئەم دبینین دەمێ یاریزانەكێ باژێرێ وان شاشیەكێ یان پاسەكا خەلەت ددەت، كۆمێنتار نە هەر رەخنێ لێ ناگریت، بەلكو ب شێوەیەكێ سۆزداری پەسنا وی دكەت، ئەگەر تیما وەلاتی یان باژێرێ وی ب ئەنجامەكێ نەباش ئینا، هەر ئێكسەر دێ رەخنەیێن تۆند ئاراستەی دەستەكا راهێنانێ كەن، بێ كو  ئەگەرێن زانستی دیاربكەن، بەلكو تنێ بۆ رازیكرنا هندەك گرۆپێن لسەر تۆرێن جڤاكی دەست ب گۆتنێن تۆند دكەن و پال ددەن بۆ ژ ناڤبرنا كومەكا كارێن كارگێری، بێ گۆمان ئەڤە ژی هۆكارەكێ سەرەكی یە كو وەرزشا ئیراقێ هەردەم دقەیرانان دا بمینیت و چ جاران نەگەهیتە ئارامیا تەكنیكی، ئەگەر ئەم بزانین كو پەیاما راگەهاندنا وەرزشی دڤێت  یا راستگویی بیت و دوور بیت ژ هەموو لایەنگریەكێ، ئەوا نوكە لسەر شاشەیێن مە رووددەت بەروڤاژییا راستییە، چونكو ڤەگوهاستنا هشیارییا جەماوەری بۆ ئاستێ سۆزێن دەڤەرداری زەرەرەكا مەزن ل هزرو پێگەهشتنا نەڤێن نوو دكەت، بنەمایێ سەرەكی یێ وەرزشێ پێگیرییە ب رێسایان و دانپێدان ب شیانێن هەڤركییا پاقژە، لەوما دەمێ راگەهاندنا وەرزشی ژ ئاراستەیا خوە یا پەروەردەیی و زانستی دەردكەڤیت و دبیتە پرەك بۆ پەرپێدانا عەقلیەتەكا پاشكەڤتا لایەنگیریێ، ئەم ژ ژینگەهەكا تەندروست بۆ پێشكەڤتنا بریارێن مەزن دوور دكەڤین، یا من دڤێت بێژم راستگویا میدیایا وەرزشی فەرمانەكا نەگوورە و پێدڤییە لسەر ئاستێ ئەكادیمی و كارگێری سنۆرەك بۆ ڤێ رەوشێ بهێتە دانان و پێداچوونەكا رژد دناڤ مەرجێن پێشكێشكرنا مژارێن وەرزشی بهێتە كرن، لەوما پێدڤییە  كومێنتار و شرۆڤەكارێن كوردستانێ ئەگەر هندەك ژوان لدووڤ رێباز و شاشیێن دەڤەرێن دی یێن ئیراقێ بچن، یان داخباربن ب وان، ب تنێ پشت ب پرەنسیپ و رەوشتێ رۆژنامەڤانی یێ پرۆفیشنال بكەن و خوە ژ تێكەلكرنا بریارێن سۆزداری و لایەنگیریێن دەڤەرداری و ئاخڤتنێن نەشرین دوور بێخن، داكو پەیاما وان ببیتە بناغەیەكێ ئاڤاكەر بۆ هۆشیاریا جەماوەری و بلندكرنا ئاستێ وەرزشا مە لسەر بنەمایێن زانستی و تەكنیكی یێن دروست.

ئیحسان حەسەن
دگەل دەستپێكرنا سالا نوو یا خواندنێ ل هەرێما كوردستانێ، ڤەكرنا دەرگەهێن قوتابخانەیان، ئەم جارەكا دی رووبرووی راستییەكا زوور یا تەحل دبین، ئەوژی وەرزشا قۆتابخانەیا نە كو نەتنێ پاشكەڤتن بخوەڤە گرتییە، بەلكو بوویە قوربانییا كێمترخەمییێن ستراتیژی، د دەمەكی دا كو ل وەلاتێن پێشكەڤتی باشترین پیڤەر بۆ هەلسەنگاندنا وەرزشا هەر وەلاتەكی وەرزشا قوتابخانەیانە، لەوما لدەستپێكا سالا نوو یا خواندنێ مەترسییا هەرە مەزن ئەوە كو دەمژمێرێن وەرزشێ ل قوتابخانەیان ب تمامی هاتینە كێمكرن ، كو ل شوونا دوو تا سێ وانەیان دحەفتییەكێ دا هەبن، تنێ ئێك بۆ پەروەردەكرنا لەشی هێلایە، د دەمەكی دا ئەم ل هیڤیا هندێ بوون كووەزارەتا پەروەردێ ئەڤێ دەمژمێرا بێ مفا و كێم زێدەتر لێ بكەت، ژبەر كو ب چ رەنگان بۆ پشكنین ، بزاڤ ، پێگەهاندن و دیتنا شیانێن قوتابیان نا گونجیت، ئەگەر ئەم بزانین كو ئەو دەمژمێر ژی گەلەك جاران ل هندەك قوتابخانەیان ناهێتە كرن و دهێنە گوهارتن ب وانەیێن زانستی و بیركاریێ یان هەر بابەتەكێ دی، ژبلی هندێ نەبوونا ژێرخانەیا وەرزشی دناڤا قوتابخانەیان دا و كێمبوونا گەرستەیێن وەرزشی و نە سەخبیركرنا گورەپانێن قوتابخانەیان و نەبوونا بودجەیێ بۆ رێڤەبرنا چالاكیێن نافخویی ئاریشەیەكا دی یە، ئەگەر ئەم كێشەیا كێماتییا مامۆستایێن بسپۆر ژبیر نەكەین، ب تایبەت ل پەروەردەیێن قەزایان، كو سالانە ب سەدان دەرچویێن زیرەك و خودان شیان ژ كولیژ و پەیمانگەهێن وەرزشی دەردكەڤن لێ ژبەر راوەستاندنا دامەزراندنێ بێ بەهربووینە، لێ دناڤا ڤێ رەوشێ دا و گەرمییا دەستپێكرنا سالا نوو، پێدڤییە ئەم تیشكا هەر مەزن بداینە لسەر رۆلێ سەرەكی وبێ وێنە یێ خێزانێ و رێڤەبەریێن قوتابخانەیان و مامۆستایێن وەرزشی، ژبەركو دەمێ خێزان دگەل كرینا پێدڤیێن خواندنێ گرنگییێ ب ئارەزوویێن زارۆكێن خوە و چالاكیێن وان یێن وەرزشی ددەن، دێ بنە هاریكاركو ئیرادا وان بۆ سەركەڤتنێ دمەیدانا خواندنێ، دیسان وەرزشێ دا بهێزتر لێ بهێت، ژلایەكێ دیڤە دەمێ رێڤەبەرێ قۆتابخانەیێ رێگریێ ل گوهۆرینا وانەیا وەرزشی دگریت، هەر چەند یا كێم ژی بیت، دێ ژینگەهەكا گونجای بۆ چالاكیێن نافخویی دروست كەت و دێ وەكەت كو قوتابی پتر بهێنە گرێدان و حەژ قوتابخانەیێ بكەت، هەروەسا مامۆستایێ وەرزشی ژی ئەگەر چەند رووبرووی رەوشەكا گران ببیت، لێ دشێت ب دلسۆزیا خوە ببیتە پرەكا راستەقینە دناڤبەرا دیاكرنا بەهرەمەندان و دروستكرنا تیمێن قوتابخانەیێ دسالا نوو دا، ژبۆ ئامادەكرنێ و پشكداریێ دوان چالاكییان دا یێن كو دهێنە كرن لسەر ئاستێ قوتابخانەیان، یا من دڤێت بێژم، چونكو سەرۆكانیا راست و دروستا وەرزشێ ل قوتابخانەیان دەسپێدكەت، ئەگەر خێزان، رێڤەبەرێن قوتابخانەیان، مامۆستایێن وەرزشی، دەستهەلاتا پەروەردێ دەستێن خوە نە كەنە تێكدا، دەستپێكا سالا نوو تنێ دووبارەكرنا قەیرانان بیت، ئەگەر مە پلانەكا ستراتیژی و زانستی نەبیت و كار لسەر نەهێلانا كێم و كاسیان نەهێتە كرن، ئێدی تشتەك نامینیت بناڤێ وەرزشا قوتابخانەیان، بەلێ دڤێت ئەم بزانین كو ئەو وەلاتێن بێ وەرزشا قوتابخانەیان وەلاتەكێ بێ پاشەرۆژە ل مەیدانێن جیهانی دا.

ئیحسان حەسەن

د خولا ستێرێن ئیراقێ یا فوتبۆلێ دا، تۆماركرنا ئێك سەركەڤتن بتنێ ژ هەشت یاریان بەرامبەر شەش وەكهەڤییان و دۆراندنەكێ، ئەنجامەكێ نە پێشبینیكریە بۆ یانەیەكا مەزن وەكو یانەیا دهۆكێ یا خودان مەزنترین جەماوەرێ دلسۆز، دیسان خودان هیڤی و ئارمانج دخولا ڤی وەرزی دا، ئەڤ نزمبوونا ئاستێ تیمێ نیشانا قەیرانەكا كوور دناڤا پێكهاتییێ تەكنیكی یێ تیمێ دیاردكەت، دەرئەنجامێ راستەوخوە یا كێمتر خەمی و خەمساریا سێ قولییە كو ئەڤرۆ ئەلهویێن چیا ژ هەڤركییا پێشەنگا خولێ دوور ئێخستی، یا ئێكێ بەرپرسیارەتییا كارگێریا یانەیا دهۆكێ یە، ئەوا نەشیای بەرچاڤ روونیەكا دیار و پلانەكا درێژخایەن بۆ ئەڤی وەرزی دارێژیت، هەر ژ گرێدانا گرێبەستان دگەل یاریزانین خودان شیان و سەربۆر لدووڤ پێدڤیێن تیمێ، دیسان دەستەكەكا راهێنانێ یا كو هەتا نها نەشیای خوە دگەل خولا ئیراقێ ب گونجینیت، بێ دەنگی یان درەنگ بریاردان هەلبژارتی، بێ كو پێنگاڤێن ڕژدی و كاریگەر بۆ راستڤەكرنا رێرەوا تیمێ پاڤێژیت، یا دویێ لاوازیا بریاردانا تەكنیكی یا راهێنەرێ تیمێ گولمحەمەدی ئەگەرەكی سەرەكی یێ ڤان ئەنجامێن خرابە، تۆماركرنا ئیك سەركەڤتن ب تنێ بەلگەیە راهێنەری نەشیایە شێوازەكێ تەكتیكی یێ ژێرانە و نەخشەیەكێ سەركەڤتی بۆ تیمێ بدانیت، ژبلی هندێ خاندنا وی بۆ تیمێن هەڤرك نە ل ئاستێ پێدڤییە، هەروەسا گوهۆڕینێن ئەو دكەت ب تایبەت دنیڤا دویێ دا كێشەیێن دیاربۆ تیمێ دروست دكەت، ڕاهێنەرەكە نەشیایە مفای وەكو پێدڤی ژ یاریگەه و دناڤا جەماوەرێ خوە دا بینیت، ئانكو نەشیایە شیانێن خوە بێخیتە دخزمەتا ئارمانجێن مەزنێن یانەیا دهۆكێ دا، یا سێیێ یاریزان بخوەنە سەرباری هەر كێماسیەكا كارگێری و لاوازیا تەكتیكی، یاریزانێن خودان ئەزموون دڤێت بەرپرسیارتیەكا مەزنتر هەلبگرن، ژبەر كو ئەڤ یاریزانە ئەوێن لژێر دریس و لوگۆیێ یانەیا دهۆكێ یاریێ دكەن، بەرسڤا هەست و جوش و خروشا هزارەهان هەندەران دكەن، لێ مخابن نزمبوونا گیانێ هەڤركیێ و سەركەڤتنێ خەمساریا وان بوویە ئاریشە ژبەر كو نەشیایە وەكو پێدڤی بەرەڤانییێ ژناڤێ یانەیێ بكەن، چونكو خول ژبەر نێزیكبوونا دەستپێكرنا كوپا كەنداڤی دێ هێتە راوەستاندن دەلیڤەكا زێرینە بۆ یانەیا دهۆك كو ناڤ مالییا خوە رێكبێخیت، ڤان پێنگاڤان پاڤێژیت یا ژهەمیا گرنكتر ئەگەر دەستەكا راهێنانێ نەشێت پلانەكا ئاشكرا بۆ باشكرنا ئەنجامان پێشكێش بكەت، دڤێت كارگێری بریارێ لسەر گوهۆڕینا ستافی بدەت، ژبلی هندێ پێدڤییە ستافێ راهێنانێ شرۆڤەكا تێروتەسل لسەرئاستێ تیمێ دهەشت یاریێن بوری دا بكەت، ئەگەران دیاربكەت و رێكێن چارەسەریێ بۆ بینیت، دیسان پیًدڤییە كەمپەكێ راهێنانێ یێ كورت بدانیت و چەندین یاریێن هەڤالینی ئەنجامبدەت، دڤان یاریان دا ئەو جهێن كو تێدا تیم یا لاواز ب تەكتیك و یاریزانێن باشتر پر بكەت، ژبلی هندێ كار لسەر لایەنێ دەرونی یێ یاریزانان بكەت كو بهێزەكا نوو بزڤرنە دناڤا یاریگەهێ دا، یا من دڤێت بێژم راوەستاندنا خولێ نیشانا دووماهی هاتنا مەترسیان نینە، بەلكو زەنگا هۆشداریا دووماهییێ یە ئەگەر كارگێری، راهێنەر و یاریزان ڤی دەمی بۆ راستڤەكرنا شاشیان بكار نەئینن، دهۆك نەشێت هەڤركییا ناسناڤی بكەن و ب تمامی دێ دوور كەڤیت.

ئیحسان حەسەن

د جیهانا فوتبۆلا سەردەمی دا، ئاراستەیێن زانستی یێن كارگێریێن وەرزشی دوپات دكەن كو كەس نەشێت دیرۆكێ ب چاپینیت، چێدبیت یانەیەك یان تیمەك ب چەنسی ئەنجامێ یاریەكێ ببەت، یان د هەلكەڤتەكا نەئاسایی دەستكەڤتەكێ بدەستخوەڤە بینیت، لێ یانەیێن مەزن و پرۆژێن سەركەڤتی بێ پلان چێنابن، ژبەر كو ئاڤاكرنا هەر دەزگەهەكێ وەرزشی پێدڤی ب پرۆژەیەكێ زانستی یێ درێژخایەن هەیە كو چەندین سالان ڤەكێشیت، ژبەر ڤێ چەندێ ئەوا ئەڤرۆ دوەرزشا مە دا رووددەت و ئەم دبینین، نە تنێ قەیرانا ئەنجامانە، بەلكو نیشانا لاوازیا دیتن و بەرزەبوونا ناسنامەیێ یە، ژبەر كو ئەگەر ئەم ب شێوازەكێ زانستی بەری خوە بدەینە ڕەوشا یانەیێن مە یێن كوردستانێ ب تایبەتی ئەوێن نها پشكدار دخولا ستێرێن ئیراقێ دا، دێ بینین كو مەترسیدارترین دیاردا تەكنیكی یا بەرۆكێن وەرزشا مە گرتی، ئەوژی پشتبەستنا راستەوخوە و زێدەیا یانەیێن مە لسەر یاریزانێن ژدەرڤەی هەرێما كوردستانێ ب رێژەیا 75% ئەگەر پتر ژی نەبیت، ئەڤە ئامارە نیشانا نەبوونا پلاندانانێ یە، ژبەر كو پارەكێ ئێكجار مەزن بۆ ئینانا یاریزانێن دەرڤە دهێنە مەزاختن، داكو ئەنجامێن وەختی بدەستڤە بینن، ددەمەكی دا ئەڤە یاریزانە بێ چ پرۆژێن درێژخایەن دهێن و دچن بێ كو چ مفایێن چێگیر یێن تەكنیكی بدەنە پاشەرۆژا یانەیێن مە، یان گەشەپێدانا ئاستێ گشتی یێ وەرزشا هەرێمێ، سەربۆرا ژی هووسا بۆ مە دیاركریە، كو هەر دەمێ پشتەڤانییا دارایی كێم ببیت ژبەر هەر رەوشەكێ، تیمێن مە یێن ڤەگەریاینە خالا دەستپێكی، ژبەر كو مە ئەو رێژا یاریزانێن خۆمالی نینن كو بشێن دگەل تیمێن مەزن یان خولێن بهێزبەردەوام بن، چونكو هەر یانەیەك یان خولەكا نافخویی تنێ ب قەبارێ مەزاختنا پارەی، یان ئینانا ناڤێن دیار یێن بیانی ناهێتە پیڤان، بەلكو هەلسەنگاندنا راستەقینە لدۆر كارێ وان یێ ئاڤاكرن و پێگەهاندنا یاریزانێ خومالی دیاردبیت، ئەگەر مەزاختنا دارایی یا مەزن نەبیتە ئەگەرێ گەشپێدانا ژێرخانەیا وەرزشی و ئاڤاكرنا تیمان لسەر ئاستێ ژیێن جودا و بەرهەڤكرنا كادرێ راهێنانێ و ئارمانجێن خوە یێن سەرەكی بجهنائینیت، چونكو نەڤیێن نوو ب چەنسی دروست نابن، بەلكو ژ ئەنجامێ كارەكێ ئەكادیمی یێ رێكخستی دهێنە پێش، بەلێ پشت بەستنا تمام لسەر یاریزانێن بیانی ژبۆ تێركرنا حەزا بەروەختا جەماوەری چ جاران یانەیەكا خودان بەرنامە چێ ناكەت، یا من دڤێت بێژم ڤەگەریانا یانەیێن كوردستانێ بۆ رێرەوا وان یا دروست، پێدڤی ب شۆرەشا بریارا دەزگەهێن وەرزشی یێن بلند ل هەرێما كوردستانێ و كارڤەدانێن عاتفی نینن، بەلكو پێدڤی ب جێگیركرنا پرنسیپ و رێسایێن زانستی ییێن كارگێری هەیە، دارشتنا پرۆژیەكێ تەكنیكی یێ روون، دیسان وەبەرهێنانا راستەقینە دبەهرەمەرندێن نافخویی دا، دیسان هەلسەنگاندن و بەردەوامییا كارێ كارگێریێن یانەیان لسەر بنەمایێ بەرهەمێ كاركرنێ بیت، نەك ئەنجامێن وەختی، وی دەمی بتنێ دێ شێن بینە خودان یانە و تیمێن باش كو بشێن هەڤركییێ لسەر ناسناڤان بكەن، نەكو ب تنێ پشكداریێن وەختی و بێ ئارمانج بن.

ئیحسان حەسەن

دجیهانا فوتبۆلێ دا چ تشتەك وەكو ژدەستدانا ئەنجام و خالێن یاریێ دلێ پشتەڤانان نا ئێشینیت، ب تایبەتی دەمێ ئەو یانەیا وان ڤیان لسەر هەی، دناڤا یاریگەها خوەدا دەلیڤەیا سەركەڤتنێ ژ دەست ددەت، ژبەر هەر تیمەكا بڤێت بگەهیتە گۆپیتكا سەفەرازیێ، پێدڤییە مفای ژ ئەرد و جەماوەرێ خوە بینیت، دیارە ژدەستدانا شەش خالان ژسێ یاریێن دەستپێكێ یێن یانەیا دهۆك دخولا ستێرێن ئیراقێ دا، ئەوێن ب وەكهەڤی ب داوی هاتین پتر ژ تێبینەیەكێ تا نها لسەر ئاستێ ئەلهویێن چیا پەیداكرینە، ژبەر كو دەمێ ددوو یاریان دا لسەر ئێك تو چار خالان دناڤ ئەرد و جەماوەرێ خوەدا ژ دەست ددەی، ئەڤە ئاماژەیە كو تیم تووشی فوبیا یاریگەها خوە بوویە، ئەڤرۆكە ل شوونا پشتەڤان هاریكاربن بۆ سەركەڤتنا تیمێ یێن بووینە هۆكارێ گڤاشتنا دەروونی لسەر یاریزانان، ئەڤە ب شكەستنەكا تەكتیكی دناڤ ئەردێ خوەدا دهێتە قەلەم دان، دیسان دەمێ پێنچ گۆل دسێ یاریاندا دهێنە تۆماركرن وێ نیشانددەت كو كێشە بتنێ چەنس نینە، بەلكو هەماهەنگی دناڤبەرا هێلا بەرگێریێ و گۆلپارێزی یا لاۆازە، ئەگەر ئەم وان گوهۆرینێن نە دروست، ژلایێ دەستەكا راهێنانێ ڤە ژبیر نەكەین، دەمێ یاریزانێن خوە یێن هێلا هێرشبەرێ دەردئێخیت و یێن بەرگیرییێ دئینتە دناڤا یاریگەهێ دا، ئەڤە وەدكەت كو دهۆك ب تمامی ڤەگەریێتە دەڤەرا سزایا خوە و ببیتە ئەگەرێ هندێ كو تەپە بەردەوام ددەڤەرا مەترسیێ دا بیت و رێژەیا دروستبوونا شاشیان زێدەببیت، ژبلی نە چێگیربوون لسەر پێكهاتییەكێ سەرەكی ئاریشەیەكا دی یە، داكو دهۆك بشێت سنوورەكی بۆ ژدەستدانا ڤان خالێن زێرین ب دانیت، پێدڤییە راهێنەرێ ئیرانی یەحیا گۆلمحەمەدی ڤان رێكارێن تەكتیكی و دەروونی لبەر چاڤ وەربگریت، یا ئێكی َو سەرەكی فەلسەفا خوە یا پلانا یاریێ ب گوهۆریت، پێدڤییە لسەر كو بێژیتە یاریزانێن خوە پاراستنا تەپێ دناڤا نیڤا یاریگەها هەڤرك دا بكەن داكو گڤاشتنێ لسەر تیما خوە كێم بكەت، هند پشت بەستنێ لسەر تەپێن درێژ و بێ مفا نەكەت، یا دویێ رێكخستنەكا باشتر دهێلا بەرگێریێ دا بكەت ب تایبەت دتەپێن بلند ئەوێن ژلایاڤە دهێن كو ئەو ئەگەرێ سەرەكییێ وان گۆلانە یێن كو لسەر دهۆكێ دهێنە ئۆماركرن، یا سێیێ دڤێت هێزا هێلا پێشییێ ب گوهۆرینێن نە دروست ژ دەست نەدەت داكو رێ نەدەتە تیما هەڤرك كو پتر بهێنە پێش، یا چارێ هەموو بزاڤان بكەت راهێنانێن دەروونی یێن تایبەت ب یاریزانان بكەت، بۆ هندێ نەكەڤنە لبن گڤاشتنێ ب تایبەت دوان یاریاندا یێن كو دناڤا جەماوەرێ خوە یێ مەزن دا دكەن، یا من دڤێت بێژم رەنگە هندەك بێژن كو هێشتا زوویە و دهۆك پێدڤی پتر ب دەمی یە كو لسەر شاشییان راوەستیت، بەلێ ب بوچوونا من ژ دەستدانا شەش خالان ژ سێ یاریان زەنگەكەكا هۆشداریێ یە، دەم هات ئێدی كادرێ راهێنانێ ب خوەدا بچیت و ڤێ ئاریشەیێ بلەز چارەربكەت، داكو تیم ڤەگەریێتە رێرەوا سەركەڤتنان، بەری دەم ب سەر ڤە بچیت و خەونا هەڤركیێ وەكو سەربۆرێن پێشین لسەر ناسناڤێ خۆلێ ژدەست بچیت.

ئیحسان حەسەن

دیارە لڤی وەرزی كارگێریا یانەیا زاخۆ پتر ژ هەر دەمەكی پووتە دایە تیما خوە یا فوتبۆلێ ئەوا پشكدار دخولا ستێرێن ئیراقێ دا، پشتی بازارێ ڤەگوهاستنا یاریزانان ب ئینانا ناڤێن مەزن و بوهایەكێ گران رێزێن خوە پێ موكمكرین، بۆ هندێ پەیامەكێ بدەتە هەموو یانەیێن ئیراقێ كو ئەڤ سالە تنێ بۆ پشكداریێ بەشدار نابیت، بەلكو چاڤێ وێ دێ ل دروستكرنا دیرۆكەكا نوو بیت، ئەوژی برنا ئێكەم ناسناڤێ خولێ، بەلێ ددەستپێكا وەرزی دا بدەستڤەئینانا تنێ سەركەڤتنەكێ ژ سێ یاریان دگەل تیمێن ژخوە كێمتر پرسیارەكا جدی لدەڤ پشتەڤان و حەژێكەر و چاڤدێران پەیدا دكەت، ئەرێ كومكرنا ڤان هەموو ستێران تێرا هندێ هەیە كو ناسناڤێ خولێ بدەستڤە بینن، یان كێشەیەكا تەكتیكی درێڤەبرنا ڤێ تیما مەزندا هەیە؟ ژبەركو پێكهاتییێ زاخۆ لڤی وەرزی ناڤێن هەرە دیار تێدا نە ژوانا گۆلكەرێ وەرزێ بوری شیزۆرد دیمترۆڤ ل هێلا پێشیێ، دیسان هەبوونا هەر ئێك ژ ئاكام هاشم ل بەرگیریێ و مایسترو هارۆن ئەحمەد، عەلی جاسم، شێركو كەریم، ئەمجەد عەتوان و ئورینیوی ل هێلا ناڤین و هێرشبەریێ، ژبلی وان پیشەكارێن نها و یێن وەرزێ بوری یێن كو بەرەڤانییێ ژ درێسێ یانەیێ دكەن، ئەڤ كاروانێ ژ ستێران دڤێت پتر باوەریێ بدەنە تیمێ، بەلێ ئەنجامێن دەستپێكێ هووسا نیشان ددەن كو ئینانا ناڤێن مەزن ب تنێ بەس نینە ئەگەر تە پلانەكا تەكتیكی یا تمام ل پشت نەبیت، دیارە هەتا نها راهێنەرێ فرەنسی لورانت بانید نەشیایە ڤان ستێران دناڤ ئێك پێكهاتییێ بهێز دا بكار بینیت، كێشەیا سەرەكی نەبوونا ناسنامەیا تەكتیكی یا روون بوویە، پێدڤی یە راهێنەر شێوازێ یاریا خوە ب گوهۆریت و بزانیت دێ چەوا مفایی ژ شیانێن ڤان یاریزان بینیت، ب گرێدانا هەر سێ هێلان پێكڤە، نەك ب تنێ پشت بەستنێ لسەر شیانێن كەسوكی بكەت، هەروەسا دەمێ ئەڤ ناڤێن مەزن پێكڤە یاریێ دكەن، پێدڤییە ب روونی ئەركێ هەر یاریزانەكی دیاربیت داكو زاخۆ هەڤسەنگیا دناڤبەرا هێرشبرنێ و بەرگێریێ پەیدابكەت، دیسان دەمێ تەپە ژێ دهێتە ستاندن نەكەڤیتە لبن فشارێدا، ژبەر كو ئەڤ یاریزانە ژ یانەیێن جورو جور هاتینە پێدڤییە ددەمەكێ كورت دا گیانێ یاریا بكۆم دناڤبەرا واندا ئاڤابكەت، چونكو بتنێ ستێر ئەنجامێن یاریان و دەستكەڤتان ئێكلاناكەن، بەلكو تیم ناسناڤان دئینن، ژلایەكێ دیڤە پێدڤییە پشتەڤانێن زاخۆ و كارگێریا یانەیێ و دەستەكا راهێنانێ بزاڤێ بكەن، گڤاشتنا دەروونی و راگەهاندنێ لسەر یاریزانێن خوە كێم بكەن، داكو بشێن ب ئارامی یاریێ بكەن، زێدەباری هندێ خولا ئیراقێ یا درێژە و پێدڤی ب نەفسەكا مەزن و بهێز هەیە، لەوما پێدڤییە زاخۆ بشێت رەفتارێ دگەل هەموو رەوشان بكەت، ب تایبەت یێن گرێدای هنگاڤتن و سزایان داكو ئاستێ خوە ژ دەست نەدەت، یا من دڤێت ل دووماهییێ بێژم مافێ جەماوەرێ زاخۆ ژ هەر دەمەكی پترە چاڤەرێ ئاهەنگا برنا ناسناڤی ببیت، بەلێ پێدڤییە بزانن كو ناڤێن مەزن تنێ ئالایێ هەڤركییێ بلند ناكەن، بەلكو تەكتیكا دروست و خەبات بەردەوام و گیانێ ئێكگرتنێ دێ تیمێ بەرەڤ ئارمانجێ ببەت، ئەڤە ژی كارێ سەرەكییێ دەستەكا راهێنانێ یە.

ئیحسان حەسەن

دبێژن كلیل و نهێنییا سەرەكی یا ب دەستڤەبرنا ناسناڤێن خۆلێن درێژ یێن جیهانا فوتبۆلێ دا، هەبوونا یەدەكێن خودان شیانێن، هەر تیمەكا ئەڤ چەكە د دەست دا بیت، دێ شێت بیتە هەڤركەكا بهێز ژبۆ بدەستڤەبرنا ناسناڤێ خولێ، بەلێ ئەڤە ڕامانا هندێ نینە كو بتنێ ب یەدەكێن باش دێ شێی گەهییە هەمی هیڤی و ئومێدێن خوە، ددەه سالێن بوریدا ئەگەر ئەم خولا ئیراقێ یا مەزنان بكەینە نموونە، یانەیێن پایتەختێ ئیراقێ جەوییە و شورتە و زەورا بەردەوام هەڤركی لسەر ناسناڤێ خولێ دكرن، ژبەركو ژدەما جێبەجێكرنا سیستەمێ پیشەكاریێ، دهەر وەرزەكی دا پێكهاتیێن خوە ب یاریزانێن ئاست بلند و بهێز تمام دكرن، بۆ هندێ دناڤا بازنێ هەڤركییێ دا بمینن، دبەرامبەردا یانەیێن دی دژی ژبەر كێشەیێن دارایی، یان ژی هزرا كارگێریا كلاسیكی یا تنێ بۆ مانێ دخولێدا وپشت بەستن ب كورێن یانەیێ، یان تنێ هەڤركی لسەر ناسناڤێ كوپا ئیراقێ وەكر كو ئارمانجێن وان دبەرتەنك بن، بەلێ دیارە دڤان پێنچ سالێن داویێ دا گورانكاریێن ریشەیی پەیدابوون، گڤاشتنێن راگەهاندنێ و حەزا جەماوەری بوونە پالدەرێن بهێز كو كارگێریێن یانەیێن كوردستانێ ژی بلڤن و گورانكاریێ دپێكهاتیێن خوەدا بكەن، خوونێن نوو یێن خودان شیان بینە دناڤ رێزێن خوەدا و ئەنجامێن باش تۆماربكەن، ئەگەر ئەم بزانین كو یانەیا دهۆك شیا ناسناڤێ خولا یانەیێن گەنداڤی، دیسان كوپا ئیراقێ بدەستڤە بینیت، هەردو یانەیێن زاخۆ و هەولێر وەكو خودانێن رێزبەندیا سێیێ پشكداریا خولا كەنداڤی دبەرژوەندییا خوەدا ئێكلا بكەن، ب دیتنا من دگەل دەستپێكرنا هەڤركیێن گەرا ئێكێ ژ خولا ستێرێن ئیراقێ، یانەیێن كوردستانێ دێ ب شێوازەكێ جودا ژ وەرزێن بوری دەركەڤن، ژ بەركو وان  راهێنەرێن خودان شیان و یارێزانێن ئاست بلند ئیناینە، لسەر كورسیا یەدەكان ژی چارەسەریێن تەكنیكی یێن بهێز هەنە كو دشێن ئەنجامێن یاریان ددەمێن ئالۆز دا بگوهۆرن، بەلێ پرسیارا گرنگ ئەوە ئەرێ یەدەكێن باش بتنێ دێ تیما تە ڤیان لسەر هەی بەرب ناسناڤان بەت، ئەز دبێژم نەخێر، ژبەر كو دخولەكا درێژدا گەشتێن دوور دناڤبەرا پارێزگەهان دا هەنە، ئەو تیم دێ ب سەركەڤیت یا بشێت ئاستێ شیانێن جەستەیی یێن یاریزانێن خوە پارێزیت و خوە دوور بێخیت ژ هنگاڤتنێن دژوار، یا دیتر راهێنەرێن تیمێ بشێن ب كومكرنا ژمارەیا زوور یا ستێران كۆنترۆلا گیانێ تیمێ و رێگریێ ل ئاریشەیێن دەرۆنی و یاریزانێن یەدەك بكەت، دیسان بشێن هەر زوو پشتی هەردۆراندنەكەكێ یان وەكهەڤییەكێ ڤەگەریێنە سەركەڤتنان، ژبلی هندێ ساقامگیریا دارایی و پشتەڤانییا كارگێریێ یۆ تیمێ ژ هەموو لایان ڤە هەبیت، بزانیت دێ چەوا رەفتارێ دگەل وان یاریان كەت یێن كو ژدەرڤەی یاریگەها خوە ئەنجامددەت وخالان ژدەست نەدەت، یامن دڤێت بێژم كو بدەستڤەبرنا ناسناڤێ خولێ مافێ هەر تیمەكا پشكدارە، بەلێ تنێ ئەو تیم دێ گەهیتە گۆپیتكا سەرفەرازیێ یا كو ژبلی یەدەكێن بهێز خودان نەفسەكا درێژ بیت، ئەڤان خالێن سەری  ب گرنگی وەربگریت، ب هیڤیا هندێ یانەیێن مە یین كوردستانێ ببنە هەڤركێن راستەقینە لسەر ناسناڤێ خولا ڤی وەرزی و ئەم ئێك ژوان ل پودیوما خەلاتكرنێ بینین.

ئیحسان حەسەن

ئەڤرۆ 16 تەباخێ یە، مللەتێ كورد و لایەنگرێن رێبازا بارزانییێ نەمر دێ سالیادا بورینا 80 سالان لسەر دامەزراندنا پارتی دیموكراتی كوردستانێ پیرۆز كەن، د ڤێ مێژوویا پر سەروەری دا، پارتی ب تنێ حزبەكا سیاسی یا چەكداری نەبوویە ژبۆ داكوكیكرنێ ژ مافێن مللەتێ كورد، بەلكو هەردەم هزر د ئاڤاكرنا تەخ و تویژن جودا یێن جڤاكی دا كرییە، د ناڤا ڤان تەخان دا سەكتەرێ وەرزشی و گەنجان  بوویە كو هەردەم د پێشەنكا كار و بەرنامەیێن پارتی دا بوویە، هەر ب گەرماتییا شورەشێ تا ئەڤرۆ خوە ل وەرزشێ كریە خودان و بدیتنەكا كوور بەرێ خوە دایە وەرزشێ وەكو لایەنەكێ گرنكێ ژیانێ كو ئارمانجا وێ یا سەرەكی خزمەتكرن و پەروەردەكرنا لاوانە، پەیاما دیرۆكی یا جەنابێ سەرۆك مەسعوود بارزانی دەمێ دبێژیت (رۆلێ وەرزشێ ژ هیچ لایەنەكێ سیاسی كێمتر نینە بۆ ناسناندنا مللەتێ كورد ل جیهانێ) نیشانا تێگەهشتنا كوور و ئاست بەرزە بۆ رۆل و سەنگا وەرزشێ د جیهانا ئەڤرۆدا، ب دیتنا سەرۆكی دا وەرزش ب تنێ یاری یان دەم بوراندن نینە، بەلكو هێزەكا نەرم و هۆكارەكێ كارا یێ دیبلۆماسییەتێ یە كو دشێت سنوران ببریت و دەنگ و روخسارێ شارستانی یێ مللەتێ كورد ب گەهینتە مەیدانێن دەولەتی، دەمێ ئالایێ كوردستانێ د قارەمانیێن جیهانی دا ب رێكا وەرزشڤانان دهێتە  بلندكرن، كاریگەریا وێ ب دەهان كومبوونێن سیاسی گرنكترە، سەرۆك بارزانی بڤێ ئاخڤتنێ وەرزشڤان كرینە بالیۆزێن راستەقینە یێن دۆزا رەوایا مللەتێ كورد د ناڤ گوكەلگەهێ نێفدەولەتی دا، ئەڤ دیتنا مەزن یا سەرۆكی، بوویە نەخشەرێیەكا كرداری بۆ هەموو بەرپرسێن پارتی یێن كو كار د ناڤا حكومرانییا كوردستانێ دكەن ب تایبەتی رۆلێ بەرچاڤێ بەرێزان نێجیرڤان بارزانی سەرۆكێ هەرێما كوردستانێ و مەسرور بارزانی سەرۆكێ حكومەتا هەرێما كوردستانێ دهێتە پێش، كو ب بەردەوامی و دهەمی قووناغان دا پشتەڤانێن راستەقینە یێن یانە و ئێكەتیێن وەرزشی و وەرزشڤانان بووینە، پشتەڤانییا وان یا بەردەوام و بەرهەڤكرنا هەر تشتەكێ پێدڤی بۆ سەركەڤتنا كاروانێ تیمێن كوردستانێ ژبۆ پشكداریێ دخول و قارەمانیێن نافخۆ و دەرڤەدا بەلگەیێ ڤێ چەندێ نە، ژبلی پشتەڤانییا وان یا بەردەوام  بۆ ئاڤاكرنا ژێرخانەیا وەرزشی ژ یاریگەه و هۆلێن دەولەتی، دیسان  پشتەڤانییا وان برێكا هەردو رێكخراوێن ئێكەتیا قوتابی ولاوێن كوردستانێ و ئێكەتیا ئافرەتێن كوردستانێ ب دروستكرنا ب دەهان یاریگەهان بۆ باژێر و گوندێن كوردستانێ، ژبلی دابینكرن و بەلاڤكرنا كەل و پەلێن وەرزشی ل سەر هزاران ژ تیمێن مللی بێ جوداهی، بەلگەیەكێ دی یێ پشتەڤانییا سەركردێن پارتی یە بۆ بزاڤا وەرزشی، ژبەر هندێ ژی  چ جاران رێگری ل حەزێن گەنجان نەكریە، د هەموو كاودانان دا پالپشتی لێكریە، ژبەر كو باش دزانیت وەرزش چییە و ئارمانجێن وەرزشێ چ نە، وەرزش هۆكارەكە بۆ دوورئێخستنا لاوان ژ مەترسی و دیاردێن زیان بەخش، دیسان بۆ ئاڤاكرنا ئەندروستییا جەستەیی و وهزری یا جڤاكی، هەروەسا بۆ چاندنا گیانێ هەڤركییا ساخلەم و كوردپەروەریێ د دلێ نەڤێن نوو دا، ژبەر كو ب باوەریا پارتی وەرزش سەكتەرەكێ پیرۆز و پاقژە، هەردەم دگەل هەموو كاودانان دا دەرگەه ڤەكری هێلایە داكو وەرزشڤانێن كوردستانێ بەردەوام هەڤركییان دگەل تیمێن ئیراقێ بكەن، داكو پتر شارەزاهییێ وەرگرن و ئاستێ خوە پتر پێشبێخن بۆ هندێ پاشەرۆژەكا باشتر هەبیت و ناڤێ خوە و ولات و مللەتێ خوە بلند بكەن، لەوما ژبەر ڤێ پووتەدانێ  بەرهەمەكێ زێرین هەبوویە، ئەڤرۆ وەرزشڤانێن كوردستانێ شانازیێ پێ دبن، ئەنجامێن دیرۆكی یێ یانە و وەرزشڤانێن كوردستانێ لسەر ئاستێ نافخویێ و دەرڤە دا،  بدەستڤە ئینانا مەدالیێن رەنگین دقارەمانیێن دەولەتی و ئۆلمپی دا ب یاریێن جودا وەكو فوتبۆلێ، باسكێت بۆلێ، ڤۆلی بۆلێ ،تێنسا ئەردی و مێزێ، یاریێن جەنگی، شەترەنج و پایسكلان لسەر ئاستێ كوڕان وكچان، دیسان خەلاتكرنا وان ژلایێ سەركردایەتییا پارتی ڤە بەرهەمێ ڤێ پشتەڤانییا بەردەوامە، دیارە خزمەتكرنا وەرزشێ لدەڤ پارتی دیموكراتی كوردستان، تنێ دروشمەكێ راگەهاندنێ نەبوویە، بەلكو بەشەك بوویە ژ ئادیۆلۆژیا ئاڤاكرنا مرۆڤێ كورد، ژبەر هندێ د سالیادا 80 یێ یا دامەزراندنا پارتی دا، وەرزشڤانێن كوردستانێ ب رێز و پێزانین ڤە بەرێ خوە ددەنە ڤێ مێژوویا پر ژ پشتەڤانیێ، ئەڤرۆ وەرزشا كوردستانێ ژ سیبەرا ڤێ رێبازێ دا گەهشتیە ئاستەكێ هووسا كو نە بتنێ ل سەر ئاستێ ناوچەیێ، بەلكو د مەیدانێن جیهانی دا ژی ئالایێ كوردستانێ یێ بلند دبیت و بەردەوام بیت  ب جهئینانا پەیاما سەرۆكێ كوردان، دا كو وەرزش بالیۆزێ راستەقینەبیت بۆ مللەتێ كورد.